MiG-21 Crash in Rajasthan : ಪೈಲಟ್ ದುರ್ಮರಣ, ವರ್ಷದ ಐದನೇ ಘಟನೆ!
ತರಬೇತಿ ಹಾರಾಟದ ವೇಳೆ ಮಿಗ್-21 ಯುದ್ಧ ವಿಮಾನ ಪತನ
ಭಾರತೀಯ ವಾಯುಸೇನೆಯ ಅಧಿಕಾರಿ ದುರ್ಮರಣ
ಹಾಲಿ ವರ್ಷದಲ್ಲಿ ಸಂಭವಿಸಿದ 5ನೇ ಘಟನೆ
ಜೈಸಲ್ಮೇರ್ (ಡಿ. 24): ಭಾರತೀಯ ವಾಯುಸೇನೆಯಲ್ಲಿ (Indian Air Force) ಅತ್ಯಂತ ಸುದೀರ್ಘ ಅವಧಿಯ ಕಾಲ ಸೇವೆ ಸಲ್ಲಿಸಿದ ಯುದ್ಧ ವಿಮಾನ ಎನಿಸಿಕೊಂಡಿರುವ ರಷ್ಯಾ ನಿರ್ಮಿತ ಮಿಗ್-21 ಬೈಸನ್ (MiG-21 Bison)ಯುದ್ಧ ವಿಮಾನ ಮತ್ತೊಮ್ಮೆ ಅಪಘಾತಕ್ಕೆ ಈಡಾಗಿದೆ. ರಾಜಸ್ಥಾನದ (Rajasthan) ಜೈಸಲ್ಮೇರ್ ನಲ್ಲಿ (Jaisalmer) ತರಬೇತಿ ಹಾರಾಟದಲ್ಲಿ ಪಾಲ್ಗೊಂಡಿದ್ದ ವೇಳೆ ಮಿಗ್-21 ಅಪಘಾತಗೊಂಡಿದ್ದು, ವಾಯುಸೇನೆಯ ಅಧಿಕಾರಿ ಸಾವನ್ನಪ್ಪಿದ್ದಾರೆ. ಮುಂಬರುವ ವರ್ಷಗಳಲ್ಲಿ ಹಳೆಯ ಜೆಟ್ ವಿಮಾನಗಳನ್ನು ಹೊಸದಾದ ಯುದ್ಧ ವಿಮಾನಗಳೊಂದಿಗೆ ಬದಲಾಯಿಸುವ ಗುರಿಯನ್ನು ಇಟ್ಟುಕೊಂಡಿರುವ ಭಾರತೀಯ ವಾಯುಸೇನೆಯ ಯೋಜನೆಗಳ ಮೇಲೆ ಈ ಅಪಘಾತ ಮತ್ತೊಮ್ಮೆ ಗಮನ ಕೇಂದ್ರೀಕರಿಸುವಂತೆ ಮಾಡಿದೆ.
ಶುಕ್ರವಾರ ರಾತ್ರಿ 8.30ರ ವೇಳೆಗೆ ಜೈಸೆಲ್ಮೇರ್ ನಲ್ಲಿ ಭಾರತೀಯ ವಾಯುಸೇನೆಗೆ ಸೇರಿದಂತೆ ಮಿಗ್-21 ಬೈಸನ್ ಯುದ್ಧ ವಿಮಾನ ಪತನಗೊಂಡಿದ್ದು, ಪೈಲಟ್ ವಿಂಗ್ ಕಮಾಂಡರ್ ಹರ್ಷಿತ್ ಸಿನ್ಹಾ ( Wing Commander Harshit Sinha) ಈ ದುರಂತದಲ್ಲಿ ಸಾವನ್ನಪ್ಪಿದ್ದಾರೆ ಎಂದು ಐಎಎಫ್ ಪ್ರಕಟಣೆಯಲ್ಲಿ ತಿಳಿಸಿದೆ.
ಮಿಗ್-21 ಬೈಸನ್ ಯುದ್ಧ ವಿಮಾನ ಹಾಲಿ ವರ್ಷದಲ್ಲಿ ಪತನಗೊಂಡಿದ್ದು ಇದು ಐದನೇ ಬಾರಿಯಾಗಿದೆ. "ವಿಂಗ್ ಕಮಾಂಡರ್ ಹರ್ಷಿತ್ ಸಿನ್ಹಾ ಅವರು ಇಂದು ರಾತ್ರಿ ಸಂಭವಿಸಿದ ಮಿಗ್-21 ಯುದ್ಧ ವಿಮಾನ ಅಪಘಾತದಲ್ಲಿ ಮೃತರಾದರೆಂದು ತಿಳಿಸಲು ಐಎಎಫ್ ವಿಷಾದಿಸುತ್ತದೆ. ಈ ಕುಟುಂಬದ ನೋವಿನಲ್ಲಿ ಐಎಎಫ್ ಕೂಡ ಭಾಗಿಯಾಗಿದೆ'' ಎಂದು ಟ್ವೀಟ್ ಮಾಡಿದೆ. ಇದಕ್ಕೂ ಮುನ್ನ ಟ್ವೀಟ್ ಮಾಡಿದ್ದ ಐಎಎಫ್, ಯುದ್ಧ ವಿಮಾನ ಅಪಘಾತದ ಕುರಿತಂತೆ ತನಿಖೆಗೆ ಆಗ್ರಹ ಮಾಡಿತ್ತು. ಈ ತಿಂಗಳ ಆರಂಭದಲ್ಲಿ ತಮಿಳುನಾಡಿನ ಕೂನೂರಿನಲ್ಲಿ ಸಂಭವಿಸಿದ ಸೇನಾ ಹೆಲಿಕಾಪ್ಟರ್ ದುರಂತವನ್ನು ದೇಶದ ಜನತೆ ಮರೆಯುವ ಮುನ್ನವೇ ಮತ್ತೊಂದು ದುರ್ಘಟನೆ ಸಂಭವಿಸಿದೆ.
ಮಿಗ್-21 ಮಾದರಿಯ ಯುದ್ಧ ವಿಮಾನದಲ್ಲಿ ಬೈಸನ್ ಜೆಟ್ ಹೊಸ ಮಾದರಿಯದ್ದಾಗಿದ್ದರೂ, ಹಲವು ವರ್ಷಗಳಿಂದ ಐಎಎಫ್ ನ (IAF)ಸೇವೆಯಲ್ಲಿದೆ. ಪ್ರಸ್ತುತ ಐಎಎಫ್ ನಲ್ಲಿ ನಾಲ್ಕು ಸ್ಕ್ವಾಡ್ರನ್ ಮಿಗ್-21 ಬೈಸನ್ ಯುದ್ಧ ವಿಮಾನಗಳಿವೆ. ಒಂದು ಸ್ಕ್ವಾಡ್ರನ್ ನಲ್ಲಿ 16 ರಿಂದ 18 ಫೈಟರ್ ಜೆಟ್ ಗಳು ಇರುತ್ತವೆ. ಪ್ರಸ್ತುತ ಇರುವ ಬೈಸನ್ ಯುದ್ಧ ವಿಮಾನಗಳು ಮಿಗ್-21 ಮಾದರಿಯಲ್ಲಿ ಆಧುನಿಕ ಮಾದರಿಯದ್ದಾಗಿ ಮುಂದಿನ ಮೂರು-ನಾಲ್ಕು ವರ್ಷಗಳ ಕಾಲ ಸೇವೆ ಕಲ್ಪಿಸುವ ಅವಕಾಶ ಹೊಂದಿದೆ. 1963ರಲ್ಲಿ ಐಎಎಫ್ ಮೊದಲ ಸಿಂಗಲ್ ಇಂಜಿನ್ ಮಿಗ್-21 ಯುದ್ಧವಿಮಾನವನ್ನು ಸೇರಿಸಿಕೊಂಡಿತ್ತು. ಭಾರತ ಈವರೆಗೂ 874 ಸೋವಿಯತ್ ರಷ್ಯಾ ನಿರ್ಮಿತ ಸೂಪರ್ ಸಾನಿಕ್ ಫೈಟರ್ ಜೆಟ್ ಗಳು ದೇಶದ ವಾಯುಸೇನೆಯನ್ನು ಬಲಪಡಿಸುವ ನಿಟ್ಟಿನಲ್ಲಿ ಖರೀದಿ ಮಾಡಿದೆ. ಈ 874 ಯುದ್ಧ ವಿಮಾನಗಳ ಪೈಕಿ ಶೇಕಡಾ 60 ರಷ್ಟು ಯುದ್ಧ ವಿಮಾನಗಳನ್ನು ಪರವಾನಿಗಿ ಪಡೆದು ಭಾರತದಲ್ಲಿಯೇ ನಿರ್ಮಾಣ ಮಾಡಲಾಗಿದೆ.
Helicopter Accidents : ಕಳೆದ 5 ವರ್ಷಗಳಲ್ಲಿ 15 ಸೇನಾ ದುರಂತ!
ಕಳೆದ ಆರು ದಶಕಗಳಲ್ಲಿ 400ಕ್ಕೂ ಅಧಿಕ ಮಿಗ್-21 ಯುದ್ಧ ವಿಮಾನಗಳ ಅಪಘಾತವಾಗಿದ್ದು, 200ಕ್ಕೂ ಅಧಿಕ ಪೈಲಟ್ ಗಳು ಸಾವಿಗೀಡಾಗಿದ್ದಾರೆ. ಆ ಕಾರಣಕ್ಕಾಗಿ ಈ ಯುದ್ಧ ವಿಮಾನವನ್ನು "ಹಾರುವ ಶವಪೆಟ್ಟಿಗೆ", (flying coffin)"ವಿಡೋ ಮೇಕರ್" ಎನ್ನುವ ಕುಖ್ಯಾತ ಹೆಸರುಗಳನ್ನು ಪಡೆದುಕೊಂಡಿದೆ. ಈಗಾಗಲೇ ರಕ್ಷಣಾ ಪಡೆಗಳ ಅನುಭವಿಗಳು, ಮಿಗ್-21 ಯುದ್ಧವಿಮಾನವನ್ನು ವಾಯುಸೇನೆಯಿಂದ ಹೊರಗಿಡಬೇಕು ಎಂದು ಅಭಿಪ್ರಾಯ ವ್ಯಕ್ತಪಡಿಸಿದ್ದರೂ, ಹೊಸ ಫೈಟರ್ ಜೆಟ್ ಗಳು ಸೇರುವವರೆಗೂ ಮಿಗ್-21 ಜೆಟ್ ಗಳನ್ನು ಉಳಿಸಿಕೊಳ್ಳುವ ಇರಾದೆಯಲ್ಲಿ ಐಎಎಫ್ ಇದೆ. ಎರಡು ವರ್ಷಗಳ ಹಿಂದೆ ಪಾಕಿಸ್ತಾನದ ಬಾಲಾಕೋಟ್ ನಲ್ಲಿ ಭಯೋತ್ಪಾದಕ ಶಿಬಿರಗಳ ಮೇಲೆ ದಾಳಿ ಮಾಡಲು ಇದೇ ಬೈಸನ್ ಯುದ್ಧ ವಿಮಾನಗಳನ್ನು ಬಳಸಲಾಗಿತ್ತು.
