ಸೀರೆಯುಟ್ಟು ರೋಲ್ಸ್ ರಾಯ್ಸ್ ಘೋಸ್ಟ್ ರೈಡ್, ಈ ಅಜ್ಜಿ ಕೈಯಲ್ಲಿದೆ ಇಂಟರ್‌ನ್ಯಾಷನಲ್ ಡ್ರೈವಿಂಗ್ ಲೈಸೆನ್ಸ್

ದುಬೈ ರಸ್ತೆಯಲ್ಲಿ ಕೂಲ್ ಆಗಿ ಕಾರ್ ಓಡಿಸಿದ ಭಾರತೀಯ ಮಹಿಳೆ. ವಯಸ್ಸು ಬರೀ ಲೆಕ್ಕಕ್ಕೆ, ಸಾಧನೆಗಲ್ಲ ಎಂಬುದಕ್ಕೆ ಇವರೇ ಸ್ಪೂರ್ತಿ. 

ದುಬೈ (Dubai) ರಸ್ತೆಯಲ್ಲಿ ಓಡ್ತಿರುವ ರೋಲ್ಸ್ ರಾಯ್ಸ್ ಘೋಸ್ಟ್ (Rolls-Royce Ghost) ಎಲ್ಲರ ಗಮನ ಸೆಳೆದಿದೆ. ಇದನ್ನು ಯಾವ್ದೋ ವ್ಯಕ್ತಿ ಓಡಿಸ್ತಿಲ್ಲ. ಬದಲಾಗಿ ನಮ್ಮ ದೇಶದ ಸೀರೆಯುಟ್ಟ ಮಹಿಳೆ ಓಡಿಸ್ತಿದ್ದಾರೆ. ಈ ಮಹಿಳಾ ಡ್ರೈವರ್ ಬಗ್ಗೆ ಚರ್ಚೆ ಆಗ್ತಿದೆ. ಬರೀ ದುಬೈ ಮಾತ್ರವಲ್ಲ ಭಾರತ ಕೂಡ ಈ ಮಹಿಳೆ ಬಗ್ಗೆ ಮಾತನಾಡ್ತಿದೆ. ಅಷ್ಟಕ್ಕೂ ಆ ಮಹಿಳೆ ವಯಸ್ಸು 75 ವರ್ಷ. ಹೆಸರು ಮಣಿ ಅಮ್ಮ (Mani Amma). ದುಬೈನಲ್ಲಿ ಸಾಂಪ್ರದಾಯಿಕ ಸೀರೆಯುಟ್ಟು ಐಷಾರಾಮಿ ರೋಲ್ಸ್ ರಾಯ್ಸ್ ಘೋಸ್ಟ್ ಡ್ರೈವ್ ಮಾಡ್ತಿದ್ದಾರೆ. ಮಣಿ ಅಮ್ಮ, ರೋಲ್ಸ್ ರಾಯ್ಸ್ ಘೋಸ್ಟ್ ಓಡಿಸ್ತಿರೋದು ಇಲ್ಲಿ ಹೆಚ್ಚು ಸುದ್ದಿ ಮಾಡಿಲ್ಲ, ಅದ್ರ ಬದಲಾಗಿ ಅವರ ಆತ್ಮವಿಶ್ವಾಸ ಹಾಗೂ ಕೂಲ್ ಡ್ರೈವಿಂಗ್ ಎಲ್ಲರ ಗಮನ ಸೆಳೆದಿದೆ.

ಮಣಿ ಅಮ್ಮ ಯಾರು ? : ಮಣಿ ಅಮ್ಮ ಕೇರಳದವರು. ಅವರು ಡ್ರೈವರ್ ಅಮ್ಮ ಎಂದೇ ಪ್ರಸಿದ್ಧಿ ಪಡೆದಿದ್ದಾರೆ. ಮಣಿ ಅಮ್ಮ,11 ರೀತಿಯ ವಾಹನಗಳಿಗೆ ಚಾಲನಾ ಪರವಾನಗಿ ಹೊಂದಿದ್ದಾರೆ. ಮಣಿ ಅಮ್ಮ ಅಂತರರಾಷ್ಟ್ರೀಯ ಚಾಲನಾ ಪರವಾನಗಿ ಕೂಡ ಹೊಂದಿದ್ದಾರೆ. 1978ರಲ್ಲಿ ಮಣಿ ಅಮ್ಮ ಪತಿ ಕೇರಳದಲ್ಲಿ ಡ್ರೈವಿಂಗ್ ಸ್ಕೂಲ್ ಶುರು ಮಾಡಿದ್ರು. ಮಣಿ ಅಮ್ಮ ಅವರ ಡ್ರೈವಿಂಗ್ ಪ್ರಯಾಣ ಅಲ್ಲಿಂದ ಪ್ರಾರಂಭವಾಯಿತು. ಪತಿ ನಿಧನದ ನಂತ್ರ ಮಣಿ ಅಮ್ಮ, ಡ್ರೈವಿಂಗ್ ಸ್ಕೂಲ್ ಹೊಣೆ ಹೊತ್ತುಕೊಂಡ್ರು. ಡ್ರೈವಿಂಗ್ ಸ್ಕೂಲ್ ಜೊತೆ ಕುಟುಂಬವನ್ನು ಮುನ್ನಡೆಸಿದ್ರು. ಇಂದು, ಅದೇ ಉತ್ಸಾಹ ದುಬೈ ರಸ್ತೆಗಳಲ್ಲಿ ಪ್ರಪಂಚದಾದ್ಯಂತ ಇರುವ ಜನರ ಗಮನವನ್ನು ಸೆಳೆಯುವಂತೆ ಮಾಡುತ್ತಿದೆ. ಅವರ ಜೀವನಶೈಲಿ ಅನೇಕ ಮಹಿಳೆಯರಿಗೆ ಸ್ಫೂರ್ತಿಯಾಗಿದೆ. ಜೀವನದ ಯಾವುದೇ ಹಂತದಲ್ಲಾದ್ರೂ ನಾವು ಹೊಸದನ್ನು ಕಲಿಯಬಹುದು, ಸಾಧಿಸಬಹುದು ಎಂಬುದಕ್ಕೆ ಇವರೇ ಉದಾಹರಣೆ.

ಕೇರಳದಲ್ಲಿ ಮಣಿ ಅಮ್ಮ ಡ್ರೈವಿಂಗ್ ಸ್ಕೂಲ್ ನಡೆಸುತ್ತಿದ್ದಾರೆ. ಕಾರು, ಟ್ರಕ್ , ಫೋರ್ಕ್ಲಿಫ್ಟ್ ಮತ್ತು ಕ್ರೇನ್ ಸೇರಿದಂತೆ ವಿವಿಧ ವಾಹನಗಳನ್ನು ಡ್ರೈವ್ ಮಾಡೋದ್ರಲ್ಲಿ ಮಣಿ ಅಮ್ಮ ಎತ್ತಿದ ಕೈ. ಮಣಿಯಮ್ಮನ ಪ್ರತಿಭೆ ನೋಡಿ ಪ್ರತಿಯೊಬ್ಬರೂ ಅಚ್ಚರಿಗೊಂಡಿದ್ದಾರೆ. ದುಬೈ ಕೇವಲ ಪ್ರವಾಸ, ಮನರಂಜನೆಗೆ ಸೀಮಿತವಾಗಿಲ್ಲ, ಅಲ್ಲಿಯೂ ಹೊಸ ಪ್ರತಿಭೆಗಳನ್ನು ಕಲಿಯಬಹುದು ಎಂಬುದಕ್ಕೆ ಮಣಿ ಅಮ್ಮ ಸ್ಪೂರ್ತಿ.

ವಯಸ್ಸು ಎಷ್ಟೇ ಆಗಿರಲಿ, ಆಸಕ್ತಿ ಇದ್ರೆ ಏನನ್ನು ಬೇಕಾದ್ರೂ ಕಲಿಯಬಹುದು ಎಂಬುದಕ್ಕೆ ಮಣಿಯಮ್ಮ ಉತ್ತಮ ನಿದರ್ಶನ. ಮಣಿ ಅಮ್ಮ ಸ್ಟೋರಿ ಸಾಮಾನ್ಯ ಜನರನ್ನು ಮಾತ್ರವಲ್ಲ ದೊಡ್ಡ ದೊಡ್ಡ ಉದ್ಯಮಿಗಳನ್ನು ಸೆಳೆದಿದೆ. ಪ್ರಮುಖ ಉದ್ಯಮಿ ಆನಂದ್ ಮಹೀಂದ್ರಾ ಕೂಡ ಅವರ ಸ್ಟೋರಿ ಹಂಚಿಕೊಂಡಿದ್ದಾರೆ. ಸೋಶಿಯಲ್ ಮೀಡಿಯಾದಲ್ಲಿ ಮಣಿ ಅಮ್ಮ ವಿಡಿಯೋ ಹಂಚಿಕೊಂಡ ಆನಂದ್ ಮಹೀಂದ್ರಾ ಇದು ಸೋಮವಾರದ ಮೋಟಿವೇಷನ್ ಅಂತ ಬರೆದಿದ್ದಾರೆ. ಜೀವನದ ಕಡೆಗೆ ಮಣಿ ಅಮ್ಮ ಅವರ ಅದಮ್ಯ ಇಚ್ಛಾಶಕ್ತಿಯನ್ನು ಆನಂದ್ ಮಹೀಂದ್ರ ಹೊಗಳಿದ್ದಾರೆ.

ಮಣಿ ಅಮ್ಮ ಅವರ ಈ ವೀಡಿಯೊ ಆನ್ಲೈನ್ನಲ್ಲಿ ಸಾಕಷ್ಟು ಫೇಮಸ್ ಆಗಿದೆ. ಅನೇಕರು ಮಣಿ ಅಮ್ಮ ಕೆಲ್ಸವನ್ನು ಹೊಗಳಿದ್ದಾರೆ. ಜೀವನವನ್ನು ಪೂರ್ಣವಾಗಿ ಬದುಕಲು ಮಣಿ ಅಮ್ಮ ಸ್ಫೂರ್ತಿ ಎಂದು ಅನೇಕರು ಕಮೆಂಟ್ ಮಾಡಿದ್ದಾರೆ. ಅಂತರರಾಷ್ಟ್ರೀಯ ಚಾಲನಾ ಪರವಾನಗಿಯನ್ನು ಹೊಂದಿರುವ ವಿಶ್ವದ ಅತ್ಯಂತ ಹಿರಿಯ ಮಹಿಳೆ ಮಣಿ ಅಮ್ಮ ಎಂದು ಅನೇಕ ಬಳಕೆದಾರರು ಬರೆದಿದ್ದಾರೆ.