ಭೀಕರ ಹತ್ಯೆ ಪ್ರಕರಣವೊಂದು ಬೆಳಕಿಗೆ ಬಂದಿದ್ದು, ಪ್ರಿಯಕರನೊಬ್ಬ ತನ್ನನ್ನು ಮದುವೆಯಾಗೆಂದ ತನ್ನ ಗೆಳತಿಯನ್ನೇ ಕೊಂದು ಸೂಟ್‌ಕೇಸ್‌ನಲ್ಲಿ ಇಟ್ಟು ಚರಂಡಿಗೆಸೆದರುವುದು ಬೆಚ್ಚಿ ಬೀಳಿಸಿದೆ.
ಹೈದರಾಬಾದ್‌[ಏ.15]: ವಿವಾಹವಾಗುವಂತೆ ಒತ್ತಾಯಿಸಿದ್ದ ಪ್ರಿಯತಮೆಯನ್ನು, ಪ್ರಿಯಕರನೇ ಹತ್ಯೆಗೈದು, ಸೂಟ್‌ಕೇಸ್‌ನಲ್ಲಿ ತುಂಬಿ, ಮೋರಿಗೆ ಎಸೆದು ಹೋದ ಭೀಕರ ಘಟನೆ ತೆಲಂಗಾಣದಲ್ಲಿ ನಡೆದಿದೆ.
ಸ್ಥಳೀಯ ಟೆಕ್ಕಿಯೊಬ್ಬಳು, ಬಿಹಾರ ಮೂಲದ ಟೆಕ್ಕಿ ಸುನಿಲ್‌ನನ್ನು ಪ್ರೀತಿಸುತ್ತಿದ್ದಳು. ಇಬ್ಬರೂ ಕಾಲೇಜು ದಿನಗಳಿಂದಲೇ ಸ್ನೇಹಿತರಾಗಿದ್ದರು. ಈ ನಡುವೆ ಯುವತಿ, ಇತ್ತೀಚೆಗೆ ಮದುವೆಯಾಗೋಣ ಎಂದು ಸುನಿಲ್‌ಗೆ ಒತ್ತಡ ಹಾಕಿದ್ದರು. ಆದರೆ ಅದಕ್ಕೆ ಆತ ನಿರಾಕರಿಸಿದ್ದ.
ಈ ನಡುವೆ ಇತ್ತೀಚೆಗೆ ದುಬೈಗೆ ಕೆಲಸಕ್ಕಾಗಿ ಹೋಗಲು, ಯುವತಿಗೆ ವೀಸಾ ಮಾಡಿಸುವುದಾಗಿ ಹೇಳಿ ಆಕೆಯನ್ನು ಸುನಿಲ್‌ ಕರೆದೊಯ್ದಿದ್ದ. ಬಳಿಕ ಇಬ್ಬರು ಹೋಟೆಲ್‌ನಲ್ಲಿ ಉಳಿದುಕೊಂಡಿದ್ದರು. ಅಲ್ಲಿ ಆಕೆಯನ್ನು ಹತ್ಯೆ ಮಾಡಿದ್ದ ಸುನಿಲ್‌, ಆಕೆಯ ದೇಹವನ್ನು ಸೂಟ್‌ಕೇಸ್‌ನಲ್ಲಿ ತುಂಬಿ ಮೋರಿಗೆ ಎಸೆದು ಹೋಗಿದ್ದ. ಈ ನಡುವೆ ಪುತ್ರಿ ಮನೆಗೆ ಮರಳದ ಹಿನ್ನೆಲೆಯಲ್ಲಿ ಆಕೆಯ ಪೋಷಕರು ದೂರು ನೀಡಿದ್ದರು. ಇದೇ ವೇಳೆ ಶನಿವಾರ ಯುವತಿಯ ಶವ ಪತ್ತೆಯಾಗಿದೆ. ವಿಚಾರಣೆ ವೇಳೆ ತಾನೇ ಹತ್ಯೆ ಮಾಡಿದ್ದನ್ನು ಒಪ್ಪಿಕೊಂಡಿದ್ದಾನೆ.