ಎಂಜಲು ಮುಟ್ಟಿ ನೋಟು ಎಣಿಸಬಾರದು ಯಾಕೆ? ಶಾಸ್ತ್ರದ ಜೊತೆಗಿದೆ ವೈಜ್ಞಾನಿಕ ಕಾರಣ!

ಹಣ ಮಾನವನ ಜೀವನದ ಮೂಲಭೂತ ಅವಶ್ಯಕತೆಯಾಗಿದೆ.  ಒಬ್ಬ ವ್ಯಕ್ತಿ ಹಣವಿಲ್ಲದೆ ಬದುಕಬಹುದು. ಆದರೆ ಹಣವಿಲ್ಲದೆ ನೆಮ್ಮದಿಯಿಂದ ಸಾಯಲು ಸಹ ಸಾಧ್ಯವಿಲ್ಲ ಎಂಬುದು ವಾಸ್ತವ. ಹಣ ಸಂಪಾದಿಸುವುದೇ ಇಲ್ಲಿ ಬದುಕಲು ಒಂದೇ ದಾರಿ. 

ಹೀಗೆ ಸಂಪಾದಿಸುವ ಹಣವನ್ನು ಪ್ರತಿಯೊಬ್ಬರೂ ಒಂದೊಂದು ರೀತಿಯಲ್ಲಿ ನಿರ್ವಹಿಸುತ್ತಾರೆ. ಕೆಲವರು ಹಣವನ್ನು ಎಣಿಸುವಾಗ ಎಂಜಲು ಮುಟ್ಟಿಸಿ  ಒಂದೊಂದು ನೋಟು ಎಣಿಸುತ್ತಾರೆ. ಬ್ಯಾಂಕುಗಳಲ್ಲಿ ಹಣವನ್ನು ಬೃಹತ್ ಪ್ರಮಾಣದಲ್ಲಿ ತೆಗೆದುಕೊಂಡವರು ಹಣವನ್ನು ಎಣಿಸುವುದನ್ನು ನೀವು ಗಮನಿಸಿದ್ದರೆ, ಖಂಡಿತವಾಗಿಯೂ ಅವರ ಕೈಯಲ್ಲಿ ಉಗುಳು ಕರುಹು ಇದ್ದೇ ಇರುತ್ತದೆ. 

ಅಷ್ಟೇ ಅಲ್ಲ, ಕೆಲವರು ಪುಸ್ತಕಗಳನ್ನು ತಿರುವಿಹಾಕುವಾಗ ಎಂಜಲು ಮುಟ್ಟಿ ಪುಟಗಳನ್ನು ತಿರುಗಿಸುತ್ತಾರೆ.  ಕೆಲವು ಕಂಡಕ್ಟರ್‌ಗಳು ಟಿಕೆಟ್ ಕೊಡುವಾಗ ಬಾಯಿಗೆ ಬೆರಳು ತಾಗಿಸಿ ಹರಿದು ಕೊಡುತ್ತಾರೆ.  ಹಲವು ಕಡೆ ಪಾಲಿಥಿನ್  ಕವರ್‌ಗಳನ್ನು ಒಂದೊಂದಾಗಿ ತೆಗೆದುಕೊಳ್ಳಲು ಬಾಯಿಗೆ ಬೆರಳಿಟ್ಟುಕೊಳ್ಳುತ್ತಾರೆ. ಅದೇ ರೀತಿ ಕಾಗದಗಳನ್ನು ತೆಗೆದುಕೊಳ್ಳಲು ಸಹ  ಬಾಯಿಯಲ್ಲಿರುವ ಉಗುಳನ್ನು ಬಳಸಲಾಗುತ್ತದೆ. ಆದರೆ ಹೀಗೆ ಮಾಡುವುದು ತಪ್ಪು ಎಂದು ಕೊರೋನಾ ಸಮಯದಲ್ಲಿ ಅರಿವು ಮೂಡಿಸಲಾಗಿತ್ತು. 

ಕೊರೋನಾ ನಂತಹ ಸಾಂಕ್ರಾಮಿಕ ರೋಗಗಳಿಂದ ತಪ್ಪಿಸಿಕೊಳ್ಳಲು ಜನರು ಸ್ವಲ್ಪ ಸಮಯದವರೆಗೆ ಬಾಯಿಗೆ ಬೆರಳಿಟ್ಟುಕೊಂಡು ಹಣವನ್ನು ನಿರ್ವಹಿಸುವುದನ್ನು ತಪ್ಪಿಸಿದ್ದರು, ಆದರೆ ಇತ್ತೀಚಿನ ದಿನಗಳಲ್ಲಿ ಕೆಲವರು ಹಾಗೆ ಮಾಡುವುದನ್ನು ನೋಡಬಹುದು.  ಒಬ್ಬ ವ್ಯಕ್ತಿಯು ಬಾಯಿಗೆ ಬೆರಳಿಟ್ಟುಕೊಂಡು ಹಣವನ್ನು ಏಕೆ ನಿರ್ವಹಿಸಬಾರದು ಎಂಬುದನ್ನು ಇಲ್ಲಿ ನೋಡೋಣ. 

ಹಿಂದೂ ಶಾಸ್ತ್ರಗಳಲ್ಲಿ ಹಣವನ್ನು ಎಣಿಸುವಾಗ ಬಾಯಿಗೆ ಬೆರಳು ತಾಗಿಸಿ, ಅಥವಾ ಎಂಜಲು ಮುಟ್ಟಿಸಬಾರದು ಅನ್ನೋದಕ್ಕೆ ಒಂದು ಕಾರಣವನ್ನು ಹೇಳಲಾಗಿದೆ. ಅಂದರೆ, ಹಣವನ್ನು ಎಣಿಸುವಾಗ ಉಗುಳನ್ನು ಬಳಸಿದರೆ ವಾಸ್ತು ಪ್ರಕಾರ ಅದು ತಪ್ಪು. ಹೀಗೆ ಮಾಡುವುದರಿಂದ ಸಂಪತ್ತಿನ ದೇವತೆಯಾದ ಲಕ್ಷ್ಮಿ ದೇವಿಯನ್ನು ಅವಮಾನಿಸಿದಂತೆ ಆಗುತ್ತದೆ. ಹೀಗೆ ಮಾಡುವವರ ಕೈಯಲ್ಲಿ ಹಣ ಉಳಿಯುವುದಿಲ್ಲವಂತೆ. ಅವರ  ಜೀವನದುದ್ದಕ್ಕೂ ಹಣಕಾಸಿನ ಸಮಸ್ಯೆಯಲ್ಲಿಯೇ ಇರುತ್ತಾರಂತೆ. 

ಹಣವನ್ನು ಬಾಯಿಗೆ ಬೆರಳಿಟ್ಟುಕೊಂಡು ಎಣಿಸಬಾರದು ಎಂಬುದಕ್ಕೆ ವೈಜ್ಞಾನಿಕ ಕಾರಣವೂ ಇದೆ. ಪ್ರಸ್ತುತ ಚಲಾವಣೆಯಲ್ಲಿರುವ ಹಣವು ಕೋಟ್ಯಂತರ ಜನರ ಕೈಗಳಲ್ಲಿ ಸುತ್ತಾಡಿದೆ.  ಹೀಗೆ ಹಲವರ ಕೈಗಳಿಂದ ಬದಲಾಗಿ ಬಂದಿರುವ ರೂಪಾಯಿ ನೋಟುಗಳ ಮೇಲೆ ಸಾರ್ವಜನಿಕ ಶೌಚಾಲಯದ ಬಾಗಿಲಿಗಿಂತ ಹೆಚ್ಚು ಸೂಕ್ಷ್ಮಜೀವಿಗಳು ಇರಬಹುದು ಎಂದು ಹೇಳಲಾಗುತ್ತದೆ. ಆದ್ದರಿಂದ ಅವುಗಳನ್ನು ಎಣಿಸುವಾಗ ಬೆರಳಿಗೆ ಉಗುಳನ್ನು ಹಚ್ಚುವುದು ಆರೋಗ್ಯಕ್ಕೆ ಒಳ್ಳೆಯದಲ್ಲ. 

ರೂಪಾಯಿ ನೋಟಿನ ಮೇಲೆ  ಕಂಡುಬರುವ ಕೆಲವು ಸೂಕ್ಷ್ಮಜೀವಿಗಳು ಬೆರಳುಗಳಿಗೆ ಅಂಟಿಕೊಂಡರೂ ಅದರಿಂದ ಆರೋಗ್ಯಕ್ಕೆ ಹೆಚ್ಚಿನ ಹಾನಿ ಉಂಟಾಗುವುದಿಲ್ಲ.  ಆದರೆ ಕೆಲವರು ಹಣವನ್ನು ಎಣಿಸಿದ ನಂತರ ಪದೇ ಪದೇ ಬಾಯಿಗೆ ಬೆರಳು ಹಾಕಿಕೊಳ್ಳುತ್ತಾರೆ. ಇಂತಹವರಲ್ಲಿ ಕೆಲವರಿಗೆ ಹೊಟ್ಟೆ ಉಬ್ಬುವುದು ಮುಂತಾದ ಸಮಸ್ಯೆಗಳು ಕಾಣಿಸಿಕೊಳ್ಳಬಹುದು.

ಏಕೆಂದರೆ ರೂಪಾಯಿ ನೋಟುಗಳಲ್ಲಿ ಅಂಟಿಕೊಂಡಿರುವ ಕೆಲವು ಬಗೆಯ ಬ್ಯಾಕ್ಟೀರಿಯಾಗಳು ಈ ಸಮಸ್ಯೆಯನ್ನು ಉಂಟುಮಾಡಬಹುದು ಎಂದು ತಜ್ಞರು ಹೇಳುತ್ತಾರೆ. ಕೆಲವರಿಗೆ ಚರ್ಮ ರೋಗಗಳು ಕಾಣಿಸಿಕೊಳ್ಳಬಹುದು. ಆದ್ದರಿಂದಲೇ ಹಣವನ್ನು ಎಣಿಸುವಾಗ ಬೆರಳಿಗೆ ಉಗುಳನ್ನು ಹಚ್ಚಬಾರದು ಎಂದು ಹೇಳಲಾಗುತ್ತದೆ. ವಿಶೇಷವಾಗಿ ಹಣವನ್ನು ಎಣಿಸಿದ ನಂತರ ಸೋಪು ಹಾಕಿ ಕೈಗಳನ್ನು ಚೆನ್ನಾಗಿ ತೊಳೆಯಬೇಕು. ಒಂದು ವೇಳೆ ನೀವು ಹಣವನ್ನು
 ಎಣಿಸಿದ ನಂತರ ಕೈಗಳನ್ನು ಚೆನ್ನಾಗಿ ತೊಳೆಯದಿದ್ದರೆ, ಸೂಕ್ಷ್ಮಜೀವಿಗಳ ಸೋಂಕು ಉಂಟಾಗುವ ಸಾಧ್ಯತೆ ಇರುತ್ತದೆ. 

ಹಣವು ಕೇವಲ ಕಾಗದವಲ್ಲ. ಅದು ಕಣ್ಣಿಗೆ ಕಾಣದ ಬ್ಯಾಕ್ಟೀರಿಯಾ, ವೈರಸ್‌ಗಳು ಮತ್ತು ಇತರ ಸೂಕ್ಷ್ಮಜೀವಿಗಳನ್ನು ಹರಡುವ ಮಾಧ್ಯಮ. ಅದನ್ನು ಮುಟ್ಟುವಾಗ ಬಾಯಿಗೆ ಬೆರಳು ಹಾಕಿಕೊಂಡರೆ ನಿಮಗೆ ಅನಾರೋಗ್ಯ ಉಂಟಾಗುವ ಸಾಧ್ಯತೆ ಇರುತ್ತದೆ. 

ಕೊಳೆ:

ರೂಪಾಯಿ ನೋಟುಗಳು ಕೊಳೆ, ಧೂಳು ಮುಂತಾದ ಕಲ್ಮಶಗಳನ್ನು ಹೊಂದಿರುತ್ತವೆ. ಅವುಗಳನ್ನು ಎಣಿಸುವಾಗ ಬಾಯಿಗೆ ಬೆರಳು ಹಾಕಿಕೊಂಡರೆ ಆ ಕೊಳಕು ನಮ್ಮೊಳಗೆ ಹೋಗುವ ಅಪಾಯ ಇರುತ್ತದೆ. 
 
ರಾಸಾಯನಿಕಗಳು: 

ಕೆಲವು ರೂಪಾಯಿ ನೋಟುಗಳಲ್ಲಿ ಮುದ್ರಿಸಿದ ಶಾಯಿ ಅಥವಾ ಸುರಕ್ಷತೆಗಾಗಿ ಹಚ್ಚಿದ  ರಾಸಾಯನಿಕಗಳ ಕುರುಹು ಇರಬಹುದು. ಅದನ್ನು ತಿಳಿಯದೆ ನಾವು ಸೇವಿಸಿದರೆ ಆರೋಗ್ಯಕ್ಕೆ ಹಾನಿಕಾರಕ. 

ಉಗುಳಿನ ಹಾನಿ: 

ಹಣವನ್ನು ಬಾಯಿಯಲ್ಲಿರುವ ಉಗುಳಿನಿಂದ ಎಣಿಸುವಾಗ ಅದು ಹಾಳಾಗಬಹುದು. ಸ್ವಲ್ಪ ಹಳೆಯ ನೋಟಾಗಿದ್ದರೆ ಹರಿದು ಹೋಗುವ ಅಪಾಯ ಇರುತ್ತದೆ. ಅದನ್ನು ನಂತರ ಬಳಸಲು ಸಾಧ್ಯವಾಗುವುದಿಲ್ಲ. 

ವೃತ್ತಿಪರತೆ: 

ಹಣಕ್ಕೆಂದೇ ಒಂದು ಗೌರವ ಇದೆ. ಹಣವನ್ನು ಎಣಿಸುವಾಗ ಬಾಯಿಗೆ ಬೆರಳಿಟ್ಟುಕೊಂಡು ಹಣವನ್ನು ಮುಟ್ಟುವುದು ವೃತ್ತಿಪರ ನಡವಳಿಕೆಯಲ್ಲ. ಇದರಿಂದ ಗ್ರಾಹಕರ ಮುಂದೆ ಅಥವಾ ಸಹೋದ್ಯೋಗಿಗಳ ಮುಂದೆ ನಿಮ್ಮ ಗೌರವ ಕಡಿಮೆಯಾಗಬಹುದು.  ಅದು ಅಶುಚಿಯಾದ ನಡವಳಿಕೆ ಎನಿಸುತ್ತದೆ.  

ಹಣವನ್ನು ಎಣಿಸಲು ಉಗುಳಿನ ಬದಲು ಇದನ್ನು ಬಳಸಬಹುದು.. 

ನೀವು ಹಣವನ್ನು ಎಣಿಸಲು ಒದ್ದೆ ಬೆರಳುಗಳ ಬದಲು  ಒಣ ಬೆರಳುಗಳನ್ನು ಬಳಸಬಹುದು. ಬರಿಗೈಯಲ್ಲಿ ಹಣವನ್ನು ಎಣಿಸದೆ ಕೈಗವಸುಗಳನ್ನು ಧರಿಸಬಹುದು. ಒಂದು ದಿನದಲ್ಲಿ ಹೆಚ್ಚು ಹಣ ವ್ಯವಹರಿಸುವವರು ಕೈಗವಸು ಧರಿಸಬಹುದು. ವ್ಯಾಪಾರ ಸ್ಥಳಗಳಲ್ಲಿ ಹಣ ಎಣಿಸುವ ಯಂತ್ರಗಳನ್ನು ಬಳಸಬಹುದು. ವೆಟ್ ಟಿಷ್ಯೂ (wet tissue) ಎಂಬ ಒದ್ದೆ ಟಿಷ್ಯೂ ಪೇಪರ್‌ಗಳನ್ನು ಬಳಸಬಹುದು. ನೀವು ಹಣವನ್ನು ಎಣಿಸುವಾಗ ನೈರ್ಮಲ್ಯವನ್ನು ಕಾಪಾಡಿಕೊಳ್ಳುವುದು ಅತ್ಯಗತ್ಯ. ವಿಶೇಷವಾಗಿ ವೃತ್ತಿಪರ ಸಂಸ್ಥೆಗಳು ಉತ್ತಮ ನೈರ್ಮಲ್ಯವನ್ನು ಕಾಪಾಡಿಕೊಳ್ಳುವುದು ಮತ್ತು ಹಣವನ್ನು ಸರಿಯಾಗಿ ನಿರ್ವಹಿಸುವುದು ಮುಖ್ಯ.