(ವಿಡಿಯೋ) ಇದು ಪಾಪಾಸ್ ಕಳ್ಳಿಯ ಗಿನ್ನಿಸ್ ರೇಕಾರ್ಡ್ ಸ್ಟೋರಿ
ಇದನ್ನು ಅಪಶಕುನ, ಕಳೆ ಎಂದು ಜರಿಯುವವರೇ ಜಾಸ್ತಿ.
ಪಾಪಾಸ್ಕಳ್ಳಿ ಎಂದ ಕೂಡಲೇ ಮೂಗು ಮುರಿಯುವವರೇ ಹೆಚ್ಚು. ಆದರೆ ಧಾರವಾಡದಲ್ಲಿ ಪಾಪಾಸ್ಕಳ್ಳಿಯೊಂದು ಬೆಳೆಸಿದವರಿಗೆ ಅಭಿಮಾನದ ಸಂಕೇತವಾಗಿದೆ. ಈ ಅಭಿಮಾನಕ್ಕೆ ಕಾರಣ ಅದು ಗಿನ್ನೆಸ್ ರೆಕಾರ್ಡು ಮಾಡಿದ್ದು.
ಪಾಪಾಸ್ಕಳ್ಳಿ ಅಂದ್ರೆ ಇಂಗ್ಲೀಷ್ನಲ್ಲಿ ಕ್ಯಾಕ್ಟಸ್. ಇದನ್ನು ಅಪಶಕುನ, ಕಳೆ ಎಂದು ಜರಿಯುವವರೇ ಜಾಸ್ತಿ. ಅಂಥಾದ್ರಲ್ಲಿ ಧಾರವಾಡದ ಎಸ್ಡಿಎಮ್ ಕಾಲೇಜಿನಲ್ಲಿನ ಕೆಲ ಕ್ಯಾಕ್ಟಸ್ ಪ್ರೇಮಿಗಳು ಯಾರೂ ಮಾಡದ ಸಾಧನೆ ಮಾಡಿದ್ದಾರೆ. ಹೌದು ಇಲ್ಲಿನ ಸುರೇಂದ್ರ ಮತ್ತು ಆತನ ತಂಡ ಅತೀ ಎತ್ತರವಾಗಿ ಕ್ಯಾಕ್ಟಸ್ ಬೆಳೆಸುವ ಮೂಲಕ ಗಿನ್ನೆಸ್ ದಾಖಲೆ ಪುಸ್ತಕ ಸೇರುವಂತೆ ಮಾಡಿದ್ದಾರೆ. ಇದರ ಹಿಂದಿನ ಶ್ರಮವೇನು ಸಣ್ಣದಲ್ಲ. 2002 ರಿಂದ ಪ್ಲಾಂಟ್ ಮಾಡಲಾಗಿದ್ದ ಈ ಪಾಪಾಸ್ಕಳ್ಳಿಗಳನ್ನ ಬರೋಬ್ಬರಿ 14 ವರ್ಷಗಳಿಂದ ಜತನದಿಂದ ಕಾಯ್ದುಕೊಂಡು ಬರಲಾಗಿದೆ ಎನ್ನುತ್ತಾರೆ ಇಲ್ಲಿನ ಸಿಬ್ಬಂದಿ.
105 ಅಡಿ ಬೆಳೆದಿರುವ ಈ ಪಾಪಾಸ್ಕಳ್ಳಿ ವಿಶ್ವದಾಖಲೆಗೆ ಸೇರ್ಪಡೆಯಾಗುತ್ತಿರುವುದು ಎರಡನೇ ಬಾರಿ. ತನ್ನದೇ ದಾಖಲೆಯನ್ನು ತಾನೇ ಮುರಿದಿರುವುದು ಇದರ ವಿಶೇಷ. ಕ್ಯಾಕ್ಟಸ್ ಎತ್ತರಕ್ಕೆ ಬೆಳೆದಂತೆ ಬುಡ ಸಡಿಲಾಗುತ್ತದೆ. ಹಾಗಾಗಿ ದೊಡ್ಡ ಟವರ್ವೊಂದನ್ನ ಕ್ಯಾಕ್ಟಸ್ ಮುರಿಯಬಾರದು ಎನ್ನುವುದಕ್ಕಾಗಿಯೆ ನಿರ್ಮಿಸಲಾಗಿದೆ. 2009 ರಲ್ಲಿ 78 ಫೂಟ್ ಬೆಳೆದಿದ್ದ ಈ ಪಾಪಾಸ್ಕಳ್ಳಿ ಮೊದಲ ಬಾರಿ ಗಿನ್ನೆಸ್ ಪುಸ್ತಕದಲ್ಲಿ ಜಾಗ ಗಿಟ್ಟಿಸಿತ್ತು. ಮತ್ತೆ ಈಗ 105 ಅಡಿ ಬೆಳೆಯುವ ಮೂಲಕ ವಿಶ್ವದಾಖಲೆಗೆ ಪಾತ್ರವಾಗಿ ಬೆಳೆಸಿದವರಿಗೂ ಹೆಸರು ತಂದಿದೆ.
ಬರೋಬಬರಿ 14 ವರ್ಷಗಳ ಕಾಲ ಕ್ಯಾಕ್ಟಸ್ವೊಂದನ್ನು ಬೆಳೆಸಿ, ಜತನ ಮಾಡಿ ದಾಖಲೆ ಮಾಡುವಂತೆ ಮಾಡಿರುವ ಧಾರವಾಡದ ಎಸ್ಡಿಎಮ್ ಕಾಲೇಜು ಸಿಬ್ಬಂದಿಗಳ ಪ್ರಯತ್ನ ನಿಜಕ್ಕೂ ವಿಭಿನ್ನ ಅಂತಾನೇ ಹೇಳ್ಬೇಕು.
ವರದಿ: ಸಿದ್ದು ಸತ್ಯಣ್ಣನವರ್, ಸುವರ್ಣ ನ್ಯೂಸ್