ವಿವಿ ಪ್ಯಾಟ್ ಆಯ್ತು, ಈಗ ವಿವಿಪ್ಯಾಟ್ ರಸೀದಿ ಪತ್ತೆ..!
ಬಸವನಬಾಗೇವಾಡಿ ಕ್ಷೇತ್ರ ವ್ಯಾಪ್ತಿಯ ಉಕ್ಕಲಿ ಗ್ರಾಮದ ಮತಗಟ್ಟೆಸಂಖ್ಯೆ 12ಕ್ಕೆ ಸೇರಿದ ರಶೀದಿ ಇದಾಗಿದೆ. ಮತಯಂತ್ರದ ಮೂಲಕ ವೋಟ್ ಹಾಕಿದ ಬಳಿಕ ನಾವು ನಿರ್ದಿಷ್ಟ ಅಭ್ಯರ್ಥಿಗೇ ವೋಟ್ ಹಾಕಿದ್ದೇವೆ ಎನ್ನುವುದನ್ನು ಖಚಿತಪಡಿಸುವ ವಿವಿ ಪ್ಯಾಟ್ನ ರಶೀದಿ ಇದಾಗಿದೆ. ಈ ರಶೀದಿ ಬಹಿರಂಗವಾದ ಹಿನ್ನೆಲೆಯಲ್ಲಿ ಕ್ಷೇತ್ರದ ಚುನಾವಣೆಯಲ್ಲಿ ಅಕ್ರಮ ನಡೆದಿರುವ ಶಂಕೆ ವ್ಯಕ್ತವಾಗುತ್ತಿದೆ.
ಬಸವನಬಾಗೇವಾಡಿ[ಜೂ.01]: ವಿಜಯಪುರ ಜಿಲ್ಲೆಯ ಮನಗೂಳಿಯ ಶೆಡ್ವೊಂದರಲ್ಲಿ ಇತ್ತೀಚೆಗಷ್ಟೇ ವಿವಿ ಪ್ಯಾಟ್ ಮಷಿನ್ನ ಬಾಕ್ಸ್ ಪತ್ತೆಯಾದ ಬೆನ್ನಲ್ಲೇ ಈಗ ವಿವಿ ಪ್ಯಾಟ್ ರಶೀದಿ ಪತ್ತೆಯಾಗಿರುವ ಘಟನೆಯೊಂದು ಬೆಳಕಿಗೆ ಬಂದಿದೆ.
ಬಸವನಬಾಗೇವಾಡಿ ಕ್ಷೇತ್ರ ವ್ಯಾಪ್ತಿಯ ಉಕ್ಕಲಿ ಗ್ರಾಮದ ಮತಗಟ್ಟೆಸಂಖ್ಯೆ 12ಕ್ಕೆ ಸೇರಿದ ರಶೀದಿ ಇದಾಗಿದೆ. ಮತಯಂತ್ರದ ಮೂಲಕ ವೋಟ್ ಹಾಕಿದ ಬಳಿಕ ನಾವು ನಿರ್ದಿಷ್ಟ ಅಭ್ಯರ್ಥಿಗೇ ವೋಟ್ ಹಾಕಿದ್ದೇವೆ ಎನ್ನುವುದನ್ನು ಖಚಿತಪಡಿಸುವ ವಿವಿ ಪ್ಯಾಟ್ನ ರಶೀದಿ ಇದಾಗಿದೆ. ಈ ರಶೀದಿ ಬಹಿರಂಗವಾದ ಹಿನ್ನೆಲೆಯಲ್ಲಿ ಕ್ಷೇತ್ರದ ಚುನಾವಣೆಯಲ್ಲಿ ಅಕ್ರಮ ನಡೆದಿರುವ ಶಂಕೆ ವ್ಯಕ್ತವಾಗುತ್ತಿದೆ. ಈ ಕುರಿತು ಚುನಾವಣಾ ಆಯೋಗ ಸೂಕ್ತ ತನಿಖೆ ನಡೆಸಬೇಕೆಂದು ಕ್ಷೇತ್ರದ ಪರಾಜಿತ ಜೆಡಿಎಸ್ ಅಭ್ಯರ್ಥಿ ಸೋಮನಗೌಡ ಪಾಟೀಲ ಮನಗೂಳಿ ಅವರು ಚುನಾವಣಾ ಆಯೋಗಕ್ಕೆ ಬುಧವಾರ ಬೆಂಗಳೂರಿನಲ್ಲಿ ಲಿಖಿತ ದೂರು ಸಲ್ಲಿಸಿದ್ದಾರೆ.
ತಾಲೂಕಿನ ಮನಗೂಳಿ ಪಟ್ಟಣದ ಸಮೀಪದ ರಾಷ್ಟ್ರೀಯ ಹೆದ್ದಾರಿಗೆ ಹೊಂದಿಕೊಂಡಿರುವ ಶೆಡ್ವೊಂದರಲ್ಲಿ ಮೇ 20ರಂದು ಎಂಟು ವಿವಿ ಪ್ಯಾಟ್ ಯಂತ್ರದ ಬಾಕ್ಸ್ಗಳು ಪತ್ತೆಯಾಗಿದ್ದವು. ಇದು ಭಾರೀ ಚರ್ಚೆಗೆ ಕಾರಣವಾಗಿತ್ತು. ಈಗ ಮೇ 27ರಂದು ಇದೇ ಮತಕ್ಷೇತ್ರಕ್ಕೆ ಸೇರಿದ ವಿವಿ ಪ್ಯಾಟ್ನ ಮುದ್ರಿತ ರಶೀದಿ ಸಿಕ್ಕಿರುವುದು ಸಾರ್ವಜನಿಕರ ಗೊಂದಲವನ್ನು ಮತ್ತಷ್ಟುಹೆಚ್ಚಿಸಿದೆ. ವಿವಿ ಪ್ಯಾಟ್ನ ಮುದ್ರಿತ ರಶೀದಿ ಕುರಿತು ಬಸವನಬಾಗೇವಾಡಿ ಮತಕ್ಷೇತ್ರದ ಚುನಾವಣಾಧಿಕಾರಿಗಳು ಗುರುವಾರ ಮನಗೂಳಿ ಪೊಲೀಸ್ ಠಾಣೆಯಲ್ಲಿ ದೂರು ಸಲ್ಲಿಸಿದ್ದಾರೆ.