ಪ್ರೀತಿ ಪ್ರೇಮ ಅಂದರೆ.... ಇವರು ಹೇಳ್ತಾರೆ ನೀವು ಮಾಡಿ!
ಪ್ರೀತಿಯೆಂದರೇನು ಅಂತ ಲೋಕಕ್ಕೇ ಹೇಳಿಕೊಡುವವರು ಇವರು. ಪ್ರೇಮಚಿತ್ರಗಳಲ್ಲಿ ನಾಚಿ, ಬಳುಕಿ, ಮುಗುಳ್ನಕ್ಕು, ಮಂದಹಾಸ ಸೂಸಿ, ಮಿನುಗಿ, ಮರ ಸುತ್ತಿ, ಕೈ ಹಿಡಿದು ಕರಗಿ ನೋಡುಗರನ್ನೂ ಕರಗಿಸುವ ಈ ಕಿನ್ನರ ಕಿನ್ನರಿಯರು ವ್ಯಾಲೆಂಟೇನ್‌ ದಿನದಂದು ತಮ್ಮ ಪ್ರಕಾರ ಪ್ರೀತಿ ಏನು ಅನ್ನೋದನ್ನು ಹೇಳಿಕೊಂಡಿದ್ದಾರೆ. ಓದಿ, ಪ್ರೀತಿ ಮಾಡಿ!
Follow1. ರಚಿತಾ ರಾಮ್‌, ನಟಿ
ಪ್ರೀತಿ ಅಂದರೇನು ಎಂದರೆ ಒಂದು ವಾಕ್ಯದಲ್ಲಿ ಹೇಳಲಾಗದು. ಅದು ಸ್ವಚ್ಚವಾದ ಮನಸ್ಸಿನ ಭಾವನೆ. ಅದಕ್ಕೆ ವಿಶಾಲವಾದ ಅರ್ಥವಿದೆ. ಪ್ರೀತಿ ಎಲ್ಲರ ಮೇಲೂ, ಎಲ್ಲ ವಿಚಾರದಲ್ಲೂ ಆಗುತ್ತದೆ. ನಾವು ಮಾಡೋ ಕೆಲಸ, ಅಣ್ಣ- ಅಕ್ಕ, ತಂಗಿ, ಅಮ್ಮ- ಅಪ್ಪ ಹೀಗೆ ಎಲ್ಲ ಸಂಬಂಧಗಳಲ್ಲೂ ಪ್ರೀತಿ ಹುಟ್ಟುಕೊಳ್ಳುತ್ತದೆ. ಆದರೆ, ಹುಡುಗ ಅಥವಾ ಹುಡುಗಿ ತಮ್ಮ ವೈಯಕ್ತಿಕ ಜೀವನ ಇವರ ಜತೆಗೆ ಅಂತ ನಿರ್ಧರಿಸಿಕೊಂಡಾಗ ಮನಸ್ಸಿನಲ್ಲಿ ಹುಟ್ಟಿಕೊಳ್ಳುವ ಭಾವನೆಗಳು ಇವೆಯಲ್ಲ ಅದು ಪ್ರೀತಿ. ನಾನು ಇಂಥ ನಿಜವಾದ ಪ್ರೀತಿಯನ್ನು ಮೊದಲು ನೋಡಿದ್ದೇ ನನ್ನ ತಂದೆ- ತಾಯಿ ಅವರಲ್ಲಿ. ಏನೇ ಜಗಳ, ಕೋಪ, ಮುನಿಸು ಬಂದರೂ ಇಬ್ಬರೂ ಇಷ್ಟುವರ್ಷ ಆದರೂ ಜತೆಗೆ ಇದ್ದಾರಲ್ಲ ಅವರಿಗಿಂತ ನಿಜವಾದ ಪ್ರೇಮಿಗಳನ್ನ ನಾನು ನೋಡಿಲ್ಲ. ನಂಬಿ, ನಾನು ಪ್ರತಿ ವರ್ಷ ಪ್ರೇಮಿಗಳ ದಿನವನ್ನು ಆಚರಿಸುವುದು ನನ್ನ ಅಪ್ಪ ಅಮ್ಮನ ಜತೆಗೆ.
ಯಾರೋ ಮೋಹನ ಯಾವ ರಾಧೆಗೋ ಪಡುತಿರುವನು ಪರಿತಾಪ;ಒಂದು ಮಧುರ ಕಥಾ ಪ್ರಸಂಗ!
ಒಂದು ಹಾರ್ಟ್‌ ಆಕಾರದ ರೆಡ್‌ ಕೇಕ್‌ ತರಿಸಿ ಅಪ್ಪ- ಅಮ್ಮನ ಕೈಯಲ್ಲಿ ಆ ಕೇಕ್‌ ಕಟ್‌ ಮಾಡಿಸುತ್ತೇನೆ. ಆ ಕ್ಷಣ ಅವರಿಬ್ಬರಲ್ಲೂ ಕಾಣುವ ನಾಚಿಕೆ, ನಗು, ಸಂಭ್ರಮವೇ ನನಗೆ ಪ್ರೇಮಿಗಳ ದಿನ ಮತ್ತು ಪ್ರೀತಿ ಎಂದರೇನು ಎನ್ನುವುದಕ್ಕೆ ಅರ್ಥ ಸಿಗುತ್ತಿದೆ. ನಂಬಿಕೆ, ಪ್ರಾಮಾಣಿಕತೆ, ಪರಸ್ಪರ ಅರ್ಥ ಮಾಡಿಕೊಳ್ಳುವ ಗುಣ ಪ್ರೀತಿಗೆ ಇದೆ. ಮದುವೆ ಆದ ಮೇಲೂ ತಮ್ಮ ಸಂಗಾತಿಯನ್ನು ಪ್ರೀತಿಸುವುದು ಇದೆಯಲ್ಲ ಅದೇ ನಿಜವಾದ ಲವ್ವು. ಒಂದು ಗುಲಾಬಿ ಕೊಟ್ಟು ಈ ವರ್ಷ ಐ ಲವ್‌ ಯೂ ಅಂತೇಳಿ, ಮತ್ತೊಂದು ವರ್ಷ ಅದೇ ರೀತಿಯ ಗುಲಾಬಿ ಇನ್ನೊಬ್ಬರಿಗೆ ಕೊಟ್ಟು ಐ ಲವ್‌ ಯೂ ಅನ್ನುವುದು ಇದೆಯಲ್ಲ ಅದೇ ಪ್ರೀತಿಯನ್ನು ಕೊಲ್ಲುತ್ತಿರುವುದು. ಹೀಗಾಗಿ ನಮ್ಮ ಜನರೇಷನ್‌ಗೆ ಪ್ರೀತಿ ಅನ್ನೋದು ಬರೀ ಟೈಮ್‌ ಪಾಸ್‌ ಆಚರಣೆ. ರೋಜಾ, ಮಿಲನಾ, ಮಿಸ್ಟರ್‌ ಆಂಡ್‌ ಮಿಸಸ್‌ ರಾಮಾಚಾರಿ, ಅರ್ಜುನ್‌ ರೆಡ್ಡಿ... ನಾನು ನೋಡಿ ಮೆಚ್ಚಿದ ಅತ್ಯುತ್ತ ಪ್ರೇಮ ಕತೆಯ ಚಿತ್ರಗಳು.
2. ಅದಿತಿ ಪ್ರಭುದೇವ, ನಟಿ
ಪ್ರೀತಿಗೆ ತುಂಬಾ ಜನ ಹಲವು ರೀತಿಯ ಅರ್ಥ ಮತ್ತು ವ್ಯಾಪ್ತಿಯನ್ನು ಕೊಟ್ಟಿದ್ದಾರೆ. ಆದರೆ, ನನ್ನ ಪ್ರಕಾರ ಪ್ರೀತಿ ಎಂದರೆ ಜವಾಬ್ದಾರಿ. ಇಲ್ಲಿ ಹುಡುಗ ಮತ್ತು ಹುಡುಗಿ ಇಬ್ಬರೂ ಪರಸ್ಪರ ಜವಾಬ್ದಾರಿಯುತವಾಗಿ ಜೀವನ ನಡೆಯುಸುದೇ ಪ್ರೀತಿ. ಹಾಗಂತ ಪ್ರೀತಿ ಕೇವಲ ಹುಡುಗ- ಹುಡುಗಿ ಮೇಲೆ, ಹುಡುಗಿಗೆ ಹುಡುಗನ ಮೇಲೆ ಆಗುವಂತದ್ದಲ್ಲ. ನಮ್ಮ ಜೀವನದಲ್ಲಿ ಎದುರಾಗುವ ಎಲ್ಲ ಸಂಬಂಧಗಳನ್ನೂ ಸ್ನೇಹದಿಂದ ಕಾಣುವುದು, ಆ ಸಂಬಂಧಗಳನ್ನು ಉಳಿಸಿಕೊಳ್ಳುವುದು ಕೂಡ ಪ್ರೀತಿನೇ. ಆದರೆ, ನಿನ್ನ ಜತೆಗೆ ನಾನು ಜೀವನ ಮಾಡುವೆ ಎಂದು ಹೇಳಿಕೊಳ್ಳುವ ಪ್ರೀತಿ ಮುಂದೆ ಮದುವೆ ವರೆಗೂ ಹೋಗುತ್ತದೆ. ಮದುವೆಗೂ ಮೊದಲು ಮತ್ತು ಮದುವೆ ನಂತರವೂ ‘ನಾನು ನಿನಗೆ, ನೀನು ನನಗೆ’ ಎನ್ನುವ ಮಾತು ಕೊನೆಯವರೆಗೂ ಉಳಿಯಬೇಕು.
ಅವನಿಗೆ ಗೊತ್ತಿಲ್ಲ, ಅವಳು ಹೇಳಲ್ಲ; ಇದೊಂದು ಕ್ಯೂಟ್ ಲವ್‌ ಸ್ಟೋರಿ!
ವೈಯಕ್ತಿಕವಾಗಿ ನಾನು ಇಂಥ ಭಾವನಾತ್ಮಕ ಪ್ರೀತಿಗಾಗಿಯೇ ಕಾಯುತ್ತಿದ್ದೇನೆ. ಅಂದರೆ ಜವಾಬ್ದಾರಿಯುತ, ಭಾವನೆಗಳಿಗೆ ಬೆಲೆ ಕೊಡುವ, ಸಂಬಂಧಗಳನ್ನು ಅರ್ಥ ಮಾಡಿಕೊಳ್ಳುವ ಹುಡುಗ ಸಿಗಬೇಕು. ಅಂಥ ಹುಡುಗನ ಜತೆಗೆ ನನ್ನ ಪ್ರೀತಿ ಮತ್ತು ಮದುವೆ ಆಗಬೇಕು ಎನ್ನುವ ಆಸೆ ನನ್ನದು. ಇದು ನಾನು ಕೇವಲ ಹೇಳಿಕೆಗಾಗಿ ಹೇಳುತ್ತಿರುವ ಮಾತಲ್ಲ. ನನ್ನ ಪ್ರೇಮಿ ಕಷ್ಟಕ್ಕೆ ಹೆಗಲು ಕೊಡಬೇಕು. ಅವನ ಗುರಿ ಮತ್ತು ಜೀವನಕ್ಕೆ ನಾನು ಜತೆಯಾಗಿ ನಿಲ್ಲಬೇಕು. ಇಂಥ ಪ್ರಾಮಾಣಿಕ ಪ್ರೀತಿ- ಪ್ರೇಮಿಗಾಗಿ ಎದುರು ನೋಡುತ್ತಿದ್ದೇನೆ. ಇನ್ನೂ ಸಿನಿಮಾ ವಿಚಾರಕ್ಕೆ ಬಂದರೆ ‘ನಾನಿನ್ನ ಮರೆಯಲಾರೆ’ ನಾನು ನೋಡಿ ಮೆಚ್ಚಿದ ಎವರ್ಗ್ರೀನ್ ಪ್ರೇಮ ಕತೆಯ ಸಿನಿಮಾ. ಆ ಚಿತ್ರದಲ್ಲಿ ನಾಯಕಿ ಚೆನ್ನಾಗಿರಬೇಕು ಎಂದು ನಾಯಕ, ನಾಯಕ ಚೆನ್ನಾಗಿರಬೇಕೆಂದು ನಾಯಕಿ... ಹೀಗೆ ಇಬ್ಬರು ಖುಷಿಯಾಗಿರಬೇಕು ಎಂದು ಬಯಸುತ್ತ ಕೊನೆಗೂ ಬಂದು ಜತೆಯಾಗುವ ಸನ್ನಿವೇಶ ಇದೆಯಲ್ಲ, ಅಮೇಜಿಂಗ್‌. ಈ ರೀತಿಯ ಪ್ರೇಮ ಕತೆಗಳು ಈಗ ಬರುತ್ತಿಲ್ಲ ನಿಜ. ಈಗ ಕೇವಲ ಆಚರಣೆಗೆ ಸೀಮಿತ ಮಾಡುತ್ತಿರುವ ಪ್ರೀತಿಯ ನಿಜವಾದ ಅರ್ಥ ತಿಳಿಯಲು ಈ ಸಿನಿಮಾ ನೋಡಬೇಕು.
3. ಹರ್ಷಿಕಾ ಪೂಣಚ್ಚ, ನಟಿ
ಸಂಭ್ರಮಕ್ಕಾಗಿ ಒಂದು ದಿನ ಆಚರಣೆ ಮಾಡುವುದು ಅಥವಾ ಒಂದು ಸಾಲಿನಲ್ಲಿ ಹೇಳುವುದಕ್ಕೆ ಆಗದೆ ಇರುವ ಭಾವನೆ ಅಂದರೆ ಪ್ರೀತಿ. ಜೀವನದಲ್ಲಿ ನಮಗೆ ತುಂಬಾ ಕಮ್ಮಿ ಜನ ಸಿಗುತ್ತಾರೆ. ಅಪ್ಪ- ಅಮ್ಮ, ಸ್ನೇಹಿತರು, ಒಡ ಹುಟ್ಟಿದವರು. ಇವರೆಲ್ಲ ಸದಾ ನಮ್ಮ ಜತೆಗೆ ಇರುವವರು. ಆದರೆ, ಏನೇ ಕಷ್ಟಬಂದರೂ, ಏಲೇ ಸಂತೋಷ ಆದರೂ ನಾನು ನಿನ್ನ ಜತೆಗೆ ಇರುತ್ತೇನೆ. ನನ್ನ ಮತ್ತು ನಿನ್ನ ಜೀವನ ಒಟ್ಟಿಗೆ ಸಾಗಲಿ ಎಂದು ತೆರೆದ ಮನಸ್ಸಿನಿಂದ ಹೇಳುವ ಹುಡುಗ ಅಥವಾ ಹುಡುಗಿಯ ಮಾತುಗಳಲ್ಲಿ ನಿಜವಾದ ಪ್ರೀತಿ ಕಾಣುತ್ತೇವೆ. ಪ್ರತಿ ದಿನ ಒಬ್ಬರನ್ನೊಬ್ಬರು ಅರ್ಥ ಮಾಡಿಕೊಂಡು, ನಂಬಿಕೆಯಿಂದ ಜತೆ ಇರುವುದು ಪ್ರೀತಿ. ನನ್ನ ತಂದೆ, ತಾಯಿ ಜಗಳ ಆಡುವುದನ್ನು ನೋಡಿದ್ದೇನೆ. ಆದರೆ, ಊಟ ಮಾಡುವ ಹೊತ್ತಿಗೆ ‘ಆಯ್ತು ಬನ್ನಿ ಊಟ ಮಾಡೋಣ’ ಅಂತ ಕರೆದಾಗ ನನ್ನ ಅಮ್ಮನ ಆ ಮಾತಿನಲ್ಲಿ ಪ್ರಾಮಾಣಿಕವಾದ ಪ್ರೀತಿಯನ್ನು ಕಂಡಿರುವೆ. ಅದಕ್ಕೆ ಎಷ್ಟೇ ವರ್ಷ ಆದರೂ ಆಗಿನ ಸಂಬಂಧಗಳಲ್ಲಿ ಡೈವೋರ್ಸ್‌, ಬ್ರೇಕಪ್‌ ಎನ್ನುವ ಮಾತುಗಳೇ ಬರುತ್ತಿರಲಿಲ್ಲ.
ಆದರೆ, ಈಗ ಪರಿಸ್ಥಿತಿ ಬದಲಾಗಿದೆ. ಪ್ರೇಮಿಗಳ ದಿನಾಚರಣೆ ಆಚರಿಸುವ ಈ ಜನರೇಷನ್‌ ಮುಂದೆ ಬ್ರೇಕಪ್‌, ಡೈವೋರ್ಸ್‌ ಆಯ್ಕೆ ಕೂಡ ಇದೆ. ವರ್ಷ ಪೂರ್ತಿ ಜಗಳ ಮಾಡಿಕೊಂಡು ಒಂದು ದಿನ ರೋಜಾ ಹೂವು ಕೊಟ್ಟರೆ ಅದು ಹೇಗೆ ಪ್ರೀತಿ ಆಗುತ್ತದೆ ತಿಳಿಯದು. ಇರೋತನಕ ಖುಷಿ ಆಗಿರೋದು, ಪರಸ್ಪರ ಗೌರಿರವಿಸುವುದು ನಿಜವಾದ ಪ್ರೀತಿ. ನನಗೆ ತುಂಬಾ ಇಷ್ಟವಾದ ಪ್ರೇಮ ಕತೆಯ ಸಿನಿಮಾ ‘ಕುಚ್‌ ಕುಚ್‌ ಹೋತಾ ಹೈ’. ಜಗಳ, ಮುನಿಸು, ಸ್ನೇಹ ಮತ್ತು ಒಂದಾಗುವುದು ಎಲ್ಲವೂ ಈ ಚಿತ್ರದಲ್ಲಿದೆ. ಅದಕ್ಕೆ ಇಷ್ಟ.
