ಬೆಂಗಳೂರು[ಅ.09]: ರಾಜ​ಕಾ​ರ​ಣ​ದಲ್ಲಿ ಬದ್ಧ ವೈರಿ​ಗ​ಳಾ​ಗಿ​ರುವ ಮಾಗಡಿ ಕ್ಷೇತ್ರದ ಜೆಡಿ​ಎಸ್‌ ಶಾಸಕ ಎ.ಮಂಜು​ನಾಥ್‌ ಹಾಗೂ ಕಾಂಗ್ರೆಸ್‌ ನಾಯ​ಕ​ರಾದ ಮಾಜಿ ಶಾಸಕ ಎಚ್‌ .ಸಿ.​ಬಾ​ಲ​ಕೃಷ್ಣ ಅವರು ಗೌಪ್ಯ​ವಾಗಿ ಸಭೆ ನಡೆ​ಸಿ​ರು​ವುದು ರಾಜ​ಕೀಯ ವಲಯ​ದಲ್ಲಿ ತೀವ್ರ ಚರ್ಚೆಗೆ ಗ್ರಾಸ​ವಾ​ಗಿದೆ.

ಬೆಂಗಳೂರಿನ ಶಿವಾ​ನಂದ ಸರ್ಕಲ್‌ನಲ್ಲಿನ ಖಾಸಗಿ ಹೋಟೆಲ್‌ ಒಂದರಲ್ಲಿ ಶಾಸಕ ಎ. ಮಂಜು​ನಾಥ್‌, ಮಾಜಿ ಶಾಸಕ ಎಚ್‌.ಸಿ. ​ಬಾ​ಲ​ಕೃಷ್ಣ, ಕಾಂಗ್ರೆಸ್‌ ಯುವ ಅಧ್ಯಕ್ಷ ರಘುವೀರ್‌ ಗೌಡ ಹಾಗೂ ಮಂಡ್ಯದ ಕಾಂಗ್ರೆಸ್‌ ನಾಯಕ ಗಣಿಗ ರವಿ ಅವ​ರೆ​ಲ್ಲರು ಒಟ್ಟಿಗೆ ಚರ್ಚೆ ನಡೆ​ಸು​ತ್ತಿ​ರುವ ಫೋಟೋ​ಗ​ಳು ಸಾಮಾ​ಜಿಕ ಜಾಲ​ತಾ​ಣ​ಗ​ಳಲ್ಲಿ ವೈರಲ್‌ ಆಗಿವೆ.

ಪ್ರತಿ ವಿಧಾ​ನ​ಸಭಾ ಚುನಾ​ವ​ಣೆ​ಗ​ಳಲ್ಲಿ ಪರ​ಸ್ಪರ ಪ್ರತಿ​ಸ್ಪ​ರ್ಧಿ​ಗ​ಳಾ​ಗುವ ಇಬ್ಬರು ನಾಯ​ಕರು ಗೌಪ್ಯ ಸಭೆ ನಡೆ​ಸಿ​ರು​ವುದು ಜೆಡಿ​ಎಸ್‌ ಪಾಳ​ಯ​ದಲ್ಲಿ ಸಂಚ​ಲನ ಮೂಡಿ​ಸಿದೆ. ದಳ​ದಲ್ಲಿ ಎ. ಮಂಜು​ ಅ​ವರ ಮಾತಿಗೆ ಬೆಲೆ​ಯಿಲ್ಲ. ಕ್ಷೇತ್ರ​ದಲ್ಲಿ ಅಭಿವೃದ್ಧಿ ಕೆಲಸ ಮಾಡಲು ತೊಂದರೆಯಾಗುತ್ತಿದೆ. ಇದರಿಂದ ಇವರು ಬೇಸತ್ತಿದ್ದಾರೆ. ಹೆಸರಿಗಷ್ಟೆಶಾಸಕ. ಆದರೆ, ಸ್ವತಂತ್ರ​ವಾಗಿ ಕ್ಷೇತ್ರದ ಕೆಲಸ ಮಾಡಲಾಗುತ್ತಿಲ್ಲ ಎಂದು ನೊಂದುಕೊಂಡಿದ್ದಾರೆ ಎಂಬುದು ಅವರ ಆಪ್ತರ ಮಾತು.

ಹೊಂದಾ​ಣಿಕೆ ಯತ್ನ:

ಹೀಗಾ​ಗಿ ಜೆಡಿ​ಎಸ್‌ ವರಿ​ಷ್ಠ​ರಿಗೆ ಸೆಡ್ಡು ಹೊಡೆ​ಯಲು ಮಂಜು​ರ​ವರು ಶತ್ರು ಜೊತೆಗೆ ಹೊಂದಾ​ಣಿಕೆ ಮಾಡಿ​ಕೊ​ಳ್ಳು​ತ್ತಿ​ದ್ದಾ​ರೆ. ದಳ​ಪ​ತಿ​ಗಳ ವಿರು​ದ್ಧವೇ ತೊಡೆ ತಟ್ಟಲು ಒಂದಾ​ಗು​ತ್ತಿ​ದ್ದಾ​ರೆಯೇ ಎಂಬ ಅನು​ಮಾ​ನ​ಗಳು ದಟ್ಟ​ವಾ​ಗುತ್ತಿವೆ.

ಜೆಡಿಎಸ್‌ ಪಕ್ಷದಲ್ಲಿ ದೀರ್ಘ​ಕಾಲ ರಾಜ​ಕಾ​ರಣ ಮಾಡಿ ಕಾಂಗ್ರೆಸ್‌ ಪಕ್ಷಕ್ಕೆ ಬಂದಿರುವ ಎಚ್‌.ಸಿ.ಬಾಲಕೃಷ್ಣರವರು ಶಾಸಕ ಎ.ಮಂಜುನಾಥ್‌ ಅವರನ್ನು ಜೆಡಿಎಸ್‌ ಪಕ್ಷದಿಂದ ಕಾಂಗ್ರೆಸ್‌ ಪಕ್ಷಕ್ಕೆ ಕರೆತರುವ ಕಾರ್ಯಕ್ಕೆ ನವರಾತ್ರಿ ಸಂದರ್ಭದಲ್ಲಿಯೇ ಚಾಲನೆ ನೀಡಿದ್ದಾರೆ. ಇವರಿಬ್ಬರ ನಡುವಿನ ಮಾತು ಹೆಚ್ಚೂ ಕಡಿಮೆ ಫಲಪ್ರದವಾಗಿವೆ ಎಂಬ ಬಿಸಿಬಿಸಿ ಚರ್ಚೆಗಳು ನಡೆ​ಯು​ತ್ತಿ​ವೆ.

ಕಳೆದ ವಿಧಾ​ನ​ಸಭಾ ಚುನಾ​ವಣೆ ವೇಳೆ ಜೆಡಿ​ಎಸ್‌ ತೊರೆದು ಕಾಂಗ್ರೆಸ್‌ ಸೇರಿದ್ದ ಎಚ್‌.ಸಿ. ​ಬಾ​ಲ​ಕೃಷ್ಣ ಅವ​ರನ್ನು ಕಾಂಗ್ರೆಸ್‌ನಲ್ಲಿದ್ದ ಮಂಜು​ನಾಥ್‌ ಅವ​ರನ್ನು ಜೆಡಿ​ಎಸ್‌ನಿಂದ ಟಿಕೆಟ್‌ ನೀಡಿ ಸೋಲಿ​ಸ​ಲಾ​ಗಿತ್ತು. ಆ ಸಿಟ್ಟನ್ನು ತೀರಿ​ಸಿ​ಕೊ​ಳ್ಳಲು ಮಾಜಿ ಸಿಎಂ ಕುಮಾ​ರ​ಸ್ವಾಮಿ ಬಳ​ಸಿದ ಅಸ್ತ್ರ​ವನ್ನೇ ಬಳ​ಸಲು ಬಾಲ​ಕೃಷ್ಣರವರು ಶಾಸಕ ಮಂಜು​ನಾಥ್‌ ಅವ​ರನ್ನು ಭೇಟಿ​ಯಾ​ಗಿ​ರ​ಬ​ಹುದು ಎಂಬ ಪ್ರಶ್ನೆ ಕಾಡ​ತೊ​ಡ​ಗಿ​ದೆ.

ಯಾರು ಎಲ್ಲಿಗೆ ಹೋಗ್ತಾರೆ?:

ಹಾಗೊಂದು ವೇಳೆ ಎ. ಮಂಜು​ನಾಥ್‌ ಜೆಡಿ​ಎಸ್‌ ತೊರೆದು ಕಾಂಗ್ರೆಸ್‌ ಸೇರ್ಪ​ಡೆ​ಯಾ​ದಲ್ಲಿ ಮುಂದಿನ ಚುನಾ​ವ​ಣೆ​ಯ​ಲ್ಲಿ ಮಾಗಡಿ ಕ್ಷೇತ್ರ​ದಿಂದ ಸ್ಪರ್ಧಿ​ಸು​ವವರು ಯಾರು? ಅನರ್ಹ ಶಾಸ​ಕರಿಂದಾಗಿ ನಡೆ​ಯ​ಲಿ​ರುವ ಉಪ​ಚು​ನಾ​ವ​ಣೆ​ಯಲ್ಲಿ ಮಹಾ​ಲಕ್ಷ್ಮಿ ಲೇಔಟ್‌ ಕ್ಷೇತ್ರ​ದಲ್ಲಿ ಕಾಂಗ್ರೆಸ್‌ ಪಕ್ಷ​ದಿಂದ ಎಚ್‌.ಸಿ. ​ಬಾ​ಲ​ಕೃಷ್ಣ ಸ್ಪರ್ಧಿ​ಸು​ತ್ತಾರೆ ಎಂಬ ಮಾತು​ಗಳು ಕೇಳಿ ಬರು​ತ್ತಿವೆ.

ಆ ರೀತಿ​ ಆ​ದಲ್ಲಿ ಎ.ಮಂಜು​ನಾಥ್‌ ಅವ​ರಿಗೆ ಮಾಗಡಿ ಕ್ಷೇತ್ರ ಗಟ್ಟಿ​ಯಾ​ಗ​ಲಿದೆ. ಆದರೆ, ಬಾಲಕೃಷ್ಣರ​ವರು ಮಹಾ​ಲಕ್ಷ್ಮಿ ಲೇಔಟ್‌ ಕ್ಷೇತ್ರ​ದಿಂದ ಸ್ಪರ್ಧಿ​ಸಲು ಹಿಂದೇಟು ಹಾಕು​ತ್ತಿ​ದ್ದಾರೆ. ನನ್ನ ಕರ್ಮ​ಭೂಮಿ ಏನಿ​ದ್ದರೂ ಮಾಗ​ಡಿ ಕ್ಷೇತ್ರ. ಸೋತರೂ, ಗೆದ್ದರೂ ಮಾಗಡಿಯಲ್ಲಿಯೇ ಸ್ಪರ್ಧಿ​ಸು​ತ್ತೇನೆ ಎಂಬ ಮಾತು​ಗ​ಳನ್ನು ಆಡಿ​ದ್ದಾ​ರೆ.

ಮಾಗ​ಡಿ​ಯಲ್ಲಿ ಬದ್ಧ ರಾಜ​ಕೀಯ ವೈರಿ​ಗ​ಳೆಂದೇ ಕರೆ​ಸಿ​ಕೊ​ಳ್ಳುವ ಮಂಜು​ನಾಥ್‌ ಮತ್ತು ಬಾಲ​ಕೃ​ಷ್ಣ​ರ​ವರು ಗುಪ್ತ ಸಭೆಯ ಹಿಂದಿ​ರುವ ಪ್ಲಾನ್‌ ಏನೆಂಬು​ದ​ನ್ನು ಅವ​ರೇ ಸ್ಪಷ್ಟಪಡಿಸ​ಬೇಕಾ​ಗಿದೆ.