ಬಾಂಗ್ಲಾ ವಿರುದ್ಧ ಲಂಕಾಕ್ಕೆ ಸರಣಿ ಜಯ
ದೀಮುತ್ ಕರುಣರತ್ನೆ ನೇತೃತ್ವದ ಶ್ರೀಲಂಕಾ ತಂಡವು ಬರೋಬ್ಬರಿ 44 ತಿಂಗಳುಗಳ ಬಳಿಕ ತವರಿನಲ್ಲಿ ಸರಣಿ ಜಯಿಸಿ ಸಂಭ್ರಮಿಸಿದೆ. ಈ ಕುರಿತಾದ ವರದಿ ಇಲ್ಲಿದೆ ನೋಡಿ...
ಕೊಲಂಬೊ(ಜು.29): ಆರಂಭಿಕ ಆವಿಷ್ಕಾ ಫರ್ನಾಂಡೋ (82 ರನ್‌, 75 ಎಸೆತ) ಅದ್ಭುತ ಪ್ರದರ್ಶನದ ನೆರವಿನಿಂದ ಶ್ರೀಲಂಕಾ, ಬಾಂಗ್ಲಾದೇಶ ವಿರುದ್ಧ ಇಲ್ಲಿ ನಡೆದ 2ನೇ ಏಕದಿನ ಪಂದ್ಯದಲ್ಲಿ 7 ವಿಕೆಟ್‌ ಗೆಲುವು ಸಾಧಿಸಿದೆ. ಇದರೊಂದಿಗೆ 3 ಪಂದ್ಯಗಳ ಏಕದಿನ ಸರಣಿಯಲ್ಲಿ ಶ್ರೀಲಂಕಾ 2-0 ಯಿಂದ ಸರಣಿ ಜಯಿಸಿದೆ. ಬುಧವಾರ (ಜು.31) 3ನೇ ಪಂದ್ಯ ನಡೆಯಲಿದೆ. ಈ ಸರಣಿ ಗೆಲುವಿನೊಂದಿಗೆ ಬರೋಬ್ಬರಿ 44 ತಿಂಗಳುಗಳ ಬಳಿಕ ಶ್ರೀಲಂಕಾ ತಂಡವು ತವರಿನಲ್ಲಿ ಸರಣಿ ಜಯ ದಾಖಲಿಸಿದೆ.
ವಿದಾಯದ ಪಂದ್ಯದಲ್ಲಿ ದಾಖಲೆ ಬರೆದ ಮಾಲಿಂಗ
ಭಾನುವಾರ ಟಾಸ್‌ ಗೆದ್ದು ಮೊದಲು ಬ್ಯಾಟ್‌ ಮಾಡಿದ ಬಾಂಗ್ಲಾದೇಶ ಮುಷ್ಫೀಕುರ್‌ ರಹೀಂ (98*) ಹಾಗೂ ಮೆಹದಿ ಹಸನ್‌ (43) ರನ್‌ ನಿಂದಾಗಿ 50 ಓವರಲ್ಲಿ 8 ವಿಕೆಟ್‌ಗೆ 238 ರನ್‌ ಗಳಿಸಿತು. ಈ ಸವಾಲಿನ ಗುರಿ ಬೆನ್ನತ್ತಿದ ಶ್ರೀಲಂಕಾ 44.4 ಓವರಲ್ಲಿ 3 ವಿಕೆಟ್‌ಗೆ 242 ರನ್‌ ಗಳಿಸಿ ಜಯ ಸಾಧಿಸಿತು.
ಮೊದಲ ಪಂದ್ಯವನ್ನು 91 ರನ್‌ಗಳಿಂದ ಬಾಂಗ್ಲಾದೇಶವನ್ನು ಮಣಿಸುವ ಮೂಲಕ ಲಸಿತ್ ಮಾಲಿಂಗಾಗೆ ಗೆಲುವಿನ ವಿದಾಯ ನೀಡಿದ್ದ ಶ್ರೀಲಂಕಾ, ಇನ್ನೊಂದು ಪಂದ್ಯವನ್ನು ಬಾಕಿ ಇರುವಂತೆಯೇ ಸರಣಿ ಕೈವಶ ಮಾಡಿಕೊಂಡಿದೆ.
ಸ್ಕೋರ್‌: ಬಾಂಗ್ಲಾ 238/8
ಶ್ರೀಲಂಕಾ 242/3
