ಮಹಿಳೆಯರ ಸಿಂಗಲ್ಸ್ ವಿಭಾಗದಲ್ಲಿ ಚೆನ್ನೈನ ಸ್ಟಾರ್ ಆಟಗಾರ್ತಿ ಪಿ.ವಿ. ಸಿಂಧು 11-4, 11-6 ಗೇಮ್‌'ಗಳಿಂದ ಅವಧ್ ವಾರಿಯರ್ಸ್‌ನ ರಿತುಪರ್ಣ ದಾಸ್ ಎದುರು ಗೆಲುವು ದಾಖಲಿಸಿದರು.
ಬೆಂಗಳೂರು(ಜ.11): ಭಾರತದ ಅನುಭವಿ ಆಟಗಾರ ಪರುಪಳ್ಳಿ ಕಶ್ಯಪ್ ಅವರ ಮನೋಜ್ಞ ಆಟದ ನೆರವಿನಿಂದ ಚೆನ್ನೈ ಸ್ಮಾಶರ್ಸ್ ತಂಡ, 2ನೇ ಆವೃತ್ತಿಯ ಪ್ರೀಮಿಯರ್ ಬ್ಯಾಡ್ಮಿಂಟನ್ ಲೀಗ್'ನಲ್ಲಿ 4-1 ಅಂಕಗಳಿಂದ ಅವಧ್ ವಾರಿಯರ್ಸ್ ತಂಡದ ಎದುರು ಮುನ್ನಡೆ ಸಾಧಿಸಿದೆ. ಇದರೊಂದಿಗೆ ಸೆಮಿಫೈನಲ್ ಹಂತವನ್ನು ಮತ್ತಷ್ಟು ಭದ್ರಗೊಳಿಸಿಕೊಂಡಿದೆ.
ಇಲ್ಲಿನ ಕೋರಮಂಗಲದ ಒಳಾಂಗಣ ಕ್ರೀಡಾಂಗಣದಲ್ಲಿ ನಡೆದ ಪುರುಷರ ಸಿಂಗಲ್ಸ್ ವಿಭಾಗದ ಪಂದ್ಯದಲ್ಲಿ ಚೆನ್ನೈನ ಪರುಪಳ್ಳಿ ಕಶ್ಯಪ್ 11-7, 5-11, 11-7 ಗೇಮ್'ಗಳಿಂದ ಅವಧ್ ವಾರಿಯರ್ಸ್ನ ಆದಿತ್ಯ ಜೋಷಿ ಎದುರು ಗೆಲುವು ಸಾಧಿಸಿದರು. ಇಂದು ಟ್ರಂಪ್ (ಅತ್ಯಂತ ಮಹತ್ವನೀಯ) ಪಂದ್ಯವಾಗಿದ್ದರಿಂದ ಚೆನ್ನೈ ತಂಡ ಈ ಗೆಲುವಿನೊಂದಿಗೆ 2 ಅಂಕಗಳನ್ನು ಪಡೆದು ಮುನ್ನಡೆ ಸಾಧಿಸಿದೆ.
ಮಹಿಳೆಯರ ಸಿಂಗಲ್ಸ್ ವಿಭಾಗದಲ್ಲಿ ಚೆನ್ನೈನ ಸ್ಟಾರ್ ಆಟಗಾರ್ತಿ ಪಿ.ವಿ. ಸಿಂಧು 11-4, 11-6 ಗೇಮ್'ಗಳಿಂದ ಅವಧ್ ವಾರಿಯರ್ಸ್ನ ರಿತುಪರ್ಣ ದಾಸ್ ಎದುರು ಗೆಲುವು ದಾಖಲಿಸಿದರು. ಈ ಗೆಲುವಿನೊಂದಿಗೆ ಚೆನ್ನೈ ತಂಡ ಉತ್ತಮ ಮುನ್ನಡೆ ಕಾಯ್ದುಕೊಂಡಿತು. ಯಾವ ಹಂತದಲ್ಲೂ ಸಿಂಧು ಅವರಿಗೆ ಸರಿಸಾಟಿಯಲ್ಲದ ಅವಧ್ ತಂಡದ ರಿತುಪರ್ಣ ಪ್ರಭಾವಿ ಆಟವಾಡುವಲ್ಲಿ ವಿಫಲರಾದರು. ಹೀಗಾಗಿ ರಿಯೊ ಒಲಿಂಪಿಕ್ಸ್ ಕೂಟದ ರಜತ ಪದಕ ವಿಜೇತೆ ಸಿಂಧು, ಸಿಂಗಲ್ಸ್ನಲ್ಲಿ ಸುಲಭ ಗೆಲುವು ದಾಖಲಿಸಿದರು. ಕೇವಲ 2 ಸೆಟ್'ಗಳ ಆಟದಲ್ಲಿ ಸಿಂಧು ಕ್ರಮವಾಗಿ 7 ಮತ್ತು 5 ಪಾಯಿಂಟ್ಸ್ಗಳ ಅಂತರ ಕಾಯ್ದುಕೊಂಡು ಪಂದ್ಯ ಜಯಿಸಿದರು.
ಸೈನಾ ಗೈರು: ಅವಧ್ ವಾರಿಯರ್ಸ್'ನ ಸ್ಟಾರ್ ಆಟಗಾರ್ತಿ ಸೈನಾ ನೆಹ್ವಾಲ್, ಚೆನ್ನೈ ಸ್ಮಾಶರ್ಸ್ ಎದುರಿನ ಪಂದ್ಯದಲ್ಲಿ ಕಾಣಿಸಿಕೊಂಡಿಲ್ಲ. ಸೈನಾ ಗೈರು ಹಾಜರಿ ಪಂದ್ಯದುದ್ದಕ್ಕೂ ಎದ್ದುಕಂಡಿತು. ಆರಂಭದಲ್ಲಿ ಮುನ್ನಡೆ ಸಾಧಿಸಿದ್ದ ವಾರಿಯರ್ಸ್ ಕ್ರಮೇಣ ಎದುರಾದ ಸೋಲುಗಳಿಂದ ಜರ್ಜರಿತಗೊಂಡಿತು.
