ಮೊದಲ ಬಾರಿ ಕಾಂಚೀಪುರಂ ಸೀರೆ ಖರೀದಿಸ್ತಿದ್ದೀರಾ ಈ ವಿಚಾರ ನೆನಪಿನಲ್ಲಿರಲಿ

ಅಸಲಿ ಕಾಂಚೀಪುರಂ ಸೀರೆಯನ್ನು ಗುರುತಿಸುವುದು ಹೇಗೆ, ಅದರ ವಿಶೇಷತೆಗಳು, ನೇಯ್ಗೆ ವಿಧಾನಗಳು, ಜರಿ ಗುಣಮಟ್ಟ, ಬಣ್ಣ ಆಯ್ಕೆ ಮತ್ತು ಖರೀದಿ ಮಾಡುವಾಗ ಗಮನಿಸಬೇಕಾದ ಅಂಶಗಳ ಬಗ್ಗೆ ಇಲ್ಲಿದೆ ಮಾಹಿತಿ

ಅಸಲಿ ಪಟ್ಟು

ಕಾಂಚೀಪುರಂ ಸೀರೆ ಅಂದ್ರೆ ಬರೀ ಬಟ್ಟೆ ಅಲ್ಲ, ಅದು ನಮ್ಮ ಪರಂಪರೆ, ಕಲೆ, ಸಂಸ್ಕೃತಿಯ ಪ್ರತೀಕ. ಪ್ರತಿ ಹೆಣ್ಣು ಮಗಳಿಗೂ ತನ್ನ ಬಳಿಯೂ ಒಂದು ಕಾಂಚೀಪುರಂ ಸೀರೆ ಇರಲೇಬೇಕು ಅನ್ನೋ ಆಸೆ ಇರುತ್ತೆ. ಕಾಂಚೀಪುರಂ ಸೀರೆ ಖರೀದಿಸುವಾಗ ನೀವು ಕೆಲವು ವಿಚಾರಗಳನ್ನು ಗಮನದಲ್ಲಿಡಬೇಕು.

ಕಾಂಚೀಪುರಂ ಸೀರೆಯ ಮುಖ್ಯ ಅಂಶ ಅಂದ್ರೆ ಅದರ ಪಟ್ಟು(ಝರಿ) ಅಸಲಿ ಕಾಂಚೀಪುರಂ ಸೀರೆಗಳು 100% ಶುದ್ಧ ಮಲ್ಬೆರಿ ರೇಷ್ಮೆಯಿಂದ ನೇಯ್ದಿರುತ್ತವೆ. ಮೆತ್ತಗೆ, ನೈಸರ್ಗಿಕ ಹೊಳಪಿನಿಂದ ಕೂಡಿರುತ್ತೆ. ಒಂದು ಸಣ್ಣ ದಾರ ತೆಗೆದು ಸುಟ್ಟರೆ ಕೂದಲು ಸುಟ್ಟ ವಾಸನೆ ಬರುತ್ತೆ, ಬೂದಿ ಆಗುತ್ತೆ. ಹಾಗೆ ಆಗಿಲ್ಲವೆಂದರೆ ಅದು ಅಸಲಿ ಪಟ್ಟು ಸೀರೆ ಅಲ್ಲ ಅಂತ ಅರ್ಥ.

ಹೀಗಾಗಿ ಕಾಂಚೀಪುರಂ ಸೀರೆ ಖರೀದಿಸುವಾಗ ಸಿಲ್ಕ್ ಮಾರ್ಕ್ ಲೇಬಲ್ ಇರೋ ಸೀರೆಗಳನ್ನ ತಗೊಳ್ಳಿ. ಇದು ಅಸಲಿ ಪಟ್ಟು ಸೀರೆ ಅನ್ನೋದಕ್ಕೆ ಗ್ಯಾರಂಟಿ.

ಕಾಂಚೀಪುರಂ ಸೀರೆಯ ಸೌಂದರ್ಯಕ್ಕೆ ಜರಿ ಮುಖ್ಯ ಕಾರಣ. ಇದು ಚಿನ್ನ ಬೆಳ್ಳಿ ದಾರಗಳಿಂದ ನೇಯ್ದಿರುತ್ತೆ. ಜರಿ ಗುಣಮಟ್ಟ ತಿಳ್ಕೊಳ್ಳೋದು ಮುಖ್ಯ:

ಕಾಂಚೀಪುರಂ ಸೀರೆಯಲ್ಲಿ ಅಸಲಿ ಜರಿ

ಅಸಲಿ ಕಾಂಚೀಪುರಂ ಸೀರೆಯಲ್ಲಿ ಅಸಲಿ ಜರಿ ಇರುತ್ತೆ. ಪಟ್ಟು ದಾರದಲ್ಲಿ ಬೆಳ್ಳಿ ಬಣ್ಣದ ಮೇಲೆ ಚಿನ್ನದ ಲೇಪನ ಇರುತ್ತೆ. ಇದು ಸ್ವಲ್ಪ ಮಂದ ಹೊಳಪಿನೊಂದಿಗೆ ಕಾಲಾನಂತರ ಬಣ್ಣ ಬದಲಾಗದೆ ಇರುತ್ತೆ. ಜರಿ ದಾರವನ್ನ ಉಜ್ಜಿದಾಗ ಉದುರಬಾರದು. ಉದುರಿದ್ರೆ ನಕಲಿ ಜರಿ ಆಗಿರಬಹುದು. ಕೆಲವು ಸೀರೆಗಳಲ್ಲಿ ಇಮಿಟೇಶನ್ ಜರಿ ಇರುತ್ತೆ. ಇದು ತಾಮ್ರದ ತಂತಿ ಮೇಲೆ ಚಿನ್ನದ ಲೇಪನ ಇದ್ದಂಗೆ ಇರುತ್ತೆ. ಇದು ಅಗ್ಗ, ಕಾಲಾನಂತರ ಬಣ್ಣ ಬದಲಾಗುತ್ತೆ. ನೋಡುವುದಕ್ಕೆ ಅತಿ ಹೊಳಪಿನಿಂದ ಕೂಡಿರುತ್ತೆ. ಸೀರೆಯ ಹಿಂಭಾಗದಲ್ಲಿ ಜರಿ ದಾರಗಳು ಸ್ಪಷ್ಟವಾಗಿ, ಅಚ್ಚುಕಟ್ಟಾಗಿರಬೇಕು.

ನೇಯ್ಗೆ ಮತ್ತು ವಿನ್ಯಾಸ

ಕಾಂಚೀಪುರಂ ಸೀರೆಯ ನೇಯ್ಗೆಯೇ ವಿಶಿಷ್ಟ. ಅಸಲಿ ಸೀರೆಯಲ್ಲಿ, ಸೀರೆಯ ಮೈ, ಪಲ್ಲು, ಬಾರ್ಡರ್ ಮೂರನ್ನೂ ಬೇರೆ ಬೇರೆ ನೇಯ್ದು ಜೋಡಿಸಿರುತ್ತಾರೆ. ಸೀರೆಯ ಒಳಭಾಗ ನೋಡಿದ್ರೆ ಗೊತ್ತಾಗುತ್ತೆ. "zig-zag" ರೇಖೆ ಇದ್ದಂಗೆ ಇರುತ್ತೆ. ಪಾರಂಪರಿಕ ಸೀರೆಗಳಲ್ಲಿ ಗೋಪುರ, ನವಿಲು, ಹಂಸ, ಆನೆ, ಚಕ್ರ, ರುದ್ರಾಕ್ಷಿ, ಹೂವುಗಳ ವಿನ್ಯಾಸ ಇರುತ್ತೆ. ಈಗ ಹೊಸ ವಿನ್ಯಾಸಗಳು ಸಿಗುತ್ತೆ. ಆದ್ರೆ ಮೊದಲ ಸೀರೆಗೆ ಪಾರಂಪರಿಕ ವಿನ್ಯಾಸವೇ ಚೆನ್ನ. ಸೀರೆಯ ಬಾರ್ಡರ್‌ನ್ನು ಅದರ ಮೈಗೆ ಗಟ್ಟಿಯಾಗಿ ಜೋಡಿಸಿರಬೇಕು. ಬಾರ್ಡರ್ ಸಡಿಲ ಇದ್ರೆ ಸೀರೆ ಬೇಗ ಹಾಳಾಗುತ್ತೆ.

ಕಾಂಚೀಪುರಂ ಸೀರೆಯ ನೇಯ್ಗೆ ವಿಧಾನ

ಕಾಂಚೀಪುರಂ ಸೀರೆಗಳಲ್ಲಿ ಬೇರೆ ಬೇರೆ ವಿಶೇಷ ವಿಧಗಳು ಮತ್ತು ನೇಯ್ಗೆ ವಿಧಾನಗಳಿವೆ. ಪ್ರತಿಯೊಂದೂ ವಿಶಿಷ್ಟ ಸೌಂದರ್ಯ ಮತ್ತು ನುಣುಪಾದ ಕೆಲಸವನ್ನು ಹೊಂದಿರುತ್ತದೆ.

ಕೋರ್ವಾಯ್: ಸೀರೆಯ ಮೈ, ಪಲ್ಲು ಮತ್ತು ಬಾರ್ಡರ್ ಅನ್ನು ಬೇರೆ ಬೇರೆ ಬಣ್ಣಗಳಲ್ಲಿ ನೇಯ್ದು, ನಂತರ ಕೈಮಗ್ಗದಲ್ಲಿ ಅಚ್ಚುಕಟ್ಟಾಗಿ ಜೋಡಿಸುವ ವಿಧಾನ. ಇದು ಕಾಂಚೀಪುರಂ ಸೀರೆಯ ವಿಶಿಷ್ಟ ಲಕ್ಷಣ.

ಕಾಂಚೀಪುರಂ ಸೀರೆಯ ಲಕ್ಷಣಗಳು

ಬೆಳ್ಳಿಪಟ್ಟು/ಜರಿ ಕೆಲಸ: ಪಲ್ಲು ಮತ್ತು ಬಾರ್ಡರ್‌ನಲ್ಲಿ ಚಿನ್ನದ ಜರಿ ಜೊತೆಗೆ ಬೆಳ್ಳಿ ಜರಿಯನ್ನು ಬಳಸಿರುತ್ತಾರೆ. ಇದು ಸೀರೆಗೆ ಹೊಳಪು ಮತ್ತು ಸೌಂದರ್ಯವನ್ನು ನೀಡುತ್ತದೆ.

ರುದ್ರಾಕ್ಷಿ ಬುಟ್ಟಾ: ರುದ್ರಾಕ್ಷಿ ಆಕಾರದ ವಿನ್ಯಾಸಗಳನ್ನು ಸೀರೆ ಉದ್ದಕ್ಕೂ ಅಥವಾ ಬಾರ್ಡರ್‌ನಲ್ಲಿ ನೇಯ್ದಿರುತ್ತಾರೆ. ಇದು ಪಾರಂಪರಿಕ ಮತ್ತು ಶುಭ ಸಂಕೇತ.

ಆಯಿರಂ ಬುಟ್ಟಾ: ಸೀರೆ ಉದ್ದಕ್ಕೂ ಸಾವಿರಾರು ಸಣ್ಣ ಬುಟ್ಟಾಗಳನ್ನು ನೇಯ್ದಿರುತ್ತಾರೆ. ಇದು ಸೀರೆಗೆ ಭವ್ಯವಾದ ನೋಟವನ್ನು ನೀಡುತ್ತದೆ.

ಬಣ್ಣ ಆಯ್ಕೆ:

ಬಣ್ಣ ಆಯ್ಕೆ ವೈಯಕ್ತಿಕ ಇಷ್ಟ. ಆದ್ರೆ ಮೊದಲ ಕಾಂಚೀಪುರಂ ಸೀರೆ ಖರೀದಿಸುವಾಗ ಸಾಮಾನ್ಯವಾಗಿ ಈ ವಿಷ್ಯಗಳನ್ನು ಗಮನಿಸಬಹುದು:

ನಿಮ್ಮ ಚರ್ಮದ ಬಣ್ಣಕ್ಕೆ ಹೊಂದುವ ಬಣ್ಣ ಆಯ್ಕೆ ಮಾಡಿ. ಮೆರೂನ್-ಚಿನ್ನ, ಕೆಂಪು-ಹಸಿರು, ನೀಲಿ-ಮೆರೂನ್ ಬಣ್ಣಗಳು ಯಾವಾಗಲೂ ಚೆನ್ನಾಗಿರುತ್ತೆ. ನೀವು ಯಾವ ಸಮಾರಂಭಕ್ಕೆ ಸೀರೆ ತಗೋಳ್ತಿದ್ದೀರಿ ಅನ್ನೋದನ್ನೂ ಗಮನಿಸಿ.

ತೂಕ ಮತ್ತು ಸೌಕರ್ಯ

ಕಾಂಚೀಪುರಂ ಸೀರೆಗಳು ಸಾಮಾನ್ಯವಾಗಿ ತೂಕದಲ್ಲಿ ಹೆಚ್ಚಿರುತ್ತವೆ. ಆದರೆ ತುಂಬಾ ತೂಕ ಇದ್ರೆ ನಕಲಿ ಆಗಿರಬಹುದು. ಶುದ್ಧ ಪಟ್ಟು ಸೀರೆಯೂ ತೂಕದಲ್ಲಿ ಹೆಚ್ಚಿರಬಹುದು. ನಿಮಗೆ ಅನುಕೂಲಕರವಾದ ತೂಕದ ಸೀರೆ ಆಯ್ಕೆ ಮಾಡಿ. ಸೀರೆ ಉಟ್ಟು ನೋಡಿ, ಆರಾಮದಾಯಕವಾಗಿದೆಯ ಅಂತ ಖಚಿತಪಡಿಸಿಕೊಳ್ಳಿ.

ನಂಬಿಕಸ್ತ ಅಂಗಡಿಗಳಿಂದ ಖರೀದಿಸಿ

ಕಾಂಚೀಪುರಂ ಸೀರೆಗಳ ಬೆಲೆ ಪಟ್ಟು ಗುಣಮಟ್ಟ, ಜರಿ ಪ್ರಮಾಣ ಮತ್ತು ಗುಣಮಟ್ಟ, ನೇಯ್ಗೆ ಮತ್ತು ವಿನ್ಯಾಸವನ್ನು ಅವಲಂಬಿಸಿರುತ್ತದೆ. ತುಂಬಾ ಕಡಿಮೆ ಬೆಲೆಯ ಸೀರೆಗಳ ಬಗ್ಗೆ ಎಚ್ಚರವಿರಲಿ. ಕಾಂಚೀಪುರಂ ಸೀರೆಯನ್ನು ನೇರವಾಗಿ ಪ್ರಸಿದ್ಧ, ನಂಬಿಕಸ್ತ ಅಂಗಡಿಗಳಿಂದ ಖರೀದಿಸಿ. ಅವರು ಗುಣಮಟ್ಟದ ಸೀರೆ ಮತ್ತು ಸಿಲ್ಕ್ ಮಾರ್ಕ್ ಪ್ರಮಾಣಪತ್ರ ನೀಡುತ್ತಾರೆ. ದೊಡ್ಡ ಬ್ರ್ಯಾಂಡ್ ಅಂಗಡಿಗಳು ಅಥವಾ ಹಲವು ವರ್ಷಗಳ ಅನುಭವ ಇರುವ ಅಂಗಡಿಗಳಿಂದ ಖರೀದಿಸುವುದು ಸುರಕ್ಷಿತ.

ಜೋಪಾನವಾಗಿ ರಕ್ಷಿಸಿ

ಕಾಂಚೀಪುರಂ ಸೀರೆಯನ್ನು ಡ್ರೈ ಕ್ಲೀನ್ ಮಾತ್ರ ಮಾಡಿಸಬೇಕು. ಸೀರೆಯನ್ನು ಚೆನ್ನಾಗಿ ಒಣಗಿಸಿ, ತೇವಾಂಶ ಇಲ್ಲದ ಜಾಗದಲ್ಲಿ ಇಡಿ. ಸಿಲ್ಕ್ ಮಾರ್ಕ್ ಸೀರೆಗಳ ಜೊತೆ ಸಿಲ್ಕ್ ಮಾರ್ಕ್ ಗುರುತಿನ ಚೀಟಿ ಸಿಗುತ್ತೆ. ಅದರಲ್ಲಿ ಅದರ ಪಾಲನೆ ಬಗ್ಗೆ ಮಾಹಿತಿ ಇರುತ್ತೆ. ಅದನ್ನು ಪಾಲಿಸಿ.

ನಿಮ್ಮ ಮೊದಲ ಕಾಂಚೀಪುರಂ ಸೀರೆ ಒಂದು ಬಂಡವಾಳದಂತೆ. ಮೇಲಿನ ಮಾಹಿತಿಗಳನ್ನು ಗಮನದಲ್ಲಿಟ್ಟುಕೊಂಡು ಸೀರೆ ಖರೀದಿಸಿದರೆ, ಸುಂದರ, ಗುಣಮಟ್ಟದ ಮತ್ತು ಬಾಳಿಕೆ ಬರುವ ಸೀರೆ ಸಿಗುತ್ತೆ. ಇದು ನಿಮ್ಮ ಜೀವನದಲ್ಲಿ ಒಂದು ಅಮೂಲ್ಯ ವಸ್ತುವಾಗುತ್ತೆ.