ಸಾವು, ವಿಕಲತೆಯಲ್ಲಿ ಒಂದರ ಆಯ್ಕೆ ನನ್ನ ಮುಂದಿತ್ತು
ನವದೆಹಲಿ(ಸೆ.13): ಸಾವು ಅಥವಾ ಬದುಕು... ಅಂದು ನನ್ನ ಮುಂದಿದ್ದದ್ದು ಈ ಎರಡೇ ದಾರಿ. ಅದೂ, ಬದುಕೆಂದರೆ ಬರೀ ಬದುಕಲ್ಲ. ದೇಹದ ಅರ್ಧಭಾಗವೇ ನಿಯಂತ್ರಣ ಕಳೆದುಕೊಂಡಂತಹ ಸ್ಥಿತಿಯಲ್ಲಿ ಸದಾ ವ್ಹೀಲ್ಚೇರ್ನಲ್ಲೇ ಮುಂದಿನ ಜೀವನವನ್ನು ದೂಡುವಂಥ ಬದುಕಿನಲ್ಲಿ ಕೊನೆಗೂ ನಾನು ವಿಕಲತೆಯನ್ನೇ ಆಯ್ದುಕೊಂಡೆ ಎಂದು ರಿಯೊ ಸಾಧಕಿ ದೀಪಾ ಮಲಿಕ್‌ ಹೇಳಿದ್ದಾರೆ.
ರಿಯೊದಲ್ಲಿ ನಡೆಯುತ್ತಿರುವ ಪ್ಯಾರಾಲಿಂಪಿಕ್ಸ್‌ನ ಮಹಿಳೆಯರ ಶಾಟ್‌ಫುಟ್‌ ವಿಭಾಗದಲ್ಲಿ ಬೆಳ್ಳಿ ಗೆದ್ದ ದೀಪಾ ಮಲಿಕ್‌, ಇಂಡಿಯಾ ಟುಡೇಗೆ ನೀಡಿರುವ ಸಂದರ್ಶನದಲ್ಲಿ ತಮ್ಮ ಸಾಹಸಗಾಥೆಯನ್ನು ಬಿಚ್ಚಿಟ್ಟಿದ್ದಾರೆ.
1999ರಲ್ಲಿ ಪತಿ ಬಿಕ್ರಮ್‌ ಸಿಂಗ್‌, ಕಾರ್ಗಿಲ್‌ ಕದನದಲ್ಲಿ ತೊಡಗಿಕೊಂಡು ಗಡಿಯಲ್ಲಿ ದೇಶದ ಸೇವೆ ಮಾಡುತ್ತಿದ್ದರೆ, ಇತ್ತ ದೀಪಾ ಆಸ್ಪತ್ರೆಯೊಂದರಲ್ಲಿ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದರು. ರಾಜಸ್ಥಾನದ ಯುವ ಮಹಿಳಾ ಕ್ರಿಕೆಟರ್‌ ಆಗಿದ್ದ ಅವರ ಜೀವನ ಅಂದು ಕೆಟ್ಟತಿರುವು ಪಡೆದುಕೊಂಡಿತ್ತು. ಹೀಗೆ ತಿರುವು ಪಡೆದುಕೊಂಡ ಈ ಬದುಕು ಅವರನ್ನೀಗ ರಿಯೊ ಪ್ಯಾರಾಲಿಂಪಿಕ್ಸ್‌ನಲ್ಲಿ ಪದಕ ಗೆಲ್ಲುವಷ್ಟರ ಮಟ್ಟಕ್ಕೆ ತಂದು ನಿಲ್ಲಿಸಿತು.
‘‘ಶಸ್ತ್ರಚಿಕಿತ್ಸೆಯ ನಂತರದ ದಿನಗಳಲ್ಲಿ ಜೀವನದಲ್ಲಿ ಏನಾದರೂ ಸಾಧಿಸಲೇಬೇಕೆಂಬ ಛಲ ತೊಟ್ಟನಾನು, ಕ್ರೀಡೆಯ ಬಗೆಗೆ ಹೊಂದಿದ್ದ ಆಸಕ್ತಿ ಬತ್ತದಂತೆ ನೋಡಿಕೊಂಡೆ. ಪ್ಯಾರಾಅಥ್ಲೀಟ್ ಆಗಿ ಬೆಳೆದು ನಿಂತೆ. ದೇಶೀಯ, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಅನೇಕ ಪದಕಗಳನ್ನು ಗೆದ್ದಿದ್ದರೂ ಪ್ಯಾರಾಲಿಂಪಿಕ್ಸ್‌ ಪದಕದಿಂದ ವಂಚಿತವಾಗಿರುವುದು ನನ್ನನ್ನು ಕಾಡುತ್ತಿತ್ತು. ಇದೀಗ ಅದನ್ನೂ ಸಾಧಿಸಿದ್ದೇನೆ’’ ಎಂದು ಅವರು ಹೆಮ್ಮೆಯಿಂದ ಹೇಳಿಕೊಂಡಿದ್ದಾರೆ.
