ಮಳೆ ಬಿಟ್ಮೇಲೂ ಬೀಳೋ ಹನಿಯಂತೆ Long Covid, ಎಚ್ಚರ ತಪ್ಪದಿರಿ ಎನ್ನುತ್ತಿದೆ ವಿಶ್ವ ಆರೋಗ್ಯ ಸಂಸ್ಥೆ

ಕೋವಿಡ್ 19 ಬಂದಿದ್ದು ದೃಢವಾದ ಮೇಲೆ ವಾರ, ತಿಂಗಳು ಅಥವಾ ವರ್ಷ ಕಳೆದರೂ ಒಂದಿಲ್ಲೊಂದು ಆರೋಗ್ಯ ಸಮಸ್ಯೆಗಳು ಕಾಣಿಸಿಕೊಳ್ಳಬಹುದು. ಈ ಲಾಂಗ್ ಕೋವಿಡ್ ಬಗ್ಗೆ ಎಚ್ಚರ ಎನ್ನುತ್ತಿದೆ ವಿಶ್ವ ಆರೋಗ್ಯ ಸಂಸ್ಥೆ.

ಪ್ರಪಂಚದಾದ್ಯಂತ ಕೋವಿಡ್ ದಿನದಿಂದ ದಿನಕ್ಕೆ ತನ್ನ ಹೊಸ ಹೊಸ ಮುಖಗಳನ್ನು ಪರಿಚಯ ಮಾಡಿಕೊಡುತ್ತಿದೆ. ದಿನಕ್ಕೊಂದು ರೀತಿಯ ಹೊಸ ತಳಿಗಳು ಉತ್ಪತ್ತಿಯಾಗುತ್ತಿವೆ ಎಂಬ ಆತಂಕ ಒಂದೆಡೆಯಾದರೆ ಇದೀಗ WHO(World Health Organization) ಒಂದು ಆತಂಕಕಾರಿ ಮಾಹಿತಿಯನ್ನು ಹೊರ ಹಾಕಿದೆ.

ವಿಶ್ವ ಆರೋಗ್ಯ ಸಂಸ್ಥೆಯ ಅಧಿಕಾರಿಗಳು ತಮ್ಮ ಇತ್ತೀಚಿನ ಸಂಶೋಧನೆಯ ಪ್ರಕಾರ ದೀರ್ಘಕಾಲೀನ ಕೋವಿಡ್ (Covid) ಸೋಂಕಿನ ಬಗ್ಗೆ ಮಾಹಿತಿ ನೀಡಿದ್ದಾರೆ. ಕೋವಿಡ್ ಬಂದಾಗ ಉಸಿರಾಟದ ಸಮಸ್ಯೆ ಎದುರಾಗುತ್ತದೆ ಎಂಬುದು ಸಾಮಾನ್ಯ ವಿಚಾರ. ಎಲ್ಲರಿಗೂ ತಿಳಿದಿರುವುದೇ. ಆದರೆ, ಇದು ಇನ್ನೂ ಮುಂದುವರೆದು ಹೃದಯಕ್ಕೆ ಸಂಬಂಧಪಟ್ಟಂಥ ಬೇರೆ ಬೇರೆ ತೊಂದರೆಗಳನ್ನು ಸೋಂಕಿತರು ಅನುಭವಿಸಬಹುದು. ಕೋವಿಡ್ ದೇಹದ ಇತರೆ ಅಂಗಗಳಿಗೆ ತೊಂದರೆಗಳನ್ನು ಕೊಡಬಹುದು ಎಂಬ ಆತಂಕಕಾರಿ ಮಾಹಿತಿಯನ್ನು ವೈಧ್ಯಾಧಿಕಾರಿಗಳು ಹೊರಹಾಕಿದ್ದಾರೆ.

ಲಾಂಗ್ ಕೋವಿಡ್ (Long COVID)

ಕೋವಿಡ್ 19 ಸೋಂಕು ತಗುಲಿ ಹೋದ ನಂತರ ಕೆಲವು ದಿನಗಳ ಬಳಿಕ ಸೋಂಕಿತರು ಮಾಮೂಲಿಯಂತೆ ಆಗಿ ಬಿಡುತ್ತಾರೆ. ಆದರೆ, ಕೆಲವರಲ್ಲಿ 90 ದಿನಗಳಿಗಿಂತಲೂ ಹೆಚ್ಚು ದಿನಗಳ ಕಾಲ ಕೋವಿಡ್ ರೋಗಲಕ್ಷಣಗಳು (Symptoms)  ಉಳಿದುಬಿಡುತ್ತವೆ. ಇದಕ್ಕೇ ಲಾಂಗ್ ಕೋವಿಡ್ ಎನ್ನುವುದು. ಸಂಶೋಧನೆಯ ಪ್ರಕಾರ ಕೋವಿಡ್ ನಿಂದ ಗುಣಮುಖರಾಗಲು ಕೆಲವು ವಾರಗಳು, ಕೆಲವು ತಿಂಗಳು, ಅಥವಾ ಇನ್ನೂ ಮುಂದುವರೆದು ಕೆಲವು ವರ್ಷಗಳೇ ಬೇಕಾಗಬಹುದು ಎಂಬುದು WHO ನೀಡುತ್ತಿರುವ ಮಾಹಿತಿ.

Brain Deathಗೂ ಸಾವಿಗೂ ಇದೆಯೇ ವ್ಯತ್ಯಾಸ?

ಹಾಗಾದರೆ ಒಮಿಕ್ರೋನ್ (Omicron) ತಗುಲಿರುವ ವ್ಯಕ್ತಿ ಕೂಡ ಈ ದೀರ್ಘಕಾಲದ ಕೊರೋನಾದಿಂದ ಬಳಲಬೇಕಾಗಬಹುದೇ? ಎಂದು ಕೇಳಿದರೆ ಇದರ ಬಗ್ಗೆ ವೈದ್ಯಾಧಿಕಾರಿಗಳಿಗೆ ಯಾವುದೇ ಸಂಪೂರ್ಣ ಮಾಹಿತಿ ದೊರೆತಿಲ್ಲ. ದೀರ್ಘ ಕೋವಿಡ್ ನಿಂದ ಬಳಲುತ್ತಿರುವ ಜನರು ಎಷ್ಟು ಶೇಕಡದಷ್ಟು (Percentage) ಇದ್ದಾರೆ ಎಂಬ ನಿರ್ದಿಷ್ಟ ಅಂಕಿ ಅಂಶಗಳು ಸಂಶೋಧಕರಿಗೆ ಇನ್ನೂ ದೊರೆತಿಲ್ಲ. ಇದರ ಕುರಿತಾಗಿ ಸಂಶೋಧನೆಗಳು ನಡೆಯುತ್ತಲೇ ಇವೆ. 

ದೀರ್ಘ ಕೋವಿಡ್ ಲಕ್ಷಣಗಳು 

• ಇದು ದೇಹದ ಎಲ್ಲ ಅಂಗಾಂಗಗಳ ಮೇಲೆ ತನ್ನ ಪರಿಣಾಮ ಬೀರುತ್ತದೆ. ಆದರೆ, ಒಂದೇ ಸಲಕ್ಕೆ ಎಲ್ಲಾ ಭಾಗಗಳಲ್ಲಿಯೂ ಕಾಣಿಸಿಕೊಳ್ಳುವುದಿಲ್ಲ ಬದಲಿಗೆ ಒಂದಾದ ಮೇಲೆ ಇನ್ನೊಂದು ಅಂಗದ ಮೇಲೆ ಬೇರೆ ಬೇರೆ ರೀತಿಯ ಪರಿಣಾಮವನ್ನು ತೋರಿಸಿ ಕೊಡುತ್ತದೆ.
• ಈ ವೈರಾಣುವನ್ನು ಯಾರಿಂದಲೂ ಸುಲಭವಾಗಿ ಪತ್ತೆ ಹಚ್ಚಲು ಸಾಧ್ಯವಾಗದ ಕಾರಣ ಇದು ತನ್ನ ವ್ಯಾಪ್ತಿಯನ್ನು ಹೆಚ್ಚಿಸಿಕೊಳ್ಳುತ್ತಾ ಹೋಗುತ್ತದೆ. ಉಸಿರಾಟದ ಸಮಸ್ಯೆ ಮುಂದುವರೆಯುತ್ತದೆ. ಇದರಿಂದಾಗಿ ನೀವು ಎಕ್ಸಸೈಸ್ ಮಾಡುವುದಕ್ಕೂ ಕಷ್ಟವಾಗುತ್ತದೆ.
• ಇದರ ಜೊತೆಗೆ ಇನ್ನೂ ಕೆಲವರಲ್ಲಿ ಈ ಲಾಂಗ್ ಕೊರೋನಾ ಹೃದಯ (Heart) ಸಂಬಂಧಿ ಕಾಯಿಲೆಯನ್ನು ಕೂಡ ಉಂಟುಮಾಡಿದೆ ಎಂಬ ವಿಷಯ ಸಾಬೀತಾಗಿದೆ.

ಲಾಂಗ್ ಕೋವಿಡ್ ಆತಂಕಕಾರಿ (Dangerous) ಲಕ್ಷಣಗಳು

ಮೇಲ್ನೋಟಕ್ಕೆ ಶ್ವಾಸಕೋಶಕ್ಕೆ ಸಂಬಂಧಪಟ್ಟ ಕಾಯಿಲೆಯಂತೆ ಇದು ಕಾಣಿಸಿಕೊಂಡರೂ ಹೃದಯನಾಳದ ಪ್ರತಿ ಭಾಗವನ್ನು ವ್ಯವಸ್ಥಿತವಾಗಿ ಈ ವೈರಾಣು ನಾಶ ಮಾಡುವ ಶಕ್ತಿ ಹೊಂದಿದೆ. ಇದು ಹೃದಯದಲ್ಲಿ ಸೇರಿಕೊಳ್ಳುವುದರಿಂದ ದೇಹದ ಪ್ರತಿಯೊಂದು ಭಾಗದ ಮೇಲೆ ಕೂಡ ಈ ವೈರಾಣುವಿನ ಪರಿಣಾಮ ಕಾಣಿಸಿಕೊಳ್ಳುತ್ತದೆ.

ಈ ಎಲ್ಲ ಮಾಹಿತಿಗಳನ್ನು WHO ಗೆ ಸಂಬಂಧಪಟ್ಟ ವೈದ್ಯಾಧಿಕಾರಿಗಳು ತಿಳಿಸಿದ್ದಾರೆ. ಲಾಂಗ್ ಕೋವಿಡ್ ಕುರಿತಾಗಿ ಇನ್ನೂ ಹೆಚ್ಚಿನ ಸಂಶೋಧನೆಯ ಅಗತ್ಯವಿದೆ ಎಂಬುದು ಸಂಶೋಧಕರು ಹೇಳುವ ಮಾತು. ಯಾವುದಕ್ಕೂ ಆರೋಗ್ಯದ ವಿಷಯದಲ್ಲಿ ಮುನ್ನೆಚ್ಚರಿಕೆ ತೆಗೆದುಕೊಳ್ಳುವುದು ಹಾಗೂ ದೇಹದ ಬದಲಾವಣೆಗಳ ಬಗ್ಗೆ ಗಮನಿಸುತ್ತಿರುವುದು ಉತ್ತಮ ಎನ್ನುತ್ತಾರೆ ಸಂಶೋಧಕರು.