ಅಂಬಾಜಿ ದೇವಾಲಯದ ದಂತಕಥೆಯು ಶತಮಾನಗಳ ಹಿಂದೆ, ಸತಿ ದೇವಿಯಿಂದ ಆರಂಭವಾಗುತ್ತದೆ. ಈ ದೇಗುಲದ ವಿಶೇಷತೆ ಎಂದರೆ ಇಲ್ಲಿ ಯಾವುದೇ ದೇವರ ಮೂರ್ತಿ ಇಲ್ಲ, ಕಣ್ಣಿಗೆ ಪಟ್ಟಿ ಕಟ್ಟಿ ಇಲ್ಲಿ ದೇವಿಯನ್ನು ಪೂಜಿಸಲಾಗುತ್ತೆ.
ಗುಜರಾತಿನಲ್ಲಿ (Gujarat) ಅನೇಕ ಆಸಕ್ತಿದಾಯಕ ಸ್ಥಳಗಳಿವೆ. ಅಲ್ಲಿನ ಸೌಂದರ್ಯವು ಜನರನ್ನು ಹುಚ್ಚರನ್ನಾಗಿ ಮಾಡುತ್ತದೆ. ಗುಜರಾತ್ ನ ಬನಸ್ಕಾಂತದಲ್ಲಿರುವ ಅಂಬಾಜಿ ಮಾತಾ ದೇವಾಲಯವು ವಾಸ್ತುಶಿಲ್ಪದ ದೃಷ್ಟಿಯಿಂದ ಅದ್ಭುತವಾದ ದೇವಾಲಯಗಳಲ್ಲಿ ಒಂದಾಗಿದೆ. ಅಲ್ಲದೆ, ಈ ದೇವಾಲಯವನ್ನು 51 ಪ್ರಾಚೀನ ಶಕ್ತಿಪೀಠಗಳಲ್ಲಿ ಸೇರಿಸಲಾಗಿದೆ.
ಭಾರತದಲ್ಲಿ ತಮ್ಮದೇ ಆದ ಧಾರ್ಮಿಕ ಮಹತ್ವವನ್ನು ಹೊಂದಿರುವ ಅನೇಕ ಸ್ಥಳಗಳಿವೆ. ಗುಜರಾತಿನ ಬನಸ್ಕಾಂತದಲ್ಲಿ ಅಂಬಾಜಿ ಮಾತಾ ದೇವಾಲಯವಿದೆ (Ambaji Mata Temple), ಅಲ್ಲಿ ವಿಗ್ರಹವಿಲ್ಲ. ಪವಿತ್ರ ಶ್ರೀ ಚಕ್ರವನ್ನು ಈ ದೇವಾಲಯದಲ್ಲಿ ಮುಖ್ಯವಾಗಿ ಪೂಜಿಸಲಾಗುತ್ತದೆ.
ಮತ್ತೊಂದು ವಿಶೇಷತೆ ಎಂದರೆ ಇಲ್ಲಿ ಈ ಶ್ರೀ ಯಂತ್ರವು ಸಾಮಾನ್ಯ ಕಣ್ಣಿಗೆ ಗೋಚರಿಸುವುದಿಲ್ಲ. ಆದ್ದರಿಂದ, ಇದನ್ನು ಕಣ್ಣುಮುಚ್ಚಿಕೊಂಡು ಮಾತ್ರ ಪೂಜಿಸಲಾಗುತ್ತದೆ. ಅಲ್ಲದೇ ಈ ದೇಗುಲದಲ್ಲಿ ಫೋಟೋ ತೆಗೆಯುವುದನ್ನು ಸಹ ನಿಷೇಧಿಸಲಾಗಿದೆ.
ಪೌರಾಣಿಕ ನಂಬಿಕೆ ಏನು?
ಗುಜರಾತಿನ ಬನಸ್ಕಾಂತದಲ್ಲಿರುವ ಈ ದೇವಾಲಯವು ಒಂಬತ್ತು ದೇವತೆಗಳಲ್ಲಿ ಒಬ್ಬರಾದ ಅಂಬಾ ದೇವಿಗೆ ಸಮರ್ಪಿತವಾಗಿದೆ. ಈ ದೇವಾಲಯದ ಹಿಂದೆ ಪೌರಾಣಿಕ ನಂಬಿಕೆ ಇದೆ. ಅದರ ಪ್ರಕಾರ, ದಕ್ಷ ಮಾಡಿದ ಅವಮಾನದಿಂದ ಶಿವನಿಗೆ ನೋವಾದಾಗ ಮಾತಾ ಸತಿ ಅಗ್ನಿ ಕುಂಡಕ್ಕೆ ಹಾರಿ ತನ್ನ ಪ್ರಾಣವನ್ನು ತ್ಯಾಗ ಮಾಡಿದಳು. ಅದರ ನಂತರ, ಭಗವಾನ್ ಶಂಕರನು ಯಜ್ಞ ಕುಂಡದಿಂದ ಸತಿಯ ದೇಹವನ್ನು ಹೊರತೆಗೆದು ತನ್ನ ಭುಜದ ಮೇಲೆ ಎತ್ತಿ ದುಃಖದಿಂದ ನಡೆಯಲು ಪ್ರಾರಂಭಿಸಿದನು.
ಏತನ್ಮಧ್ಯೆ, ವಿಷ್ಣು ಸತಿಯ ದೇಹವನ್ನು ಚಕ್ರದಿಂದ ಕತ್ತರಿಸಿದನು. ಮಾತಾ ಸತಿಯ ದೇಹದ ತುಂಡುಗಳು ಬಿದ್ದ ಎಲ್ಲಾ ಸ್ಥಳಗಳನ್ನು 51 ಶಕ್ತಿಪೀಠಗಳು (51 Shakti peetha) ಎಂದು ಕರೆಯಲಾಗುತ್ತಿತ್ತು. ಮಾತಾ ಸತಿಯ ಹೃದಯವು ಈ ಸ್ಥಳದಲ್ಲಿ ಅಂಬಾಜಿ ದೇಗುಲವಿರುವ ಸ್ಥಳದಲ್ಲಿ ಬಿದ್ದಿತು, ಆದ್ದರಿಂದ ಈ ದೇವಾಲಯವನ್ನು 51 ಶಕ್ತಿಪೀಠಗಳಲ್ಲಿ ಸೇರಿಸಲಾಗಿದೆ.
ಪ್ರತಿ ವರ್ಷ ಸಾವಿರಾರು ಭಕ್ತರು ಅಂಬಾಜಿ ದೇವಸ್ಥಾನಕ್ಕೆ ಆಗಮಿಸುತ್ತಾರೆ. ವಿಶೇಷವಾಗಿ ಭಾದ್ರವಿ ಪೂರ್ಣಿಮಾ, ನವರಾತ್ರಿ ಮತ್ತು ದೀಪಾವಳಿಯ ಸಮಯದಲ್ಲಿ ಇಲ್ಲಿ ಸಾಕಷ್ಟು ಭಕ್ತರು ಆಗಮಿಸುತ್ತಾರೆ. ಇದು ನಂಬಿಕೆಯ ಕೇಂದ್ರ ಮಾತ್ರವಲ್ಲ, ಅತ್ಯಂದ ಸುಂದರವಾದ ನೈಸರ್ಗಿಕ ತಾಣಗಳನ್ನು ಸಹ ಹೊಂದಿದೆ.
ಅಂಬಾಜಿ ಮಾತಾ ದೇವಾಲಯದ ಸುತ್ತಲೂ ಅನೇಕ ಪ್ರವಾಸಿ ಸ್ಥಳಗಳಿವೆ, ಅಲ್ಲಿ ಪ್ರವಾಸಿಗರು ಭೇಟಿ ನೀಡುತ್ತಾರೆ. ಈ ಸ್ಥಳವು ಅರಾವಳಿ ಶ್ರೇಣಿಗಳ ದಟ್ಟವಾದ ಕಾಡುಗಳಿಂದ ಆವೃತವಾಗಿದೆ. ಗಬ್ಬರ್ ಬೆಟ್ಟ, ಕೈಲಾಶ್ ಟೇಕ್ರಿ, ಕುಂಭಾರಿಯಾ ಮುಂತಾದ ಆಸಕ್ತಿದಾಯಕ ಸ್ಥಳಗಳು ಈ ದೇವಾಲಯದ ಸುತ್ತಲೂ ಇವೆ. ಇಲ್ಲಿ ನೀವು ದೇವರ ಭಕ್ತಿಯಲ್ಲಿ ಕಳೆದು ಹೋಗುವ ಜೊತೆಗೆ, ಪ್ರವಾಸೋದ್ಯಮವನ್ನು ಸಹ ಎಂಜಾಯ್ ಮಾಡಬಹುದು.