ಎಂಜಿನಿಯರಿಂಗ್​ ಹುದ್ದೆ ತೊರೆದ 24ರ ಚೆಲುವೆ ಈಗ 45 ಕೋಟಿಗಳ ಒಡತಿ! ರೀಲ್ಸ್​ ರಾಣಿಯ ರೋಚಕ ಪಯಣ

ಅಪೂರ್ವ ಮುಖಿಜಾ ಎಂಬ ಓದಿನಲ್ಲಿ ಟಾಪ್ ಇದ್ದ ಎಂಜಿನಿಯರ್, ತನ್ನ ಶೈಕ್ಷಣಿಕ ಸಾಧನೆಗೆ ಮಾನ್ಯತೆ ಸಿಗದಿದ್ದಾಗ ಸೋಷಿಯಲ್ ಮೀಡಿಯಾ ಜಗತ್ತಿಗೆ ಕಾಲಿಟ್ಟರು. ಅರೆ-ಬರೆ ಉಡುಪಿನಲ್ಲಿ ರೀಲ್ಸ್ ಮಾಡಿ, ಟ್ರೋಲ್‌ಗಳ ಮೂಲಕವೇ ಪ್ರಸಿದ್ಧರಾಗಿ, ಇಂದು 45 ಕೋಟಿಗೂ ಹೆಚ್ಚು ಸಂಪಾದಿಸಿ ಕೋಟ್ಯಧಿಪತಿಯಾಗಿದ್ದಾರೆ.

ಸೋಷಿಯಲ್​ ಮೀಡಿಯಾದ ತಾಕತ್ತು

ಇಂದು ಸೋಷಿಯಲ್​ ಮೀಡಿಯಾದ ತಾಕತ್ತು ಎಲ್ಲರಿಗೂ ತಿಳಿದದ್ದೇ. ಅದರಲ್ಲಿಯೂ ರೀಲ್ಸ್​ ಮೂಲಕವೇ ಲಕ್ಷದಿಂದ ಕೋಟಿ ಕೋಟಿ ಸಂಪಾದನೆ ಮಾಡುವವರೂ ಇದ್ದಾರೆ. ಅದೃಷ್ಟವೊಂದು ಇದ್ದರೆ, ಸೋಷಿಯಲ್​ ಮೀಡಿಯಾ ಕೂಡ ಕೈಹಿಡಿದುಬಿಡುತ್ತದೆ. ಅಂಥದ್ದೇ ಒಂದು ಸ್ಟೋರಿ ಈ ಲೇಡಿ ಎಂಜಿನಿಯರ್​ದ್ದು.

ರೀಲ್ಸ್​ ಮೂಲಕವೇ 45 ಕೋಟಿ

ರೀಲ್ಸ್​ ಮೂಲಕವೇ 45 ಕೋಟಿ ರೂಪಾಯಿಗೂ ಹೆಚ್ಚಿನ ದುಡ್ಡು ಮಾಡಿರುವ 24 ವರ್ಷಗಳ ಯುವತಿಯ ಹೆಸರು ಅಪೂರ್ವ ಮುಖಿಜಾ. ಇವಳೀಗ ಸೋಷಿಯಲ್​ ಮೀಡಿಯಾದ ಇನ್​ಫ್ಲುಯೆನ್ಸರ್​. ಓದಿನಲ್ಲಿ ಟಾಪ್​ 1 ಇದ್ದಾಕೆ, ಉತ್ತಮ ಹುದ್ದೆ ಹೊಂದಿದರೂ, ಮಾನ್ಯತೆಯೇ ಸಿಕ್ಕಿಲ್ಲವೆಂದು ಇದೀಗ ರೀಲ್ಸ್​ ಪ್ರಪಂಚ ಹೊಕ್ಕು ಕೋಟ್ಯಧಿಪತಿಯಾಗಿದ್ದಾಳೆ!

ಅಸಾಧಾರಣ ಪ್ರತಿಭೆ

ಅಂದಹಾಗೆ, ಈಕೆಯದ್ದು ಅಸಾಧಾರಣ ಪ್ರತಿಭೆ. ಓದಿನಲ್ಲಿ ಜಾಣೆಯಾಗಿರುವ ಅಪೂರ್ವ, ರೀಲ್ಸ್​ಗೆ ಕಾಲಿಡುವ ಮೊದಲು ಭಾರತದ ಅತ್ಯಂತ ಕಠಿಣ ಎಂಜಿನಿಯರಿಂಗ್ ಪರೀಕ್ಷೆಯನ್ನು ಪಾಸ್ ಮಾಡಿದ್ದಾಳೆ. ಇದಕ್ಕಾಗಿ ಆಕೆ ದಿನಕ್ಕೆ 14 ಗಂಟೆಗಳ ಕಾಲ ಅಧ್ಯಯನ ಮಾಡಿದ್ದಾಳೆ. ಮನೆ, ಸ್ನೇಹಿತರು, ಸೋದರಸಂಬಂಧಿಗಳು, ನಿದ್ರೆ ಮತ್ತು ಈ ವಯಸ್ಸಿನಲ್ಲಿ ಬರುವ ಎಲ್ಲಾ ಕನಸುಗಳನ್ನೂ ತ್ಯಜಿಸಿದ್ದಾಳೆ.

ವಿವಿಧೆಡೆ ಉದ್ಯೋಗ

ಐಐಟಿಗೆ ಸೇರಿದ ಆರು ವರ್ಷಗಳವರೆಗೆ ಕೆಲಸವನ್ನೂ ಮಾಡಿದ್ದಾಳೆ. ಇಷ್ಟೆಲ್ಲಾ ಸಾಧನೆ ಮಾಡಿದರೂ ಈಕೆಯನ್ನು ಗುರುತಿಸಿದವರು ಕನಿಷ್ಠ ನೂರು ಮಂದಿಯೂ ಇಲ್ಲ ಎಂದು ಖುದ್ದು ಅಪೂರ್ವಳೇ ಹೇಳುತ್ತಾಳೆ. ಇಂಥದ್ದೊಂದು ಮಹತ್​ ಸಾಧನೆ ಮಾಡಿದಾಗ ಯಾರೂ ಕೇಳಲಿಲ್ಲ. ಈ ಬಗ್ಗೆ ಸೋಷಿಯಲ್​ ಮೀಡಿಯಾದಲ್ಲಿ ಹಾಕಿದರೂ ಬೆರಳೆಣಿಕೆ ಮಂದಿಯಷ್ಟೇ ಲೈಕ್​ ಮಾಡಿದರು. ನನ್ನ ಸಾಧನೆ ಬಗ್ಗೆ ಯಾರ ಬಾಯಲ್ಲಿಯೂ ಏನೂ ಬರಲಿಲ್ಲ, ಎಲ್ಲವೂ ಶೂನ್ಯವಾಗಿತ್ತು ಎಂದಿರೋ ಅಪೂರ್ವ ಕೊನೆಗೆ ಆಯ್ಕೆ ಮಾಡಿಕೊಂಡಿದ್ದು ಇದೇ ಸೋಷಿಯಲ್​ ಮೀಡಿಯಾ ಪ್ರಪಂಚವನ್ನು!

ಅರೆ-ಬರೆ ಡ್ರೆಸ್​

ಅರೆ-ಬರೆ ಡ್ರೆಸ್​ ಹಾಕಿಕೊಂಡು, ದೇಹ ಪ್ರದರ್ಶನ ಮಾಡುತ್ತಾ ರೀಲ್ಸ್​ ಮಾಡಿ ಲಕ್ಷಾಂತರ ಅಭಿಮಾನಿಗಳನ್ನು ಗಳಿಸಿದ್ದಾಳೆ ಈಕೆ. ಇವಳು ಸಾಧನೆ ಮಾಡಿದಾಗ ಇದೇ ಸೋಷಿಯಲ್​ ಮೀಡಿಯಾದಲ್ಲಿ ಪೋಸ್ಟ್​ ಮಾಡಿದಾಗಲೂ ಒಂದೇ ಒಂದು ಲೈಕ್​ ಒತ್ತದವರು ಇದೀಗ ಈಕೆಯ ಫಾಲೋವರ್ಸ್​. ಇವಳು ವಿಡಿಯೋ ಹಾಕಿದಾಗಲೆಲ್ಲಾ ಲೈಕ್​, ಕಮೆಂಟ್​ಗಳ ಸುರಿಮಳೆ.

ಟ್ರೋಲ್​ನಿಂದಲೇ ಫೇಮಸ್ಸು

ಟ್ರೋಲ್​ ಮಾಡುತ್ತಲೇ ಇವಳ ವಿಡಿಯೋ ಎಂಜಾಯ್​ ಮಾಡುವ ದೊಡ್ಡ ವರ್ಗವೇ ಇದೆ. ಫಾಲೋವರ್ಸ್​ ಸಂಖ್ಯೆ ಹೆಚ್ಚಾದಂತೆ ಸಹಜವಾಗಿ ಇವಳಿಗೆ ಬ್ರ್ಯಾಂಡ್ ಡೀಲ್‌ಗಳು, ಜಾಹೀರಾತುಗಳು ಬಂದಿವೆ. ಹಗಲು-ಇರುಳು ಓದಿ ಪರೀಕ್ಷೆ ಮಾಡಿದಾಗ ಸಿಗದ ಶ್ರೇಯಸ್ಸು, ಈಗ ಟ್ರೋಲ್​ನಿಂದಾಗಿ ಸಿಕ್ಕಿದೆ. ಇದೇ ಕಾರಣಕ್ಕೆ ಇಂಥವರನ್ನೇ ಹುಡುಕುವ ರಿಯಾಲಿಟಿ ಶೋಗಳಿಗೂ ಇವಳೇ ಬೇಕು. ಏನಿಲ್ಲವೆಂದರೂ ದಿನಕ್ಕೆ ಸುಮಾರು 2.5 ಲಕ್ಷ ರೂ. ಗಳಿಸುತ್ತಿದ್ದಾಳೆ ಈಕೆ!