ಪ್ರೊ ಕುಸ್ತಿ ಹರಾಜು: ಭಜರಂಗ್, ವಿನೇಶ್’ಗೆ ಬಂಪರ್
ಹರಾಜಿನಲ್ಲಿ 2018ರ ಕಾಮನ್‌ವೆಲ್ತ್ ಮತ್ತು ಏಷ್ಯನ್ ಗೇಮ್ಸ್ ಚಿನ್ನ ವಿಜೇತ ಭಜರಂಗ್ ಪೂನಿಯಾ ₹30 ಲಕ್ಷಕ್ಕೆ ಪಂಜಾಬ್ ರಾಯಲ್ಸ್ ಪಾಲಾದರೆ, ಮಹಿಳಾ ವಿಭಾಗದಲ್ಲಿ ಏಷ್ಯನ್ ಗೇಮ್ಸ್ ಚಿನ್ನ ವಿಜೇತೆ ವಿನೇಶ್ ಪೊಗಾಟ್ ₹25 ಲಕ್ಷಕ್ಕೆ ಮುಂಬೈ ಮಹರಾಠಿ ತಂಡ ಸೇರಿದರು.
ಗುರುಗ್ರಾಮ(ಜ.05): ಜ.14ರಿಂದ ಆರಂಭವಾಗಲಿರುವ ಪ್ರೊ ಕುಸ್ತಿ ಲೀಗ್ 4ನೇ ಆವೃತ್ತಿಗೆ ಶುಕ್ರವಾರ ಕುಸ್ತಿಪಟುಗಳ ಹರಾಜು ಪ್ರಕ್ರಿಯೆ ಭರ್ಜರಿಯಾಗಿಯೇ ನಡೆಯಿತು.
ಹರಾಜಿನಲ್ಲಿ 2018ರ ಕಾಮನ್‌ವೆಲ್ತ್ ಮತ್ತು ಏಷ್ಯನ್ ಗೇಮ್ಸ್ ಚಿನ್ನ ವಿಜೇತ ಭಜರಂಗ್ ಪೂನಿಯಾ ₹30 ಲಕ್ಷಕ್ಕೆ ಪಂಜಾಬ್ ರಾಯಲ್ಸ್ ಪಾಲಾದರೆ, ಮಹಿಳಾ ವಿಭಾಗದಲ್ಲಿ ಏಷ್ಯನ್ ಗೇಮ್ಸ್ ಚಿನ್ನ ವಿಜೇತೆ ವಿನೇಶ್ ಪೊಗಾಟ್ ₹25 ಲಕ್ಷಕ್ಕೆ ಮುಂಬೈ ಮಹರಾಠಿ ತಂಡ ಸೇರಿದರು. ಸಾಕ್ಷಿ ಮಲಿಕ್, ಡೆಲ್ಲಿ ಸುಲ್ತಾನ್ಸ್‌ಗೆ ₹20 ಲಕ್ಷಕ್ಕೆ ಬಿಕರಿಯಾಗಿದ್ದಾರೆ. ವಿದೇಶಿ ಕುಸ್ತಿಪಟುಗಳಾದ ಬೆಲಾರಸ್‌ನ ವೆನೆಸಾ ಕಲಾಜಿನ್ಸ್ ಯುಪಿ ದಂಗಲ್ ಸೇರಿದರೆ, ರಷ್ಯಾದ ಖೇತಿಕ್ ₹25 ಲಕ್ಷಕ್ಕೆ ಡೆಲ್ಲಿ ಸುಲ್ತಾನ್ಸ್ ತಂಡಕ್ಕೆ ಬಿಕರಿಯಾದರು. ಹರಾಜಿನಲ್ಲಿ ಒಟ್ಟು 225 ಕುಸ್ತಿಪಟುಗಳು ಪಾಲ್ಗೊಂಡಿದ್ದರು. ಅದರಲ್ಲಿ 6 ಫ್ರಾಂಚೈಸಿಗಳು 54 ಕುಸ್ತಿಪಟುಗಳನ್ನು ಖರೀದಿಸಿದವು. ಯೋಧಾ, ಲೀಗ್‌ನ ಹೊಸ ತಂಡವಾಗಿದೆ.
ನಾಲ್ಕನೇ ಆವೃತ್ತಿಯ ಪ್ರೊ ರೆಸ್ಲಿಂಗ್ ಲೀಗ್ ಟೂರ್ನಿಯು ಜನವರಿ 14ರಿಂದ 31ರವರೆಗೆ ನಡೆಯಲಿದ್ದು, ಚಾಂಪಿಯನ್ ತಂಡವು 1.9 ಕೋಟಿ ಹಾಗೂ ರನ್ನರ್ ಅಪ್ ತಂಡವು 1.1 ಕೋಟಿ ರುಪಾಯಿ ಜೇಬಿಗಿಳಿಸಿಕೊಳ್ಳಲಿದೆ.
