☰
ವಿಟಮಿನ್ ಡಿ ಕಡಿಮೆ ಆಗಿದೆ ಎನ್ನುವ ಕಾರಣಕ್ಕೆ ಜನರು ಪೂರಕಗಳನ್ನು ಸೇವನೆ ಮಾಡ್ತಾರೆ. ಆದ್ರೆ ದೇಹದಲ್ಲಿ ಅದು ಎಷ್ಟಿರಬೇಕು, ಹೆಚ್ಚಾದ್ರೆ ಏನಾಗುತ್ತೆ ಎಂಬುದು ಅವರ ಅರಿವಿನಲ್ಲಿ ಇರೋದಿಲ್ಲ.
ನಮ್ಮ ದೇಹಕ್ಕೆ ವಿಟಮಿನ್ ಡಿ (Vitamin D) ಬಹಳ ಮುಖ್ಯ. ಈ ವಿಟಮಿನ್ ಮೂಳೆಗಳು ಮತ್ತು ಸ್ನಾಯುಗಳನ್ನು ಬಲಪಡಿಸುತ್ತದೆ. ದೇಹದಲ್ಲಿ ವಿಟಮಿನ್ ಡಿ ಕೊರತೆಯಾದ್ರೆ ಅನೇಕ ರೀತಿಯ ರೋಗಗಳು ನಮ್ಮನ್ನು ಕಾಡುತ್ತವೆ. ದೇಹದಲ್ಲಿ ವಿಟಮಿನ್ ಡಿ ಕೊರತೆ ಆಗ್ತಿದ್ದಂತೆ ವೈದ್ಯರು ವಿಟಮಿನ್ ಡಿ ಮಾತ್ರೆಯನ್ನು ನೀಡ್ತಾರೆ. ಅನೇಕರು ವಿಟಮಿನ್ ಡಿ ಕಡಿಮೆ ಆಗಿದೆ ಎನ್ನುವ ಕಾರಣಕ್ಕೆ ವೈದ್ಯರ ಸಲಹೆ ಪಡೆಯದೆ ಮಾತ್ರೆ ಸೇವನೆ ಮಾಡ್ತಾರೆ. ನಮ್ಮ ದೇಹದಲ್ಲಿ ವಿಟಮಿನ್ ಸೂಕ್ತ ಪ್ರಮಾಣದಲ್ಲಿ ಇರಬೇಕು. ಅದು ಕಡಿಮೆ ಆದ್ರೂ, ಹೆಚ್ಚಾದ್ರೂ ಒಳ್ಳೆಯದಲ್ಲ. ನಮ್ಮ ದೇಹದಲ್ಲಿ ವಿಟಮಿನ್ ಡಿ ಹೆಚ್ಚಾದಾಗ ಅದನ್ನು ವಿಷತ್ವ ಅಥವಾ ಹೈಪರ್ವಿಟಮಿನೋಸಿಸ್ (Hypervitaminosis) ಡಿ ಎಂದು ಕರೆಯಲಾಗುತ್ತದೆ. ಇದು ಗಂಭೀರ ಸ್ಥಿತಿಯಾಗಿದ್ದು, ಅನೇಕ ಆರೋಗ್ಯ ಸಮಸ್ಯೆ ಇದ್ರಿಂದ ಕಾಡುತ್ತದೆ.
ವಿಟಮಿನ್ ಡಿ ಹೆಚ್ಚಳದಿಂದ ಆಗುವ ಸಮಸ್ಯೆ ಏನು? : ವಿಟಮಿನ್ ಡಿ ಮುಖ್ಯ ಕಾರ್ಯವೆಂದರೆ ದೇಹದಲ್ಲಿ ಕ್ಯಾಲ್ಸಿಯಂ ಅನ್ನು ಹೀರಿಕೊಳ್ಳುವುದು. ಇದು ಮೂಳೆಗಳು, ಹಲ್ಲುಗಳು ಮತ್ತು ಸ್ನಾಯುಗಳನ್ನು ಬಲಪಡಿಸಲು, ಜೀವಕೋಶಗಳ ಬೆಳವಣಿಗೆ ಮತ್ತು ರಕ್ತದೊತ್ತಡ ನಿಯಂತ್ರಣಕ್ಕೆ ಸಹಾಯ ಮಾಡುತ್ತದೆ. ಇದರ ಕೊರತೆಯಿಂದಾಗಿ, ದೇಹವು ಕ್ಯಾಲ್ಸಿಯಂ ಅನ್ನು ಹೀರಿಕೊಳ್ಳಲು ಸಾಧ್ಯವಾಗುವುದಿಲ್ಲ. ಅದೇ ವಿಟಮಿನ್ ಡಿ ಹೆಚ್ಚಾದಾಗ ರಕ್ತದಲ್ಲಿ ಕ್ಯಾಲ್ಸಿಯಂ ಸಂಗ್ರಹವಾಗಲು ಕಾರಣವಾಗುತ್ತದೆ. ಇದು ಹೈಪರ್‌ಕಾಲ್ಸೆಮಿಯಾಕ್ಕೆ ಕಾರಣವಾಗಬಹುದು.
ಈ ಆಹಾರಗಳ ಜೊತೆ ಸೌತೆಕಾಯಿ ತಿಂದ್ರೆ ಆರೋಗ್ಯಕ್ಕೆ ಅಪಾಯ
ವಿಟಮಿನ್ ಡಿ ಕೊರತೆಯಿಂದ ವಾಕರಿಕೆ, ವಾಂತಿ, ಹಸಿವಿನ ಕೊರತೆ, ಅತಿಯಾದ ಬಾಯಾರಿಕೆ ಮತ್ತು ಸುಸ್ತು ಕಾಡುತ್ತದೆ. ಇದಲ್ಲದೆ ದೀರ್ಘಕಾಲಿಕ ಸಮಸ್ಯೆಯಾಗಿ ಮೂಳೆಗಳಲ್ಲಿ ನೋವು ಕಾಡುತ್ತದೆ. ಕಿಡ್ನಿಯಲ್ಲಿ ಕಲ್ಲು ಕಾಣಿಸಿಕೊಳ್ಳುತ್ತದೆ. ಡಿಹೈಡ್ರೇಷನ್ ಸಮಸ್ಯೆಗೆ ಕಾರಣವಾಗುತ್ತದೆ. ಪದೇ ಪದೇ ಮೂತ್ರವಿಸರ್ಜನೆ ಕಾಣಿಸಿಕೊಳ್ಳುತ್ತದೆ. ಮಲಬದ್ಧತೆ ಕೂಡ ಜನರನ್ನು ಕಾಡುವುದಿದೆ. ವಿಟಮಿನ್ ಡಿ ಹೆಚ್ಚಾದ್ರೆ ಹೃದಯ ಸಮಸ್ಯೆ, ಮಾನಸಿಕ ಸಮಸ್ಯೆ, ಖಿನ್ನತೆ ಕಾಡುವುದಲ್ಲದೆ, ಅತಿಯಾದಾಗ ವ್ಯಕ್ತಿ ಕೋಮಾಕ್ಕೆ ಹೋಗುತ್ತಾನೆ.
ವಿಟಮಿನ್ ಡಿ ಪತ್ತೆ ಹಚ್ಚುವುದು ಹೇಗೆ? : ಮೇಲಿನ ಯಾವುದೇ ಲಕ್ಷಣಗಳು ಕಾಣಿಸಿಕೊಂಡಾಗ ವಿಟಮಿನ್ ಡಿ ಪರೀಕ್ಷೆ ಮಾಡಿಸಿಕೊಳ್ಳಬೇಕು. ದೇಹದಲ್ಲಿ ವಿಟಮಿನ್ ಡಿ ಮತ್ತು ಕ್ಯಾಲ್ಸಿಯಂ ಪ್ರಮಾಣ ಪರೀಕ್ಷಿಸಲು ರಕ್ತ ಪರೀಕ್ಷೆ ಮಾಡಿಸಿಕೊಳ್ಳಬಹುದು. ಇದಲ್ಲದೆ, ಮೂತ್ರಪಿಂಡದ ಸ್ಥಿತಿಯನ್ನು ಪರೀಕ್ಷಿಸಲು ಮೂತ್ರಪಿಂಡದ ಕಾರ್ಯ ಪರೀಕ್ಷೆ (ಕೆಎಫ್‌ಟಿ) ಸಹ ಮಾಡಬಹುದು. ಈ ಪರೀಕ್ಷೆಗಳು ವಿಟಮಿನ್ ಡಿ ವಿಷತ್ವವನ್ನು ಪತ್ತೆ ಮಾಡುತ್ತವೆ. ವೈದ್ಯರ ಪ್ರಕಾರ, ವಿಟಮಿನ್ ಡಿ ವಿಷತ್ವದಿಂದ ಬಳಲುವ ಜನರ ಸಂಖ್ಯೆ ಕಡಿಮೆ. ಆದ್ರೆ ವಿಷತ್ವ ಹೆಚ್ಚಾದ್ರೆ ಅಪಾಯ ಹೆಚ್ಚು. ಅಧಿಕ ಪ್ರಮಾಣದಲ್ಲಿ ವಿಟಮಿನ್ ಡಿ ಪೂರಕಗಳನ್ನು ತೆಗೆದುಕೊಳ್ಳುವ ಜನರು, ಮೂಳೆ ಸಮಸ್ಯೆಗಳಿಗೆ ಸಂಬಂಧಿಸಿದ ಔಷಧಿಗಳನ್ನು ದೀರ್ಘಕಾಲದವರೆಗೆ ಸೇವಿಸುವ ಜನರು ಈ ಸಮಸ್ಯೆಯಿಂದ ಬಳಲುವುದು ಹೆಚ್ಚು.
ನವರಾತ್ರಿಯಲ್ಲಿ ಬೆಳ್ಳುಳ್ಳಿ-ಈರುಳ್ಳಿ ಯಾಕೆ ತಿನ್ನಲ್ಲ ಗೊತ್ತಾ?
ವಿಟಮಿನ್ ಡಿ ವಿಷತ್ವಕ್ಕೆ ಚಿಕಿತ್ಸೆ ಹೇಗೆ? : ರಕ್ತದಲ್ಲಿನ ಕ್ಯಾಲ್ಸಿಯಂ ಮಟ್ಟವನ್ನು ಕಡಿಮೆ ಮಾಡುವುದು ವಿಟಮಿನ್ ಡಿ ವಿಷತ್ವಕ್ಕೆ ಪ್ರಾಥಮಿಕ ಚಿಕಿತ್ಸೆಯಾಗಿದೆ. ನಿರ್ಜಲೀಕರಣಕ್ಕೆ ಚಿಕಿತ್ಸೆ ನೀಡಲು ವೈದ್ಯರು ರಕ್ತನಾಳಗಳ ಮೂಲಕ ಅಭಿದಮನಿ ದ್ರವಗಳನ್ನು ನೀಡುತ್ತಾರೆ. ವೈದ್ಯರ ಸಲಹೆಯಂತೆ ನೀವು ವಿಟಮಿನ್ ಡಿ ಪೂರಕ ಸೇವನೆ ಮಾಡಬೇಕು. ವಾರದಲ್ಲಿ ಒಂದು ದಿನ ಮಾತ್ರ ವಿಟಮಿನ್ ಡಿ ಮಾತ್ರೆ ಸೇವನೆ ಮಾಡಬೇಕು. ವೈದ್ಯರು ನೀಡಿದ ಕೋರ್ಸ್ ಮಾತ್ರ ಮುಗಿಸಿ, ಅದಕ್ಕಿಂತ ಹೆಚ್ಚು ದಿನ ವಿಟಮಿನ್ ಡಿ ಮಾತ್ರೆ ಸೇವನೆ ಮಾಡಬೇಡಿ. ಮಕ್ಕಳಿಗೆ ಯಾವುದೇ ಕಾರಣಕ್ಕೂ ವೈದ್ಯರ ಸಲಹೆ ಇಲ್ಲದೆ ವಿಟಮಿನ್ ಡಿ ಪೂರಕವನ್ನು ನೀಡಬೇಡಿ.
