Heart Health Tips: ಪ್ರತಿ ದಿನ ಹೀಗೆ ಕಳೆಯಿರಿ 'ಹೃದಯಾಘಾತ'ದ ಭಯವೇ ಇರೋದಿಲ್ಲ! ಇಲ್ಲಿವೆ ವೈದ್ಯರ ಆಪ್ತ ಸಲಹೆ

ಮಾನವ ದೇಹದ ಪ್ರಮುಖ ಅಂಗ ಹೃದಯದ ಆರೋಗ್ಯ ಕಾಪಾಡಿಕೊಳ್ಳುವುದು ಸುದೀರ್ಘ ಜೀವನಕ್ಕೆ ಅತ್ಯಗತ್ಯ. ಮಾನಸಿಕ ಒತ್ತಡ, ಜಡ ಜೀವನಶೈಲಿ ಹೃದಯ ಸಂಬಂಧಿ ಕಾಯಿಲೆಗಳಿಗೆ ಕಾರಣವಾಗಬಹುದು. 

ಜನನದಿಂದ ಮರಣದವರಗೆ ಒಂದು ಕ್ಷಣವೂ ವಿಶ್ರಾಂತಿ ಬಯಸದೆ ಕ್ರಿಯಾಶೀಲವಾಗಿರುವ ಮಾನವ ದೇಹದ ಪ್ರಬಲ ಅಂಗ ಹೃದಯ. ಹೃದಯವು ರಕ್ತ ಪರಿಚಲನಾ ವ್ಯವಸ್ಥೆಯ ರಕ್ತನಾಳಗಳ ಮೂಲಕ ರಕ್ತವನ್ನು ಪಂಪ್‌ ಮಾಡಿ ದೇಹಕ್ಕೆ ಅಗತ್ಯವಾದ ಆಮ್ಲಜನಕ ಮತ್ತು ಪೋಷಕಾಂಶಗಳನ್ನು ಒದಗಿಸುವುದರಿಂದ ಜೀವಿಯು ಜೀವಿಸಲು ಸಾಧ್ಯವಾಗುತ್ತದೆ. ಆದಕಾರಣ ಸುದೀರ್ಘ ಮತ್ತು ಗುಣಮಟ್ಟದ ಜೀವನವನ್ನು ನಡೆಸಲು ನಮ್ಮ ಹೃದಯವನ್ನು ಆರೋಗ್ಯವಾಗಿಟ್ಟುಕೊಳ್ಳುವುದು ತುಂಬಾ ಅಗತ್ಯವಾಗಿದೆ.

ವಿಶ್ವ ಆರೋಗ್ಯ ಸಂಸ್ಥೆಯ ಪ್ರಕಾರ ಪ್ರತಿ ವರ್ಷ ಸುಮಾರು 1.8 ಕೋಟಿ ಜನರು ಜಗತ್ತಿನಾದ್ಯಾಂತ ಹೃದಯ ಸಂಬಂಧಿ ಖಾಯಿಲೆಗಳಿಗೆ ಒಳಗಾಗುತ್ತಿದ್ದಾರೆ. ಶೇಕಡ 30ರಷ್ಟು ಜನರು ಹೃದಯಘಾತದಿಂದ ಸಾಯುತ್ತಿದ್ದಾರೆ. ಹೃದಯಘಾತವು ಎಲ್ಲಾ ವಯೋಮಾನದವರನ್ನು ಕಾಡುತ್ತಿರುವ ಗಂಭೀರವಾದ ರೋಗವಾಗಿದೆ.

ಸಂಶೋಧನೆಗಳ ಪ್ರಕಾರ ಅತಿಯಾದ ಆತಂಕ, ಮಾನಸಿಕ ಒತ್ತಡ, ಖಿನ್ನತೆ, ಜಡಜೀವನ ಶೈಲಿ, ಕಾರ್ಯದ ಒತ್ತಡ, ಆವೇಗ, ಆಕ್ರಮಣಕಾರಿ ಮನೋಭಾವ, ಒಂಟಿತನ, ನಿರಾಶಾವಾದ, ಭಾವನಾತ್ಮಕ ಘರ್ಷಣೆಗಳು, ಆರೋಗ್ಯ ಮತ್ತು ವೈಯಕ್ತಿಕ ಸಮಸ್ಯೆಗಳ ಬಗೆಗೆ ಅತಿಯಾದ ಚಿಂತೆ, ಅತಿಯಾದ ಮಾನಸಿಕ ಮತ್ತು ದೈಹಿಕ ಆಯಾಸ, ಅವಿಶ್ರಾಂತ ದುಡಿಮೆ ಮುಂತಾದ ಮಾನಸಿಕ ಕಾರಣಗಳು, ಅಧಿಕ ರಕ್ತದ ಒತ್ತಡ ಮತ್ತು ಹೃದಯಘಾತಕ್ಕೆ ಕಾರಣಗಳಾಗಿವೆ.

ಆರೋಗ್ಯ ಮನೋವಿಜ್ಞಾನವು ಹೃದಯದ ಆರೋಗ್ಯದ ಬಗೆಗೆ ವಿಶೇಷ ಗಮನವನ್ನು ಕೇಂದ್ರೀಕರಿಸುತ್ತದೆ. ಒತ್ತಡ ನಿರ್ವಹಣೆ, ಭಾವನಾತ್ಮಕ ಸಮತೋಲನ, ವಿಶ್ರಾಂತಿ ಚಿಕಿತ್ಸೆ, ಮನೋಚಿಕಿತ್ಸೆ ಮತ್ತು ಉತ್ತಮ ಜೀವನಶೈಲಿ ರೂಪಿಸಿಕೊಳ್ಳುವಿಕೆ ಮುಂತಾದ ವಿಧಾನಗಳ ಮೂಲಕ ಹೃದಯ ಸಂಬಂಧಿ ರೋಗಗಳನ್ನು ತಡೆಗಟ್ಟಲಾಗುತ್ತದೆ.

ಮನೋವಿಜ್ಞಾನದ ಪ್ರಕಾರ ಹೃದಯದ ಆರೋಗ್ಯವನ್ನು ಕಾಪಾಡಿಕೊಳ್ಳಲು ಕೆಳಕಂಡ ಅಂಶಗಳನ್ನು ದೈನಂದಿನ ಜೀವನದಲ್ಲಿ ಅಳವಡಿಸಿಕೊಳ್ಳುವುದು ಅವಶ್ಯಕ.

• ಸಂತೋಷ, ನಗು, ಹಾಸ್ಯ, ಸ್ನೇಹ, ಪ್ರೀತಿ, ವಾತ್ಸಲ್ಯ, ಮಮತೆ ಮುಂತಾದ ಸಕಾರಾತ್ಮಕ ಭಾವನೆಗಳಿಗೆ ಮಹತ್ವ ನೀಡಿ ಮತ್ತು ಆನಂದಿಸಿ.
• ದೈಹಿಕ ಮತ್ತು ಮಾನಸಿಕ ಆರೋಗ್ಯ ವೃದ್ಧಿಸುವಂತಹ ಧ್ಯಾನ, ಯೋಗ, ವ್ಯಾಯಾಮ, ಬೆಳಗಿನ ನಡಿಗೆ ಮುಂತಾದ ಸಕಾರಾತ್ಮಕ ಹವ್ಯಾಸಗಳನ್ನು ಅಳವಡಿಸಿಕೊಳ್ಳಿ.
• ಒತ್ತಡ ಮತ್ತು ಖಿನ್ನತೆ ಉಂಟುಮಾಡುವಂತಹ ವಿಚಾರಗಳು ಮತ್ತು ಸನ್ನಿವೇಶಗಳಿಂದ ದೂರವಿರಿ.
• ಕೋಪ, ನಿರಾಶೆ, ದುಃಖ, ಅಸೂಯೆ, ದ್ವೇಷ ಮುಂತಾದ ನಕಾರಾತ್ಮಕ ಭಾವನೆಗಳನ್ನು ನಿಯಂತ್ರಿಸಿಕೊಳ್ಳಿ.
• ವಿನಾಕಾರಣ ಆರೋಗ್ಯ ಆತಂಕ ಮತ್ತು ರೋಗಭ್ರಾಂತಿ ಸೃಷ್ಟಿಸುವ ವದಂತಿಗಳಿಂದ ದೂರವಿರಿ.
• ಏಕಾಂಗಿತನ ಮತ್ತು ನಕಾರಾತ್ಮಕ ಆಲೋಚನೆಗಳಿಂದ ದೂರವಿರಿ.
• ಸಕಾರಾತ್ಮಕ ಮನೋಭಾವ ಮತ್ತು ಆಲೋಚನೆಗಳಿಗೆ ಮಹತ್ವ ಕೊಡಿ.
• ಕುಟುಂಬ ಹಾಗೂ ಇತರ ಜನರೊಂದಿಗೆ ಸೌಹರ್ದಯುತವಾದ ಬಾಂಧವ್ಯವನ್ನು ಹೊಂದಿರಿ.
• ದೈನಂದಿನ ಜೀವನದಲ್ಲಿ ಭಾವನಾತ್ಮಕ ಸಮತೋಲನವನ್ನು ಕಾಪಾಡಿಕೊಳ್ಳಿ.
• ಪ್ರತಿನಿತ್ಯ ವಿಶ್ರಾಂತಿ ಮತ್ತು ನೆಮ್ಮದಿಯ ನಿದ್ರೆಗೆ ಆದ್ಯತೆ ಕೊಡಿ.
• ಓದು, ಸಂಗೀತ, ನೃತ್ಯ, ಕ್ರೀಡೆ ಮುಂತಾದ ಉತ್ತಮ ಹವ್ಯಾಸಗಳು ಮತ್ತು ಮನರಂಜನಾ ಚಟುವಟಿಕೆಗಳನ್ನು ಅಳವಡಿಸಿಕೊಳ್ಳಿ.
• ವರ್ತಮಾನದ ವಾಸ್ತವದೊಂದಿಗೆ ಬದುಕುವುದನ್ನು ಕಲಿಯಿರಿ ಮತ್ತು ಭ್ರಮಾಲೋಕದಿಂದ ದೂರವಿರಿ.
• ವಯೋಮಾನಕ್ಕೆ ಅನುಗುಣವಾಗಿ ಜೀವನ ಶೈಲಿಯನ್ನು ಮಾರ್ಪಡಿಸಿಕೊಳ್ಳಿ.
• ಧೂಮಪಾನ, ಮದ್ಯಪಾನ ಮತ್ತು ಮಾದಕ ವ್ಯಸನ ಮುಕ್ತ ಜೀವನಶೈಲಿ ರೂಢಿಸಿಕೊಳ್ಳಿ.
• ದೇಹದ ಎತ್ತರಕ್ಕೆ ಅನುಗುಣವಾಗಿ ಆರೋಗ್ಯಕರ ದೇಹತೂಕವನ್ನು ಕಾಪಾಡಿಕೊಳ್ಳಿ.
• ಎಣ್ಣೆ, ಜಿಡ್ಡು ಪದಾರ್ಥಗಳ ಸೇವನೆಯನ್ನು ಮಾಡಬೇಡಿ.
• ರಕ್ತದಲ್ಲಿನ ಸಕ್ಕರೆ ಪ್ರಮಾಣವನ್ನು ಮತ್ತು ದೇಹದಲ್ಲಿನ ಕೊಬ್ಬಿನ ಅಂಶದ ಪ್ರಮಾಣವನ್ನು ನಿಯಮಿತವಾಗಿ ಪರೀಕ್ಷಿಸಿಕೊಳ್ಳಿ.
• ನಾವು ಸೇವಿಸುವ ಆಹಾರದಲ್ಲಿ ಸಕ್ಕರೆ, ಉಪ್ಪು, ಕೊಬ್ಬಿನ ಅಂಶ ಮಿತವಾಗಿರಲಿ.
• ಪೌಷ್ಠಿಕವಾದ ಹಣ್ಣು ಮತ್ತು ತರಕಾರಿಗಳನ್ನು ಸೇವಿಸಿ.

ಹೃದಯ ಸಂಬಂಧಿತ ಆರೋಗ್ಯ ಸಮಸ್ಯೆಗಳಿದ್ದಲ್ಲಿ ವಿನಾಕಾರಣ ವಿಳಂಬ ಮಾಡದೆ ವೈದ್ಯರನ್ನು ತತ್‌ಕ್ಷಣ ಭೇಟಿ ಮಾಡಿ ಸೂಕ್ತ ಚಿಕಿತ್ಸೆಯನ್ನು ಪಡೆದುಕೊಳ್ಳಿ.

ಆರೋಗ್ಯವನ್ನು ವೃದ್ಧಿಸುವಂತಹ ಆಲೋಚನೆಗಳು, ವರ್ತನೆಗಳು, ಹವ್ಯಾಸಗಳು, ಅಭ್ಯಾಸಗಳನ್ನು ಸಮರ್ಪಕವಾಗಿ ದೈನಂದಿನ ಜೀವನದಲ್ಲಿ ಅಳವಡಿಸಿಕೊಂಡಾಗ ಮಾನಸಿಕ ಮತ್ತು ದೈಹಿಕ ಆರೋಗ್ಯದ ಜೊತೆಗೆ ಹೃದಯದ ಆರೋಗ್ಯವನ್ನು ಕಾಪಾಡಿಕೊಳ್ಳಬಹುದು.

-ಡಾ। ಪಿ.ಮಂಜುನಾಥ, ಮುಖ್ಯಸ್ಥರು, ಮನೋವಿಜ್ಞಾನ ಅಧ್ಯಯನ ವಿಭಾಗ

ಕರ್ನಾಟಕ ರಾಜ್ಯ ಮುಕ್ತ ವಿವಿ

ಮುಕ್ತ ಗಂಗೋತ್ರಿ, ಮೈಸೂರು