ಪಾರಿವಾಳ ಹಿಕ್ಕೆ ಹಾಕಿ ಗಲೀಜು ಮಾಡುತ್ತಿದ್ದರೆ ಡೋಂಟ್ ವರಿ, ಇಲ್ಲಿದೆ ಸುಲಭ ಪರಿಹಾರ!

ಪಾರಿವಾಳಗಳು ನಿರುಪದ್ರವಿಗಳಂತೆ ಕಾಣಿಸಬಹುದು. ಆದರೆ ಅವು ನಿಮ್ಮ ಬಾಲ್ಕನಿ ಅಥವಾ ಕಿಟಕಿ ಬಳಿ ಮಾಡುವ ಅವಾಂತರಗಳು ಒಂದೆರಡಲ್ಲ, ಅವುಗಳನ್ನು ಸುರಕ್ಷಿತವಾಗಿ ಮತ್ತು ಶಾಶ್ವತವಾಗಿ ದೂರವಿಡಬೇಕಾದರೆ ನೀವು ಈ ಸುಲಭ ತಂತ್ರಗಳನ್ನು ಬಳಸಿ.

ಸಾಮಾನ್ಯವಾಗಿ ನಗರದಲ್ಲಿ ವಾಸಿಸುತ್ತಿರುವವರು ಈ ಸಮಸ್ಯೆಯನ್ನು ಖಂಡಿತ ಎದುರಿಸಿರುತ್ತಾರೆ. ಅದೇನಪ್ಪಾ ಅಂದ್ರೆ ಬಾಲ್ಕನಿ ರೇಲಿಂಗ್‌ಗಳು ಮತ್ತು ಕಿಟಕಿಗಳ ಮೇಲೆ ಪಾರಿವಾಳಗಳು ಬಂದು ಕುಳಿತುಕೊಳ್ಳುವುದನ್ನು ನೀವು ಬಹುಶಃ ಗಮನಿಸಿರಬಹುದು. ಅವು ನೋಡಲು ಶಾಂತವಾಗಿ ಕಂಡುಬಂದರೂ, ಅಂತಹ ಪಕ್ಷಿಗಳು ಸಾಮಾನ್ಯವಾಗಿ ಸಮಸ್ಯೆ ಉಂಟುಮಾಡುತ್ತವೆ. ಅಂದರೆ ಪಾರಿವಾಳಗಳು ಗೋಡೆಗಳು ಮತ್ತು ನೆಲವನ್ನು ಸಂಪೂರ್ಣ ಕಲೆಮಯ ಮಾಡುತ್ತವೆ. ಅರ್ಥಾತ್ ಅವು ಹಾಕುವ ಹಿಕ್ಕೆಗಳು ಮನೆಯ ಮುಂಭಾಗವನ್ನು ಗಲೀಜು ಮಾಡುವುದಲ್ಲದೆ, ಆರೋಗ್ಯ ಸಮಸ್ಯೆಗಳಿಗೆ ಕಾರಣವಾಗುವ ಸೂಕ್ಷ್ಮಜೀವಿಗಳನ್ನು ಸಹ ಹೊಂದಿರುತ್ತವೆ.

ಪಾರಿವಾಳಗಳು ಸಣ್ಣ ಜಾಗದಲ್ಲಿ ಗೂಡು ಕಟ್ಟುತ್ತವೆ. ಅವು ಒಮ್ಮೆ ಬರಲು ಪ್ರಾರಂಭಿಸಿದರೆ, ಅವುಗಳನ್ನು ತಡೆಯುವುದು ಕಷ್ಟ. ಅವುಗಳ ನಿರಂತರ ಕೂಗು ನಿಮ್ಮ ಮನಸ್ಸಿನ ಶಾಂತಿಯನ್ನು ಹಾಳುಮಾಡಬಹುದು ಮತ್ತು ಅವುಗಳ ಗರಿಗಳು ಮತ್ತು ಮಲ ನಿಮ್ಮ ಮನೆಯನ್ನು ಕೊಳಕು ಮಾಡುತ್ತವೆ. ಗುಡ್ ನ್ಯೂಸ್ ಏನಂದ್ರೆ ನೀವು ಸರಳ, ಸುರಕ್ಷಿತ ಮತ್ತು ಕಡಿಮೆ ವೆಚ್ಚದ ವಿಧಾನಗಳೊಂದಿಗೆ ಪಾರಿವಾಳಗಳನ್ನು ದೂರವಿಡಬಹುದು. ಯಾರಾದರೂ ತಮ್ಮ ಬಾಲ್ಕನಿ ಮತ್ತು ಕಿಟಕಿಗಳನ್ನು ಪಾರಿವಾಳ ಮುಕ್ತವಾಗಿಸಲು ಬಯಸಿದ್ದರೆ ಐದು ಸುಲಭ ಪರಿಹಾರಗಳು ಇಲ್ಲಿವೆ.

1. ಬರ್ಡ್ ಸ್ಪೈಕ್ಸ್ ಅಥವಾ ನೆಟ್ ಬಳಸಿ
ಬರ್ಡ್ ಸ್ಪೈಕ್ಸ್ ಮೊನಚಾದ ಪ್ಲಾಸ್ಟಿಕ್ ಅಥವಾ ಲೋಹದ ಪಟ್ಟಿಗಳಾಗಿದ್ದು, ಅವು ಪಾರಿವಾಳಗಳು ರೇಲಿಂಗ್‌ಗಳು, ಎಸಿ ಘಟಕಗಳು ಮತ್ತು ಕಿಟಕಿ ಹಲಗೆಗಳ ಮೇಲೆ ಕುಳಿತುಕೊಳ್ಳುವುದನ್ನು ತಡೆಯುತ್ತವೆ. ನೆಟ್ ಸಹ ಪರಿಣಾಮಕಾರಿ, ವಿಶೇಷವಾಗಿ ಬಾಲ್ಕನಿಗಳಲ್ಲಿ. ಇವು ಪಕ್ಷಿಗಳು ನಿಮ್ಮ ಪ್ರದೇಶಕ್ಕೆ ಪ್ರವೇಶಿಸುವುದನ್ನು ಸಂಪೂರ್ಣವಾಗಿ ತಡೆಯುತ್ತವೆ. ಅಂದಹಾಗೆ ಸ್ಪೈಕ್ಸ್ ಪಕ್ಷಿಗಳಿಗೆ ಹಾನಿ ಮಾಡುವುದಿಲ್ಲ, ಅವು ಇಳಿಯುವುದನ್ನು ತಡೆಯುತ್ತವೆ. ತಮ್ಮ ಬಾಲ್ಕನಿಯನ್ನೇ ಸಂಪೂರ್ಣವಾಗಿ ಮುಚ್ಚಲು ಬಯಸುವವರಿಗೆ ನೆಟ್ ಸೂಕ್ತವಾಗಿವೆ.

2. ಹೊಳೆಯುವ ವಸ್ತುಗಳು ಅಥವಾ ಸಿಡಿಗಳು
ಪಾರಿವಾಳಗಳು ಹೊಳೆಯುವ ಅಥವಾ ಚಲಿಸುವ ವಸ್ತುಗಳನ್ನು ಇಷ್ಟಪಡುವುದಿಲ್ಲ. ಹಳೆಯ ಸಿಡಿಗಳು, ಅಲ್ಯೂಮಿನಿಯಂ ಫಾಯಿಲ್ ಪಟ್ಟಿಗಳು ಅಥವಾ ಹೊಳೆಯುವ ರಿಬ್ಬನ್‌ಗಳನ್ನು ಅವುಗಳನ್ನು ಹೆದರಿಸಲು ನೇತುಹಾಕಿ. ಪ್ರತಿಫಲಿತ ಬೆಳಕು ಪಕ್ಷಿಗಳನ್ನು ಗೊಂದಲಗೊಳಿಸುತ್ತವೆ ಮತ್ತು ಹತ್ತಿರ ಬರದಂತೆ ತಡೆಯುತ್ತದೆ. ಹೊಳೆಯುವ ಗಾಳಿ ಗಂಟೆಗಳು ಸಹ ಅವುಗಳನ್ನು ಓಡಿಸಲು ಪರಿಣಾಮಕಾರಿ.

3.ಪಾರಿವಾಳಗಳು ಇಷ್ಟಪಡದ ವಾಸನೆ ಇದೇ ನೋಡಿ
ಪಾರಿವಾಳಗಳು ವಾಸನೆ ಗ್ರಹಿಸುವ ಶಕ್ತಿ ತುಂಬಾ ಪ್ರಬಲವಾಗಿವೆ. ಅವು ಸಿಕ್ಕಾಪಟ್ಟೆ ಮಸಾಲೆ ಅಥವಾ ರಾಸಾಯನಿಕಗಳ ವಾಸನೆಯನ್ನು ಒಪ್ಪಲ್ಲ. ನೀವು ಬೇಕಾದರೆ ಇವುಗಳನ್ನು ಬಳಸಬಹುದು: ಮೆಣಸಿನ ಪುಡಿಯನ್ನು ಕಟ್ಟೆಯ ಹತ್ತಿರ ಸಿಂಪಡಿಸಿ, ಪಾರಿವಾಳಗಳ ವಿಶ್ರಾಂತಿ ಸ್ಥಳಗಳ ಹತ್ತಿರ ಬೆಳ್ಳುಳ್ಳಿ ನೀರಿನ ಸ್ಪ್ರೇ ಅಥವಾ ವಿನೆಗರ್ ಸ್ಪ್ರೇ ಮಾಡಿ. ಈ ವಾಸನೆ ಮನುಷ್ಯರಿಗೆ ಹಾನಿಕಾರಕವಲ್ಲ, ಆದರೆ ಪಾರಿವಾಳಗಳನ್ನು ಹಿಮ್ಮೆಟ್ಟಿಸುತ್ತವೆ.

4.ಆಹಾರ ನೀಡಬೇಡಿ
ಆಕಸ್ಮಿಕವಾಗಿಯಾದರೂ ಪಾರಿವಾಳಗಳಿಗೆ ಎಂದಿಗೂ ಆಹಾರ ನೀಡಬೇಡಿ. ನಿಮ್ಮ ಬಾಲ್ಕನಿಯಲ್ಲಿ ಧಾನ್ಯಗಳು ಅಥವಾ ಆಹಾರವನ್ನು ಚೆಲ್ಲಿದರೆ, ಅವು ಹಿಂತಿರುಗುತ್ತವೆ. ಅಲ್ಲದೆ ಗೂಡು ಕಟ್ಟಲು ಬಳಸಬಹುದಾದ ಸಸ್ಯಗಳು, ಮಡಿಕೆಗಳು ಅಥವಾ ರಟ್ಟನ್ನು ತೆಗೆದುಹಾಕಿ. ಪಕ್ಷಿ ಕೂರುವ ಪ್ರದೇಶವನ್ನು ಆಗಾಗ್ಗೆ ಸ್ವಚ್ಛಗೊಳಿಸಿ.

5.ತೀಕ್ಷ್ಣವಾದ ಶಬ್ದ
ಪಕ್ಷಿಗಳು ಸಮೀಪಿಸಿದಾಗ ಹೆದರಿಸುವ ಸೌಂಡ್ ಅಲಾರಂಗಳನ್ನು ಸಹ ನೀವು ಖರೀದಿಸಬಹುದು. ಪಾರಿವಾಳಗಳನ್ನು ತಡೆಯಲು ನೀವು ಅವುಗಳನ್ನು ನೋಯಿಸುವ ಅಗತ್ಯವಿಲ್ಲ. ಸರಿಯಾದ ಕ್ರಮಗಳನ್ನು ಅನುಸರಿಸಿದರೆ, ನಿಮ್ಮ ಬಾಲ್ಕನಿ ಅಥವಾ ಕಿಟಕಿ ಸ್ವಚ್ಛ, ಶಾಂತಿಯುತ ಮತ್ತು ಸುರಕ್ಷಿತವಾಗಿ ಉಳಿಯಬಹುದು. ನೀವು ಬಯಸಿದಲ್ಲಿ ಸರಳ ಮನೆಮದ್ದುಗಳಿಂದ ಹಿಡಿದು ಅಗ್ಗದ ಸಾಧನಗಳವರೆಗೆ ನಿಮಗೆ ಸೂಕ್ತವಾದುದನ್ನು ಆಯ್ಕೆ ಮಾಡಿಕೊಳ್ಳಿ.