ಭಾರತದಲ್ಲಿ ಭೇಟಿ ನೀಡಲು ಸ್ಥಳಗಳಿಗೇನೂ ಕೊರತೆಯಿಲ್ಲ. ಇಲ್ಲಿ ನೀವು ಬೇರೆ ಬೇರೆ ರೀತಿಯ ಪ್ರದೇಶಗಳನ್ನು ಭೇಟಿ ನೀಡಬಹುದು . ಇಂದು ನಾವು ನಿಮಗೆ ಮೇಘಾಲಯದ ವಿಸ್ಲಿಂಗ್ ವಿಲೇಜ್ ಎಂದು ಕರೆಯಲ್ಪಡುವ ಒಂದು ಹಳ್ಳಿಯ ಬಗ್ಗೆ ಹೇಳಲಿದ್ದೇವೆ.
ನೀವು ಆಫ್ ಬೀಟ್ ತಾಣಗಳನ್ನು (offbeat places) ನೋಡಲು ಇಷ್ಟಪಡುತ್ತಿದ್ದರೆ, ಇಂದು ನಾವು ಅಂತಹ ಒಂದು ಸ್ಥಳದ ಬಗ್ಗೆ ನಿಮಗೆ ಹೇಳಲಿದ್ದೇವೆ,ಈ ಸುಂದರ ಜಾಗ ಅಲ್ಲಿನ ವಿಶೇಷತೆಗಳು ಖಂಡಿತಾ ನಿಮಗೆ ಇಷ್ಟವಾಗುತ್ತೆ. ನಾವು ಹೇಳ್ತಾ ಇರೋದು ಮೇಘಾಲಯದ ಕಾಂಗ್ಥಾಂಗ್ ಗ್ರಾಮದ ಬಗ್ಗೆ, ಇದನ್ನು 'ವಿಸ್ಲಿಂಗ್ ವಿಲೇಜ್' (whisling village) ಎಂದೂ ಕರೆಯಲಾಗುತ್ತದೆ, ಏಕೆಂದರೆ ಇಲ್ಲಿ ಜನರು ಪರಸ್ಪರರನ್ನು ಹೆಸರಿನಿಂದ ಕರೆಯುವುದಿಲ್ಲ ಬದಲಾಗಿ ಶಿಳ್ಳೆ ಅಥವಾ ವಿಶಿಲ್ ಹೊಡೆಯುವ ಮೂಲಕ ಕರೆಯುತ್ತಾರೆ. ಕಾಂಗ್ಥಾಂಗ್ ಪೂರ್ವ ಖಾಸಿ ಬೆಟ್ಟಗಳಲ್ಲಿರುವ ಒಂದು ಸುಂದರವಾದ ಪ್ರದೇಶವಾಗಿದೆ. ಮೇಘಾಲಯದ ರಾಜಧಾನಿ ಶಿಲ್ಲಾಂಗ್ ನಿಂದ ಸುಮಾರು 60 ಕಿಮೀ ಪ್ರಯಾಣಿಸುವ ಮೂಲಕ, ನೀವು ಈ ಶಾಂತ, ಸುಂದರ ಮತ್ತು ಅನನ್ಯ ಹಳ್ಳಿಯನ್ನು ತಲುಪಬಹುದು.
ಗ್ರಾಮದ ವಿಶಿಷ್ಟ ಸಂಪ್ರದಾಯ
ಇಲ್ಲಿ ಜನರಿಗೆ ಎರಡು ಹೆಸರಿವೆ - ಒಂದು ಸಾಮಾನ್ಯ ಹೆಸರು ಮತ್ತು ಇನ್ನೊಂದು ರಾಗ ಅಥವಾ ಶಿಳ್ಳೆಯ ಹೆಸರು. ಈ ರಾಗದ ಹೆಸರಿನ ಎರಡು ರೂಪಗಳೂ ಇವೆ. ಮೊದಲನೆಯದು ಉದ್ದವಾದ ಹಾಡು ಮತ್ತು ಎರಡನೆಯದು ಸಣ್ಣ ಹಾಡು. ಈ ವಿಶಿಷ್ಟ ಸಂಪ್ರದಾಯಕ್ಕೆ ಎರಡು ಹಂತಗಳಿವೆ. ಮೊದಲನೆಯದು ತಾಯಿ ತನ್ನ ಮಗುವಿಗೆ ನೀಡುವ ರಾಗ ಮತ್ತು ಕುಟುಂಬದಲ್ಲಿ ತಮ್ಮ ನಡುವೆ ಸಂವಹನ ನಡೆಸಲು ಬಳಸಲಾಗುವ ರಾಗ.
ಮತ್ತೊಂದೆಡೆ, ಹಿರಿಯರು ತಮಗಾಗಿ ಅಥವಾ ಹಳ್ಳಿಯ ಇತರ ಜನರನ್ನು ಆಹ್ವಾನಿಸಲು ಬಳಸುವ ರಾಗಗಳನ್ನು ಸಹ ಸೃಷ್ಟಿಸುತ್ತಾರೆ. ಈ ಹಳ್ಳಿಯಲ್ಲಿ, ಮಾತುಗಳು ತುಂಬಾನೆ ಕಡಿಮೆ ಮತ್ತು ಹೆಚ್ಚು ರಾಗಗಳು ಕೇಳುತ್ತವೆ. ಬೆಳಿಗ್ಗೆಯಿಂದ ಸಂಜೆಯವರೆಗೆ ಗ್ರಾಮದಲ್ಲಿ ಶಿಳ್ಳೆಗಳ ಶಬ್ದವೇ ಕೇಳಿಸುತ್ತದೆ. ಇದು ವಿಚಿತ್ರ ಅನಿಸಿದರೂ, ಇಲ್ಲಿನ ಈ ವಿಶಿಷ್ಟ ಸಂಪ್ರದಾಯ (tradition) ನಿಮಗೆ ಖಂಡಿತಾ ಇಷ್ಟವಾಗುತ್ತೆ.
ಕಾಂಗ್ಥಾಂಗ್ ನಲ್ಲಿ ಈ ಸಂಪ್ರದಾಯವು ಪ್ರಾರಂಭವಾದದ್ದು ಹೀಗೆ
ಕಾಂಗ್ಥಾಂಗ್‌ನ (Kongthong) ಜನರು ಇಂದಿಗೂ ಈ ಹಳೆ ಕಾಲದ ಸಂಪ್ರದಾಯವನ್ನು ಅನುಸರಿಸುತ್ತಾರೆ. ಈ ಅಭ್ಯಾಸ ಹೇಗೆ ಪ್ರಾರಂಭವಾಯಿತು ಎಂಬುದರ ಬಗ್ಗೆ ಒಂದು ಕಥೆಯನ್ನು ಹೇಳಲಾಗಿದೆ, ಒಮ್ಮೆ ಇಬ್ಬರು ಸ್ನೇಹಿತರು ಎಲ್ಲೋ ಹೋಗುತ್ತಿದ್ದರಂತೆ. ದಾರಿಯಲ್ಲಿ ಅವರ ಮೇಲೆ ಕೆಲವು ಗೂಂಡಾಗಳು ಹಲ್ಲೆ ನಡೆಸಿದ್ದಾರೆ. ಇವರಲ್ಲಿ ಒಬ್ಬರು ಗೂಂಡಾಗಳಿಂದ ತಪ್ಪಿಸಲು ಮರವನ್ನು ಹತ್ತಿದನು. ಬಳಿಕ ಆತ ತನ್ನ ಸ್ನೇಹಿತರನ್ನು ಕರೆಯಲು ಕೆಲವು ಶಬ್ದಗಳನ್ನು ಬಳಸಿದನು. ಅದನ್ನು ಸ್ನೇಹಿತ ಅರ್ಥಮಾಡಿಕೊಂಡು ಅದರಂತೆ ನಡೆದನು, ಇದರಿಂದ ಇಬ್ಬರೂ ಸಹ ಗೂಂಡಾಗಳಿಂದ ತಪ್ಪಿಸಿಕೊಂಡರು. ಅಂದಿನಿಂದ, ಈ ಸಂಪ್ರದಾಯವು ಪ್ರಾರಂಭವಾಯಿತು.
ಯಾರನ್ನಾದರೂ ಕರೆಯಲು ಬಳಸುವ ಈ 'ರಾಗಗಳು' ಮಗುವಿನ ಜನನದ ನಂತರ ಅವರ ತಾಯಿಯಿಂದ ರಚಿಸಲ್ಪಟ್ಟಿವೆ. ಜನನದ ನಂತರ, ಮಗುವಿನ ಸುತ್ತಲೂ ವಾಸಿಸುವ ಜನರು ಆ ರಾಗವನ್ನು ನಿರಂತರವಾಗಿ ಗುನುಗುತ್ತಲೇ ಇರುತ್ತಾರೆ, ಇದರಿಂದಾಗಿ ಮಗು ಆ ಧ್ವನಿಯನ್ನು ಚೆನ್ನಾಗಿ ಗುರುತಿಸುತ್ತಾನೆ.
ಅತ್ಯಂತ ಮುಖ್ಯವಾದ ವಿಷ್ಯ ಏನಂದ್ರೆ ಇಲ್ಲಿ ಪ್ರತಿ ಮನೆಗೂ ವಿಭಿನ್ನ ರಾಗವಿದೆ. ರಾಗ ಅಥವಾ ವಿಸಿಲ್ (whistle) ಮೂಲಕ, ಇಲ್ಲಿ ವಾಸಿಸುವವರು ವ್ಯಕ್ತಿಯು ಯಾವ ಮನೆಯಿಂದ ಬಂದವರು ಎಂದು ಹೇಳಬಹುದು. ಅದು ನಿಜಕ್ಕೂ ಅಚ್ಚರಿಯ ವಿಷ್ಯ ಅಲ್ವಾ? ಕಾಂಗ್ಥಾಂಗ್ ಎಂಬ ಸಣ್ಣ ಹಳ್ಳಿಯಲ್ಲಿ 600ಕ್ಕೂ ಹೆಚ್ಚು ಜನರು ವಾಸಿಸುತ್ತಿದ್ದಾರೆ. ಅಂದರೆ ಇಲ್ಲಿ 600ಕ್ಕೂ ಹೆಚ್ಚು ರಾಗಗಳು ಕೇಳುತ್ತವೆ.
ಯಾವಾಗ ಹೋಗಬೇಕು?
ಅಂದಹಾಗೆ, ನೀವು ವರ್ಷದ ಯಾವುದೇ ಸಮಯದಲ್ಲಿ ಇಲ್ಲಿಗೆ ಹೋಗಲು ಪ್ಲ್ಯಾನ್ ಮಾಡಬಹುದು, ಆದರೆ ಅಕ್ಟೋಬರ್ ನಿಂದ ಏಪ್ರಿಲ್ ವರೆಗೆ ಇಲ್ಲಿ ತಿರುಗಾಡಲು ಯೋಗ್ಯ ಸಮಯ. ಇಲ್ಲಿನ ಪ್ರಕೃತಿ ಸೌಂದರ್ಯ, ಜನ, ಸಂಪ್ರದಾಯ ಎಲ್ಲವೂ ನಿಮಗೆ ಅಚ್ಚರಿಯನ್ನು ನೀಡುತ್ತೆ.
ತಲುಪುವುದು ಹೇಗೆ?
ಮೋಟಾರು ರಸ್ತೆಗಳಿಲ್ಲದ ಕಾರಣ ಕಾಂಗ್ಥಾಂಗ್ ಗೆ ರಸ್ತೆ ಸುಲಭವಲ್ಲ. ಈ ಹಳ್ಳಿಯನ್ನು ತಲುಪಲು, ನೀವು ಸುಮಾರು ಅರ್ಧ ಗಂಟೆಗಳ ಚಾರಣ ಮಾಡಬೇಕಾಗುತ್ತದೆ. ಈ ಟ್ರೆಕ್ಕಿಂಗ್ ನೀವು ತುಂಬಾನೇ ಎಂಜಾಯ್ ಮಾಡಬಹುದು.