ಅಪ್ಪಿತಪ್ಪಿಯೂ ನಿಮ್ಮ ಸಂಗಾತಿಗೆ ಎಂದಿಗೂ ಹೇಳಬಾರದ 6 ವಿಷಯಗಳಿವು!

ನಿಮ್ಮ ಉದ್ದೇಶಗಳು ಒಳ್ಳೆಯದಾಗಿದ್ದರೂ ಕೆಲವು ಪದಗಳು ನಿಮ್ಮ ಸಂಗಾತಿಯ ಹೃದಯವನ್ನು ಗಂಭೀರವಾಗಿ ನೋಯಿಸಬಹುದು. ಈ ಸಣ್ಣ ತಪ್ಪುಗಳು ನಿಧಾನವಾಗಿ ಸಂಬಂಧದಲ್ಲಿ ಬಿರುಕುಗಳನ್ನು ಸೃಷ್ಟಿಸುತ್ತವೆ ಮತ್ತು ಬ್ರೇಕಪ್ ಆಗಲು ಕಾರಣವಾಗುತ್ತವೆ.

ಗಂಡ-ಹೆಂಡತಿ ಸಂಬಂಧ ಕೊನೆಯವರೆಗೂ ಉಳಿಯಲು ಮೂರು ವಿಷಯಗಳು ಬಹಳ ಮುಖ್ಯ. ಅದು ಪ್ರೀತಿ, ವಿಶ್ವಾಸ ಮತ್ತು ಗೌರವ. ಇವು ಸಂಬಂಧಗಳ ಅಡಿಪಾಯದಂತೆ. ಆದರೆ ಕೆಲವೊಮ್ಮೆ ನಮಗೆ ತಿಳಿಯದೆಯೇ ನಮ್ಮ ಬಾಯಿಂದ ಬರುವ ಕೆಲವು ಪದಗಳು ಈ ಅಡಿಪಾಯಗಳನ್ನು ಕೆಡವಬಹುದು. ಹೌದು, "ಮಾತು ಆಡಿದರೆ ಹೋಯಿತು, ಮುತ್ತು ಒಡೆದರೆ ಹೋಯಿತು" ಎಂಬ ಮಾತಿದೆ. ಮಾತು ಗುಂಡಿಗಿಂತ ಹೆಚ್ಚು ಶಕ್ತಿಶಾಲಿ. ಹಾಗಾಗಿ "ಮಾತಿನಲ್ಲಿ ಹಿಡಿತವಿರಬೇಕು" ಎಂದು ನಮ್ಮ ಹಿರಿಯರು ಆಗಾಗ್ಗೆ ಹೇಳುವುದನ್ನು ನೀವು ಕೇಳಿರಬೇಕು. ನಿಮ್ಮ ಉದ್ದೇಶಗಳು ಒಳ್ಳೆಯದಾಗಿದ್ದರೂ ಕೆಲವು ಪದಗಳು ನಿಮ್ಮ ಸಂಗಾತಿಯ ಹೃದಯವನ್ನು ಗಂಭೀರವಾಗಿ ನೋಯಿಸಬಹುದು. ಈ ಸಣ್ಣ ತಪ್ಪುಗಳು ನಿಧಾನವಾಗಿ ಸಂಬಂಧದಲ್ಲಿ ಬಿರುಕುಗಳನ್ನು ಸೃಷ್ಟಿಸುತ್ತವೆ ಮತ್ತು ಬ್ರೇಕಪ್ ಆಗಲು ಕಾರಣವಾಗುತ್ತವೆ. ನಿಮ್ಮ ಸಂಬಂಧವು ಶಾಶ್ವತವಾಗಿ ಸಂತೋಷ ಮತ್ತು ಬಲವಾಗಿ ಇರಬೇಕೆಂದು ನೀವು ಬಯಸಿದರೆ ಸಂಗಾತಿಗೆ ಎಂದಿಗೂ ಹೇಳಬಾರದ 6 ವಿಷಯಗಳು ಇಲ್ಲಿವೆ.

ಯಾವಾಗಲೂ ಒಂದೇ ತರಹ ತಪ್ಪು ಮಾಡ್ತೀರಿ
ಈ ಹೇಳಿಕೆಯು ನಿಮ್ಮ ಸಂಗಾತಿಯ ಆತ್ಮವಿಶ್ವಾಸವನ್ನು ತೀವ್ರವಾಗಿ ಘಾಸಿಗೊಳಿಸುತ್ತದೆ. ಇದು ಅವರನ್ನು ಅಸಹಾಯಕರು ಮತ್ತು ನಿಷ್ಪ್ರಯೋಜಕರೆಂದು ಭಾವಿಸುವಂತೆ ಮಾಡುತ್ತದೆ. ಮನುಷ್ಯರೆಂದ ಮೇಲೆ ತಪ್ಪುಗಳು ಸಾಮಾನ್ಯ. ಹಾಗಾಗಿ ಮಾಡಿದ ತಪ್ಪನ್ನು ನೀವು ನಿಧಾನವಾಗಿ ವಿವರಿಸಿದರೆ ಅಥವಾ ಅದನ್ನು ಒಟ್ಟಿಗೆ ಹೇಗೆ ಸರಿಪಡಿಸಬಹುದು ಎಂದು ಕೇಳಿದರೆ ಅದು ಸಮಸ್ಯೆಯನ್ನು ಪರಿಹರಿಸುವುದಲ್ಲದೆ ನಿಮ್ಮ ನಡುವಿನ ಅನ್ಯೋನ್ಯತೆಯನ್ನು ಹೆಚ್ಚಿಸುತ್ತದೆ.

ನನ್ನ ಮಾಜಿ ಬಾಯ್‌ ಫ್ರೆಂಡ್ ನಿಮಗಿಂತ ತುಂಬಾ ಉತ್ತಮ
ನಿಮ್ಮ ಸಂಗಾತಿಯನ್ನು ಬೇರೆಯವರೊಂದಿಗೆ ವಿಶೇಷವಾಗಿ ನಿಮ್ಮ ಎಕ್ಸ್‌ ಜೊತೆ ಹೋಲಿಸುವುದು ನಿಮ್ಮ ಸಂಬಂಧಕ್ಕೆ ಬೆಂಕಿ ಹಚ್ಚಿದಂತೆ. ಇದು ಅವರಿಗೆ ಅವಮಾನಕರವಷ್ಟೇ ಅಲ್ಲ, ಅವರಿಗೆ ಅಸುರಕ್ಷಿತ ಭಾವನೆ ಮತ್ತು ತಾವು ಅವರಿಗೆ ಸರಿಯಾದ ಜೋಡಿಯಲ್ಲ ಎಂಬ ಅನುಮಾನ ಮೂಡಿಸುತ್ತದೆ. ಹೋಲಿಕೆಗಳನ್ನು ಸಂಪೂರ್ಣವಾಗಿ ಬದಿಗಿಟ್ಟು ನಿಮ್ಮ ಪ್ರಸ್ತುತ ಸಂಗಾತಿಯಲ್ಲಿರುವ ಶ್ರೇಷ್ಠತೆಯನ್ನು ಗುರುತಿಸಿ.

ನನಗೆ ಅರ್ಥವಾಗುತ್ತಿಲ್ಲ, ದಯವಿಟ್ಟು ಬಿಟ್ಟುಬಿಡಿ
ಈ ರೀತಿ ಹೇಳುವುದರಿಂದ ನೀವು ಅವರ ಅಭಿಪ್ರಾಯಕ್ಕೆ ಬೆಲೆ ಕೊಡುತ್ತಿಲ್ಲ ಎಂದು ಸ್ಪಷ್ಟವಾಗುತ್ತದೆ. ಇದು ಅವರಿಗೆ ಕೆಟ್ಟ ಭಾವನೆ ಮೂಡಿಸುತ್ತದೆ. ಬದಲಾಗಿ ಅವರ ವಾದವನ್ನು ತಾಳ್ಮೆಯಿಂದ ಆಲಿಸಿ. "ನೀವು ಏನು ಹೇಳುತ್ತಿದ್ದೀರಿ ಎಂದು ನನಗೆ ಸಂಪೂರ್ಣವಾಗಿ ಅರ್ಥವಾಗುತ್ತಿಲ್ಲ, ದಯವಿಟ್ಟು ಅದನ್ನು ಮತ್ತೊಮ್ಮೆ ವಿವರಿಸಬಹುದೇ?" ಎಂದು ಕೇಳುವುದು ಗೌರವಯುತವಾಗಿದೆ.

ನಿಮ್ಮ ಕುಟುಂಬದ ಸದಸ್ಯರು ತುಂಬಾ ವಿಚಿತ್ರರು
ನಿಮ್ಮ ಸಂಗಾತಿಯ ಕುಟುಂಬವನ್ನು ಟೀಕಿಸುವುದು ಅಥವಾ ಗೇಲಿ ಮಾಡುವುದು ಅವರನ್ನು ನೇರವಾಗಿ ನೋಯಿಸಿದಂತೆ. ಕುಟುಂಬವು ಪ್ರತಿಯೊಬ್ಬರ ಜೀವನದ ಸೂಕ್ಷ್ಮ ಭಾಗವಾಗಿದೆ. ಅವರ ಕುಟುಂಬದ ಬಗ್ಗೆ ನೆಗೆಟಿವ್ ಕಾಮೆಂಟ್‌ಗಳು ನಿಮ್ಮ ಸಂಬಂಧದ ಮೇಲೆ ಗಂಭೀರ ಪರಿಣಾಮ ಬೀರಬಹುದು. ಸಮಸ್ಯೆ ಇದ್ದರೆ, ನಿರ್ದಿಷ್ಟ ವ್ಯಕ್ತಿ ಅಥವಾ ಘಟನೆಯ ಬಗ್ಗೆ ಸೌಮ್ಯ ಮತ್ತು ಗೌರವಯುತವಾಗಿ ಮಾತನಾಡಿ.

ನಿಮ್ಮಲ್ಲಿ ಯಾವುದೂ ಸರಿಯಿಲ್ಲ
ಈ ಹೇಳಿಕೆಯು ನಿಮ್ಮ ಸಂಗಾತಿಯ ಮನಸ್ಸನ್ನು ಖಂಡಿತವಾಗಿ ನೋಯಿಸುತ್ತದೆ. ಅಂದರೆ ಅವರು ಮಾಡುವ ಪ್ರತಿಯೊಂದು ಪ್ರಯತ್ನವೂ ಅವರಲ್ಲಿ ವೈಫಲ್ಯದ ಭಾವನೆಯನ್ನು ತುಂಬುತ್ತಾ ಹೋಗುತ್ತದೆ. ಯಾರೂ ಎಂದಿಗೂ ಪರಿಪೂರ್ಣರಲ್ಲ. ಅವರ ಪ್ರಯತ್ನಗಳನ್ನು ಶ್ಲಾಘಿಸಿ ಮತ್ತು ಅಗತ್ಯವಿದ್ದರೆ ಅವರಿಗೆ ಪ್ರೀತಿಯ ಸಲಹೆಗಳನ್ನು ನೀಡಿ. ಅವರನ್ನು ಟೀಕಿಸುವ ಬದಲು ಪ್ರೋತ್ಸಾಹಿಸಿ.

ನಾನು ನಿಮ್ಮೊಂದಿಗೆ ಬದುಕಲು ಸಾಧ್ಯವಿಲ್ಲ
ಈ ರೀತಿ ಕೋಪದಿಂದ ಹೇಳುವುದು ನಿಮ್ಮ ಸಂಬಂಧದ ಮೇಲೆ ಕರಿನೆರಳು ಬಿದ್ದಂತೆ. ಇದು ಸಂಬಂಧದಲ್ಲಿ ಗಂಭೀರ ಅಸ್ಥಿರತೆ ಮತ್ತು ಭಯವನ್ನು ಸೃಷ್ಟಿಸುತ್ತದೆ. ನೀವು ಸಂಬಂಧವನ್ನು ಗಂಭೀರವಾಗಿ ಪರಿಗಣಿಸುತ್ತಿಲ್ಲ ಎಂಬ ಸಂಕೇತವನ್ನು ಇದು ಕಳುಹಿಸುತ್ತದೆ. ಅದು ಎಷ್ಟೇ ಕಷ್ಟಕರವಾಗಿದ್ದರೂ, ನಿಮ್ಮ ಭಾವನೆಗಳನ್ನು ಶಾಂತವಾಗಿ ಹಂಚಿಕೊಳ್ಳಿ, ಆದರೆ ಬ್ರೇಕಪ್ ಮಾಡಿಕೊಳ್ಳುವ ಬೆದರಿಕೆ ಹಾಕಬೇಡಿ.