ವಿಮಾನದಲ್ಲಿ ಗಗನಸಖಿಯ ಚಿತ್ರ ಬಿಡಿಸಿ ಗಿಫ್ಟ್ ನೀಡಿದ ಪ್ರಯಾಣಿಕ: ವಿಡಿಯೋ ವೈರಲ್
ಸಾರಾಂಶ
ವಿಮಾನದೊಳಗಿನ ಸುಂದರವಾದ ವಿಡಿಯೋವೊಂದು ವೈರಲ್ ಆಗಿದ್ದು, ನೆಟ್ಟಿಗರ ಮನ ಸೆಳೆದಿದೆ.
ಮುಂಬೈ: ವಿಮಾನ ಪ್ರಯಾಣ ಅನೇಕ ಸಂದರ್ಭಗಳಲ್ಲಿ ಪ್ರಯಾಣಿಕರ ಅತಿರೇಕದ ವರ್ತನೆಯ ಕಾರಣಕ್ಕೆ ಸುದ್ದಿಯಾಗುತ್ತಿರುತ್ತದೆ. ವಿಮಾನದೊಳಗೆ ವಿಮಾನದ ಸಿಬ್ಬಂದಿಯೊಂದಿಗೆ ಪ್ರಯಾಣಿಕರು ತೋರುವ ವಿಚಿತ್ರ ವರ್ತನೆಗಳ ಹಲವು ವಿಡಿಯೋಗಳು ಈಗಾಗಲೇ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿವೆ. ಆದರೆ ಈ ಬಾರಿ ವಿಮಾನದೊಳಗಿನ ಸುಂದರವಾದ ವಿಡಿಯೋವೊಂದು ವೈರಲ್ ಆಗಿದ್ದು, ನೆಟ್ಟಿಗರ ಮನ ಸೆಳೆದಿದೆ.
ಈ ವಿಡಿಯೋದಲ್ಲಿ ವಿಮಾನದಲ್ಲಿ ಪ್ರಯಾಣಿಸುವ ವ್ಯಕ್ತಿಯೊಬ್ಬರು ವಿಮಾನದಲ್ಲಿದ್ದ ಗಗನಸಖಿಯ (flight attendant) ಚಿತ್ರ ಬಿಡಿಸಿ ಅದನ್ನು ಆಕೆಗೆ ಗಿಫ್ಟ್ ನೀಡಿದ್ದಾರೆ. ಅಪರಿಚಿತ (Unknown Passenger) ಪ್ರಯಾಣಿಕರೊಬ್ಬರು ನೀಡಿದ ಅಚ್ಚರಿಯ ಉಡುಗೊರೆ ನೋಡಿ ಗಗನಸಖಿ ಅಚ್ಚರಿಯ ಜೊತೆ ಭಾವುಕರಾಗಿದ್ದಾರೆ. ಜೊತೆಗೆ ತಮ್ಮ ಭಾವಚಿತ್ರ ಬಿಡಿಸಿದ ಆ ಮಹಾನುಭವನಿಗೆ ಪುಟ್ಟದೊಂದು ಗಿಫ್ಟ್ (Gift) ನೀಡಿ ಧನ್ಯವಾದ ಹೇಳಿದ್ದಾರೆ.
50 ಸೆಕೆಂಡ್ಗಳ ಈ ವಿಡಿಯೋವನ್ನು ಸಾಮಾಜಿಕ ಜಾಲತಾಣವಾದ (Social Media) ರೆಡಿಟ್ನಲ್ಲಿ ಪೋಸ್ಟ್ ಮಾಡಲಾಗಿದೆ. ವಿಮಾನದಲ್ಲಿ ಆಹಾರದ ಬಗ್ಗೆ ವಿಚಾರಿಸಿಕೊಳ್ಳಲು ಈ ಪ್ರಯಾಣಿಕನ ಬಳಿ ಗಗನಸಖಿ ಬಂದು ಮೆನು ತೋರಿಸಿ ಏನು ಆಹಾರ ಬೇಕು ಎಂದು ಕೇಳಿದ್ದಾರೆ. ಈ ಒಂದು ಕ್ಷಣ ಆಕೆಯ ಭಾವಚಿತ್ರವನ್ನು ಕಣ್ಣಲ್ಲೇ ಸೆರೆ ಹಿಡಿದುಕೊಂಡ ಸ್ಮಾರ್ಟ್ ಕಲಾವಿದ ಆಕೆಯ ಚಿತ್ರವನ್ನು ಬಿಳಿಯ ಹಾಳೆಯ ಮೇಲೆ ಚಿತ್ರಿಸಿದ್ದಾನೆ. ಅಲ್ಲದೇ ಆಕೆ ಇದ್ದ ಸ್ಥಳಕ್ಕೆ ತೆರಳಿ ಆ ಪುಟ್ಟ ಉಡುಗೊರೆಯನ್ನು ಆಕೆಗೆ ನೀಡಿದ್ದಾನೆ. ಗಗನಸಖಿ ಮುಖಕ್ಕೆ ಫೇಸ್ಮಾಸ್ಕ್ (FaceMask) ಧರಿಸಿದ್ದು, ಹಾಗೆಯೇ ಈತ ಹಾಳೆಯ ಮೇಲೆ ಆಕೆಯನ್ನು ಚಿತ್ರಿಸಿದ್ದಾನೆ.
ಡ್ರಗ್ ಹೀರಿ ಫ್ಲೈಟ್ ಏರಿದ: ಗಗನಸಖಿಯೊಂದಿಗೆ ಗಬ್ಬು ಗಬ್ಬಾಗಿ ವರ್ತಿಸಿದ
ಅಚ್ಚರಿಯ ಉಡುಗೊರೆ ಪಡೆದ ಆಕೆ ಖುಷಿಯಿಂದ ಆ ಚಿತ್ರವನ್ನು ತನ್ನ ಸಹೋದ್ಯೋಗಿ ಬಳಿ ಆಕೆ ತೋರಿಸುತ್ತಾಳೆ. ಅಲ್ಲದೇ ಆತನಿಗೆ ಧನ್ಯವಾದ ತಿಳಿಸಿ ಪುಟ್ಟದಾದ ಗಿಫ್ಟ್ನ್ನು ಆತನಿಗೆ ನೀಡುತ್ತಾಳೆ. ಇವರಿಬ್ಬರ ಈ ಮಧುರವಾದ ವಿಡಿಯೋ ಈಗ ಸಾಮಾಜಿಕ ಜಾಲತಾಣ ರೆಡಿಟ್ನಲ್ಲಿ ವೈರಲ್ ಆಗಿದ್ದು, ನೋಡುಗರು ಕೂಡ ಸಂತಸ ವ್ಯಕ್ತಪಡಿಸಿದ್ದಾರೆ. ಅಲ್ಲದೇ ಗಗನಸಖಿ ನೀಡಿದ ಗಿಫ್ಟ್ಗೆ ಈ ಪ್ರಯಾಣಿಕ ಸಂತಸ ವ್ಯಕ್ತಪಡಿಸಿದ್ದಾರೆ.
ಅಂದಹಾಗೆ ಇದು ಜಪಾನ್ ಏರ್ಲೈನ್ಸ್ಗೆ (Japan Airlines) ಸೇರಿದ ವಿಮಾನದಲ್ಲಿ ನಡೆದ ಘಟನೆ ಆಗಿದ್ದು, ಈ ವಿಮಾನ ಟೋಕಿಯೋದಿಂದ (Tokyo) ಡಲ್ಲಾಸ್ಗೆ (Dallas) ತೆರಳುತ್ತಿತ್ತು. "ವ್ಯಕ್ತಿಯೊಬ್ಬ ಗಗನಸಖಿಯ ಚಿತ್ರ ಬಿಡಿಸಿದ, ಆಕೆ ಅದಕ್ಕೆ ಪ್ರತಿಯಾಗಿ ಉಡುಗೊರೆ ನೀಡಿದಳು' ಎಂದು ಈ ವಿಡಿಯೋ ಪೋಸ್ಟ್ ಮಾಡಿ ಬರೆಯಲಾಗಿದೆ. ಎರಡು ದಿನಗಳ ಹಿಂದೆ ಪೋಸ್ಟ್ ಆಗಿರುವ ಈ ವಿಡಿಯೋವನ್ನು 85 ಸಾವಿರಕ್ಕೂ ಹೆಚ್ಚು ಜನ ವೀಕ್ಷಿಸಿದ್ದಾರೆ.
ವಿಮಾನದಲ್ಲಿ ಪಾಕಿಸ್ತಾನ ಪ್ರಜೆಯ ಕಿತಾಪತಿ: ಫ್ಲೈಟ್ ವಿಂಡೋ ಒಡೆಯಲು ಯತ್ನ: ದುಬೈನಲ್ಲಿ ಬಂಧನ
ಈ ದೃಶ್ಯವನ್ನು ನೋಡಲು ಖುಷಿಯಾಗುತ್ತಿದೆ. ಈ ವಿಮಾನದಲ್ಲಿ ಬೊಬ್ಬೆ ಹೊಡೆಯುವ ಕಿತ್ತಾಡುವ ಜನರಿಲ್ಲ ಎಂದು ಒಬ್ಬರು ಕಾಮೆಂಟ್ ಮಾಡಿದ್ದಾರೆ. ಪ್ರಂಪಂಚ ಎಷ್ಟು ಸುಂದರವಾಗಿದೆ ಎಂದು ಮತ್ತೊಬ್ಬರು ಕಾಮೆಂಟ್ ಮಾಡಿದ್ದಾರೆ. ನಮ್ಮ ಸಣ್ಣದೊಂದು ಸುಂದರವಾದ ವರ್ತನೆ ಹೇಗೆ ಇತರರನ್ನು ಖುಷಿ ಪಡಿಸಬಲ್ಲದು ಎಂದು ಮತ್ತೊಬ್ಬರು ಕಾಮೆಂಟ್ ಮಾಡಿದ್ದಾರೆ. ಒಟ್ಟಿನಲ್ಲಿ ಅಪರಿಚಿತನೋರ್ವನ ಈ ಸುಂದರ ಗಿಫ್ಟ್ ಗಗನಸಖಿಯನ್ನು ಖುಷಿ ಪಡಿಸಿದೆ.
ಆರೋಗ್ಯ, ಸೌಂದರ್ಯ, ಫಿಟ್ನೆಸ್, ಕಿಚನ್ ಟಿಪ್ಸ್, ಸಂಬಂಧ, ಫ್ಯಾಷನ್, ರೆಸಿಪಿ ಅಪ್ಡೇಟ್ಗಳಿಗಾಗಿ ಏಷ್ಯಾನೆಟ್ ಸುವರ್ಣ ನ್ಯೂಸ್ ಫಾಲೋ ಮಾಡಿ. ಸಂಪೂರ್ಣ ಮಾಹಿತಿ ಒಂದೇ ಕ್ಲಿಕ್ನಲ್ಲಿ ಲಭ್ಯ. ಏಷ್ಯಾನೆಟ್ ಸುವರ್ಣ ನ್ಯೂಸ್ ಅಧಿಕೃತ ಆ್ಯಪ್ ಡೌನ್ಲೋಡ್ ಮಾಡಿ ಹಾಗು ಎಲ್ಲಾ ಅಪ್ಡೇಟ್ ಗಳನ್ನು ಪಡೆಯಿರಿ.