40ರ ನಂತ್ರ ಈ ಸಮಸ್ಯೆ ಕಾಣಿಸಿಕೊಂಡ್ರೆ ನಿರ್ಲಕ್ಷ್ಯ ಮಾಡ್ಬೇಡಿ, ಮೆನೋಪಾಸ್‌ನ ಮೂರು ಹಂತ ನಿಮಗೆ ತಿಳಿದಿರಲಿ

ಮಹಿಳೆಯರ ವಯಸ್ಸು 40 ವರ್ಷ ದಾಟುತ್ತಿದ್ದಂತೆ ದೇಹದಲ್ಲಿಅನೇಕ ಬದಲಾವಣೆಗಳು ಕಾಣಿಸಿಕೊಳ್ಳುತ್ವೆ. ಮೆನೋಪಾಸ್ ಮಹಿಳೆಯ ಜೀವನದಲ್ಲಿ ನಡೆಯುವ ಸಹಜ ಪ್ರಕ್ರಿಯೆಯಾದ್ರೂ ಈ ಹಂತಕ್ಕೆ ಬರುವ ವೇಳೆಗೆ ಮಹಿಳೆ ಅನೇಕ ಹಂತಗಳನ್ನು ದಾಟಬೇಕು. ಕೆಲವೊಂದನ್ನು ಸಾಮಾನ್ಯ ಅಂತ ಭಾವಿಸಿದ್ರೆ ಅಪಾಯ.

ಪೆರಿಮೆನೋಪಾಸ್

ಇದು ಮೆನೋಪಾಸ್ ಆರಂಭವಾಗುವ ಮೊದಲು ಕಾಣಿಸಿಕೊಳ್ಳುವ ಹಂತ. ಈ ಸಮಯದಲ್ಲಿ ಅಂಡಾಶಯಗಳಲ್ಲಿ ಈಸ್ಟ್ರೋಜನ್ ಹಾರ್ಮೋನ್ ಉತ್ಪಾದನೆ ಬದಲಾಗತೊಡಗುತ್ತದೆ. ಸಾಮಾನ್ಯವಾಗಿ 40ರ ಆಸುಪಾಸಿನಲ್ಲಿ ಈ ಹಂತ ಆರಂಭವಾಗಬಹುದು. ಕೆಲವರಲ್ಲಿ ಅದಕ್ಕೂ ಮೊದಲೇ ಬದಲಾವಣೆಗಳು ಕಾಣಿಸಿಕೊಳ್ಳಬಹುದು. ಪೀರಿಯಡ್ಸ್ ಅನಿಯಮಿತವಾಗುವುದು, ರಾತ್ರಿ ಬೆವರುವುದು ಮತ್ತು ಮೂಡ್ ಸ್ವಿಂಗ್ಗಳು ಈ ಹಂತದ ಲಕ್ಷಣ.

ಮೆನೋಪಾಸ್

ಸತತ 12 ತಿಂಗಳ ಕಾಲ ಪೀರಿಯಡ್ಸ್ ಆಗದಿದ್ದಾಗ, ಬೇರೆ ಯಾವುದೇ ವೈದ್ಯಕೀಯ ಕಾರಣವಿಲ್ಲದಿದ್ದರೆ, ಅದನ್ನು ಮೆನೋಪಾಸ್ ಎಂದು ಕರೆಯಲಾಗುತ್ತದೆ. ಈ ಹಂತದಲ್ಲಿ ಅಂಡಾಶಯಗಳ ಕಾರ್ಯಕ್ಷಮತೆ ಕಡಿಮೆಯಾಗಿರುತ್ತದೆ ಮತ್ತು ಸಂತಾನೋತ್ಪತ್ತಿ ಸಾಮರ್ಥ್ಯ ಸಹಜವಾಗಿ ಅಂತ್ಯಗೊಳ್ಳುತ್ತದೆ.

ಪೋಸ್ಟ್ಮೆನೋಪಾಸ್

ಮೆನೋಪಾಸ್ ಆದ ನಂತರದ ಜೀವನದ ಹಂತವನ್ನು ಪೋಸ್ಟ್ಮೆನೋಪಾಸ್ ಎಂದು ಕರೆಯಲಾಗುತ್ತದೆ. ಈ ಹಂತ ಜೀವನಪೂರ್ತಿ ಮುಂದುವರಿಯುತ್ತದೆ. ಈಸ್ಟ್ರೋಜನ್ ಮಟ್ಟ ಕಡಿಮೆಯಾಗಿರುವುದರಿಂದ ಮೂಳೆಗಳ ಸಾಂದ್ರತೆ ಕುಸಿಯುವ ಆಸ್ಟಿಯೊಪೊರೋಸಿಸ್ ಮತ್ತು ಹೃದಯ ಸಂಬಂಧಿ ಕಾಯಿಲೆಗಳ ಅಪಾಯ ಹೆಚ್ಚಾಗಬಹುದು. ಹಾಗಾಗಿ ಈ ಸಮಯದಲ್ಲಿ ಆರೋಗ್ಯದ ಬಗ್ಗೆ ಹೆಚ್ಚಿನ ಗಮನ ನೀಡುವುದು ಮುಖ್ಯ.

ಮೆನೋಪಾಸ್ನ ಪ್ರಮುಖ ಲಕ್ಷಣಗಳೇನು?

• ದೈಹಿಕ ಲಕ್ಷಣಗಳು : ದೇಹದಲ್ಲಿ ಇದ್ದಕ್ಕಿದ್ದಂತೆ ಬಿಸಿ ಹೆಚ್ಚಾದಂತೆ ಆಗುವುದು, ರಾತ್ರಿ ಬೆವರುವುದು, ಕೀಲು ಮತ್ತು ಸ್ನಾಯುಗಳಲ್ಲಿ ನೋವು, ಸುಸ್ತು, ತಲೆನೋವು, ನಿದ್ರಾಹೀನತೆ, ತೂಕ ಹೆಚ್ಚಾಗುವುದು ಮತ್ತು ಕೂದಲು ಉದುರುವುದು ಕಾಣಿಸಿಕೊಳ್ಳಬಹುದು. ಕೆಲವರಿಗೆ ತ್ವಚೆ ಒಣಗುವುದು ಕೂಡ ಅನುಭವಕ್ಕೆ ಬರಬಹುದು.

• ಮಾನಸಿಕ ಮತ್ತು ಭಾವನಾತ್ಮಕ ಬದಲಾವಣೆಗಳು : ಮೂಡ್ ಸ್ವಿಂಗ್ಗಳು, ಸಣ್ಣ ವಿಷಯಕ್ಕೂ ಕಿರಿಕಿರಿಯಾಗುವುದು, ಆತಂಕ, ಬೇಸರ, ಕೆಲಸದಲ್ಲಿ ಗಮನ ಕೇಂದ್ರೀಕರಿಸಲು ಕಷ್ಟವಾಗುವುದು ಮತ್ತು ಮರೆವು ಕಾಣಿಸಿಕೊಳ್ಳಬಹುದು. ಇಂತಹ ಬದಲಾವಣೆಗಳು ದೈನಂದಿನ ಜೀವನದ ಮೇಲೂ ಪರಿಣಾಮ ಬೀರುತ್ತದೆ.

•ಮೂತ್ರ ಮತ್ತು ಲೈಂಗಿಕ ಆರೋಗ್ಯಕ್ಕೆ ಸಂಬಂಧಿಸಿದ ಲಕ್ಷಣಗಳು : ಯೋನಿಯಲ್ಲಿ ಒಣತನ, ಲೈಂಗಿಕ ಸಂಬಂಧದ ಸಮಯದಲ್ಲಿ ಕಿರಿಕಿರಿ, ಪದೇಪದೇ ಮೂತ್ರ ವಿಸರ್ಜನೆ, ಮೂತ್ರನಾಳದ ಸೋಂಕಿನ ಅಪಾಯ ಹೆಚ್ಚಾಗುವುದು ಕೆಲವು ಮಹಿಳೆಯರಲ್ಲಿ ಕಾಣಿಸಿಕೊಳ್ಳಬಹುದು. ಲೈಂಗಿಕ ಆಸಕ್ತಿಯಲ್ಲಿಯೂ ಬದಲಾವಣೆ ಉಂಟಾಗಬಹುದು.

ಈ ಲಕ್ಷಣಗಳನ್ನು ನಿರ್ಲಕ್ಷಿಸಬೇಡ

ಮೆನೋಪಾಸ್ ಸಮಯದಲ್ಲಿ ಕಾಣಿಸಿಕೊಳ್ಳುವ ಹಲವು ಲಕ್ಷಣಗಳನ್ನು ಮಹಿಳೆಯರು ವಯಸ್ಸಾಗುತ್ತಿರುವುದರ ಸಹಜ ಪರಿಣಾಮ ಎಂದು ಭಾವಿಸಿ ಸುಮ್ಮನಾಗುತ್ತಾರೆ. ಆದರೆ ಈ ಬದಲಾವಣೆಗಳು ನಿದ್ರೆ, ಮನಸ್ಥಿತಿ ಮತ್ತು ದೈನಂದಿನ ಜೀವನದ ಮೇಲೆ ಪರಿಣಾಮ ಬೀರಿದರೆ ವೈದ್ಯರ ಸಲಹೆ ಪಡೆಯುವುದು ಉತ್ತಮ. ಮೆನೋಪಾಸ್ ಒಂದು ಸಹಜ ಪ್ರಕ್ರಿಯೆಯಾದರೂ, ಪ್ರತಿಯೊಬ್ಬ ಮಹಿಳೆಯ ಅನುಭವವೂ ವಿಭಿನ್ನವಾಗಿರುತ್ತದೆ. ಸರಿಯಾದ ಆಹಾರ, ನಿಯಮಿತ ವ್ಯಾಯಾಮ, ಉತ್ತಮ ನಿದ್ರೆ ಮತ್ತು ಅಗತ್ಯವಿದ್ದಾಗ ವೈದ್ಯಕೀಯ ಸಲಹೆ ಪಡೆಯುವ ಮೂಲಕ ಈ ಹಂತದಲ್ಲಿ ಆರೋಗ್ಯವನ್ನು ಕಾಪಾಡಿಕೊಳ್ಳಬಹುದು.12 ತಿಂಗಳು ಪೀರಿಯಡ್ಸ್ ಆಗದಿರುವುದು ಮೆನೋಪಾಸ್ನ ಪ್ರಮುಖ ಸೂಚನೆಯಾದರೂ, ಇತರ ಕಾರಣಗಳಿಂದಲೂ ಪೀರಿಯಡ್ಸ್ ನಿಲ್ಲಬಹುದು. ವಿಶೇಷವಾಗಿ 45 ವರ್ಷಕ್ಕಿಂತ ಮೊದಲು ಪೀರಿಯಡ್ಸ್ ನಿಂತರೆ ವೈದ್ಯರನ್ನು ಸಂಪರ್ಕಿಸುವುದು ಮುಖ್ಯ.