ರಾಧಿಕಾ ಡ್ರೆಸ್,​ ಕೆಜಿಎಫ್​ ನಟಿ ಮೌನಿ ರಾಯ್​ಗೆ ಗಿಫ್ಟ್​ ಕೊಟ್ಟ ಯಶ್​? ಅರೆರೆ... ಇದೇನಿದು ಭಾರಿ ಸದ್ದು?

ಕೆಜಿಎಫ್ 3ಗಾಗಿ ಅಭಿಮಾನಿಗಳು ಕಾಯುತ್ತಿದ್ದಾರೆ. ಯಶ್ ಮತ್ತು ರಾಧಿಕಾ ಮಕ್ಕಳೊಂದಿಗೆ ಸಂತೋಷವಾಗಿದ್ದಾರೆ. ರಾಧಿಕಾ ಮಕ್ಕಳ ಆರೈಕೆಯಲ್ಲಿ ಬ್ಯುಸಿಯಾಗಿದ್ದಾರೆ. ನಟಿ ಮೌನಿ ರಾಯ್ ಹಿಂದಿ ಧಾರಾವಾಹಿ ಮತ್ತು ಕೆಜಿಎಫ್ ಹಾಡಿನ ಮೂಲಕ ಪ್ರಸಿದ್ಧಿ ಪಡೆದಿದ್ದಾರೆ. ಇತ್ತೀಚೆಗೆ, ಮೌನಿ ಮತ್ತು ರಾಧಿಕಾ ಒಂದೇ ರೀತಿಯ ಡ್ರೆಸ್‌ನಲ್ಲಿ ಕಾಣಿಸಿಕೊಂಡಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆಗೆ ಕಾರಣವಾಗಿದೆ. ಇಬ್ಬರ ಟೇಸ್ಟ್ ಒಂದೇ ಆಗಿರಬಹುದು ಎಂದು ಹೇಳಲಾಗುತ್ತಿದೆ.

ಕೆಜಿಎಫ್​-1 ಮತ್ತು 2 ಬಳಿಕ ಅಭಿಮಾನಿಗಳು 3ನೇ ಭಾಗಕ್ಕಾಗಿ ಕಾತರದಿಂದ ಕಾಯುತ್ತಿದ್ದಾರೆ. ಇದಾಗಲೇ ಈ ಚಿತ್ರದ ಶೂಟಿಂಗ್​ ಕೂಡ ಆರಂಭವಾಗಿರುವ ಬಗ್ಗೆ ಸುಳಿವು ನೀಡಲಾಗಿದೆ. ಆದರೆ ಸದ್ಯ ಚಿತ್ರದ ಬಗ್ಗೆ ಸಸ್ಪೆನ್ಸ್​ ಇಡಲಾಗಿದೆ. ಅದೇ ಇನ್ನೊಂದೆಡೆ, ಯಶ್​ ಮತ್ತು ರಾಧಿಕಾ ಪಂಡಿತ್​ ತಮ್ಮ ಇಬ್ಬರು ಪುಟಾಣಿಗಳಾದ ಮಕ್ಕಳು ಆಯ್ರಾ, ಯಥರ್ವ್‌ ಜೊತೆ ಖುಷಿಯ ಸಂಸಾರ ಮಾಡುತ್ತಿದ್ದಾರೆ. ರಾಧಿಕಾ ಬಣ್ಣದ ಲೋಕದಿಂದ ದೂರವೇ ಆಗಿ ಮಕ್ಕಳ ಪಾಲನೆಯಲ್ಲಿ ತೊಡಗಿದ್ದಾರೆ.  ಆಗಾಗ ಪತಿ ಯಶ್‌ ಜೊತೆಗೆ ಜಾಹೀರಾತುಗಳಲ್ಲಿ ಮಾತ್ರ ಕಾಣಿಸಿಕೊಳ್ತಾರೆ.  ಮೊನ್ನೆಯಷ್ಟೇ ಇವರು ತಮ್ಮ ಹುಟ್ಟುಹಬ್ಬವನ್ನು ಆಚರಿಸಿಕೊಂಡಿದ್ದರು. ಯಶ್‌ ಅವರು ಪತ್ನಿ ರಾಧಿಕಾಗೋಸ್ಕರ  ʼಜೊತೆಯಲಿ ಜೊತೆಯಲಿʼ ಎಂದು ಹಾಡು ಹಾಡಿದ್ದರು.  ಯಶ್‌ ಹಾಡು ಕೇಳಿದವರು ಖುಷಿಯಿಂದ ಕೂಗಿದ್ದಾರೆ. ಇನ್ನು ಪತಿಯ ಹಾಡು ಕೇಳಿ ರಾಧಿಕಾ ಹೃದಯ ತುಂಬಿ ಬಂದಿರುವ ವಿಡಿಯೊ ವೈರಲ್​ ಆಗಿತ್ತು. 

ಇದು ರಾಧಿಕಾ ಮಾತಾದರೆ, ಕೆಜಿಎಫ್​ ನಟಿ ಮೌನಿ ರಾಯ್​ ಬಗ್ಗೆಯೂ ಸಿನಿ ಪ್ರಿಯರಿಗೆ ಚೆನ್ನಾಗಿಯೇ ತಿಳಿದಿದೆ. ಈಕೆ   ಖ್ಯಾತ  ಕಿರುತೆರೆ ನಟಿ. ಈಕೆ  ಬಾಲಿವುಡ್​ ತಾರೆ ಕೂಡ.  ಚಿತ್ರರಂಗದಲ್ಲಿ ಸಕ್ರಿಯವಾಗಿರುವ ನಟಿ ಮೌನಿ ಹೆಚ್ಚಾಗಿ ಫೇಮಸ್​ ಆಗಿರುವುದು ಹಿಂದಿ  ಧಾರಾವಾಹಿಗಳ ಮೂಲಕ.  ಪಶ್ಚಿಮ ಬಂಗಾಳದ ಮೂಲದ ಮೌನಿ 2007 ರ ಹಿಂದಿ ಸೀರಿಯಲ್ `ಕ್ಯೂಂಕಿ ಸಾಸ್ ಭಿ ಕಬಿ ಬಹು ಥಿ' ಮೂಲಕ ನಟನೆ ಆರಂಭಿಸಿದವರು. ಆದರೆ ಇವರಿಗೆ ಮೊದಲ ಖ್ಯಾತಿ ಕೊಟ್ಟಿದ್ದು ದೇವೋಂಕೆ ದೇವ ಮಹಾದೇವ ಸೀರಿಯಲ್​ನ ಪೌರಾಣಿಕ ಪಾತ್ರದಲ್ಲಿ. ಇದರಲ್ಲಿ ಈಕೆ  ಸತಿ ಪಾತ್ರ ವಹಿಸಿದ್ದರು. ನಂತರ ನಾಗಿಣಿ ಧಾರಾವಾಹಿ ಮೂಲಕ ಮತ್ತಷ್ಟು ಖ್ಯಾತಿ ಪಡೆದರು. 2018 ರಲ್ಲಿ ತೆರೆಕಂಡ ಅಕ್ಷಯ ಕುಮಾರ್ ಅಭಿನಯದ `ಗೋಲ್ಡ್' ಚಿತ್ರದ ಮೂಲಕ ಬಾಲಿವುಡ್​ಗೆ ಪದಾರ್ಪಣೆ ಮಾಡಿದರು ಮೌನಿ.  ನಂತರ ಕನ್ನಡದ ಕೆಜಿಎಫ್ ಚಿತ್ರದಲ್ಲಿ ಯಶ್ ಜೊತೆ ಒಂದು ಗೀತೆಯಲ್ಲಿ ಕಾಣಿಸಿಕೊಂಡರು. 2019 ರಲ್ಲಿ ತೆರೆಕಂಡ ಜಾನ್ ಅಬ್ರಾಹಂ ನಟನೆಯ `ರಾ' ಚಿತ್ರದಲ್ಲೂ ಕೂಡ ಕಾಣಿಸಿಕೊಂಡಿದ್ದಾರೆ. ‘ಕೆಜಿಎಫ್​: ಚಾಪ್ಟರ್​ 1’ ಸಿನಿಮಾದ ‘ಗಲಿ ಗಲಿ ಮೇ..’ ಹಾಡಿನಲ್ಲಿ ಯಶ್​ ಜೊತೆ ಸಕತ್​ ಸ್ಟೆಪ್​ ಹಾಕಿದ್ದಾರೆ. ನಂತರ ಕಳೆದ ಸೆಪ್ಟೆಂಬರ್​ನಲ್ಲಿ ಬಿಡುಗಡೆಗೊಂಡ  'ಬ್ರಹ್ಮಾಸ್ತ್ರ' ಚಿತ್ರದ ಜುನೂನ್ ಪಾತ್ರದಲ್ಲಿ ಕಾಣಿಸಿಕೊಂಡರು. ಈ ಚಿತ್ರದಲ್ಲಿ ಮೌನಿ ಚಿತ್ರದ ಮುಖ್ಯ ಕಲಾವಿದರಾದ ರಣಬೀರ್ ಕಪೂರ್ ಹಾಗೂ ಅಲಿಯಾ ಭಟ್ ಗಿಂತ ಉತ್ತಮ ಪಾತ್ರ ನಿರ್ವಹಿಸಿದ್ದಾರೆ ಎಂಬ ಮಾತುಗಳು ಕೂಡ ಕೇಳಿಬಂದವು. 

ಈಗ ಕುತೂಹಲ ಎನ್ನುವ ವಿಡಿಯೋ ಒಂದು ವೈರಲ್ ಆಗಿದೆ. ಅದರಲ್ಲಿ ಮೌನಿ ರಾಯ್​ ಮತ್ತು ರಾಧಿಕಾ ಪಂಡಿತ್​ ಅವರು ಒಂದೇ ರೀತಿಯ ಡ್ರೆಸ್​ನಲ್ಲಿ ಕಾಣಿಸಿಕೊಂಡಿದ್ದಾರೆ. ನೀಲಿ ಬಣ್ಣದ ಅಪರೂಪದ ಡ್ರೆಸ್​ ಆಗಿರುವ ಕಾರಣ, ಇದು ಸೋಷಿಯಲ್​ ಮೀಡಿಯಾದಲ್ಲಿ ವೈರಲ್​  ಆಗಿದೆ. ಸುಮ್ಮನೇ ವೈರಲ್​  ಆಗಿದ್ದರೆ ಪರವಾಗಿರಲಿಲ್ಲ. ಇದಕ್ಕೆ ತಮಾಷೆಯ ಮೀಮ್ಸ್​ಗಳೂ ಹರಿದಾಡುತ್ತಿವೆ. ಯಶ್​ ಅವರು ತಮ್ಮ ಪತ್ನಿ ರಾಧಿಕಾ ಅವರ ಡ್ರೆಸ್​ ಅನ್ನು ನಟಿ ಮೌನಿ ರಾಯ್​ ಅವರಿಗೆ ಗಿಫ್ಟ್​ ಕೊಟ್ಟಿದ್ದಾರೆ ಎಂದು ಕೆಲವರು ಕಾಲೆಳೆಯುತ್ತಿದ್ದರೆ, ಮತ್ತೆ ಕೆಲವರು ಇಲ್ಲ ಇಲ್ಲ... ಕೆಜಿಎಫ್​ ಸಂದರ್ಭದಲ್ಲಿ ಮೌನಿ ಬಟ್ಟೆ ತೊಟ್ಟದ್ದು ನೋಡಿ ಖುಷಿಯಾಗಿ ಅದನ್ನು ಅವರು ರಾಧಿಕಾಗೆ ತಂದುಕೊಟ್ಟಿದ್ದಾರೆ ಎಂದು ಮತ್ತೆ ಕೆಲವರು ಹೇಳುತ್ತಿದ್ದಾರೆ.

ಸಾಮಾನ್ಯವಾಗಿ ಸೆಲೆಬ್ರಿಟಿಗಳು ತಮ್ಮದೇ ಆದ ರೀತಿಯಲ್ಲಿ, ತಮಗಿಷ್ಟದ ಬಟ್ಟೆಗಳನ್ನು ಡಿಸೈನ್​ ಮಾಡಿಸಿಕೊಳ್ಳುತ್ತಾರೆ. ಹಾಗೆಂದು ಅವರು ಅಂಗಡಿಗಳಿಂದ ಬಟ್ಟೆ ಖರೀದಿ ಮಾಡುವುದಿಲ್ಲವೆಂದೇನಲ್ಲವಲ್ಲ. ಇದೇ ರೀತಿ ಡ್ರೆಸ್​  ಖರೀದಿ ಮಾಡಿದ್ದಾರೆ ಇಬ್ಬರಿಗೂ ಈ ಡ್ರೆಸ್​ ಹಿಡಿಸಿದೆ. ಇಬ್ಬರ ಟೇಸ್ಟ್ ಕೂಡ ಒಂದೇ ಆಗಿರಲಿಕ್ಕೆ ಸಾಕು. ಇದೇ ಕಾರಣಕ್ಕೆ, ಇಬ್ಬರೂ ಒಂದೇ ರೀತಿಯ ಔಟ್​ಫಿಟ್​ ಖರೀದಿ ಮಾಡಿದ್ದಾರೆ. ಆದರೆ ಸೋಷಿಯಲ್​ ಮೀಡಿಯಾದಲ್ಲಿ ಇದು ಹೈಲೈಟ್​ ಆಗುತ್ತಿದೆ. ಇವರಿಬ್ಬರೂ ಒಂದೇ ರೀತಿಯ ಡ್ರೆಸ್​ ಧರಿಸಿರುವುದನ್ನು ನೋಡಿ ಅದ್ಯಾವ ಪುಣ್ಯಾತ್ಮರು ವಿಡಿಯೋ ವೈರಲ್​ ಮಾಡಿದ್ದಾರೋ ಗೊತ್ತಿಲ್ಲ, ಅವರಿಗೆ ಹ್ಯಾಟ್ಸ್​ಆಫ್​ ಹೇಳುತ್ತಿರುವ ನೆಟ್ಟಿಗರು, ತಮಾಷೆಯ ಕಮೆಂಟ್​ಗಳನ್ನೂ ಮಾಡುತ್ತಿದ್ದಾರೆ. ಈ ವಿಡಿಯೋ ಅನ್ನು ಜೂಮ್​ಔಟ್​ ಕನ್ನಡ ಶೇರ್​ ಮಾಡಿಕೊಂಡಿದೆ.