ಮತ್ತೆ ಕನ್ನಡ ಬಣ್ಣದ ಜಗತ್ತಿಗೆ 'ಕರ್ಪೂರದ ಗೊಂಬೆ' ಎಂಟ್ರಿ: 'ಚೈತ್ರದ ಪ್ರೇಮಾಂಜಲಿ' ಬ್ಯೂಟಿ ಶ್ವೇತಾ ಕಮ್‌ಬ್ಯಾಕ್!

ಎಸ್ ನಾರಾಯಣ್ ನಿರ್ದೇಶನದ 'ಚೈತ್ರದ ಪ್ರೇಮಾಂಜಲಿ' ಸಿನಿಮಾ ಯಾರಿಗೆ ತಾನೇ ನೆನಪಿಲ್ಲ ಹೇಳಿ? ಆ ಸಿನಿಮಾದ ಮೂಲಕ ಕನ್ನಡ ಚಿತ್ರರಂಗಕ್ಕೆ ಕಾಲಿಟ್ಟ ನಟಿ ಶ್ವೇತಾ. 'ಚೈತ್ರದ ಪ್ರೇಮಾಂಜಲಿ' ಬಳಿಕ ಸ್ಯಾಂಡಲ್‌ವುಡ್‌ನಲ್ಲಿ ಅನೇಕ ಸಿನಿಮಾಗಳಲ್ಲಿ ನಟಿಸಿದ್ದ ಶ್ವೇತಾ, ಆನಂತರ ಕಾಣೆಯಾಗಿದ್ದರು. 2004ರಲ್ಲಿ ತೆರೆಕಂಡ 'ಕುಟುಂಬ' ಸಿನಿಮಾವೇ ಕೊನೇ. ಮತ್ತೆ ಶ್ವೇತ ಸ್ಯಾಂಡಲ್ವುಡ್ ಸಿನಿಮಾದಲ್ಲಿ ಕಾಣಿಸಿಕೊಳ್ಳಲಿಲ್ಲ. ಈಗ ಮತ್ತೆ ಕನ್ನಡ ಬಣ್ಣದ ಜಗತ್ತಿನಲ್ಲಿ ಶ್ವೇತಾ ಮೆರುಗು ಶುರುವಾಗ್ತಿದೆ. ಶ್ವೇತಾ ಈ ಭಾರಿ ಕನ್ನಡ ಧಾರವಾಹಿ ಲೋಕಕ್ಕೆ ಕಾಲಿಟ್ಟಿದ್ದಾರೆ. 

ಚೈತ್ರದ ಪ್ರೇಮಾಂಜಲಿ ಸಿನಿಮಾ ಖ್ಯಾತಿಯ ನಟಿ ಶ್ವೇತಾ ಈಗ ಕನ್ನಡದ ಲಕ್ಷ್ಮೀ ನೀವಾಸ ಧಾರವಾಹಿ ಮೂಲಕ ಕನ್ನಡಕ್ಕೆ ಮತ್ತೆ ಕಮ್ ಬ್ಯಾಕ್ ಆಗುತ್ತಿದ್ದಾರೆ.  ಅಂದಹಾಗೆ, ಶ್ವೇತಾ ಕರಿಯರ್‌ ಆರಂಭಿಸಿದ್ದು ತಮಿಳು ಚಿತ್ರಗಳ ಮೂಲಕ. ಬಾಲ ನಟಿಯಾಗಿ, ನಂತರ ನಾಯಕಿಯಾಗಿ ತಮಿಳು ಸಿನಿಮಾ ಲೋಕದಲ್ಲಿ ಮಿಂಚಿದ ಶ್ವೇತಾ, 'ಚೈತ್ರದ ಪ್ರೇಮಾಂಜಲಿ' ಮೂಲಕ ಕನ್ನಡ ಚಿತ್ರರಂಗ ಪ್ರವೇಶಿಸಿದ್ರು. ಶ್ವೇತಾಗೆ ಕನ್ನಡದಲ್ಲಿ ಯಾವ ಮಟ್ಟಿಗಿನ ಬೇಡಿಕೆ ಇತ್ತಂದ್ರೆ  1996ರಲ್ಲಿ ಒಂದೇ ವರ್ಷ ಅವರ ನಾಲ್ಕು ಕನ್ನಡ ಸಿನಿಮಾಗಳು ತೆರೆ ಕಂಡಿದ್ವು. ಗೆಜ್ಜೆನಾದ, ಕರ್ಪೂರದ ಗೊಂಬೆ, ಲಕ್ಷ್ಮೀ ಮಹಾಲಕ್ಷ್ಮೀ, ಹೆತ್ತವರು, ಕೋಟಿಗೊಬ್ಬ, ಕುಟುಂಬ ಸಿನಿಮಾಗಳಲ್ಲಿ ಶ್ವೇತಾ ಕನ್ನಡಿಗರ ಮನೆ ಗೆದ್ದಿದ್ದಾರೆ. ಈಗ ಧಾರವಾಹಿ ಲೋಕಕ್ಕೂ ಎಂಟ್ರಿ ಕೊಟ್ಟು ಕಿರುತೆರೆ ಪ್ರೇಕ್ಷಕರ ಮನ ಗೆಲ್ಲೋಕೆ ಸಜ್ಜಾಗಿದ್ದಾರೆ.