Kashmir's High-Risk Zones: ಇಂದಿಗೂ ಜನ ಹೆದರುತ್ತಾರೆ...ಕಾಶ್ಮೀರದಲ್ಲಿರುವ 5 ಅಪಾಯಕಾರಿ ಸ್ಥಳಗಳಿವು!

ಪಹಲ್ಗಾಮ್ ಭಯೋತ್ಪಾದಕ ದಾಳಿಯ ಹಿನ್ನೆಲೆಯಲ್ಲಿ ಕಾಶ್ಮೀರದ ಅಪಾಯಕಾರಿ ಪ್ರದೇಶಗಳ ಬಗ್ಗೆ ಮಾಹಿತಿ ನೀಡಲಾಗಿದೆ.

ಕಾಶ್ಮೀರದ ಪಹಲ್ಗಾಮ್‌ನಲ್ಲಿ ನಡೆದ ಭಯೋತ್ಪಾದಕ ದಾಳಿಯು ಇಡೀ ದೇಶವನ್ನೇ ಬೆಚ್ಚಿಬೀಳಿಸಿದೆ. ಭಯೋತ್ಪಾದಕರು ಪ್ರವಾಸಿಗರನ್ನು ಗುರಿಯಾಗಿಸಿಕೊಂಡು ಮನಬಂದಂತೆ ಗುಂಡು ಹಾರಿಸಿ 26 ಅಮಾಯಕ ಜನರನ್ನು ಕೊಂದಿದ್ದಾರೆ. ಕಾಶ್ಮೀರದ ಅತ್ಯಂತ ಸುಂದರವಾದ ಕಣಿವೆಗಳಲ್ಲಿ ಒಂದೆಂದು ಪರಿಗಣಿಸಲಾದ ಸ್ಥಳದಲ್ಲಿ ಈ ದಾಳಿ ನಡೆದಿದೆ. ಇದನ್ನು ಮಿನಿ ಸ್ವಿಟ್ಜರ್ಲೆಂಡ್ ಎಂದೂ ಸಹ ಕರೆಯುತ್ತಾರೆ. ಪಹಲ್ಗಾಮ್ ಪ್ರತಿವರ್ಷ ಸಾವಿರಾರು ಪ್ರವಾಸಿಗರನ್ನು ಆಕರ್ಷಿಸುತ್ತದೆ. ಆದರೆ ಈಗ ಆ ಸ್ಥಳದ ಮೇಲೆ ಭಯದ ನೆರಳು ಆವರಿಸಿದೆ. 

"ಕಾಶ್ಮೀರ ಪ್ರವಾಸಿಗರಿಗೆ ಸುರಕ್ಷಿತವೇ..?" ಎಂಬಂತಹ ಪ್ರಶ್ನೆಗಳು ಈ ದಾಳಿಯ ನಂತರ ಮತ್ತೊಮ್ಮೆ ಉದ್ಭವಿಸಿದೆ. ಹಾಗಾಗಿ ಈ ಸುದ್ದಿಯಲ್ಲಿ ನಾವು ನಿಮಗೆ ಕಾಶ್ಮೀರದ ಅಪಾಯಕಾರಿ ಪ್ರದೇಶಗಳು ಯಾವುವು ಎಂಬ ಬಗ್ಗೆ  ಮಾಹಿತಿ ಕೊಡುತ್ತೇವೆ. ಇವು ತುಂಬಾ ಸುಂದರವಾಗಿವೆ. ಆದರೆ ಇಂದಿಗೂ ಈ ಪ್ರದೇಶಗಳಿಗೆ ಹೋಗುವುದಕ್ಕೆ ಜನರು ಹೆದರುತ್ತಾರೆ. ಏಕೆಂದರೆ ಇವಿನ್ನು ಅಪಾಯದಿಂದ ಮುಕ್ತವಾಗಿಲ್ಲ. 

ಕಾಶ್ಮೀರದಲ್ಲಿರುವ 5 ಅಪಾಯಕಾರಿ ಸ್ಥಳಗಳು 

ಶೋಪಿಯಾನ್ (Shopian) 
ದಕ್ಷಿಣ ಕಾಶ್ಮೀರದಲ್ಲಿರುವ ಈ ಪ್ರದೇಶವು ಪ್ರತಿದಿನ ಭಯೋತ್ಪಾದಕ ಚಟುವಟಿಕೆಗಳು ಮತ್ತು ಎನ್‌ಕೌಂಟರ್‌ಗಳಿಗೆ ಸಾಕ್ಷಿಯಾಗಿದೆ. ಪ್ರವಾಸಿಗರು ಇಲ್ಲಿಗೆ ಹೋಗುವುದು ಅತ್ಯಂತ ಅಸುರಕ್ಷಿತವೆಂದು ಪರಿಗಣಿಸಲಾಗಿದೆ. ಇಲ್ಲಿ ಯಾವಾಗ ಭಯೋತ್ಪಾದಕ ದಾಳಿ ಸಂಭವಿಸುತ್ತದೆ ಎಂದು ಯಾರಿಗೂ ತಿಳಿದಿಲ್ಲ.ಶೋಪಿಯಾನ್ ಜಿಲ್ಲೆಯು ಪ್ರಾಕೃತಿಕ ತಾಣಗಳು, ಐತಿಹಾಸಿಕ ತಾಣಗಳು ಮತ್ತು ಸಾಂಸ್ಕೃತಿಕ ಆಕರ್ಷಣೆಗಳು ಸೇರಿದಂತೆ ವಿವಿಧ ಪ್ರವಾಸಿ ಆಕರ್ಷಣೆಗಳನ್ನು ಹೊಂದಿದೆ. ಈ ಜಿಲ್ಲೆಯು ಹಚ್ಚ ಹಸಿರಿನ ಹುಲ್ಲುಗಾವಲುಗಳು, ಸೇಬು ತೋಟಗಳು ಮತ್ತು ಶ್ರೀನಗರವನ್ನು ಜಮ್ಮು ಪ್ರದೇಶಕ್ಕೆ ಸಂಪರ್ಕಿಸುವ ಐಕಾನಿಕ್ ಮೊಘಲ್ ರಸ್ತೆಗೆ ಹೆಸರುವಾಸಿಯಾಗಿದೆ. 

ಟ್ರಾಲ್ (Tral) 
ಪುಲ್ವಾಮಾ ಜಿಲ್ಲೆಯಲ್ಲಿರುವ ಟ್ರಾಲ್ ಭಯೋತ್ಪಾದಕರ ಭದ್ರಕೋಟೆಯಾಗಿದೆ. ಇಲ್ಲಿ ಸೇನೆ ಮತ್ತು ಭಯೋತ್ಪಾದಕರ ನಡುವೆ ಘರ್ಷಣೆ ಸಾಮಾನ್ಯ. ಆದ್ದರಿಂದ ಜನರು ಇಲ್ಲಿಗೆ ಹೋಗುವುದನ್ನು ತಪ್ಪಿಸುತ್ತಾರೆ. ನಾಗಬೆರನ್ (ಅಪ್ಪರ್ ದಚಿಗಮ್ ), ವಸ್ತೂರ್ವಾನ್ (ಸೈದಾಬಾದ್), ಗುಫ್ಕ್ರಾಲ್, ಶಿಕರ್ಗಾಹ್, ಪನ್ನರ್ ಅಣೆಕಟ್ಟು, ಅರಿಪಾಲ್ ಸ್ಪ್ರಿಂಗ್, ನರಸ್ತಾನ್, ಹಜನ್ ಮತ್ತು ದಿಲ್ನಾಗ್ ಟ್ರಾಲ್‌ನ ಪ್ರಮುಖ ಪ್ರವಾಸಿ ಆಕರ್ಷಣೆಗಳಾಗಿವೆ. 

ಕುಪ್ವಾರಾ (Kupwara)
LOC ಗೆ ಹತ್ತಿರದಲ್ಲಿರುವುದರಿಂದ, ಈ ಪ್ರದೇಶವು ಆಗಾಗ್ಗೆ ಒಳನುಸುಳುವಿಕೆ ಮತ್ತು ಗುಂಡಿನ ದಾಳಿಯ ಘಟನೆಗಳಿಗೆ ಗುರಿಯಾಗುತ್ತದೆ. ಈ ಪ್ರದೇಶದ ಸೌಂದರ್ಯವನ್ನು ನೋಡಿ ಎಲ್ಲರೂ ಆಶ್ಚರ್ಯಚಕಿತರಾಗುತ್ತಾರೆ. ಆದರೆ ಸಮಸ್ಯೆ ಹಾಗೆಯೇ ಉಳಿದಿದೆ, ಗುಂಡಿನ ದಾಳಿಯಂತಹ ಘಟನೆಗಳು ಇಲ್ಲಿ ಪ್ರತಿದಿನ ನಡೆಯುತ್ತವೆ. ಕುಪ್ವಾರಾಕ್ಕೆ ರೈಲು ಹಾಗೂ ವಿಮಾನ ಸಂಪರ್ಕವಿಲ್ಲ. ಆದರೆ NH 701 ಕುಪ್ವಾರಾ ಮೂಲಕ ಹಾದುಹೋಗುತ್ತದೆ. 

ಅನಂತನಾಗ್(Anantnag) 
ಈ ಪ್ರದೇಶವು ಧಾರ್ಮಿಕ ಪ್ರವಾಸೋದ್ಯಮಕ್ಕೆ ಹೆಸರುವಾಸಿಯಾಗಿದ್ದರೂ, ಇತ್ತೀಚಿನ ವರ್ಷಗಳಲ್ಲಿ ಇಲ್ಲಿ ಭಯೋತ್ಪಾದಕ ದಾಳಿಗಳ ಸಂಖ್ಯೆ ಹೆಚ್ಚಾಗಿದೆ. ಈ ಪಟ್ಟಣವನ್ನು ಇಸ್ಲಾಮಾಬಾದ್ ಮತ್ತು ಅನಂತ್‌ನಾಗ್ ಎಂಬ ಎರಡೂ ಹೆಸರುಗಳಿಂದ ಕರೆಯಲಾಗಿದೆ. 500 CE ಯಲ್ಲಿ ನಿರ್ಮಿಸಲಾದ ಮಾರ್ತಾಂಡ ಸೂರ್ಯ ದೇವಾಲಯವು ಕಾಶ್ಮೀರದ ಪ್ರಮುಖ ಪುರಾತತ್ವ ಸ್ಥಳಗಳಲ್ಲಿ ಒಂದಾಗಿದೆ. ಈ ದೇವಾಲಯವು ಅನಂತನಾಗ್‌ನ ಪೂರ್ವ-ಈಶಾನ್ಯಕ್ಕೆ ಮತ್ತು ಮಟ್ಟನ್‌ನ ದಕ್ಷಿಣಕ್ಕೆ 9 ಕಿ.ಮೀ ದೂರದಲ್ಲಿರುವ ಕೆಹ್ರಿಬಲ್‌ನಲ್ಲಿದೆ. 

ಹಂದ್ವಾರ (Handwara) 
ಈ ಪ್ರದೇಶವು ಪಾಕಿಸ್ತಾನದ ಗಡಿಗೆ ಹತ್ತಿರದಲ್ಲಿರುವುದರಿಂದ ಸೂಕ್ಷ್ಮ ಪ್ರದೇಶದಲ್ಲಿ ಬರುತ್ತದೆ. ವಿದೇಶಿ ಪ್ರವಾಸಿಗರನ್ನು ಗುರಿಯಾಗಿಸಿಕೊಂಡು ದಾಳಿ ನಡೆಸುವ ಘಟನೆಗಳು ಹಲವು ಬಾರಿ ಇಲ್ಲಿ ಬೆಳಕಿಗೆ ಬಂದಿವೆ.

ಈ ಪ್ರದೇಶಗಳಲ್ಲಿ ಸೌಂದರ್ಯವಿದೆ, ಆದರೆ ಭದ್ರತಾ ಬಿಕ್ಕಟ್ಟು ಅದಕ್ಕಿಂತ ದೊಡ್ಡದಾಗಿದೆ. ಸರ್ಕಾರ ಮತ್ತು ಸೇನೆ ಪರಿಸ್ಥಿತಿಯನ್ನು ನಿಯಂತ್ರಿಸಲು ಪ್ರಯತ್ನಿಸುತ್ತಿವೆ. ಆದರೆ ಪರಿಸ್ಥಿತಿ ಬದಲಾಗುವವರೆಗೆ ಈ ಪ್ರದೇಶಗಳಿಗೆ ಭೇಟಿ ನೀಡುವುದು ಪ್ರವಾಸಿಗರಿಗೆ ಅಪಾಯವೆಂದೇ ಹೇಳಬಹುದು.