Constipation in Kids: ಮಲಬದ್ಧತೆಯಿರುವ ಮಕ್ಕಳಿಗೆ ಈ ಪ್ಯೂರಿ ತಿನ್ನಿಸಿ, ಯಾವುದೇ ತೊಂದರೆಯಿಲ್ಲದೆ ಸ್ವಚ್ಛವಾಗುತ್ತೆ ಹೊಟ್ಟೆ  

ಮಕ್ಕಳಲ್ಲಿ ಮಲಬದ್ಧತೆ ಸಾಮಾನ್ಯ ಸಮಸ್ಯೆಯಾಗಿದ್ದು, ಹೊಟ್ಟೆ ನೋವು ಮತ್ತು ಅಸ್ವಸ್ಥತೆಗೆ ಕಾರಣವಾಗಬಹುದು. ಓಟ್ಸ್ ಮತ್ತು ಒಣದ್ರಾಕ್ಷಿಗಳಿಂದ ತಯಾರಿಸಿದ ಪ್ಯೂರಿಯು ಮಕ್ಕಳಿಗೆ ನೈಸರ್ಗಿಕ ಪರಿಹಾರವನ್ನು ನೀಡುತ್ತದೆ, ಮಲವನ್ನು ಮೃದುಗೊಳಿಸುತ್ತದೆ ಮತ್ತು ಕರುಳಿನ ಚಲನೆಯನ್ನು ಸುಧಾರಿಸುತ್ತದೆ.

ಮಲಬದ್ಧತೆಯಿಂದ ಬಳಲುತ್ತಿರುವ ಮಕ್ಕಳಿಗೆ ಏನು ತಿನ್ನಿಸಬೇಕು ಎಂದು ಚಿಂತೆಯಾಗುತ್ತಿದೆಯಾ?, ಈ ಎರಡು ಪದಾರ್ಥಗಳನ್ನು ತಿನ್ನಿಸುವುದರಿಂದ ಮಗುವಿನ ಹೊಟ್ಟೆ ಯಾವುದೇ ತೊಂದರೆಯಿಲ್ಲದೆ ಸ್ವಚ್ಛವಾಗುತ್ತದೆ ಮತ್ತು ನೋವು ನಿವಾರಣೆಯಾಗುತ್ತದೆ ಎಂದು ವೈದ್ಯರು ಹೇಳಿರುವ ವಿಡಿಯೋ ಈಗ ವೈರಲ್ ಆಗಿದೆ. ಮಕ್ಕಳ ಜೀರ್ಣಾಂಗ ವ್ಯವಸ್ಥೆಯು ಸೂಕ್ಷ್ಮವಾಗಿರುತ್ತದೆ, ಇದರಿಂದಾಗಿ ತಿನ್ನುವಲ್ಲಿ ಸ್ವಲ್ಪ ತೊಂದರೆಯಾದರೂ ಮಲಬದ್ಧತೆಗೆ ಕಾರಣವಾಗಬಹುದು. ಆದ್ದರಿಂದ ಮಲಬದ್ಧತೆಯಿಂದ ಪರಿಹಾರ ಪಡೆಯಲು ಮಕ್ಕಳ ವೈದ್ಯರು ಸುಲಭವಾದ ಪರಿಹಾರವನ್ನು ಸೂಚಿಸಿದ್ದಾರೆ.   

ಮಲಬದ್ಧತೆಯ ಸಮಸ್ಯೆ ವಯಸ್ಕರಲ್ಲಿ ಮಾತ್ರವಲ್ಲ, ಈಗೀಗ ಚಿಕ್ಕ ಮಕ್ಕಳಲ್ಲಿಯೂ ಸಾಮಾನ್ಯವಾಗಿದೆ. ಮಕ್ಕಳು ಮಲಬದ್ಧತೆಯಿಂದ ಬಳಲುತ್ತಿದ್ದಾರೆಂದರೆ ಅವರ ಹೊಟ್ಟೆ ಕ್ಲೀನ್ ಆಗಿರುವುದಿಲ್ಲ. ಇದರಿಂದಾಗಿ ಅವರು ಹೊಟ್ಟೆ ನೋವು, ಸೆಳೆತ, ಗ್ಯಾಸ್, ಎದೆಯುರಿ ಮುಂತಾದ ಸಮಸ್ಯೆಗಳನ್ನು ಎದುರಿಸುತ್ತಾರೆ. ಇದಲ್ಲದೆ, ಮಲವಿಸರ್ಜನೆ  ಸರಿಯಾಗಿ ಆಗದಿದ್ದರೆ ಮಗು ಕಿರಿಕಿರಿಗೊಳ್ಳುತ್ತದೆ ಮತ್ತು ಸರಿಯಾಗಿ ತಿನ್ನಲು ಅಥವಾ ಕುಡಿಯಲು ಸಾಧ್ಯವಾಗುವುದಿಲ್ಲ. ನಿಮ್ಮ ಮಗುವೂ ಇಂತಹ ಸಮಸ್ಯೆಯನ್ನು ಎದುರಿಸುತ್ತಿದ್ದರೆ, ಈ ಲೇಖನ ನಿಮಗೆ ಸಹಾಯಕವಾಗಬಹುದು. ಹೌದು, ಮಲಬದ್ಧತೆಯಿಂದ ಮಕ್ಕಳಿಗೆ ತ್ವರಿತ ಪರಿಹಾರವನ್ನು ಹೇಗೆ ಒದಗಿಸುವುದು ಮತ್ತು ಇಂತಹ ಸ್ಥಿತಿಯಲ್ಲಿ ಯಾವ ವಿಷಯಗಳಿಗೆ ಗಮನ ಕೊಡುವುದು ಮುಖ್ಯ ಎಂಬುದನ್ನು ಮಕ್ಕಳ ವೈದ್ಯರೇ ತಿಳಿಸಿದ್ದಾರೆ ನೋಡಿ... 

ತಜ್ಞರು ಏನು ಹೇಳುತ್ತಾರೆ?
ಈ ವಿಷಯಕ್ಕೆ ಸಂಬಂಧಿಸಿದಂತೆ ಪ್ರಸಿದ್ಧ ಶಿಶುವೈದ್ಯ ಸಂದೀಪ್ ಗುಪ್ತಾ ತಮ್ಮ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ವಿಡಿಯೋ ಹಂಚಿಕೊಂಡಿದ್ದಾರೆ. ಈ ವಿಡಿಯೋದಲ್ಲಿ, ಮಲಬದ್ಧತೆ ಉಂಟಾದರೆ ನೀವು ಮನೆಯಲ್ಲಿಯೇ ವಿಶೇಷವಾದ ವಸ್ತುವನ್ನು ತಯಾರಿಸಿ ನಿಮ್ಮ ಮಕ್ಕಳಿಗೆ ತಿನ್ನಿಸಬಹುದು ಎಂದು ವೈದ್ಯರು ವಿವರಿಸುತ್ತಾರೆ. ಈ ವಿಶೇಷ ವಸ್ತು ಬೇರಾವುದೋ ಅಲ್ಲ, ಓಟ್ಸ್ ಮತ್ತು ಒಣದ್ರಾಕ್ಷಿಗಳ ಪ್ಯೂರಿ. ವೈದ್ಯರ ಪ್ರಕಾರ, ಈ ಪ್ಯೂರಿ ಮಕ್ಕಳಿಗೆ ಅತ್ಯುತ್ತಮವಾದ ನೈಸರ್ಗಿಕ ಪರಿಹಾರವಾಗಿದೆ.    

ಪ್ಯೂರಿ ಮಾಡುವುದು ಹೇಗೆ? 
ಇದಕ್ಕಾಗಿ, ಮೊದಲು ಓಟ್ಸ್ ಅನ್ನು ಚೆನ್ನಾಗಿ ಹುರಿಯಿರಿ.
ಈಗ ಅರ್ಧ ಕಪ್ ಓಟ್ಸ್ ಅನ್ನು ನೀರಿನಲ್ಲಿ ಕುದಿಸಿ.
2-3 ಒಣದ್ರಾಕ್ಷಿಗಳನ್ನು ರಾತ್ರಿಯಿಡೀ ನೆನೆಸಿ. ಬೆಳಗ್ಗೆ ಚೆನ್ನಾಗಿ ಪೇಸ್ಟ್ ಮಾಡಿ. 
ಈ ಪೇಸ್ಟ್ ಅನ್ನು ಬೇಯಿಸಿದ ಓಟ್ಸ್ ಗೆ ಹಾಕಿ ಮಿಶ್ರಣ ಮಾಡಿ.
ಹೀಗೆ ಮಾಡುವುದರಿಂದ ನಿಮ್ಮ ಪ್ಯೂರಿ ಸಿದ್ಧವಾಗುತ್ತದೆ. ಇದನ್ನು ಸ್ವಲ್ಪ ಬಿಸಿ ಮಾಡುವ ಮೂಲಕ ಮಕ್ಕಳಿಗೆ ತಿನ್ನಿಸಬಹುದು.

ಇದು ಮಕ್ಕಳಿಗೆ ಹೇಗೆ ಪ್ರಯೋಜನಕಾರಿ?   
ಈ ಪ್ರಶ್ನೆಗೆ ಉತ್ತರಿಸುತ್ತಾ ಡಾ. ಗುಪ್ತಾ, ಓಟ್ಸ್ ಮಲವನ್ನು ಮೃದುಗೊಳಿಸುವ ಕರಗುವ ಫೈಬರ್ ಅನ್ನು ಹೊಂದಿರುತ್ತದೆ, ಆದರೆ ಒಣದ್ರಾಕ್ಷಿಗಳು ಕರುಳಿನ ಚಲನೆಯನ್ನು ಸುಧಾರಿಸುವ ನೈಸರ್ಗಿಕ ವಿರೇಚಕ ಗುಣಗಳನ್ನು ಹೊಂದಿವೆ. ಈ ರೀತಿಯಾಗಿ, ಈ ಎರಡನ್ನೂ ಒಟ್ಟಿಗೆ ತಿನ್ನುವುದರಿಂದ, ಕರುಳಿನ ಚಲನೆ ಸುಲಭವಾಗುತ್ತದೆ ಮತ್ತು ಮಲಬದ್ಧತೆಯಿಂದ ತ್ವರಿತವಾಗಿ ಪರಿಹಾರ ಸಿಗುತ್ತದೆ ಎಂದು ತಿಳಿಸಿದ್ದಾರೆ. 

ಓಟ್ಸ್ ಸುಲಭವಾಗಿ ಜೀರ್ಣವಾಗುವ ಆಹಾರವಾಗಿದ್ದು, ಇದು ಹೊಟ್ಟೆಯನ್ನು ಆರೋಗ್ಯವಾಗಿಡಲು ಬಹಳ ಪ್ರಯೋಜನಕಾರಿಯಾಗಿದೆ. ಓಟ್ಸ್ ಅನೇಕ ಪ್ರಯೋಜನಗಳನ್ನು ಹೊಂದಿದೆ. ಇದು ರುಚಿಕರ ಮಾತ್ರವಲ್ಲ, ನಮ್ಮ ಆರೋಗ್ಯಕ್ಕೂ ತುಂಬಾ ಪ್ರಯೋಜನಕಾರಿ. ಇನ್ನು ನೆನೆಸಿದ ಒಣದ್ರಾಕ್ಷಿಯಲ್ಲಿ ಹೆಚ್ಚಿನ ಫೈಬರ್ ಅಂಶ ಇರುತ್ತದೆ. ಇದನ್ನು ಪ್ರತಿದಿನ ಸೇವಿಸುವುದರಿಂದ ಜೀರ್ಣಾಂಗ ವ್ಯವಸ್ಥೆ ಬಲಗೊಳ್ಳುತ್ತದೆ. 

ಈ ವಿಷಯಗಳನ್ನು ನೆನಪಿನಲ್ಲಿಡಿ...
ವೈದ್ಯರ ಸಲಹೆ ಪಡೆಯದೆ 6 ತಿಂಗಳಿಗಿಂತ ಕಡಿಮೆ ವಯಸ್ಸಿನ ಮಕ್ಕಳಿಗೆ ಏನನ್ನೂ ನೀಡಬೇಡಿ.
ಮಗುವು ನಿರಂತರವಾಗಿ ಮಲಬದ್ಧತೆಯಿಂದ ಬಳಲುತ್ತಿದ್ದರೆ, ಒಮ್ಮೆ ವೈದ್ಯರನ್ನು ಸಂಪರ್ಕಿಸುವುದು ಮುಖ್ಯ.