ರೋಹಿತ್ ಶರ್ಮಾ ಆರ್ಸಿಬಿ ಬರ್ತಾರಾ? ಅಚ್ಚರಿಯ ಮಾಹಿತಿ ಬಿಚ್ಚಿಟ್ಟ ಎಬಿ ಡಿವಿಲಿಯರ್ಸ್!
ಐಪಿಎಲ್ 2025 ರಲ್ಲಿ ರೋಹಿತ್ ಶರ್ಮಾ ಆರ್ಸಿಬಿಗೆ ಹೋಗ್ತಾರಾ ಅನ್ನೋ ನಿರೀಕ್ಷೆ ಫ್ಯಾನ್ಸ್ಗಳಲ್ಲಿ ಹೆಚ್ಚಾಗಿದೆ. ಆದ್ರೆ ರೋಹಿತ್ ಶರ್ಮಾ ಅವರನ್ನ ಮುಂಬೈ ಇಂಡಿಯನ್ಸ್ ಕೈಬಿಡುತ್ತಾ ಎನ್ನುವ ಬಗ್ಗೆ ಇನ್ನು ಯಾವುದೇ ಕ್ಲಾರಿಟಿ ಸಿಕ್ಕಿಲ್ಲ. ಹೀಗಿರುವಾಗಲೇ ಎಬಿ ಡಿವಿಲಿಯರ್ಸ್ ಅಚ್ಚರಿಯ ಮಾಹಿತಿ ಬಿಚ್ಚಿಟ್ಟಿದ್ದಾರೆ.
ಮುಂಬೈ ಇಂಡಿಯನ್ಸ್ ಫ್ರಾಂಚೈಸಿಯು ರೋಹಿತ್ ಶರ್ಮಾ ಅವರನ್ನ ರಾಯಲ್ ಚಾಲೆಂಜರ್ಸ್ ಬೆಂಗಳೂರಿಗೆ ಬಿಡುತ್ತದೆ ಎನ್ನುವಂತಹ ಹೆಡ್ಲೈನ್ ನೋಡೋದೇ ಕಷ್ಟ ಅಂತ ಆರ್ಸಿಬಿ ಮಾಜಿ ಆಟಗಾರ ಎಬಿ ಡಿವಿಲಿಯರ್ಸ್ ಹೇಳಿದ್ದಾರೆ. ಐಪಿಎಲ್ 2025 ರ ಆಟಗಾರರ ಪಟ್ಟಿ ಬಿಡುಗಡೆಗೆ ದಿನಾಂಕ ಹತ್ತಿರವಾಗ್ತಿದ್ದಂತೆ, ಪ್ರತಿ ತಂಡಗಳು ಚರ್ಚೆಯಲ್ಲಿ ಬ್ಯುಸಿಯಾಗಿವೆ. ಆದ್ರೆ, ಐಪಿಎಲ್ 2025 ಅಂದ್ರೆ ಎಲ್ಲರ ಬಾಯಲ್ಲೂ ಇರೋ ಹೆಸರು ಎಂ.ಎಸ್.ಧೋನಿ ಮತ್ತು ರೋಹಿತ್ ಶರ್ಮಾ. ಯಾಕಂದ್ರೆ ಇಬ್ಬರೂ ತಮ್ಮ ತಂಡದ ನಾಯಕತ್ವದಿಂದ ಕೆಳಗಿಳಿದಿದ್ದಾರೆ. ಧೋನಿ ಸ್ವಂತ ಇಚ್ಛೆಯಿಂದ ಸಿಎಸ್ಕೆ ನಾಯಕತ್ವ ಬಿಟ್ಟಿದ್ದಾರೆ. ಅವರ ಜಾಗಕ್ಕೆ ಋತುರಾಜ್ ಗಾಯಕ್ವಾಡ್ ಬಂದಿದ್ದಾರೆ. ಆದ್ರೆ, ಮುಂಬೈ ಇಂಡಿಯನ್ಸ್ನಲ್ಲಿ ಪರಿಸ್ಥಿತಿ ಹಾಗಿಲ್ಲ. ರೋಹಿತ್ ಶರ್ಮಾ 10 ವರ್ಷಗಳ ಕಾಲ ಮುಂಬೈ ಪರ ಆಡಿ, ಯಾವ ನಾಯಕನೂ ಮಾಡದ ಸಾಧನೆ ಮಾಡಿ ತೋರಿಸಿದ್ದಾರೆ.
ರೋಹಿತ್ ಶರ್ಮಾ ಬರೋಬ್ಬರಿ ಐದು ಬಾರಿ ಮುಂಬೈ ಇಂಡಿಯನ್ಸ್ಗೆ ಟ್ರೋಫಿ ಗೆಲ್ಲಿಸಿಕೊಟ್ಟಿದ್ದಾರೆ. ಮೊದಲ ಬಾರಿಗೆ ಒಂದು ತಂಡಕ್ಕೆ 5 ಬಾರಿ ಐಪಿಎಲ್ ಟ್ರೋಫಿ ಗೆಲ್ಲಿಸಿಕೊಟ್ಟ ಕೀರ್ತಿ ರೋಹಿತ್ ಶರ್ಮಾ ಅವರಿಗೆ ಸಲ್ಲುತ್ತದೆ. ನಂತರ ಧೋನಿ ಸಿಎಸ್ಕೆಗೆ 5ನೇ ಬಾರಿಗೆ ಟ್ರೋಫಿ ಗೆಲ್ಲಿಸಿಕೊಟ್ಟರು. ಇದು ಎಲ್ಲರಿಗೂ ತಿಳಿದಿರುವ ವಿಚಾರ. ಕಳೆದ ಸೀಸನ್ಗೂ ಮುನ್ನ ನಡೆದ ಐಪಿಎಲ್ ಹರಾಜಿನಲ್ಲಿ ಗುಜರಾತ್ ಟೈಟಾನ್ಸ್ನಿಂದ ಹಾರ್ದಿಕ್ ಪಾಂಡ್ಯಾ ಅವರನ್ನ ಮುಂಬೈ ಇಂಡಿಯನ್ಸ್ ತಂಡಕ್ಕೆ ಕರೆತಂದು ನಾಯಕರನ್ನಾಗಿ ಮಾಡಿತು. ಇದು ಮುಂಬೈ ಆಟಗಾರರಿಗೆ ಮಾತ್ರವಲ್ಲದೆ, ಅಭಿಮಾನಿಗಳಿಗೂ ಆಘಾತವನ್ನುಂಟು ಮಾಡಿತು. ಇದರಿಂದಾಗಿ ರೋಹಿತ್ ಶರ್ಮಾ ಅಭಿಮಾನಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ಮುಂಬೈ ತಂಡವನ್ನು ಅನ್ಫಾಲೋ ಮಾಡಲು ಪ್ರಾರಂಭಿಸಿದರು.
ಒಮ್ಮೆಯೂ ಟ್ರೋಫಿ ಗೆಲ್ಲದ ಆರ್ಸಿಬಿಗೆ ರೋಹಿತ್ ಶರ್ಮಾ ಬಂದರೆ ವಿರಾಟ್ ಕೊಹ್ಲಿ ಮತ್ತು ರೋಹಿತ್ ಶರ್ಮಾ ಇಬ್ಬರೂ ಸೇರಿ ಮೊದಲ ಬಾರಿಗೆ ಆರ್ಸಿಬಿ ಪರ ಐಪಿಎಲ್ ಟ್ರೋಫಿಯನ್ನು ಮುತ್ತು ಕೊಡುತ್ತಾರೆ. ಇದು ಪ್ರತಿಯೊಬ್ಬ ಆಟಗಾರರು, ಅಭಿಮಾನಿಗಳ ಕನಸಾಗಿದೆ. ಈ ಕನಸು ನನಸಾಗಬೇಕಾದರೆ, ಮೊದಲು ಮುಂಬೈ ಇಂಡಿಯನ್ಸ್ ರೋಹಿತ್ ಶರ್ಮಾ ಅವರನ್ನು ಬಿಡುಗಡೆ ಮಾಡಬೇಕು. ಇದೆಲ್ಲ ಸಾಧ್ಯವೇ ಅಂದ್ರೆ ಇಲ್ಲ. ಈ ಬಗ್ಗೆ ಆರ್ಸಿಬಿ ಮಾಜಿ ಆಟಗಾರ ಮಿಸ್ಟರ್ 360 ಡಿಗ್ರಿ ಎಂದೇ ಖ್ಯಾತಿ ಪಡೆದಿರುವ ಎಬಿ ಡಿವಿಲಿಯರ್ಸ್ ಹೇಳಿರುವುದನ್ನು ನೋಡೋಣ. ರೋಹಿತ್ ಶರ್ಮಾ ಆರ್ಸಿಬಿಗೆ ಹೋದರೆ ಅದು ದೊಡ್ಡ ಸುದ್ದಿಯಾಗುತ್ತದೆ. ಆದರೆ ಅದು ನಡೆಯುವ ಸಾಧ್ಯತೆ ಇಲ್ಲ.
ಹಾರ್ದಿಕ್ ಪಾಂಡ್ಯ ಗುಜರಾತ್ನಿಂದ ಮುಂಬೈಗೆ ಹೇಗೆ ಬಂದರು ಎಂಬುದಕ್ಕಿಂತ ದೊಡ್ಡ ಸುದ್ದಿಯಾಗುತ್ತದೆ. ಆದರೆ, ರೋಹಿತ್ ಶರ್ಮಾ ಮುಂಬೈಯಿಂದ ಹೊರಬಂದು ಆರ್ಸಿಬಿಗೆ ಸೇರಿದರೆ ದೇವರೇ. ಅಂತಹ ಸಾಧ್ಯತೆ ಇಲ್ಲ ಎಂದು ನಾನು ಭಾವಿಸುವುದಿಲ್ಲ. ಅದರ ಸಾಧ್ಯತೆ ಶೇ.0 ರಿಂದ ಶೇ.0.1 ರಷ್ಟಿದೆ ಎಂದು ನಾನು ಭಾವಿಸುತ್ತೇನೆ ಎಂದು ಹೇಳಿದ್ದಾರೆ.
ಹಾರ್ದಿಕ್ ಪಾಂಡ್ಯ ನಾಯಕತ್ವದ ಮುಂಬೈ ಇಂಡಿಯನ್ಸ್ 14 ಪಂದ್ಯಗಳಲ್ಲಿ 4 ಗೆಲುವು, 10 ಸೋಲುಗಳೊಂದಿಗೆ ಐಪಿಎಲ್ 2024 ರ ಪಾಯಿಂಟ್ ಪಟ್ಟಿಯಲ್ಲಿ ಕೊನೆಯ ಸ್ಥಾನದೊಂದಿಗೆ ಹೊರಬಿದ್ದಿತು. ಹಾರ್ದಿಕ್ 2022 ರ ಸೀಸನ್ನಲ್ಲಿ ಗುಜರಾತ್ ಟೈಟಾನ್ಸ್ ಪರ ಟ್ರೋಫಿ ಗೆದ್ದಿದ್ದರು. 2023 ರ ಸೀಸನ್ನಲ್ಲಿ ಗುಜರಾತ್ ತಂಡವು ಫೈನಲ್ಗೆ ತಲುಪಿತು. ಆದರೆ ಸಿಎಸ್ಕೆ ವಿರುದ್ಧ ಸೋತು ಸತತ ಎರಡನೆ ಬಾರಿಗೆ ಟ್ರೋಫಿ ಗೆಲ್ಲುವ ಅವಕಾಶವನ್ನು ಕಳೆದುಕೊಂಡಿತು.
ಐಪಿಎಲ್ ಇತಿಹಾಸದಲ್ಲಿ ವಿರಾಟ್ ಕೊಹ್ಲಿ ಮಾತ್ರ ಒಂದೇ ತಂಡಕ್ಕೆ ಆಡಿದ್ದಾರೆ. ಕೊಹ್ಲಿ ಇದುವರೆಗೆ ಆಡಿರುವ 252 ಪಂದ್ಯಗಳಲ್ಲಿ 55 ಅರ್ಧಶತಕಗಳು, 8 ಶತಕಗಳೊಂದಿಗೆ ಒಟ್ಟು 8004 ರನ್ ಗಳಿಸಿದ್ದಾರೆ. ಐಪಿಎಲ್ನಲ್ಲಿ ವಿರಾಟ್ ಕೊಹ್ಲಿ 15 ಕೋಟಿ ರೂ.ಗೆ ಆಡುತ್ತಿದ್ದರೆ, ರೋಹಿತ್ ಶರ್ಮಾ 16 ಕೋಟಿ ರೂ.ಗೆ ಆಡುತ್ತಿದ್ದಾರೆ. ನಾಯಕನಾಗಿ ರೋಹಿತ್ ಶರ್ಮಾ 158 ಪಂದ್ಯಗಳಲ್ಲಿ ಆಡಿದ್ದು, 87 ಪಂದ್ಯಗಳಲ್ಲಿ ಗೆಲುವು ಸಾಧಿಸಿದ್ದಾರೆ. ಅದರೊಂದಿಗೆ 67 ಪಂದ್ಯಗಳಲ್ಲಿ ಸೋಲು ಅನುಭವಿಸಿದ್ದಾರೆ ಮತ್ತು 4 ಪಂದ್ಯಗಳು ಡ್ರಾ ಆಗಿವೆ. ಗೆಲುವಿನ ಶೇಕಡಾವಾರು 55.06 ರಷ್ಟಿದೆ.