ಕೋಲ್ಕತಾ(ಸೆ.30): ಐವತ್ತರ ಗಡಿಯನ್ನೂ ದಾಟದೆ ಪ್ರಮುಖ ಮೂರು ವಿಕೆಟ್‌ಗಳನ್ನು ಕಳೆದುಕೊಂಡು ಚಡಪಡಿಸುತ್ತಿದ್ದ ಸಮಯವದು. ಕೇವಲ 46 ರನ್‌ಗಳಿಗೆ 3 ವಿಕೆಟ್‌ಗಳನ್ನು ಬಲಿಗೊಟ್ಟ ಭಾರತ ಆರಂಭಿಕ ದಿನದಂದೇ ಸರ್ವಪತನ ಕಾಣುವುದು ನಿಶ್ಚಿತ ಎಂಬ ಸನ್ನಿವೇಶವೂ ನಿರ್ಮಾಣವಾಗಿತ್ತು. ಇಂಥ ಒತ್ತಡದಲ್ಲಿಯೂ ದಿಟ್ಟ ಆಟವಾಡಿದ ಚೇತೇಶ್ವರ ಪೂಜಾರ (87: 219 ಎಸೆತ, 17 ಬೌಂಡರಿ ಮತ್ತು ಅಜಿಂಕ್ಯ ರಹಾನೆ (77: 157 ಎಸೆತ, 11 ಬೌಂಡರಿ) ಭಾರತಕ್ಕೆ ಆಸರೆಯಾದರು. ಆದರೆ, ಪಟ್ಟು ಬಿಡದೆ ಹೋರಾಡಿದ ಕಿವೀಸ್‌ ಕೊನೆಗೂ ತಿರುಗಿಬಿದ್ದು ನಿಡುಸುಯ್ದಿತು.

ಐತಿಹಾಸಿಕ ಈಡನ್‌ ಗಾರ್ಡನ್‌ ಮೈದಾನದಲ್ಲಿ ನಡೆಯುತ್ತಿರುವ ಎರಡನೇ ಟೆಸ್ಟ್‌ ಪಂದ್ಯದ ಮೊದಲ ದಿನದಾಟದಂದು ಇತ್ತಂಡಗಳೂ ಸಮಗೌರವಕ್ಕೆ ಭಾಜನವಾದದ್ದು ದಿನದ ಹೆಚ್ಚುಗಾರಿಕೆ. ನಾಲ್ಕನೇ ವಿಕೆಟ್‌ಗೆ ರಹಾನೆ ಮತ್ತು ಪೂಜಾರ ಕಲೆಹಾಕಿದ 141 ರನ್‌ಗಳ ಅಮೋಘ ಜತೆಯಾಟದಿಂದಾಗಿ ಭಾರತ ಮೊದಲ ದಿನಾಂತ್ಯಕ್ಕೆ 86 ಓವರ್‌ಗಳಲ್ಲಿ 7 ವಿಕೆಟ್‌ ಕಳೆದುಕೊಂಡು 239 ರನ್‌ ಗಳಿಸಿತು. ಮಂದಬೆಳಕಿನಿಂದಾಗಿ ಕೊನೆಯ ನಾಲ್ಕು ಓವರ್‌ಗಳು ನಡೆಯದೆ ಹೋದದ್ದು ಭಾರತ ಇನ್ನಷ್ಟುಹಿನ್ನಡೆ ಅನುಭವಿಸದಂತೆ ಮಾಡಿತು. ಆಟ ನಿಂತಾಗ ವೃಧಿಮಾನ್‌ ಸಾಹ (14) ಮತ್ತು ರವೀಂದ್ರ ಜಡೇಜಾ (0) ಕ್ರೀಸ್‌ನಲ್ಲಿದ್ದರು.

ಹೆನ್ರಿ ದಾಳಿಗೆ ಕಂಗಾಲು

ಬೆಳಗ್ಗೆ ಟಾಸ್‌ ಗೆದ್ದ ನಾಯಕ ವಿರಾಟ್‌ ಕೊಹ್ಲಿ ಮೊದಲು ಬ್ಯಾಟಿಂಗ್‌ ಆಯ್ದುಕೊಂಡರು. ಆದರೆ, ಅವರ ಈ ಆಯ್ಕೆ ತಪ್ಪು ನಿರ್ಣಯವೆಂಬುದು ಶುರುವಿನಲ್ಲೇ ಕಿವೀಸ್‌ ವೇಗಿ ಮ್ಯಾಟ್‌ ಹೆನ್ರಿ ಮನವರಿಕೆ ಮಾಡಿಕೊಟ್ಟರು. ಎರಡು ವರ್ಷಗಳ ಬಳಿಕ ತಂಡದಲ್ಲಿ ಕಾಣಿಸಿಕೊಳ್ಳಲು ತವಕಿಸುತ್ತಿದ್ದ ಎಡಗೈ ಆಟಗಾರ ಗೌತಮ್‌ ಗಂಭೀರ್‌ ಜತೆಗಿನ ಸ್ಪರ್ಧೆಯಲ್ಲಿ ಕೊನೆಗೂ ಅಂತಿಮ ಇಲೆವೆನ್‌ನಲ್ಲಿ ಸ್ಥಾನ ಪಡೆದ ಆರಂಭಿಕ ಶಿಖರ್‌ ಧವನ್‌ (1) ಎರಡನೇ ಓವರ್‌ನ ನಾಲ್ಕನೇ ಎಸೆತದಲ್ಲಿ ಹೆನ್ರಿ ಬೌಲಿಂಗ್‌ನಲ್ಲಿ ಎಲ್‌ಬಿ ಬಲೆಗೆ ಬಿದ್ದು ಕ್ರೀಸ್‌ ತೊರೆದರೆ, ಕಾನ್ಪುರ ಟೆಸ್ಟ್‌ನಲ್ಲಿ ಭರ್ಜರಿ ಪ್ರದರ್ಶನ ನೀಡಿದ್ದ ಮುರಳಿ ವಿಜಯ್‌ (9) ಕೂಡ ಇದೇ ಹೆನ್ರಿ ಬೌಲಿಂಗ್‌ನಲ್ಲಿ ವಿಕೆಟ್‌ಕೀಪರ್‌ ವಾಟ್ಲಿಂಗ್‌ಗೆ ಕ್ಯಾಚಿತ್ತು ನಿರ್ಗಮಿಸಿದರು. ತ್ವರಿತಗತಿಯಲ್ಲಾದ ಈ ಎರಡು ಪಲ್ಲಟಗಳಿಗಿಂತ ಬಳಿಕ ಬಂದ ನಾಯಕ ವಿರಾಟ್‌ ಕೊಹ್ಲಿ (9) ವೇಗಿ ಟ್ರೆಂಟ್‌ ಬೌಲ್ಟ್‌ ಬೌಲಿಂಗ್‌ನಲ್ಲಿ ಲಾಥಮ್‌ಗೆ ಕ್ಯಾಚಿತ್ತು ಕ್ರೀಸ್‌ ತೊರೆದಾಗ ಭಾರತ ಅಕ್ಷರಶಃ ದಿಕ್ಕೆಟ್ಟಿತು.

ಆಪದ್ಬಾಂಧವರು

ಮೇಲುಗೈ ಸಾಧಿಸೇಬಿಟ್ಟೆವೆಂಬ ಭ್ರಮೆಗೆ ಮುಳುಗಿದ ನ್ಯೂಜಿಲೆಂಡ್‌ ವಿರುದ್ಧ ಭಾರತಕ್ಕೆ ಆಪದ್ಬಾಂಧವರಂತೆ ಕಂಡುಬಂದದ್ದು ರಹಾನೆ ಮತ್ತು ಪೂಜಾರ. ಭೋಜನ ವಿರಾಮಕ್ಕೂ ಮುನ್ನ 57 ರನ್‌ ಗಳಿಸಿದ್ದ ತಂಡದ ಸ್ಥಿತಿಯನ್ನು ತಮ್ಮ ಜವಾಬ್ದಾರಿಯುತ ಬ್ಯಾಟಿಂಗ್‌ನಿಂದ ಆದರಿಸಿದ ಈ ಜೋಡಿ ಕಿವೀಸ್‌ ಬೌಲಿಂಗ್‌ಗೆ ಸೆಡ್ಡು ಹೊಡೆಯಿತು. ಅನಾರೋಗ್ಯದ ನಿಮಿತ್ತ ಎರಡನೇ ಟೆಸ್ಟ್‌ಗೆ ಅಲಭ್ಯವಾಗಿರುವ ಕೇನ್‌ ವಿಲಿಯಮ್ಸನ್‌ ಬದಲಿಗೆ ತಂಡವನ್ನು ಮುನ್ನಡೆಸುತ್ತಿರುವ ಹಿರಿಯ ಹಾಗೂ ಅನುಭವಿ ಆಟಗಾರ ರಾಸ್‌ ಟೇಲರ್‌ ಈ ಜೋಡಿಯನ್ನು ಬೇರ್ಪಡಿಸಲು ಬೌಲರ್‌ಗಳನ್ನು ಬದಲಿಸಿ ಹಲವಾರು ತಂತ್ರಗಳನ್ನು ಹೆಣೆದರೂ, ಅದು ಕೂಡ ಫಲ ಕೊಡಲಿಲ್ಲ. ಆದರೆ, ಚಹಾ ವಿರಾಮದ ನಂತರದಲ್ಲಿ ಕಿವೀಸ್‌ ತಂತ್ರ ಫಲಿಸಿತು. ನೀಲ್‌ ವ್ಯಾಗ್ನರ್‌ ಬೌಲಿಂಗ್‌ನಲ್ಲಿ ಪೂಜಾರ ಮಾರ್ಟಿನ್‌ ಗುಪ್ಟಿಲ್‌ಗೆ ಕ್ಯಾಚಿತ್ತರೆ ಅವರ ನಂತರ ಬಂದ ರೋಹಿತ್‌ ಶರ್ಮಾ (2) ಜೀತನ್‌ ಪಟೇಲ್‌ಗೆ ಬಲಿಯಾದರು. ಇನ್ನು ಬಿರುಸಿನ ಆಟಕ್ಕೆ ಇಳಿದ ಆರ್‌. ಅಶ್ವಿನ್‌ (26) ಅವರನ್ನು 84ನೇ ಓವರ್‌ನಲ್ಲಿ ಹೆನ್ರಿ ಎಲ್‌ಬಿ ಬಲೆಗೆ ಬೀಳಿಸಿ ದಿನದ ಕೊನೆಯಲ್ಲಿಯೂ ಮಿಂಚು ಹರಿಸಿದರು.

ಸ್ಕೋರ್‌ ವಿವರ

ಭಾರತ ಮೊದಲ ಇನ್ನಿಂಗ್ಸ್‌

86 ಓವರ್‌ಗಳಲ್ಲಿ 7 ವಿಕೆಟ್‌ಗೆ 239