ವಿಂಬಲ್ಡನ್ನಲ್ಲಿ ಪುರುಷರ ಸಿಂಗಲ್ಸ್ನ ಹಾಲಿ ಚಾಂಪಿಯನ್ ಆಲ್ಕರಜ್ 4ನೇ ಸುತ್ತಿಗೆ ಪ್ರವೇಶ, ಮಹಿಳಾ ಸಿಂಗಲ್ಸ್ನ ಹಾಲಿ ಚಾಂಪಿಯನ್ ಕ್ರೇಜಿಕೋವಾ 3ನೇ ಸುತ್ತಿನಲ್ಲೇ ಸೋತು ನಿರ್ಗಮನ. ಸಿನ್ನರ್, ಸಬಲೆಂಕಾ ಮತ್ತು ಸ್ವಿಯಾಟೆಕ್ 4ನೇ ಸುತ್ತಿಗೆ ಲಗ್ಗೆ.
ಲಂಡನ್: ವಿಂಬಲ್ಡನ್ ಗ್ರ್ಯಾನ್ ಸ್ಲಾಂ ಟೆನಿಸ್ ಟೂರ್ನಿಯಲ್ಲಿ ಪುರುಷರ ಸಿಂಗಲ್ಸ್ನ ಹಾಲಿ ಚಾಂಪಿಯನ್ ಕಾರ್ಲೋಸ್ ಆಲ್ಕರಜ್ 4ನೇ ಸುತ್ತಿಗೆ ಪ್ರವೇಶಿಸಿದರೆ, ಮಹಿಳಾ ಸಿಂಗಲ್ಸ್ನ ಹಾಲಿ ಚಾಂಪಿಯನ್ ಬಾರ್ಬೊರಾ ಕ್ರೇಜಿಕೋವಾ 3ನೇ ಸುತ್ತಿನಲ್ಲೇ ಸೋತು ಹೊರಬಿದ್ದಿದ್ದಾರೆ.
ಪುರುಷರ ಸಿಂಗಲ್ಸ್ನ 3ನೇ ಸುತ್ತಿನ ಪಂದ್ಯದಲ್ಲಿ ಸ್ಪೇನ್ನ ಆಲ್ಕರಜ್, ಜರ್ಮನಿಯ ಶ್ರೇಯಾಂಕ ರಹಿತ ಆಟಗಾರ ಜಾನ್ ಲೆನ್ನಾರ್ಡ್ ಸ್ಟ್ರಫ್ ವಿರುದ್ಧ 6-1, 3-6, 6-3, 6-4 ಸೆಟ್ಗಳಲ್ಲಿ ಗೆಲುವು ಸಾಧಿಸಿ ಮುನ್ನಡೆದರು. ಮಹಿಳಾ ಸಿಂಗಲ್ಸ್ 3ನೇ ಸುತ್ತಿನಲ್ಲಿ ಕ್ರೇಜಿಕೋವಾ, ಅಮೆರಿಕದ ಎಮ್ಮಾ ನವಾರೊ ವಿರುದ್ಧ 6-2, 3-6, 4-6 ಸೆಟ್ಗಳಲ್ಲಿ ಸೋತು ಹೊರಬಿದ್ದರು.
ಇನ್ನು, ವಿಶ್ವ ನಂ.1 ಟೆನಿಸಿಗರಾದ ಯಾನ್ನಿಕ್ ಸಿನ್ನರ್ ಹಾಗೂ ಅರೈನಾ ಸಬಲೆಂಕಾ ಸಹ 4ನೇ ಸುತ್ತಿಗೆ ಪ್ರವೇಶಿಸಿದ್ದಾರೆ. ಸ್ಪೇನ್ನ ಮಾರ್ಟಿನೆಜ್ ವಿರುದ್ಧ ಸಿನ್ನರ್ 6-1, 6-3, 6-1 ಸೆಟ್ಗಳಲ್ಲಿ ಗೆದ್ದರೆ, ಸಬಲೆಂಕಾ, ಬ್ರಿಟನ್ನ ತಾರಾ ಆಟಗಾರ್ತಿ ಹಾಗೂ ಮಾಜಿ ಚಾಂಪಿಯನ್ ಎಮ್ಮಾ ರಾಡುಕಾನು ವಿರುದ್ಧ 7-6(6), 6-4 ಸೆಟ್ಗಳಲ್ಲಿ ಸುಲಭ ಗೆಲುವು ಸಾಧಿಸಿದರು. ಮಾಜಿ ನಂ.1 ಇಗಾ ಸ್ವಿಯಾಟೆಕ್ ಸಹ 4ನೇ ಸುತ್ತಿಗೇರಿದರು.
Related Articles
ಕೆನಡಾ ಓಪನ್: ಸೆಮಿಗೆ ಭಾರತದ ಶ್ರೀಕಾಂತ್ ಲಗ್ಗೆ
ಕಾಲ್ಗರಿ: ಭಾರತದ ಕಿದಂಬಿ ಶ್ರೀಕಾಂತ್ ಇಲ್ಲಿ ನಡೆಯುತ್ತಿರುವ ಕೆನಡಾ ಓಪನ್ ಬ್ಯಾಡ್ಮಿಂಟನ್ ಟೂರ್ನಿಯಲ್ಲಿ ತಮ್ಮ ಅಮೋಘ ಪ್ರದರ್ಶನವನ್ನು ಮುಂದುವರಿಸಿದ್ದು, ಪುರುಷರ ಸಿಂಗಲ್ಸ್ನ ಸೆಮಿಫೈನಲ್ ಪ್ರವೇಶಿಸಿದ್ದಾರೆ. ಕ್ವಾರ್ಟರ್ ಫೈನಲ್ನಲ್ಲಿ ಅಗ್ರ ಶ್ರೇಯಾಂಕಿತ ಚೈನೀಸ್ ತೈಪೆಯ ಚೌ ಟಿಯನ್ ಚೆನ್ ವಿರುದ್ಧ 21-18, 21-9 ಗೇಮ್ಗಳಲ್ಲಿ ಸುಲಭ ಗೆಲುವು ಸಾಧಿಸಿದರು. ಶ್ರೀಕಾಂತ್ಗೆ ಸಮೀಸ್ನಲ್ಲಿ ಜಪಾನ್ನ ಕೆಂಟೊ ನಿಶಿಮೊಟೊ ಎದುರಾಗಲಿದ್ದಾರೆ. ಮತ್ತೊಂದು ಕ್ವಾರ್ಟರ್ ಫೈನಲ್ನಲ್ಲಿ ಶಂಕರ್ ಸುಬ್ರಮಣಿಯನ್ 15-21, 21-5, 17-21ರಲ್ಲಿ ನಿಶಿಮೊಟೊ ವಿರುದ್ಧ ಸೋತರು. ಮಹಿಳಾ ಸಿಂಗಲ್ಸ್ ಕ್ವಾರ್ಟರ್ನಲ್ಲಿ ಶ್ರಿಯಾನ್ಶಿ ವಲಿಶೆಟ್ಟಿ ಡೆನ್ಮಾರ್ಕ್ನ ಅಮಾಲಿ ಸಲ್ಕ್ಜ್ ವಿರುದ್ಧ ಪರಾಭವಗೊಂಡರು.
ಎಎಫ್ಸಿ ಏಷ್ಯನ್ ಕಪ್ ಫೈನಲ್ಸ್ಗೆ ಭಾರತ ಮಹಿಳಾ ತಂಡ ಪ್ರವೇಶ
ಚಿಯಾಂಗ್ ಮೈ (ಥಾಯ್ಲೆಂಡ್): ಭಾರತ ಮಹಿಳಾ ಫುಟ್ಬಾಲ್ ತಂಡ 2026ರ ಎಎಫ್ಸಿ ಏಷ್ಯನ್ ಕಪ್ ಫೈನಲ್ಸ್ ಟೂರ್ನಿಗೆ ಅರ್ಹತೆ ಪಡೆದಿದೆ. ಅರ್ಹತಾ ಟೂರ್ನಿಯ ಅಂತಿಮ ಪಂದ್ಯದಲ್ಲಿ ಶನಿವಾರ ಥಾಯ್ಲೆಂಡ್ ವಿರುದ್ಧ ಭಾರತ 2-1 ಗೋಲುಗಳ ಗೆಲುವು ಸಾಧಿಸಿತು. ಇದರೊಂದಿಗೆ ಆಡಿದ ನಾಲ್ಕೂ ಪಂದ್ಯಗಳಲ್ಲಿ ಗೆದ್ದು ಗುಂಪಿನಲ್ಲಿ ಮೊದಲ ಸ್ಥಾನ ಪಡೆಯಿತು. ಅರ್ಹತಾ ಟೂರ್ನಿಯ ಮುಖಾಂತರ ಭಾರತ ಏಷ್ಯನ್ ಕಪ್ ಫೈನಲ್ಸ್ಗೇರಿದ್ದ ಇದೇ ಮೊದಲು. ಟೂರ್ನಿಯ ಆಸ್ಟ್ರೇಲಿಯಾದಲ್ಲಿ ನಡೆಯಲಿದೆ.
