ಓ ದೇವರೇ...! 16 ಮಹಿಳೆಯರ ಮೇಲೆ ಪೊಲೀಸರಿಂದಲೇ ಅತ್ಯಾಚಾರ...!
ಚತ್ತೀಸ್‌'ಗಡ ಪೊಲೀಸರಿಂದಲೇ ಇಂಥ ವ್ಯಾಪಕ ಕಾನೂನು ಉಲ್ಲಂಘನೆಯಾದ ಬಗ್ಗೆ ಆಯೋಗ ಆಘಾತ ವ್ಯಕ್ತಪಡಿಸಿದೆ.
ರಾಯ್ಪುರ(ಜ.08): ಚತ್ತೀಸ್‌'ಗಡದಲ್ಲಿ ಪೊಲೀಸರೇ ಕನಿಷ್ಠ 16 ಮಹಿಳೆಯರ ಮೇಲೆ ಅತ್ಯಾಚಾರ, ಲೈಂಗಿಕ ಕಿರುಕುಳ, ಹಲ್ಲೆ ನಡೆಸಿದ್ದಾರೆ ಎಂದು ರಾಷ್ಟ್ರೀಯ ಮಾನವ ಹಕ್ಕುಗಳ ಆಯೋಗ (ಎನ್‌'ಎಚ್‌'ಆರ್‌'ಸಿ) ವರದಿ ತಿಳಿಸಿದೆ.
ಈ ವಿಷಯ ಆಯೋಗದ ತನಿಖೆಯ ವೇಳೆ ಪತ್ತೆಯಾಗಿದೆ. ಅಲ್ಲದೆ ಇಂಥಹುದೇ ದೌರ್ಜನ್ಯಗಳಿಗೊಳಗಾದ ಇನ್ನೂ 20 ಮಂದಿ ಸಂತ್ರಸ್ತೆಯರ ಹೇಳಿಕೆಗಳ ದಾಖಲೆಗಾಗಿ ಆಯೋಗ ನಿರೀಕ್ಷಿಸುತ್ತಿದೆ.
ವಿಷಯಕ್ಕೆ ಸಂಬಂಧಿಸಿ ಸಂತ್ರಸ್ತೆಯರಿಗೆ ₹ 37 ಲಕ್ಷ ಮಧ್ಯಂತರ ಹಣಕಾಸು ನೆರವು ಬಿಡುಗಡೆಗೊಳಿಸುವಂತೆ ಆಯೋಗ ಸರ್ಕಾರಕ್ಕೆ ಶಿಫಾರಸ್ಸು ಮಾಡಿದೆ.
ಅತ್ಯಾಚಾರಕ್ಕೊಳಗಾದ 8 ಸಂತ್ರಸ್ತೆಯರಿಗೆ ತಲಾ ₹ 3 ಲಕ್ಷ, ಲೈಂಗಿಕ ಕಿರುಕುಳಕ್ಕೊಳಗಾದ 6 ಮಂದಿಗೆ ತಲಾ ₹ 2 ಲಕ್ಷ ಮತ್ತು ಹಲ್ಲೆಗೊಳಗಾದ ಇಬ್ಬರಿಗೆ ತಲಾ ₹ 50,000 ಮಧ್ಯಂತರ ಪರಿಹಾರ ನೀಡಲು ಆಯೋಗ ಶಿಫಾರಸ್ಸು ಮಾಡಿದೆ.
ಚತ್ತೀಸ್‌'ಗಡ ಪೊಲೀಸರಿಂದಲೇ ಇಂಥ ವ್ಯಾಪಕ ಕಾನೂನು ಉಲ್ಲಂಘನೆಯಾದ ಬಗ್ಗೆ ಆಯೋಗ ಆಘಾತ ವ್ಯಕ್ತಪಡಿಸಿದೆ. ದಾಖಲೆಗಳ ಪರಿಶೀಲನೆಯ ಬಳಿಕ ಇಂಥ 34 ಸಂತ್ರಸ್ತೆಯರಿರುವುದನ್ನು ಆಯೋಗ ಪತ್ತೆ ಹಚ್ಚಿದೆ ಎಂದು ಮೂಲಗಳು ತಿಳಿಸಿವೆ.
