ಮಡಿಕೇರಿ(ಆ.07): ಎರಡು ವರ್ಷಗಳ ಹಿಂದೆ ಭಾರೀ ಮಳೆ, ಭೂ ಕುಸಿತದಿಂದ ಅಪಾರ ಹಾನಿ ಅನುಭವಿಸಿದ್ದ ಕೊಡಗು ಜಿಲ್ಲೆಯಲ್ಲಿ ಇದೀಗ ಮತ್ತೆ ಪ್ರಕೃತಿ ವಿಕೋಪ ಉಂಟಾಗಿದೆ. ಕಳೆದ ಕೆಲ ದಿನ​ಗ​ಳಿಂದ ಸುರಿ​ಯು​ತ್ತಿ​ರುವ ನಿರಂತರ ಮಳೆ​ಯಿಂದಾಗಿ ಕೊಡ​ಗಲ್ಲಿ ಮತ್ತೆ ವ್ಯಾಪಕ ಭೂಕುಸಿತ ಉಂಟಾಗಿದ್ದು ಅಪಾರ ಹಾನಿ ಉಂಟು ಮಾಡಿದೆ. 

ಭಾಗ​ಮಂಡಲದ ಬ್ರಹ್ಮ​ಗಿರಿ ಬೆಟ್ಟಸೇರಿ​ ಜಿಲ್ಲೆಯ ಹಲ​ವೆಡೆ ಗುರು​ವಾ​ರ 20ಕ್ಕೂ ಹೆಚ್ಚು ಕಡೆ ಭೂಕುಸಿತ ಸಂಭ​ವಿ​ಸಿ​​ದೆ. ನೂರಾರು ಮರ​ಗಳು ಧರೆ​ಗು​ರು​ಳಿ​ವೆ. ಕಾವೇರಿ, ಲಕ್ಷ್ಮಣ ತೀರ್ಥ ನದಿ​ಗಳು ಉಕ್ಕೇರಿ ಹರಿ​ಯು​ತ್ತಿ​ದ್ದು, ಭಾಗ ಮಂಡಲ ದ್ವೀಪ​ಸ​ದೃ​ಶ​ವಾ​ಗಿದೆ. ಸಣ್ಣ​ಪುಟ್ಟಹಳ್ಳ​ಕೊ​ಳ್ಳ​ಗ​ಳು ತುಂಬಿ ರಸ್ತೆ ಮೇಲೆ ಹರಿ​ಯು​ತ್ತಿ​ರು​ವು​ದ​ರಿಂದ ಹಲ​ವೆಡೆ ಸಂಚಾರ ಸ್ಥಗಿ​ತ​ಗೊಂಡಿದೆ.

ಮೂರ್ನಾಲ್ಕು ದಿನ​ಗ​ಳಿಂದ ಸುರಿ​ಯು​ತ್ತಿ​ರುವ ಮಳೆ​ಯಿಂದಾಗಿ ಕಾವೇರಿಯ ಉಗಮ ಸ್ಥಾನ ತಲಕಾವೇರಿ ದೇವಾಲಯದ ಬ್ರಹ್ಮಗಿರಿ ಬೆಟ್ಟದಲ್ಲಿ ಬುಧವಾರ ರಾತ್ರಿ ಭಾರೀ ಕುಸಿತ ಉಂಟಾಯಿತು. ಬೆಟ್ಟದ ತಳದಲ್ಲಿ ವಾಸವಾಗಿದ್ದ ದೇಗು​ಲ​ದ ಪ್ರಧಾನ ಅರ್ಚಕರ ಮನೆ ಮೇಲೆ ಗುಡ್ಡ ಕುಸಿದು 5 ಮಂದಿ ಸಾವನ್ನಪ್ಪಿದ್ದಾರೆ. ಇದರಿಂದಾಗಿ ಅರ್ಚಕ ನಾರಾಯಣಾಚಾರ್‌ (80), ಪತ್ನಿ ಶಾಂತಾ (70), ಅವರ ಅಣ್ಣ ಆನಂದ ತೀರ್ಥ (86), ಉಳಿದ ಇಬ್ಬರು ಸಹಾಯಕ ಅರ್ಚಕರಾದ ಕಾಸ​ರ​ಗೋಡು ಜಿಲ್ಲೆಯ ಮುಳ್ಳೇರಿಯಾದ ಶ್ರೀನಿವಾಸ ಪಡ್ಡಿಲ್ಲಾಯ, ದಕ್ಷಿಣ ಕನ್ನಡ ಜಿಲ್ಲೆಯ ಬಿ.ಸಿ.ರೋಡ್‌ನ ರವಿಕಿರಣ್‌ ಅವಶೇಷಗಳ ಅಡಿಯಲ್ಲಿ ಸಿಲುಕಿದ್ದಾರೆ. ಇವರೆಲ್ಲರ ಹುಡುಕಾಟ ನಡೆದಿದೆ. ಮನೆ​ಮುಂದಿದ್ದ 2 ಕಾರು, ಗ್ರಾಮಸ್ಥರ 20ಕ್ಕೂ ಅಧಿ​ಕ ಹಸುಗಳು ಕಣ್ಮರೆಯಾಗಿವೆ. ದುರಂತದ ಅಗಾ​ಧ​ತೆ​ ನೋಡಿ​ದರೆ ಕಣ್ಮ​ರೆ​ಯಾ​ದ​ವರು ಯಾರೂ ಬದು​ಕು​ಳಿ​ಯುವ ಸಾಧ್ಯತೆ ತೀರಾ ಕಡಿ​ಮೆ ಎನ್ನಲಾಗಿದೆ.

ಪ್ರವಾಹ ಪರಿಸ್ಥಿತಿ: ಕಳೆದ ಜುಲೈನಲ್ಲಿ ಮಳೆ ಕೊರತೆ ಎದುರಿಸಿದ್ದ ಜಿಲ್ಲೆಯಲ್ಲಿ ಸೋಮವಾರದಿಂದ ಸುರಿದ ಭಾರೀ ಮಳೆ ಜನ ಜೀವನ ಅಸ್ತವ್ಯಸ್ತಗೊಳಿ​ಸಿ​ದೆ. ಕುಶಾಲನಗರ, ಕರಡಿಗೋಡು, ಹೊದ್ದೂರು, ಬೇತ್ರಿ ಸೇರಿ ಹಲವೆಡೆ ಕಳೆದ ವರ್ಷ​ದಂತೆ ಈ ಬಾರಿಯೂ ಪ್ರವಾಹ ಪರಿಸ್ಥಿತಿ ಆರಂಭವಾಗಿದೆ. ಸುಮಾರು 200ಕ್ಕೂ ಹೆಚ್ಚು ಮಂದಿ​ಯನ್ನು ಸುರ​ಕ್ಷಿತ ಸ್ಥಳಕ್ಕೆ ಸ್ಥಳಾಂತ​ರಿ​ಸ​ಲಾ​ಗಿದ್ದು, ಪರಿ​ಹಾರ ಕೇಂದ್ರ​ವನ್ನೂ ತೆರೆ​ಯ​ಲಾ​ಗಿ​ದೆ.

10 ಜಿಲ್ಲೆಗಳಲ್ಲಿ ಮಳೆ ಅಬ್ಬರ; 8 ಬಲಿ..!

ದ್ವೀಪಸದೃಶ ಭಾಗಮಂಡಲ: ಭಾಗಮಂಡಲದಲ್ಲಿ 2ನೇ ದಿನವೂ ಪ್ರವಾಹ ಮುಂದುವರಿದಿದ್ದು, ಭಾಗಮಂಡಲ-ತಲಕಾವೇರಿ, ನಾಪೋಕ್ಲು-ಅಯ್ಯಂಗೇರಿ ರಸ್ತೆಯ ಮೇಲೆ ನೀರು ಹರಿದ ಪರಿಣಾಮ ರಸ್ತೆ ಸಂಪರ್ಕ ಕಡಿತಗೊಂಡಿದೆ. ಭಾಗಮಂಡಲದಿಂದ ತಲಕಾವೇರಿ ತೆರಳುವ ಅಲ್ಲಲ್ಲಿ ಭೂಕುಸಿತ ಸಂಭವಿಸಿದೆ. ಮಡಿಕೇರಿ-ವಿರಾಜಪೇಟೆ ರಸ್ತೆಯ ಬೇತ್ರಿಯಲ್ಲಿ ಕಾವೇರಿ ನದಿ ಅಪಾಯಕಾರಿ ಮಟ್ಟದಲ್ಲಿ ಹರಿಯುತ್ತಿದ್ದು, ಸುರಕ್ಷತೆಯ ದೃಷ್ಟಿಯಿಂದ ವಾಹನ ಸಂಚಾ​ರ ಸ್ಥಗಿ​ತ​ಗೊ​ಳಿ​ಸ​ಲಾ​ಗಿದೆ. ಹಾರಂಗಿ ಜಲಾ​ಶ​ಯಕ್ಕೆ ಭಾರೀ ಪ್ರಮಾ​ಣ​ದಲ್ಲಿ ಒಳ​ಹ​ರಿ​ಸುವ ಬರು​ತ್ತಿ​ರುವ ಹಿನ್ನೆ​ಲೆ​ಯಲ್ಲಿ 11 ಸಾವಿ​ರಕ್ಕೂ ಹೆಚ್ಚು ಕ್ಯುಸೆಕ್‌ ನೀರನ್ನು ಹೊರ​ಬಿ​ಡ​ಲಾ​ಗಿದೆ.

ಘನ ವಾಹನಕ್ಕೆ ನಿಷೇ​ಧ​: ಮಡಿ​ಕೇ​ರಿ-ಮಂಗ​ಳೂರು ರಸ್ತೆಯ ಅಲ್ಲಲ್ಲಿ ಗುಡ್ಡ​ಕು​ಸಿ​ಯು​ತ್ತಿದ್ದು, ಮುನ್ನೆ​ಚ್ಚ​ರಿಕಾ ಕ್ರಮ​ವಾಗಿ ಮಣ್ಣು ತೆರ​ವಾ​ಗು​ವ​ವ​ರೆಗೂ ಈ ರಸ್ತೆ​ಯಲ್ಲಿ ಘನ ವಾಹ​ನ​ಗಳ ಸಂಚಾ​ರ ನಿಷೇ​ಧಿ​ಸ​ಲಾ​ಗಿದೆ.