ಭಾರತ ವಿರುದ್ಧ 2 ಪಂದ್ಯಗಳನ್ನು ಗೆದ್ದರೆ ಶ್ರೀಲಂಕಾದ ಅಂಕ ಒಟ್ಟು 90ಕ್ಕೇರಲಿದೆ. ಐರ್ಲೆಂಡ್ ವಿರುದ್ಧ ಒಂದು ಹಾಗೂ ಇಂಗ್ಲೆಂಡ್ ವಿರುದ್ಧದ ಎಲ್ಲಾ 5 ಏಕದಿನ ಪಂದ್ಯಗಳನ್ನು ಗೆದ್ದರೂ ವೆಸ್ಟ್'ಇಂಡೀಸ್ ಗಳಿಸಲು ಸಾಧ್ಯವಿರುವುದು ಕೇವಲ 88 ಅಂಕಗಳನ್ನು ಮಾತ್ರ.
ಕೊಲಂಬೊ(ಆ.19): ಭಾರತ ವಿರುದ್ಧ ಟೆಸ್ಟ್ ಸರಣಿಯಲ್ಲಿ ವೈಟ್'ವಾಶ್ ಮುಖಭಂಗ ಅನುಭವಿಸಿದ ಶ್ರೀಲಂಕಾ, ಇದೀಗ ಏಕದಿನ ಸರಣಿಗೂ ಭಾರೀ ಒತ್ತಡದೊಂದಿಗೇ ಕಣಕ್ಕಿಳಿಯುತ್ತಿದೆ.
2019ರ ಐಸಿಸಿ ಏಕದಿನ ವಿಶ್ವಕಪ್'ಗೆ ನೇರ ಅರ್ಹತೆ ಪಡೆಯಬೇಕಿದ್ದರೆ, ಮಾಜಿ ವಿಶ್ವ ಚಾಂಪಿಯನ್ ಶ್ರೀಲಂಕಾ ತಂಡವು ಟೀಂ ಇಂಡಿಯಾ ಎದುರಿನ 5 ಪಂದ್ಯಗಳಸರಣಿಯಲ್ಲಿ ಕನಿಷ್ಠ ಎರಡರಲ್ಲಾದರೂ ಜಯ ಸಾಧಿಸಬೇಕಿದೆ. ನೇರ ಅರ್ಹತೆ ಪಡೆಯಲು ಸೆ.30 ಕೊನೆ ದಿನಾಂಕವಾಗಿದ್ದು, ಶ್ರೀಲಂಕಾ 88 ಅಂಕಗಳೊಂದಿಗೆ 8ನೇ ಸ್ಥಾನದಲ್ಲಿದೆ. ಇನ್ನು ವೆಸ್ಟ್ ಇಂಡೀಸ್'ಗಿಂತ ಲಂಕಾ 10 ಅಂಕಗಳಿಂದ ಮುಂದಿದೆ. ಆತಿಥೇಯ ರಾಷ್ಟ್ರ ಇಂಗ್ಲೆಂಡ್ ಜತೆ ಶ್ರೇಯಾಂಕ ಪಟ್ಟಿಯಲ್ಲಿ ಅಗ್ರ 7 ಸ್ಥಾನ ಹೊಂದಿರುವ ತಂಡಗಳು ವಿಶ್ವಕಪ್'ಗೆ ನೇರ ಪ್ರವೇಶ ಪಡೆಯಲಿವೆ.
ಹಾಗೆಯೇ ಶ್ರೇಯಾಂಕ ಪಟ್ಟಿಯಲ್ಲಿ ಕೊನೆ 4 ಸ್ಥಾನ ಪಡೆದಿರುವ ತಂಡಗಳು, ಐಸಿಸಿ ವಿಶ್ವ ಕ್ರಿಕೆಟ್ ಲೀಗ್ ಚಾಂಪಿಯನ್'ಶಿಪ್'ನ 4 ತಂಡಗಳು ಹಾಗೂ ಐಸಿಸಿ ವಿಶ್ವ ಕ್ರಿಕೆಟ್ ಲೀಗ್'ನ 2 ತಂಡಗಳು ಅರ್ಹತಾ ಸುತ್ತಿನಲ್ಲಿ ಸೆಣಸಾಡಲಿವೆ. ಇಲ್ಲಿ ಅಗ್ರ 2 ಸ್ಥಾನ ಪಡೆಯುವ ತಂಡಗಳು 2019ರ ವಿಶ್ವಕಪ್'ಗೆ ಅರ್ಹತೆ ಪಡೆಯಲಿವೆ.
ಶ್ರೀಲಂಕಾ ವಿಶ್ವ ಕಪ್ ನೇರ ಪ್ರವೇಶ ಪಡೆಯಲು ಏನು ಮಾಡಬೇಕು..?
ಭಾರತ ವಿರುದ್ಧ 2 ಪಂದ್ಯಗಳನ್ನು ಗೆದ್ದರೆ ಶ್ರೀಲಂಕಾದ ಅಂಕ ಒಟ್ಟು 90ಕ್ಕೇರಲಿದೆ. ಐರ್ಲೆಂಡ್ ವಿರುದ್ಧ ಒಂದು ಹಾಗೂ ಇಂಗ್ಲೆಂಡ್ ವಿರುದ್ಧದ ಎಲ್ಲಾ 5 ಏಕದಿನ ಪಂದ್ಯಗಳನ್ನು ಗೆದ್ದರೂ ವೆಸ್ಟ್'ಇಂಡೀಸ್ ಗಳಿಸಲು ಸಾಧ್ಯವಿರುವುದು ಕೇವಲ 88 ಅಂಕಗಳನ್ನು ಮಾತ್ರ. ಒಂದೊಮ್ಮೆ ಭಾರತ ವಿರುದ್ಧ 1-4ರಿಂದ ಸರಣಿ ಸೋತರೆ,ಲಂಕಾದ ಅಂಕ 88 ಆಗಲಿದೆ. ವೆಸ್ಟ್ಇಂಡೀಸ್ ತಾನಾಡುವ ಎಲ್ಲಾ 6 ಪಂದ್ಯಗಳಲ್ಲೂ ಗೆದ್ದರೆ, ಲಂಕಾ ಹಿಂದಿಕ್ಕಿ ತಾನು ನೇರ ಪ್ರವೇಶ ಪಡೆಯುವ ಅವಕಾಶ ಗಿಟ್ಟಿಸಲಿದೆ. ಐರ್ಲೆಂಡ್ ವಿರುದ್ಧ ವಿಂಡೀಸ್ ಸೋಲುಂಡರೆ, ನೇರ ಅರ್ಹತೆ ಪಡೆಯುವ ಅವಕಾಶವನ್ನು ಕೈಚೆಲ್ಲಲಿದ್ದು, ಭಾರತ ವಿರುದ್ಧ 0-5ರಲ್ಲಿ ಸರಣಿ ಸೋತರೂ ಶ್ರೀಲಂಕಾ ತಂಡವೇ ವಿಶ್ವಕಪ್ಗೆ ಪ್ರವೇಶ ಪಡೆಯಲಿದೆ.
