ಕೊರೋನಾ ಕಾಲದ ನಂತರ....ಹೀಗೊಂದು ಊಹೆ!

ಕೋವಿಡ್ 19 ವೈರಸ್ ಶ್ರೀಮಂತರು ಬಡವರೆನ್ನದೆ ಎಲ್ಲರನ್ನು ಬಾಧಿಸುತ್ತಿದೆ. ಮುಂದುವರಿದ ಹಿಂದುಳಿದ ಎಂಬ ಭೇದವಿಲ್ಲದೆ ಎಲ್ಲ ದೇಶಗಳನ್ನು ತತ್ತರಿಸುವಂತೆ ಮಾಡುತ್ತಿದೆ. ಈ ಸೋಂಕಿಗೆ ಹಲವು ಲಕ್ಷ ಮಂದಿ ಬಲಿಯಾಗಲಿರುವುದು ನಿಶ್ಚಿತ. ಬದುಕುಳಿದವರು ಆರ್ಥಿಕ ಕುಸಿತದಿಂದ ಕಂಗೆಡುತ್ತಾರೆ. ಹಲವು ಪಾಸಿಟಿವ್ ಬದಲಾವಣೆಗಳೂ ಆಗಬಹುದು.

- ನಗರಗಳಲ್ಲಿ ಉದ್ಯೋಗಗಳು ಮಾಯವಾಗುವುದರಿಂದ ಯುವಜನ ಹಳ್ಳಿಯ ಕಡೆ ಮುಖ ಮಾಡಬಹುದು. ಕೃಷಿ ಚಟುವಟಿಕೆ ಹೆಚ್ಚಬಹುದು. ಯುವಜನರು‌ ತಮ್ಮ‌ ಹಿರಿಯರ ಜೊತೆಗೆ ಸಮಯ ಕಳೆಯಲು ಸಾಧ್ಯ ಆಗಬಹುದು.
- ಹೆಚ್ಚು ಜನ ಓಡಾಡುವಲ್ಲಿ‌,‌ ನಿಗಾ‌ ವ್ಯವಸ್ಥೆ ಹೆಚ್ಚಬಹುದು.
- ಮೆಟ್ರೋ ಸ್ಟೇಶನ್, ಥಿಯೇಟರ್ ಕೌಂಟರ್ ಮುಂತಾದ ಕಡೆ ಟಿಕೆಟ್ ಕೊಡುವಲ್ಲಿ ಮಾನವ ಸ್ಪರ್ಶ ತಪ್ಪಿಸಲು ಯಂತ್ರಗಳು, ರೊಬಾಟ್‌ಗಳು ಬರಬಹುದು.
- ಈಗಾಗಲೇ ಕೊರೋನಾ ಕಾರಣದಿಂದಾಗಿ ಪ್ರತಿಯೊಬ್ಬ ಪ್ರಜೆಯ ಆರೋಗ್ಯ ಮಾಹಿತಿಯೂ ಸರಕಾರಕ್ಕೆ ಸಿಕ್ಕಿದೆ. ಮುಂದೆ ಈ ಮಾಹಿತಿಗಳು ಖಾಸಗಿ ಮೆಡಿಕಲ್, ವಿಮಾ ಕಂಪನಿಗಳಿಗೆ ಸುಲಭವಾಗಿ ಸಿಕ್ಕಿ, ಅವು ಅದರ ದುರ್ಬಳಕೆ ಮಾಡಬಹುದು. 
- ಹಳ್ಳಿಯ ತುಂಡು ಜಮೀನುಗಳು ಇನ್ನಷ್ಟು ತುಂಡಾಗಬಹುದು. 
- ಮೊದಲಿಗಿಂತ ಜನರ ಓಡಾಟ ಕಡಿಮೆಯಾಗುತ್ತದೆ. ಹೀಗಾಗಿ ಪ್ರವಾಸೋದ್ಯಮ ಕೂಡ ಕುಸಿಯುತ್ತದೆ. ಉದ್ಯೋಗಿಗಳು ಹಣ ಖರ್ಚು ಮಾಡುವ ಬದಲು ಅದನ್ನು ಕೂಡಿಡುವುದರತ್ತ ಗಮನ ಹರಿಸುತ್ತಾರೆ.
- ಸಾರಿಗೆ ಕಡಿಮೆಯಾಗುವುದರಿಂದ ಪೆಟ್ರೋಲ್‌ಗೆ ಬೇಡಿಕೆ ಕಡಿಮೆಯಾಗಿ ಅದರ ಬೆಲೆ ಕುಸಿಯುತ್ತದೆ.
- ಚಿನ್ನದ ಬೆಲೆ ಈಗ ಹೆಚ್ಚಿದೆ. ಆದರೆ ಈಗ ಆಪತ್ಕಾಲಕ್ಕೆಂದು ತೆಗೆದಿಟ್ಟುಕೊಂಡ ಚಿನ್ನ ಎಲ್ಲರ ಸಂಸಾರದಲ್ಲೂ ಅಷ್ಟಿಷ್ಟು ಇದೆ. ಒಮ್ಮೆ ಉದ್ಯೋಗ ನಷ್ಟ ಆರಂಭವಾಗಿ ಸಂಸಾರ ಸಾಗಿಸುವುದು ಕಷ್ಟವಾದರೆ ಎಲ್ಲರೂ ಚಿನ್ನ ಮಾರಲು ಮುಂದಾಗುತ್ತಾರೆ. ಆಗ ಚಿನ್ನದ ಬೆಲೆ ಇಳಿಯುತ್ತದೆ.

- ಮೆಡಿಕಲ್ ಕೋರ್ಸಿಗೆ ಬೇಡಿಕೆ ಹೆಚ್ಚಲಿದೆ. ಆದರೆ ಅದು ಇನ್ನಷ್ಡು ಶ್ರೀಮಂತರ ಸೊತ್ತಾಗಲಿದೆ. ಮೆರಿಟ್‌ ಅಭ್ಯರ್ಥಿಗಳಿಗೆ ಕೊಡುವ ಸಬ್ಸಿಡಿಯನ್ನು ಸರಕಾರಗಳು ಖಜಾನೆ ಕೊರತೆಯಿಂದಾಗಿ ಕಡಿಮೆ ಮಾಡುವುದರಿಂದ, ಬಡವರು ಮೆಡಿಕಲ್ ಓದುವುದು ಕಷ್ಟವೆನಿಸಲಿದೆ.
- ಖಜಾನೆಯಲ್ಲಿ ಕಾಸು ಇಲ್ಲದಿರುವುದರಿಂದ ಬಡವರಿಗೆ ನೀಡುವ ಸೌಲಭ್ಯ ಸೇವೆಗಳಲ್ಲಿ ಕಡಿತವಾಗಲಿದೆ. 
- ಔಪಚಾರಿಕ ಶಿಕ್ಷಣ ವ್ಯವಸ್ಥೆ ಕುಸಿಯಬಹುದು. ಅಲ್ಲೂ ಸರಕಾರದ ನೆರವು ಕಡಿತವಾಗುತ್ತೆ. ಜನ ಹೆಚ್ಚಹೆಚ್ಚಾಗಿ ತಮ್ಮ ಮಕ್ಕಳನ್ನು ಹೋಂ ಸ್ಕೂಲಿಂಗ್ ಮಾಡಿಸುತ್ತಾರೆ.

- ಐಟಿ ಕ್ಷೇತ್ರದ ಮೇಲಿದ್ದ ಅತಿಯಾದ ನಂಬಿಕೆ ಕುಸಿಯಲಿದೆ. ಯುವಕರು ಹೆಚ್ಚು ಹೆಚ್ಚಾಗಿ ಸರಕಾರಿ ಉದ್ಯೋಗಗಳ ಭದ್ರತೆಯ ಮೊರೆ ಹೋಗಬಹುದು.

"