ಬೆಂಗಳೂರು (ಮಾ.20): ಕನ್ನಡದ ನಟಿ ಅನಿತಾ ಭಟ್ ಅವರು ನಾಯಿ ಹಿಡಿದುಕೊಂಡು ಹೋಗುವಾಗ, ಪಕ್ಕದಲ್ಲಿ ಹೋಗುತ್ತಿದ್ದವರಿಗೆ ಬೊಗಳಿದೆ. ನಾಯಿ ಬೊಗಳಿದ್ದಕ್ಕೆ ಕ್ಯಾತೆ ತೆಗೆದ ನಾಲ್ವರ ಗುಂಪು ನಟಿಯ ಕಾರಿನ ಮೇಲೆ ಕಲ್ಲು ಎತ್ತಿಹಾಕಲು ಮುಂದಾಗಿ ಬಾಯಿಗೆ ಬಂದಂತೆ ಅವ್ಯಾಚ್ಯ ಶಬ್ದಳಿಂದ ನಿಂದಿಸಿದ್ದಾರೆ.
ನಾಯಿ ಬೊಗಳಿದ್ದಕ್ಕೆ ಸ್ವತಃ ನಟಿ ಅನಿತಾ ಭಟ್ ಪಾದಾಚಾರಿಗಳ ಕ್ಷಮೆಯನ್ನೂ ಕೇಳಿ ಮುಂದಕ್ಕೆ ಹೋಗಿದ್ದಾರೆ. ಆದರೂ, ಸುಮ್ಮನಿರದ ಪಾದಾಚಾರಿಗಳು ಅವ್ಯಾಚ್ಯ ಶಬ್ದಳಿಂದ ಬೈದು, ಜಗಳಕ್ಕೆ ಮುಂದಾಗಿದ್ದಾರೆ.
ಈ ವೇಳೆ ನಾಯಿ ಪುನಃ ಬೊಗಳಿದೆ. ಆಗ ಜಗಳ ಮಾಡುವುದೇ ಬೇಡವೆಂದು ನಟಿ ಅನಿತಾ ಭಟ್ ನಾಯಿಯನ್ನು ಕರೆದುಕೊಂಡು ಕಾರಿನಲ್ಲಿ ಕೂರಿಸಿಕೊಂಡು ಮನೆಯೆಡೆಗೆ ಹೋಗಲು ಮುಂದಾಗಿದ್ದಾರೆ. ಆದರೂ, ಸುಮ್ಮನಿರದ ಕಿಡಿಗೇಡಿಗಳು ಬೈದು ಕಾರಿನ ಮೇಲೆ ಕಲ್ಲು ಎತ್ತಿಹಾಕಲು ಬಂದಿದ್ದಾರೆ.
ಸಾರ್ವಜಿಕ ಸ್ಥಳದಲ್ಲಿ ನಾಯಿ ಬೊಗಳಿದ ಘಟನೆಯನ್ನು ದೊಡ್ಡದಾಗಿ ಮಾಡಿ, ಬೈದು ಹಲ್ಲೆ ಮಾಡಲು ಮುಂದಾದವರ ವರ್ತನೆಗೆ ಬೇಸತ್ತ ನಟಿ ಅನಿತಾಭಟ್, ಜಗಳ ಮಾಡಿದವರ ಮೇಲೆ ದೂರು ಕೊಡಲು ಮುಂದಾಗಿದ್ದಾರೆ.
ಸದ್ಯಕ್ಕೆ ನಟಿ ಅನಿತಾಭಡ್ ಜಗಳ ಮಾಡಿದ ನಾಲ್ಕೈದು ಮಂದಿಯ ವಿರುದ್ಧ ದೂರು ನೀಡಲು ಸಂಪಿಗೆಹಳ್ಳಿ ಪೊಲೀಸ್ ಠಾಣೆಗೆ ತೆರಳಿದ್ದಾರೆ.
ಕನ್ನಡದಲ್ಲಿ ಸೈಕೋ, ತಿಪ್ಪಜ್ಜಿ ಸರ್ಕಲ್, ಡೇಸ್ ಆಫ್‌ ಬೋರಾಪುರ, ಬೆಂಗಳೂರು 69 ಸೇರಿದಂತೆ ಅನೇಕ ಸಿನಿಮಾಗಳಲ್ಲಿ ನಟಿಸಿರುವ ಅನಿತಾಭಟ್ ಕನ್ನಡಿಗರಿಗೆ ಚಿರಪರಿಚಿತರೇ ಆಗಿದ್ದಾರೆ.
ಇನ್ನು ಸಿನಿಮಾಗಳಲ್ಲಿ ಅವಕಾಶಗಳು ಕಡಿಮೆ ಆಗಿದ್ದರಿಂದ ಇದೀಗ ಕಿರುತೆರೆಗೂ ಕಾಲಿಟ್ಟಿದ್ದಾರೆ. ಉದಯ ಟಿವಿಯಲ್ಲಿ ಪ್ರಸಾರವಾಗುತ್ತಿರುವ 'ಕನ್ಯಾದಾನ' ಧಾರಾವಾಹಿಯಲ್ಲಿ ಅನಿತಾ ಭಟ್ ಪೊಲೀಸ್ ಅಧಿಕಾರಿಯಾಗಿ ಕಾಣಿಸಿಕೊಂಡಿದ್ದಾರೆ.
ಕಳೆದ ಕೆಲವು ತಿಂಗಳ ಹಿಂದೆ ಸ್ಯಾಂಡಲ್‌ವುಡ್ ನಟ ದರ್ಶನ್ ಅವರ ನಾಯಿ ಕಚ್ಚಿದೆ ಎಂಬ ಕಾರಣಕ್ಕೆ ದೂರು ದಾಖಲಾಗಿ ದೊಡ್ಡ ವಿವಾದವೇ ಸೃಷ್ಟಿಯಾಗಿತ್ತು.