WhatsApp ನಲ್ಲಿ ಅಪ್ಪಿತಪ್ಪಿಯೂ ಈ ತಪ್ಪುಗಳನ್ನ ಮಾಡಬೇಡಿ, ಮಾಡಿದ್ರೆ ಜೈಲೂಟ ಫಿಕ್ಸ್!

Whatsapp: ಇತ್ತೀಚಿನ ದಿನಗಳಲ್ಲಿ WhatsApp ಎಂಬುದು ಬರೀ ಆಪ್ ಅಲ್ಲ, ನಮ್ಮ ಜೀವನದ ಪ್ರಮುಖ ಭಾಗವಾಗಿದೆ. ನಾವು ದಿನವಿಡೀ ಅದರಲ್ಲಿ ಸಂದೇಶಗಳನ್ನು ಕಳುಹಿಸುತ್ತೇವೆ, ವೀಡಿಯೊಗಳು ಮತ್ತು ಫೋಟೋಗಳನ್ನು ಹಂಚಿಕೊಳ್ಳುತ್ತೇವೆ. ಅಷ್ಟೇ ಅಲ್ಲ ವಿವಿಧ ವಹಿವಾಟುಗಳು, ಹಣಕಾಸಿನ ವ್ಯವಹಾರಗಳಿಗೂ ವಾಟ್ಸಪ್ ಬಳಸುತ್ತಿದ್ದೇವೆ. ಎಷ್ಟೆಲ್ಲ ಉಪಯೋಗವಿದ್ದರೂ, ನಾವು ಮಾಡುವ ತಪ್ಪಿನಿಂದ,  WhatsApp ದುರ್ಬಳಕೆಯಿಂದ ಜೈಲು ಕಂಬಿ ಹಿಂದೆ ಕೂಡಬೇಕಾಗಹುದು. ಹೌದು ವಾಟ್ಸಪ್‌ನಲ್ಲಿ ಈ ತಪ್ಪು ಮಾಡಿದ್ರೆ ಜೈಲಿಗೆ ಹೋಗುವುದು ಗ್ಯಾರಂಟಿ. 

ವಾಟ್ಸಾಪ್ ಮೂಲಕ ಯಾವ ಕೆಲಸ ಮಾಡುವುದು ಕಾನೂನು ಅಪರಾಧ? ಅವುಗಳನ್ನು ತಪ್ಪಿಸುವುದು ಹೇಗೆ ಅನ್ನೋದು ಇಲ್ಲಿ ತಿಳಿದುಕೊಳ್ಳೋಣ.

WhatsApp ನಲ್ಲಿ ಅಶ್ಲೀಲ, ಹಿಂಸಾತ್ಮಕ ಅಥವಾ ಧಾರ್ಮಿಕವಾಗಿ ಆಕ್ಷೇಪಾರ್ಹ ವಿಷಯವನ್ನು ಕಳುಹಿಸುವುದು ಭಾರತೀಯ ಕಾನೂನಿನ ಪ್ರಕಾರ ಅಪರಾಧವಾಗಿದೆ. ಐಟಿ ಆಕ್ಟ್ 2000 ರ ಸೆಕ್ಷನ್ 67 ರ ಅಡಿಯಲ್ಲಿ, ಹಾಗೆ ಮಾಡಿದರೆ ಜೈಲು ಮತ್ತು ದಂಡ ವಿಧಿಸಬಹುದು.

ವಾಟ್ಸಾಪ್ ಗ್ರೂಪ್‌ಗಳಲ್ಲಿ ಸುದ್ದಿ ಕಳುಹಿಸುವುದು ಮತ್ತು ವದಂತಿ, ಕೋಮುಗಲಭೆ ಎಬ್ಬಿಸುವಂತೆ ಸಂದೇಶ, ವಿಡಿಯೋ ಸಂದೇಶ ಕಳಿಸುವುದು, ಹಂಚಿಕೊಳ್ಳುವುದು ಆ ಮೂಲಕ ಸಮಾಜದಲ್ಲಿ ಅಶಾಂತಿ ಸೃಷ್ಟಿಗೆ ಕಾರಣವಾದರೆ ಅಂಥವರ ವಿರುದ್ಧ ಐಪಿಸಿ ಸೆಕ್ಷನ್ 505 ರ ಅಡಿಯಲ್ಲಿ, ನಿಮ್ಮನ್ನು ಜೈಲಿಗೆ ಹಾಕಬಹುದು.
 

WhatsApp ನಲ್ಲಿ ಯಾರಿಗಾದರೂ ಬೆದರಿಕೆ ಅಥವಾ ಬೆದರಿಕೆ ಸಂದೇಶಗಳನ್ನು ಕಳುಹಿಸುವುದು ಕಾನೂನು ಅಪರಾಧವಾಗಿದೆ. ಐಪಿಸಿ ಸೆಕ್ಷನ್ 503 ರ ಅಡಿಯಲ್ಲಿ ಇದು ಗಂಭೀರ ಅಪರಾಧವಾಗಿದ್ದು, ಶಿಕ್ಷೆಯ ನಿಬಂಧನೆ ಇದೆ.
 

ಜನಾಂಗೀಯ, ಧಾರ್ಮಿಕ ಅಥವಾ ಸಾಮಾಜಿಕ ಸ್ವಾಸ್ಥ್ಯ ಹಾಳುಗೆಡುವಂತೆ ಸಂದೇಶ, ವಿಡಿಯೋಗಳನ್ನ ಕಳಿಸುವುದು ಅಪರಾಧ, ನೀವು ವಾಟ್ಸಪ್ ಗ್ರುಪ್ ಅಡ್ಮಿನ್ ಆಗಿದ್ದರೆ ಅಂಥವುಗಳನ್ನು ತಡೆಯಿರಿ, ಇಲ್ಲವಾದಲ್ಲಿ ಕಠಿಣ ಶಿಕ್ಷೆಗೆ ಗುರಿಯಾಗಬಹುದು.

ವಾಟ್ಸಪ್‌ನಲ್ಲಿ ಮಕ್ಕಳಿಗೆ ಸಂಬಂಧಿಸಿದ ಅಶ್ಲೀಲ ವಿಡಿಯೋ, ಹಿಂಸಾತ್ಮಕ ವಿಡಿಯೋಗಳು, ಹಂಚಿಕೊಳ್ಳುವುದು, ಮಕ್ಕಳ ಲೈಂಗಿಕ ದೌರ್ಜನ್ಯಕ್ಕೆ ಸಂಬಂಧಿಸಿದ ಬರಹ, ಪ್ರಚೋದನೆ ವಾಟ್ಸಪ್‌ನಲ್ಲಿ ಚರ್ಚಿಸುವುದು, ಶೇರ್ ಮಾಡಿಕೊಳ್ಳುವುದು ಕಾನೂನುಬಾಹಿರವಾಗಿದೆ. ಹಾಗೆ ಮಾಡಿದರೆ ಪೋಕ್ಸೊ ಕಾಯ್ದೆಯಡಿ ಗಂಭೀರ ಅಪರಾಧವಾಗಿರುತ್ತದೆ.

ಅದೇ ರೀತಿ, ವಾಟ್ಸಪ್‌ನಲ್ಲಿ ಅಧಾರ ಕಾರ್ಡ್, ಪಾಸ್‌ಪೋರ್ಟ್ ಅಥವಾ ಸರ್ಕಾರಿ ದಾಖಲೆಗಳ ನಕಲಿ ಮಾರಾಟ ಮಾಡುವುದು ಅಪರಾಧವಾಗಿದೆ.

ನಿಮ್ಮ ವಾಟ್ಸಪ್‌ನಲ್ಲಿ ಮೇಲೆ ತಿಳಿಸಲಾದ ಯಾವುದೇ ರೀತಿಯ ಸಂದೇಶ, ವಿಡಿಯೋ ಹಂಚಿಕೆಕೊಳ್ಳದಂತೆ ಎಚ್ಚರವಹಿಸಿ, ಬೇರೆ ಯಾರಿಂದಲಾದರೂ ಸ್ವೀಕರಿಸಿದರೆ ಅದರ ಸತ್ಯಾಸತ್ಯತೆ ಪರಿಶೀಲಿಸಿ. ಯಾವುದೇ ಕಾರಣಕ್ಕೂ ತಕ್ಷಣ ಬೇರೆಯವರಿಗೆ ಫಾರ್ವರ್ಡ್ ಮಾಡಬೇಡಿ. WhatsApp ಗುಂಪುಗಳಲ್ಲಿ ಪೋಸ್ಟ್ ಮಾಡಲಾದ ವಿಷಯವನ್ನು ಮೇಲ್ವಿಚಾರಣೆ ಮಾಡಿ. WhatsApp  ಉತ್ತಮ ಸಂವಹನ ಮಾಧ್ಯಮವಾಗಿದೆ, ಆದರೆ ಅದರ ದುರುಪಯೋಗವು ನಿಮ್ಮನ್ನ ಕಾನೂನು ಸಂಕಷ್ಟಕ್ಕೆ ಸಿಲುಕಿಸಬಹುದು. ಹೀಗಾಗಿ ವಾಟ್ಸಪ್ ಅನ್ನು ಜವಾಬ್ದಾರಿಯುತವಾಗಿ ಬಳಸಿ