ಕೊರೋನಾ ಶಂಕಿತರ ದಿಗ್ಬಂಧನ ಹೇಗಿರುತ್ತೆ?
ಕೊರೋನಾ... ಈ ಹೆಸರು ಕೇಳಿದರೆ ಜನರು ಭಯಬೀಳುವಂತಾಗಿದೆ. ವಿಶ್ವಾದ್ಯಂತ 5000ಕ್ಕೂ ಹೆಚ್ಚು ಜನರನ್ನು ಬಲಿ ಪಡೆದಿರುವ ಈ ಮಾರಕ ವೈರಸ್‌ಗೆ ಈಗಾಗಲೇ ದೇಶದಲ್ಲೂ ಇಬ್ಬರು ಪ್ರಾಣ ತೆತ್ತಿದ್ದಾರೆ. ದೇಶಾದ್ಯಂತ 88 ಜನರಲ್ಲಿ ಸೋಂಕು ಖಚಿತಪಟ್ಟಿದೆ. ದಿನೇದಿನೇ ಕೊರೋನಾ ತನ್ನ ಕಬಂಧಬಾಹು ವ್ಯಾಪಿಸುತ್ತಿರುವ ಹಿನ್ನೆಲೆಯಲ್ಲಿ ಶಂಕಿತರ ಮೇಲೆ ನಿಗಾ ಇಡಲು ಪ್ರತ್ಯೇಕ ಕೊಠಡಿಗಳನ್ನು ದೇಶಾದ್ಯಂತ ಮೀಸಲಿಡಲಾಗಿದೆ. ಆ ಕೋಣೆಗಳಲ್ಲಿ ಯಾವೆಲ್ಲಾ ಸೌಲಭ್ಯ ಇದೆ? ಶುಶ್ರೂಷೆ ಹೇಗೆ ನಡೆಯುತ್ತೆ ಎಂಬುದು ಗೊತ್ತಾ? ಇಲ್ಲಿದೆ ಮಾಹಿತಿ.
ಪ್ರತ್ಯೇಕ ಕೊಠಡಿ ಏಕೆ ಬೇಕು?
ಕೊರೋನಾ ಎಂಬುದು ವೈರಸ್ ಸೋಂಕು. ಇದು ತಗುಲಿರುವ ವ್ಯಕ್ತಿ ಕೆಮ್ಮಿದಾಗ, ಸೀನಿದಾಗ ಬೇರೆಯವರಿಗೂ ಹಬ್ಬುತ್ತದೆ. ಕೊರೋನಾಪೀಡಿತರ ಜತೆ ಸಂಪರ್ಕ ಹೊಂದಿದ ವ್ಯಕ್ತಿಗಳಲ್ಲೂ ಸೋಂಕು ಕಾಣಿಸಿಕೊಳ್ಳಬಹುದು. ಹೀಗಾಗಿ ಆ ಕುರಿತ ಶಂಕೆ ಇರುವ ವ್ಯಕ್ತಿಗಳು ಎಲ್ಲೆಂದರಲ್ಲಿ ಓಡಾಡದಂತೆ, ಹೆಚ್ಚು ಹೆಚ್ಚು ಜನರ ಜತೆ ಸಂಪರ್ಕ ಹೊಂದದಂತೆ ತಡೆಯಲು ಹಾಗೂ ಅವರಲ್ಲಿ ಸೋಂಕು ಇದೆಯೇ, ಇಲ್ಲವೇ ಎಂಬುದನ್ನು ದೃಢಪಡಿಸಿಕೊಳ್ಳಲು ವಿಶ್ವಾದ್ಯಂತ ಆಸ್ಪತ್ರೆಗಳಲ್ಲಿ ಪ್ರತ್ಯೇಕ ಕೊಠಡಿಗಳನ್ನು ಮೀಸಲಿರಿಸಲಾಗಿದೆ. ಇದನ್ನು ‘ಕ್ವಾರಂಟೇನ್‌ ಹೋಂ’ ಎಂದೂ ಕರೆಯಲಾಗುತ್ತದೆ.
ಪ್ರತ್ಯೇಕ ತಟ್ಟೆ, ಲೋಟ, ಹಾಸಿಗೆ
ಸೂಕ್ತ ಗಾಳಿ, ಬೆಳಕು ಹಾಗೂ ಶೌಚಾಲಯ, ಸ್ನಾನಗೃಹವನ್ನು ಈ ಕೋಣೆಗಳು ಹೊಂದಿರುತ್ತವೆ. ಈ ರೀತಿಯ ಪ್ರತ್ಯೇಕ ಕೊಠಡಿಗಳಲ್ಲಿ ತಂಗುವವರು ಮುಂದಿನ 14 ದಿನಗಳವರೆಗೆ ಯಾವುದೇ ಸಾಮಾಜಿಕ ಮತ್ತು ಧಾರ್ಮಿಕ ಕಾರ್ಯಕ್ರಮಗಳಲ್ಲಿ ಪಾಲ್ಗೊಳ್ಳದಂತೆ, ಇತರರನ್ನು ಸ್ಪರ್ಶಿಸದಂತೆ, ಸಂಪರ್ಕಿಸದಂತೆ ನಿರ್ಬಂಧ ವಿಧಿಸಲಾಗುತ್ತದೆ. ಎಲ್ಲಾ ಸಮಯದಲ್ಲಿ ಮಾಸ್ಕ್‌ ಧರಿಸುವಂತೆ ಹಾಗೂ ಪ್ರತಿ 6-8 ಗಂಟೆಗೊಮ್ಮೆ ಮಾಸ್ಕ್‌ ಬದಲಿಸುವಂತೆ ಸೂಚಿಸಲಾಗುತ್ತದೆ. ಹಾಗೆಯೇ ಅವರು ಬಳಸಿದ ಲೋಟ, ಆಹಾರ, ಪಾತ್ರೆ, ಟವೆಲ್‌, ಬೆಡ್‌ಗಳನ್ನು ಯಾರೂ ಬಳಸದಂತೆ ಎಚ್ಚರ ವಹಿಸಲಾಗುತ್ತದೆ. ಜೊತೆಗೆ ರೋಗಿಗಳು, ಕಾರು ಚಾಲಕರು ಮತ್ತು ಹೋಂ ಕೇರ್‌ ವೇಳೆ ರೋಗಿಗಳನ್ನು ಸಂಪರ್ಕಿಸಿದವರು ಬಳಸಿದ ಮಾಸ್ಕ್‌ಗಳನ್ನು ಸುಟ್ಟು ಹಾಕಲಾಗುತ್ತದೆ. ಒಂದು ವೇಳೆ ರೋಗಿಯ ಸಂಬಂಧಿಕರು ಅಥವಾ ಕುಟುಂಬಸ್ಥರು ಅವರೊಂದಿಗಿದ್ದು ಶುಶ್ರೂಷೆ ಮಾಡಬೇಕೆಂದರೆ ರೋಗಿಯಿಂದ ಕನಿಷ್ಠ 1 ಮೀಟರ್‌ ಅಂತರ ಕಾಯ್ದುಕೊಳ್ಳಲು ಕಟ್ಟುನಿಟ್ಟಾಗಿ ಆದೇಶಿಸಲಾಗುತ್ತದೆ.
14 ದಿನಗಳ ದಿಗ್ಬಂಧನ
ಕೋವಿಡ್‌-19 ಅಥವಾ ಕೊರೋನಾ ಸೋಂಕು ಶಂಕಿತರು ಮತ್ತು ಸೋಂಕು ದೃಢಪಟ್ಟಿರುವ ವ್ಯಕ್ತಿಯ ಸಂಪರ್ಕಕ್ಕೆ ಬಂದ ಎಲ್ಲಾ ವ್ಯಕ್ತಿಗಳನ್ನೂ ಕ್ವಾರಂಟೇನ್‌ ಹೋಂನಲ್ಲಿಟ್ಟು ನಿಗಾ ವಹಿಸುವುದು ಅತ್ಯವಶ್ಯಕ. ಏಕೆಂದರೆ ಕೋವಿಡ್‌-19 ಬರೀ ಸಾಂಕ್ರಾಮಿಕ ರೋಗ ಮಾತ್ರವಲ್ಲದೆ, 14 ದಿನಗಳವರೆಗೆ ರೋಗ ಲಕ್ಷಣಗಳು ಪತ್ತೆಯಾಗದ ಕಾರಣ ಮತ್ತು 14 ದಿನದ ನಂತರವೂ ರೋಗ ಲಕ್ಷಣ ಕಾಣಿಸಿಕೊಂಡು, ಇತರರಿಗೆ ಹರಡುವ ಸಾಧ್ಯತೆ ಇರುವುದರಿಂದ ಪ್ರಯೋಗಾಲಯದಲ್ಲಿ ಸೋಂಕು ಇಲ್ಲ ಎಂಬ ಖಚಿತ ವರದಿ ಬರುವವರೆಗೂ ಶಂಕಿತರನ್ನು ಪ್ರತ್ಯೇಕವಾಗಿಟ್ಟು ನಿಗಾ ವಹಿಸಲಾಗುತ್ತದೆ. ಕ್ವಾರಂಟೇನ್‌ ಹೋಂನಲ್ಲಿ 14 ದಿನಗಳ ತಂಗಿದ ವ್ಯಕ್ತಿ ರೋಗ ಮುಕ್ತನಾಗಿ ಹೊರಬಂದು ಮತ್ತೆ ಕೊರೋನಾಪೀಡಿತ ವ್ಯಕ್ತಿಯ ಸಂಪರ್ಕಕ್ಕೆ ಬಂದರೆ ಮತ್ತೆ ಆತ/ಆಕೆಯನ್ನು 14 ದಿನಗಳ ಕಾಲ ಪ್ರತ್ಯೇಕವಾಗಿಟ್ಟು ತಪಾಸಣೆ ನಡೆಸಬೇಕಾಗುತ್ತದೆ. ಈ 14 ದಿನಗಳ ವರೆಗೆ ಅವರಿಗೆ ಮೊಬೈಲ್‌, ಕೇರಂಬೋರ್ಡ್‌ ಬಳಸಲೂ ಅವಕಾಶ ಇರುತ್ತದೆ.
ಯಾರೆಲ್ಲಾ ಕ್ವಾರಂಟೇನ್‌ ಹೋಂಗಳಲ್ಲಿ ಚಿಕಿತ್ಸೆ ಪಡೆಯಬೇಕು?
- ಕೊರೋನಾ ಸೋಂಕಿತರ ಕುಟುಂಬಸ್ಥರು ಅಥವಾ ಅವರೊಂದಿಗೆ ವಾಸವಿದ್ದವರು.
- ವೈಯಕ್ತಿಕ ಸುರಕ್ಷಾ ಸಾಧನವನ್ನು ಬಳಸದೇ ಕೊರೋನಾ ಸೋಂಕು ಪೀಡಿತ ವ್ಯಕ್ತಿಯೊಂದಿಗೆ ದೈಹಿಕ ಸಂಪರ್ಕ ಹೊಂದಿದವರು.
- ವಿಮಾನ ಪ್ರಯಾಣದಲ್ಲಿ ಅಥವಾ ಕೊರೋನಾ ಸೋಂಕಿತರ ಸುತ್ತಮುತ್ತಲ 1 ಮೀಟರ್‌ ಪ್ರದೇಶದಲ್ಲಿ ಸಂಪರ್ಕ ಹೊಂದಿದವರು.
ಮಕ್ಕಳು, ಗರ್ಭಿಣಿಯರನ್ನು ಸಂಪರ್ಕಿಸುವಂತಿಲ್ಲ
ಹೀಗೆ ಪ್ರತ್ಯೇಕ ಕೊಠಡಿಯಲ್ಲಿ ಇರುವವರು ವಯಸ್ಸಾದವರು, ಗರ್ಭಿಣಿಯರು, ಮಕ್ಕಳು, ಅಸ್ವಸ್ಥಗೊಂಡಿರುವವರಿಂದ ದೂರ ಇರುವಂತೆ ಸೂಚಿಸಲಾಗುತ್ತದೆ. ಕೊರೋನಾ ವೈರಸ್ ಮಕ್ಕಳಲ್ಲಿ ಕಂಡುಬಂದಿರುವುದು ತೀರಾ ಕಡಿಮೆ. ಚೀನಾದ ಒಟ್ಟು ಕೊರೋನಾ ಪೀಡಿತರ ಪೈಕಿ 2% ರೋಗಿಗಳು ಮಾತ್ರ 20 ವರ್ಷಕ್ಕಿಂತ ಕಡಿಮೆ ವಯಸ್ಸಿನವರು. ಆದಾಗ್ಯೂ ಮಕ್ಕಳನ್ನು ಶಂಕಿತರಿಂದ ದೂರ ಇಡಲು ಭಾರತ ಸರ್ಕಾರ ಸೂಚಿಸಿದೆ.
ಇದರಿಂದ ನಿಜಕ್ಕೂ ಉಪಯೋಗ ಇದೆಯಾ?
ಕೊರೋನಾ ವೈರಸ್ ಇದೀಗ ಜಗತ್ತಿನ 130 ದೇಶಗಳಿಗೆ ಹರಡಿದೆ. ಎಲ್ಲಾ ದೇಶಗಳೂ ಲಸಿಕೆ ರಹಿತವಾದ ಮಾರಕ ವೈರಸ್ ನಿಯಂತ್ರಣಕ್ಕೆ ಶತಪ್ರಯತ್ನ ನಡೆಸುತ್ತಿವೆ. ವಿಶೇಷ ಎಂದರೆ ಈ ವೈರಸ್ ನಿಯಂತ್ರಣದಲ್ಲಿ ಚೀನಾ ಯಶಸ್ಸು ಕಾಣುತ್ತಿದೆ. ಇದಕ್ಕೆ ಮೂಲಕ ಕಾರಣ ಕ್ವಾರಂಟೇನ್‌ ಹೋಂಗಳು ಎನ್ನಲಾಗುತ್ತಿದೆ. ತಜ್ಞರ ಪ್ರಕಾರ ಈ ಪ್ರತ್ಯೇಕ ಚಿಕಿತ್ಸಾ ಕೋಣೆಗಳು ಕೊರೋನಾ ತಡೆಗಟ್ಟುವಲ್ಲಿ ಪರಿಣಾಮಕಾರಿ ಪಾತ್ರ ವಹಿಸಿವೆ. ಅದೆಷ್ಟೋ ರೋಗಿಗಳ ಕುಟುಂಬಸ್ಥರನ್ನು ಮಾರಕ ರೋಗದಿಂದ ಪಾರು ಮಾಡಿದೆ.
ಕುಟುಂಬಸ್ಥರು ಏನು ಮಾಡಬೇಕು?
- ಎಲ್ಲಾ ಸಮಯದಲ್ಲಿ ಮಾಸ್ಕ್‌ ಧರಿಸಿರಬೇಕು.
- ಶಂಕಿತರೊಂದಿಗೆ ಎಲ್ಲಾ ರೀತಿಯ ದೈಹಿಕ ಸಂಪರ್ಕವನ್ನು ನಿಲ್ಲಿಸಬೇಕು.
- ಜನರನ್ನು ಭೇಟಿ ಮಾಡುವುದನ್ನು ನಿಯಂತ್ರಿಸಬೇಕು.
- ವಾಸಿಸುವ ಪ್ರದೇಶವನ್ನು ಅತ್ಯಂತ ಶುಚಿಯಾಗಿಡಬೇಕು.
- ಶಂಕಿತರ ಬಟ್ಟೆಗಳನ್ನು ಪ್ರತ್ಯೇಕವಾಗಿಟ್ಟು ತೊಳೆಯಬೇಕು.
- ಅವರು ಬಳಸಿದ ಶೌಚಾಲಯವನ್ನು ಇತರರು ಬಳಬಾರದು.
ದಿಗ್ಬಂಧನ ಕೊಠಡಿ ಕಲ್ಪನೆ ಬಂದಿದ್ದು ಹೇಗೆ?
ರೋಗಿಗಳನ್ನು ಪ್ರತ್ಯೇಕವಾಗಿಟ್ಟು ನಿಗಾ ಇಡುವ ಪದ್ಧತಿ ಆರಂಭವಾಗಿದ್ದು ಈಗಲ್ಲ. 14ನೇ ಶತಮಾನದ ವೇಳೆಯಲ್ಲಿಯೇ ಇಂಥದ್ದೊಂದು ವಿಧಾನ ಬಳಕೆಯಲ್ಲಿತ್ತು ಎಂಬುದಕ್ಕೆ ಹಲವು ಕುರುಹುಗಳು ಲಭ್ಯವಾಗಿವೆ. 1773ರಲ್ಲಿ ಅಮೆರಿಕದಲ್ಲಿ ಹಳದಿ ಜ್ವರ ಎಂಬ ಸಾಂಕ್ರಾಮಿಕ ರೋಗ ಹರಡಿ ಸುಮಾರು 5000 ಜನರನ್ನು ಬಲಿ ಪಡೆದಿತ್ತು. 1799ರಲ್ಲಿ ಅದರಿಂದ ಪಾರಾಗಲು ಅಮೆರಿಕದ ಕಾಮನ್‌ವೆಲ್ತ್‌ ಆಫ್‌ ಫಿಲಿಡೆಲ್ಫಿಯಾದಲ್ಲಿ ಕ್ವಾರಂಟೇನ್‌ ಹೋಂ ತೆರೆದು ಸೋಂಕಿತರನ್ನು ಪ್ರತ್ಯೇಕವಾಗಿ ಇಡಲಾಗಿತ್ತು. 1830ರಲ್ಲಿ ಕಾಲರಾ ಸಾಂಕ್ರಾಮಿಕ ವ್ಯಾಧಿ ತಡೆಗಟ್ಟಲು ನ್ಯೂಯಾರ್ಕ್ನಲ್ಲಿ ಹಡಗು ಮತ್ತು ವಾಹನಗಳ ಮೂಲಕ ಪ್ರವೇಶಿಸಿದವರ ತಪಾಸಣೆಗೆ ಪ್ರತ್ಯೇಕ ಚಿಕಿತ್ಸಾ ಕೊಠಡಿಯನ್ನು ತೆರೆಯಲಾಗಿತ್ತು. ಹೀಗೇ ಇವುಗಳ ಬಳಕೆ ಮುಂದುವರೆಯಿತು. ಅನಂತರ ಆಧುನಿಕ ಯುಗದಲ್ಲಿ ಈ ದಿಗ್ಭಂಧನ ಕೊಠಡಿಗಳು ಸಾಂಕ್ರಾಮಿಕ ರೋಗ ತಡೆಗಟ್ಟುವ ಪರಿಣಾಮಕಾರಿ ವಿಧಾನವಾಗಿ ಬಳಕೆಯಾಗುತ್ತಿವೆ. 2003ರಲ್ಲಿ ಸಾರ್ಸ್‌ ಎಂಬ ಕಾಯಿಲೆ ಹರಡಿದಾಗಲೂ ಹಲವು ದೇಶಗಳು ಕ್ವಾರಂಟೇನ್‌ ಹೋಂ ಮೊರೆ ಹೋಗಿದ್ದವು.
