ಶಕ್ತಿ ಯೋಜನೆ ಇಂಪ್ಯಾಕ್ಟ್​: ಖಾಸಗಿ ಬಸ್​ ದರ ಶೇಕಡಾ 20-30ರಷ್ಟು ದಿಢೀರ್​ ಏರಿಕೆ; ಇಂದಿನಿಂದಲೇ ಜಾರಿ

ಇಂಧನ ಬೆಲೆ ಏರಿಕೆ ಮತ್ತು ಶಕ್ತಿ ಯೋಜನೆಯ ಪರಿಣಾಮದಿಂದಾಗಿ, ಕರ್ನಾಟಕದ ಖಾಸಗಿ ಬಸ್ ಮಾಲೀಕರು ಮೇ 15 ರಿಂದ ಬಸ್ ದರವನ್ನು ಶೇ. 20-30 ರಷ್ಟು ಹೆಚ್ಚಿಸಲು ನಿರ್ಧರಿಸಿದ್ದಾರೆ. ಈ ನಿರ್ಧಾರದಿಂದಾಗಿ ಬೆಂಗಳೂರಿನಿಂದ ಬೆಳಗಾವಿ, ಮಂಗಳೂರಿನಂತಹ ಪ್ರಮುಖ ಮಾರ್ಗಗಳಲ್ಲಿ ಪ್ರಯಾಣ ದರ ಗಣನೀಯವಾಗಿ ಏರಿಕೆಯಾಗಲಿದೆ.

ಬೆಂಗಳೂರು: ಇಂಧನ ಬೆಲೆ ಏರಿಕೆಯ ಹಿನ್ನೆಲೆಯಲ್ಲಿ, ಖಾಸಗಿ ಬಸ್ ನಿರ್ವಾಹಕರು ಇಂದಿನಿಂದ ಅರ್ಥಾತ್​ ಮೇ 15ರ ಶುಕ್ರವಾರ ಮಧ್ಯರಾತ್ರಿಯಿಂದ ಜಾರಿಗೆ ಬರುವಂತೆ ಮಾರ್ಗವನ್ನು ಅವಲಂಬಿಸಿ ದರವನ್ನು ಶೇಕಡಾ 20-30 ರಷ್ಟು ಹೆಚ್ಚಿಸಲು ನಿರ್ಧರಿಸಿದ್ದಾರೆ. ರಾಜ್ಯದಲ್ಲಿ ಬಸ್ ಮಾಲೀಕರ ಪರಿಸ್ಥಿತಿ ಈಗಾಗಲೇ ಹೆಚ್ಚಿನ ರಸ್ತೆ ತೆರಿಗೆ ಮತ್ತು ಸರ್ಕಾರಿ ಬಸ್‌ಗಳಲ್ಲಿ ಮಹಿಳೆಯರಿಗೆ ಉಚಿತ ಬಸ್ ಪ್ರಯಾಣದ ಶಕ್ತಿ ಯೋಜನೆಯ ಪರಿಣಾಮದಿಂದಾಗಿ ಸಂಕಷ್ಟದಲ್ಲಿದೆ. ಇದರ ಜೊತೆಗೆ, ಇಂಧನ ಬೆಲೆಗಳು ಹೆಚ್ಚಿವೆ. ಶಕ್ತಿ ಯೋಜನೆಯಿಂದ ನಮಗೆ ತುಂಬಾ ಕೆಟ್ಟ ಪ್ರಭಾವ ಬೀರಿದೆ. ಈ ಹಿನ್ನೆಲೆಯಲ್ಲಿ ಬಸ್​ ದರ ಏರಿಸುವುದು ಅನಿವಾರ್ಯ ಎಂದು ಕರ್ನಾಟಕ ರಾಜ್ಯ ಬಸ್ ಮಾಲೀಕರ ಸಂಘದ ಅಧ್ಯಕ್ಷ ಎಸ್. ನಟರಾಜ್ ಶರ್ಮಾ ಹೇಳಿದರು.

15 ಸಾವಿರ ಹೊರೆ

ಇದು ಬಸ್ ಮಾಲೀಕರ ಮೇಲೆ ತಿಂಗಳಿಗೆ ಪ್ರತಿ ವಾಹನಕ್ಕೆ 15,000 ರೂ.ಗಳ ಹೊರೆ ಆಗುತ್ತಿದೆ. ಒಬ್ಬ ಮಾಲೀಕರು ಮೂರು ಬಸ್‌ಗಳನ್ನು ಹೊಂದಿದ್ದರೆ, ಆ ಹೊರೆ ತಿಂಗಳಿಗೆ 45,000 ರಿಂದ 50,000 ರೂ.ಗಳವರೆಗೆ ಇರುತ್ತದೆ. ಪ್ರಸ್ತುತ ಪರಿಸ್ಥಿತಿಯಲ್ಲಿ ಮಾರ್ಗವನ್ನು ಅವಲಂಬಿಸಿ ಮಾಲೀಕರು ಶೇಕಡಾ 20-30 ರಷ್ಟು ದರವನ್ನು ಹೆಚ್ಚಿಸುವುದು ಅನಿವಾರ್ಯವಾಗಿದೆ ಎಂದು ಅವರು ಮಾತಿಹಿ ನೀಡಿದರು. ಈ ಹೆಚ್ಚಳವು ಪ್ರತಿ ಸೀಟಿಗೆ ಸರಿಸುಮಾರು 200 ರೂ.ಗಳಾಗಬಹುದು ಎಂದಿದ್ದಾರೆ.

ಎಲ್ಲೆಲ್ಲಿ ಎಷ್ಟೆಷ್ಟು?

“ಉದಾಹರಣೆಗೆ, ಬೆಂಗಳೂರಿನಿಂದ ಬೆಳಗಾವಿಗೆ ಪ್ರಸ್ತುತ ಬಸ್ ದರ ಸುಮಾರು 1,000–1,200 ರೂ.ಗಳಾಗಿದ್ದು, ಇದು 1,350–1,400 ರೂ.ಗಳಿಗೆ ಏರಿಕೆಯಾಗುವ ಸಾಧ್ಯತೆಯಿದೆ. ಅದೇ ರೀತಿ, ಬೆಂಗಳೂರಿನಿಂದ ಮಂಗಳೂರು ಅಥವಾ ಉಡುಪಿಗೆ ಪ್ರಸ್ತುತ 900–1,000 ರೂ.ಗಳ ನಡುವೆ ಇದ್ದು, 1,100–1,200 ರೂ.ಗಳಿಗೆ ಏರಿಕೆಯಾಗುವ ನಿರೀಕ್ಷೆಯಿದೆ” ಎಂಬ ಮಾಹಿತಿ ನೀಡಿದರು.

ಪಶ್ಚಿಮ ಏಷ್ಯಾ ಸಂಘರ್ಷ

ಪಶ್ಚಿಮ ಏಷ್ಯಾ ಸಂಘರ್ಷದ ಹಿನ್ನೆಲೆಯಲ್ಲಿ ಜಾಗತಿಕ ಕಚ್ಚಾ ತೈಲ ಬೆಲೆ ಏರಿಕೆಯಿಂದಾಗಿ ಇಂಧನ ಚಿಲ್ಲರೆ ವ್ಯಾಪಾರಿಗಳಿಗೆ ಹೆಚ್ಚುತ್ತಿರುವ ನಷ್ಟದ ನಡುವೆಯೂ, ನಾಲ್ಕು ವರ್ಷಗಳಿಗೂ ಹೆಚ್ಚು ಕಾಲದ ನಂತರ ಮೊದಲ ಬಾರಿಗೆ ಶುಕ್ರವಾರ ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಗಳನ್ನು ಲೀಟರ್‌ಗೆ 3 ರೂ.ಗಳಷ್ಟು ಹೆಚ್ಚಿಸಲಾಗಿದೆ.ಅಸ್ಸಾಂ, ಕೇರಳ, ತಮಿಳುನಾಡು, ಪಶ್ಚಿಮ ಬಂಗಾಳ ಮತ್ತು ಪುದುಚೇರಿಯಲ್ಲಿ ವಿಧಾನಸಭಾ ಚುನಾವಣೆಗಳು ಮುಗಿದ ಎರಡು ವಾರಗಳ ನಂತರ ಈ ಹೆಚ್ಚಳವಾಗಿದೆ.