Onion Storage Tips: ಈರುಳ್ಳಿ 6 ತಿಂಗಳಾದರೂ ಕೆಡುವುದಿಲ್ಲ,ರುಚಿಯೂ ಹಾಗೆ ಇರುತ್ತೆ...ಈ 5 ವಿಧಾನ ಅನುಸರಿಸಿ

ಈರುಳ್ಳಿಯನ್ನು ದೀರ್ಘಕಾಲ ತಾಜಾ ಇಡಲು ಜಾಲರಿ ಚೀಲಗಳಲ್ಲಿ, ತಂಪಾದ, ನೆರಳಿನ ಸ್ಥಳದಲ್ಲಿ ಸಂಗ್ರಹಿಸಿ. ಹಾನಿಗೊಳಗಾದ ಈರುಳ್ಳಿಯನ್ನು ಬೇರ್ಪಡಿಸಿ. ಬಿದಿರಿನ ಬುಟ್ಟಿ ಅಥವಾ ಮರದ ಪೆಟ್ಟಿಗೆಗಳನ್ನು ಬಳಸಬಹುದು. ಗ್ರಾಮೀಣ ಪ್ರದೇಶಗಳಲ್ಲಿ ಬೂದಿ ಅಥವಾ ಒಣ ಮರಳಿನ ಪದರಗಳಲ್ಲಿಟ್ಟು ಸಂರಕ್ಷಿಸುವ ಸಾಂಪ್ರದಾಯಿಕ ವಿಧಾನವಿದೆ. ಸೂಕ್ತ ತಾಪಮಾನ ೨೫-೩೦ ಡಿಗ್ರಿ ಸೆಲ್ಸಿಯಸ್ ಮತ್ತು ಆರ್ದ್ರತೆ ೬೦-೭೦%.

How to Store Onions: ಹೆಚ್ಚು ಕಡಿಮೆ ಎಲ್ಲಾ ಅಡುಗೆಗೂ ಈರುಳ್ಳಿ  ಬಳಸಲಾಗುತ್ತದೆ. ಔಷಧೀಯ ಗುಣಗಳಿಂದಲೂ ಗುರುತಿಸಿಕೊಂಡಿರುವ ಈರುಳ್ಳಿ ಅತ್ಯಂತ ಅಗತ್ಯವಾದ ತರಕಾರಿಗಳಲ್ಲಿ ಒಂದಾಗಿದೆ. ವೆಜ್ ಇರಲಿ, ನಾನ್ ವೆಜ್ ಇರಲಿ, ಗ್ರೇವಿ ತಯಾರಿಸುವುದಕ್ಕಾಗಲಿ ಅಥವಾ ಸಲಾಡ್ ಅಲಂಕರಿಸುವುದಕ್ಕಾಗಲಿ ಈರುಳ್ಳಿಯನ್ನು ಪ್ರತಿ ಮನೆಯಲ್ಲೂ ಪ್ರತಿದಿನ ಬಳಸಲಾಗುತ್ತದೆ. ಆದರೆ ಈರುಳ್ಳಿ ಕೆಲವೇ ದಿನಗಳಲ್ಲಿ ಕೊಳೆಯಲು ಅಥವಾ ಮೊಳಕೆಯೊಡೆಯಲು ಪ್ರಾರಂಭಿಸುತ್ತದೆ. ವಿಶೇಷವಾಗಿ ಹವಾಮಾನವು ಆರ್ದ್ರ ಅಥವಾ ಬಿಸಿಯಾಗಿರುವಾಗ. ಇದರಿಂದ ಈರುಳ್ಳಿ ಹಾಳಾಗುವುದಲ್ಲದೆ ನಮ್ಮ ಜೇಬಿನ ಮೇಲೂ ಪರಿಣಾಮ ಬೀರುತ್ತದೆ. 

ಆದರೆ ಈರುಳ್ಳಿಯನ್ನು ಸರಿಯಾಗಿ ಸಂಗ್ರಹಿಸಿದರೆ ಅದು ವರ್ಷಪೂರ್ತಿ ಸುರಕ್ಷಿತವಾಗಿರುತ್ತದೆ. ನೀವು ಭಾರತ ಸರ್ಕಾರ ಮತ್ತು ಕೃಷಿ ಸಂಸ್ಥೆಗಳು ಸೂಚಿಸಿರುವ ಕೆಲವು ಸಾಂಪ್ರದಾಯಿಕ ಮತ್ತು ವೈಜ್ಞಾನಿಕ ವಿಧಾನಗಳ ಸಹಾಯದಿಂದಲೂ ಈರುಳ್ಳಿಯನ್ನು ನಿಮ್ಮ ಮನೆಯಲ್ಲಿ ದೀರ್ಘಕಾಲ ಫ್ರೆಶ್ ಆಗಿ ಇರಿಸಿಕೊಳ್ಳಬಹುದು. ಜೊತೆಗೆ ಇಲ್ಲಿ ಸೂಚಿಸಿರುವ ವಿಧಾನಗಳನ್ನು ಅಳವಡಿಸಿಕೊಳ್ಳುವ ಮೂಲಕವೂ ನೀವು ಈರುಳ್ಳಿಯ ಗುಣಮಟ್ಟವನ್ನು ಕಾಪಾಡಿಕೊಳ್ಳುವುದಲ್ಲದೆ ಅವು ಕೊಳೆಯದಂತೆಯೂ ತಡೆಯಬಹುದು. 

ಈರುಳ್ಳಿ ಸಂಗ್ರಹಿಸಲು ಅನುಸರಿಸಬೇಕಾದ 5 ಮಾರ್ಗಗಳು 

ಜಾಲರಿ ಚೀಲಗಳಲ್ಲಿ ಸಂಗ್ರಹಿಸಿ
ಈರುಳ್ಳಿ ಇಡುವ ಸ್ಥಳ ಸದಾ ಗಾಳಿಯಾಡುವಂತಿರಬೇಕು.ಇಲ್ಲದಿದ್ದರೆ ಅವು ತೇವಾಂಶದಿಂದಾಗಿ ಕೊಳೆಯಲು ಪ್ರಾರಂಭಿಸುತ್ತವೆ. ಆದ್ದರಿಂದ, ಈರುಳ್ಳಿಯನ್ನು ಪ್ಲಾಸ್ಟಿಕ್ ಚೀಲಗಳಲ್ಲಿ ಇಡುವ ಬದಲು, ಸೆಣಬು ಅಥವಾ ಜಾಲರಿ ಚೀಲಗಳಲ್ಲಿ ಸಂಗ್ರಹಿಸಿ. ಅಂತಹ ಚೀಲಗಳು ಗಾಳಿಯ ಪ್ರಸರಣಕ್ಕೆ ಸಹಾಯ ಮಾಡುತ್ತವೆ, ಇದು ಈರುಳ್ಳಿಯನ್ನು ಒಣಗಿಸಿ ತಾಜಾವಾಗಿರಿಸುತ್ತದೆ. ನಂತರ ಈ ಚೀಲಗಳನ್ನು ನೆರಳಿನ ಮತ್ತು ತಂಪಾದ ಸ್ಥಳದಲ್ಲಿ ನೇತುಹಾಕಿ. 

ನೆರಳಿರುವ ಮತ್ತು ಶುಷ್ಕ ಸ್ಥಳವನ್ನು ಆರಿಸಿ 
ಈರುಳ್ಳಿಯನ್ನು ಬಿಸಿಲಿನಲ್ಲಿ ಇಡುವುದರಿಂದ ಅವು ಮೃದುವಾಗುತ್ತವೆ ಮತ್ತು ಬೇಗನೆ ಕೊಳೆಯಲು ಪ್ರಾರಂಭಿಸುತ್ತವೆ. ಅಷ್ಟೇ ಅಲ್ಲ, ಹೆಚ್ಚಿನ ಆರ್ದ್ರತೆ ಇರುವ ಸ್ಥಳದಲ್ಲಿ ಇಡುವುದರಿಂದ ಅದರಲ್ಲಿ ಶಿಲೀಂಧ್ರ ಬೆಳೆಯಬಹುದು. ಆದ್ದರಿಂದ ಈರುಳ್ಳಿಯನ್ನು ಯಾವಾಗಲೂ ಒಣ, ತಂಪಾದ ಮತ್ತು ನೆರಳಿರುವ ಸ್ಥಳದಲ್ಲಿ ಸಂಗ್ರಹಿಸಿ. ಇನ್ನು ಸರಿಯಾಗಿ ಹೇಳಬೇಕೆಂದರೆ NHRDF ಪ್ರಕಾರ, 25-30 ಡಿಗ್ರಿ ಸೆಲ್ಸಿಯಸ್ ತಾಪಮಾನ ಮತ್ತು 60-70% ಆರ್ದ್ರತೆಯು ಈರುಳ್ಳಿಗೆ ಸೂಕ್ತವಾಗಿದೆ. 

ಈರುಳ್ಳಿ ವಿಂಗಡಣೆ
ಎಲ್ಲಾ ಈರುಳ್ಳಿಗಳನ್ನು ಸಂಗ್ರಹಿಸುವ ಮೊದಲು ಚೆನ್ನಾಗಿ ವಿಂಗಡಿಸಿ. ಹಾನಿಗೊಳಗಾದ, ಕೊಳೆತ ಅಥವಾ ಮೊಳಕೆಯೊಡೆದ ಈರುಳ್ಳಿಯನ್ನು ಉಳಿದವುಗಳಿಂದ ಪ್ರತ್ಯೇಕವಾಗಿ ಇರಿಸಿ. ಏಕೆಂದರೆ ಅವು ಇತರ ಈರುಳ್ಳಿಗಳನ್ನು ಸಹ ಹಾಳುಮಾಡಬಹುದು. ಸಂಪೂರ್ಣವಾಗಿ ಒಣಗಿದ ಮತ್ತು ಯಾವುದೇ ಹಾನಿಯಾಗದ ಈರುಳ್ಳಿಯನ್ನು ಮಾತ್ರ ಸಂಗ್ರಹಿಸಿ. ಈ ವಿಧಾನವು ಶೇಖರಣಾ ಅವಧಿಯನ್ನು ಹೆಚ್ಚಿಸುವಲ್ಲಿ ಬಹಳಷ್ಟು ಸಹಾಯ ಮಾಡುತ್ತದೆ.

ಬಿದಿರಿನ ಬುಟ್ಟಿಗಳು ಅಥವಾ ಮರದ ಪೆಟ್ಟಿಗೆಗಳನ್ನು ಬಳಸಿ 
ಈರುಳ್ಳಿಯನ್ನು ಬಿದಿರಿನ ಬುಟ್ಟಿಗಳು ಅಥವಾ ಮರದ ಪೆಟ್ಟಿಗೆಗಳಲ್ಲಿಯೂ ಸಂಗ್ರಹಿಸಬಹುದು. ಅವುಗಳಲ್ಲಿ ಗಾಳಿಯ ನಿರಂತರ ಹರಿವು ಇರುವುದರಿಂದ ಈರುಳ್ಳಿ ಸುರಕ್ಷಿತವಾಗಿ ಉಳಿಯುತ್ತದೆ. ಬುಟ್ಟಿ ಅಥವಾ ಪೆಟ್ಟಿಗೆಯನ್ನು ನೆಲದಿಂದ ಸ್ವಲ್ಪ ಎತ್ತರದಲ್ಲಿ ಇಡಬೇಕು, ಇದರಿಂದ ಕೆಳಗಿನಿಂದ ತೇವಾಂಶ ಸಿಗುವುದಿಲ್ಲ ಎಂಬುದನ್ನು ನೆನಪಿನಲ್ಲಿಡಿ.

ಹಳ್ಳಿಗಳಲ್ಲಿ ಬಳಸುವ ಸಾಂಪ್ರದಾಯಿಕ ವಿಧಾನ

ಗ್ರಾಮೀಣ ಪ್ರದೇಶಗಳಲ್ಲಿ ಈರುಳ್ಳಿಯನ್ನು ದೀರ್ಘಕಾಲ ಸಂರಕ್ಷಿಸಲು ಒಂದು ಸಾಂಪ್ರದಾಯಿಕ ವಿಧಾನವಿದೆ. ಅದನ್ನು ಬೂದಿ ಅಥವಾ ಒಣ ಮರಳಿನ ಪದರಗಳಲ್ಲಿ ಇಡುವುದು. ಈರುಳ್ಳಿಯ ಪದರ ಹರಡಿ ಅದರ ಮೇಲೆ ಬೂದಿಯನ್ನು ಸಿಂಪಡಿಸಿ, ನಂತರ ಮುಂದಿನ ಪದರವನ್ನು ಹಚ್ಚಿ. ಈ ವಿಧಾನವು ತೇವಾಂಶವನ್ನು ಹೀರಿಕೊಳ್ಳಲು ಮತ್ತು ಈರುಳ್ಳಿ ಕೊಳೆಯುವುದನ್ನು ತಡೆಯಲು ಸಹಾಯ ಮಾಡುತ್ತದೆ.