ನಾಳೆಯಿಂದ ಡೇವಿಸ್ ಕಪ್ ವಿಶ್ವ ಗುಂಪಿನ ಪ್ಲೇ ಆಫ್ ಸುತ್ತು; ಪ್ರಬಲ ಸ್ಪೇನ್ ವಿರುದ್ಧ ಆತಿಥೇಯರ ಸೆಣಸು
ನವದೆಹಲಿ (ಸೆ.15): ಬಹು ನಿರೀಕ್ಷಿತ ಡೇವಿಸ್ ಕಪ್ ಪಂದ್ಯಾವಳಿಯ ವಿಶ್ವ ಗುಂಪಿನ ಪ್ಲೇ ಆಫ್ ಸುತ್ತು ಶುಕ್ರವಾರದಿಂದ ಆರಂಭಗೊಳ್ಳಲಿದ್ದು, ತನ್ನ ತವರಿನ ಅಂಗಳದಲ್ಲಿ ಬಲಿಷ್ಠ ಸ್ಪೇನ್ ತಂಡವನ್ನು ಎದುರಿಸಲು ಭಾರತ ತಂಡ ಸಜ್ಜಾಗಿದೆ.
ಈಗಾಗಲೇ ಐದು ಬಾರಿ ಚಾಂಪಿಯನ್ ಪಟ್ಟವನ್ನಲಂಕರಿಸಿರುವ ಹೆಗ್ಗಳಿಕೆ ಹೊಂದಿರುವ ಸ್ಪೇನ್ ತಂಡವು ತನ್ನ ಬತ್ತಳಿಕೆಯಲ್ಲಿ ರಾಫೆಲ್ ನಡಾಲ್, ಡೇವಿಡ್ ಫೆರರ್ ಅವರಂಥ ವಿಶ್ವದರ್ಜೆಯ ಆಟಗಾರರ ಪಡೆಯನ್ನೇ ಹೊಂದಿದೆ. ಇತ್ತ, ಭಾರತದ ಪಾಳಯದಲ್ಲಿ ಲಿಯಾಂಡರ್ ಪೇಸ್, ರಾಮ್ ರಾಮನಾಥನ್, ಸಾಕೇತ್ ಮೈನೇನಿ ಇದ್ದು ಅನುಭವಿ ರೋಹನ್ ಬೋಪಣ್ಣ ಗಾಯದ ಸಮಸ್ಯೆಯಿಂದಾಗಿ ಟೂರ್ನಿಯಿಂದ ದೂರ ಉಳಿದಿದ್ದಾರೆ. ಹಾಗಾಗಿ, ಅವರ ಜಾಗಕ್ಕೆ ಕಿರಿಯ ಸುಮಿತ್ ನರ್ವಾಲ್ ಅವರಿಗೆ ಅವಕಾಶ ನೀಡಲಾಗಿದೆ. ತಂಡಗಳ ಬಲಾಬಲದ ಲೆಕ್ಕಾಚಾರದಲ್ಲಿ ನೋಡುವುದಾದರೆ ಸ್ಪೇನ್ ತಂಡ, ಭಾರತಕ್ಕಿಂತ ಬಲಿಷ್ಠವೆನಿಸಿದರೂ, ಸವಾಲನ್ನು ಸಮರ್ಪಕವಾಗಿ ಎದುರಿಸಿದ್ದೇ ಆದಲ್ಲಿ ಭಾರತಕ್ಕೆ ಈ ಟೂರ್ನಿಯ ಕಬ್ಬಿಣದ ಕಡಲೆಯಾಗದು.
ಬಲಿಷ್ಠ ಆಟಗಾರರನ್ನು ಎದುರುಗೊಳ್ಳಲಿರುವ ರಾಮ್ಕುಮಾರ್ ರಾಮನಾಥನ್ಗೆ ಇದು ಮೊದಲ ಡೇವಿಸ್ ಕಪ್ ಹಣಾಹಣಿ. ಅವರೊಂದಿಗೆ ಕಣಕ್ಕಿಳಿಯಲಿರುವ ಸಾಕೇತ್ ಮೈನೇನಿ ಈ ಅವಕಾಶವನ್ನು ಸದುಪಯೋಗಪಡಿಸಿಕೊಂಡಲ್ಲಿ ತಮ್ಮ ಆತ್ಮವಿಶ್ವಾಸವನ್ನು ಅಪಾರವಾಗಿ ವೃದ್ಧಿಸಿಕೊಳ್ಳಬಹುದು. ಈವರೆಗಿನ ತಮ್ಮ ವೃತ್ತಿಜೀವನಗಳಲ್ಲಿ ತಲಾ ಐದು ಡೇವಿಸ್ ಕಪ್ ಪಂದ್ಯಗಳನ್ನಷ್ಟೇ ಆಡಿರುವ ಈ ಇಬ್ಬರೂ ಆ ಯಾವುದೇ ಹಣಾಹಣಿಯಲ್ಲಿ ಬಲಿಷ್ಠ ಆಟಗಾರರನ್ನು ಎದುರಿಸಿಲ್ಲ. ಹಾಗಾಗಿ, ಈ ಬಾರಿಯ ಡೇವಿಸ್ ಕಪ್ ಈ ಇಬ್ಬರಿಗೂ ದೊಡ್ಡ ಅನುಭವ ನೀಡಲಿರುವುದಂತೂ ಸತ್ಯ. ಇನ್ನು, ಭಾರತದ ಪರ ಲಿಯಾಂಡರ್ ಅವರು, ಡೇವಿಸ್ ಕಪ್ನಲ್ಲಿ 53 ಪಂದ್ಯಗಳನ್ನಾಡಿದ್ದು ಅವರ ಮೇಲೆ ಭಾರತೀಯ ಟೆನಿಸ್ ಅಭಿಮಾನಿಗಳ ಹೆಚ್ಚಿನ ನಿರೀಕ್ಷೆಯಿದೆ.
ಭಾರ ತೀಯ ಟೆನಿಸ್ ಅಭಿಮಾನಿಗಳು ಮುಂದಿನ ಮೂರು ದಿನ ಹಬ್ಬದ ವಾತಾವರಣದಲ್ಲಿ ಮಿಂದೇಳಬಹುದು. ತಮ್ಮದೇ ನೆಲದಲ್ಲಿ ಆಡುತ್ತಿರುವ ವಿಶ್ವದ 4ನೇ ಶ್ರೇಯಾಂಕಿತ ರಾಫೆಲ್ ನಡಾಲ್ ಅವರ ಆಟವನ್ನು ಕಣ್ತುಂಬಿಕೊಳ್ಳುವ ಅವಕಾಶ ಅವರಿಗೆ ಒದಗಿಬಂದಿದೆ. ಈ ಹಿಂದೆ , ಸ್ಪೇನ್ ತಂಡ ಡೇವಿಸ್ ಕಪ್ ಗೆದ್ದಾಗಲೆಲ್ಲಾ (2004, 2008, 2009, 2011 ಆವೃತ್ತಿಗಳಲ್ಲಿ), ತಂಡದ ಯಶಸ್ಸಿನಲ್ಲಿ ನಡಾಲ್ ಪಾತ್ರ ದೊಡ್ಡದಿತ್ತು. ಇನ್ನು, 2008, 2009, 2011ರ ಆವೃತ್ತಿಗಳಲ್ಲಿ ಗೆದ್ದಾಗ ಫೆರರ್ ಪಾತ್ರ ಮಹತ್ವದ್ದಾಗಿತ್ತು. ಇದೀಗ, ಈ ಇಬ್ಬರೂ ಸ್ಪೇನ್ ತಂಡದಲ್ಲಿರುವುದು ಆ ತಂಡದ ಆತ್ಮವಿಶ್ವಾಸವನ್ನು ಸಹಜವಾಗಿಯೇ ಹೆಚ್ಚಿಸಿದೆ. ಈವರೆಗಿನ ತಮ್ಮ ವೃತ್ತಿಜೀವನದಲ್ಲಿ ನಡಾಲ್ 16 ಪಂದ್ಯಗಳನ್ನಾಡಿದ್ದರೆ, ಫೆರರ್ 18, ಫೆಲಿಸಿಯಾನೊ ಲೋಪೇಜ್ 22 ಹಾಗೂ ಮಾರ್ಕ್ ಲೋಪೇಜ್ 9 ಪಂದ್ಯಗಳನ್ನಾಡಿದ್ದಾರೆ.
ಈ ಹಿಂದೆ, ಮೂರು ಬಾರಿ ಡೇವಿಸ್ ಕಪ್ ಫೈನಲ್ಗೆ ಹೋಗಿದ್ದರೂ (1966, 1974 ಹಾಗೂ 1987) ಭಾರತ ಕೇವಲ ರನ್ನರ್ ಅಪ್ ಸ್ಥಾನಕ್ಕೆ ತೃಪ್ತಿಪಡಬೇಕಾಗಿ ಬಂದಿದೆ. ಈ ಬಾರಿ ಪ್ರಶಸ್ತಿ ಗೆಲ್ಲುವ ಹಂತಕ್ಕೆ ಸಾಗಬೇಕಾದರೆ, ಭಾರತಕ್ಕೆ ಈಗ ಸದ್ಯಕ್ಕಿರುವ ಸ್ಪೇನ್ ಸವಾಲನ್ನು ಮೆಟ್ಟಿನಿಲ್ಲಬೇಕಾದ ಅನಿವಾರ್ಯತೆ ಇದೆ.
ವಿಶ್ವ ಗುಂಪು ಪ್ಲೇ ಆಫ್ ವೇಳಾಪಟ್ಟಿ(ಭಾರತ v/s ಸ್ಪೇನ್)
ದಿನಾಂಕ ಪಂದ್ಯ ಸಮಯ
ಸೆ. 16 ರಾಮ್ಕುಮಾರ್ ರಾಮನಾಥನ್ v/s ರಾಫಲ್ ನಡಾಲ್ (ಸಂಜೆ 5ಕ್ಕೆ)
ಸಾಕೇತ್ ಮೈನೇನಿ v/s ಡೇವಿಡ್ ಫೆರರ್ (ಮೊದಲ ಪಂದ್ಯದ ನಂತರ)
ಸೆ. 17 ಲಿಯಾಂಡರ್ ಪೇಸ್ ಮತ್ತು ಸಾಕೇತ್ ಮೈನೇನಿ v/s ಮಾರ್ಕ್ ಲೋಪೇಜ್ ಮತ್ತು ಫೆಲಿಸಿಯಾನೊ ಲೋಪೇಜ್ (ಸಂಜೆ 7ಕ್ಕೆ)
ಸೆ. 18 ಸಾಕೇತ್ ಮೈನೇನಿ v/s ರಾಫೆಲ್ ನಡಾಲ್ (ಸಂಜೆ 5ಕ್ಕೆ)
ರಾಮ್ಕುಮಾರ್ ರಾಮನಾಥನ್ v/s ಡೇವಿಡ್ ಫೆರರ್ (ಮೊದಲ ಪಂದ್ಯದ ನಂತರ)
ಸ್ಥಳ: ಆರ್.ಕೆ. ಖನ್ನಾ ಟೆನಿಸ್ ಕ್ರೀಡಾಂಗಣ, ನವದೆಹಲಿ
ಭಾರತ- ಸ್ಪೇನ್ ನಡುವಿನ ಹಿಂದಿನ ಹಣಾಹಣಿ: ಒಂದು ಮೆಲುಕು
1922 ವಿಶ್ವ ಗುಂಪು ಕ್ವಾರ್ಟರ್ ಫೈನಲ್ ಭಾರತಕ್ಕೆ 4-1 ಅಂತರದ ಗೆಲವು
1927 ಯೂರೋಪ್ ಟೂರ್ 1ನೇ ಸುತ್ತು ಭಾರತಕ್ಕೆ 3-2 ಅಂತರದ ಗೆಲವು
1965 ಐಎನ್ಝಡ್ ಫೈನಲ್ ಭಾರತಕ್ಕೆ 2-3 ಅಂತರದ ಸೋಲು