ಇದೊಂದು ಟಿಕೆಟ್‌ ಇದ್ರೆ ಸಾಕು.. 56 ದಿನಗಳ ಕಾಲ ರೈಲಿನಲ್ಲಿ ಇಡೀ ಭಾರತವನ್ನು ಸುತ್ತಬಹುದು..ಇದನ್ನು ಬುಕ್‌ ಮಾಡೋದು ಹೇಗೆ?

ಭಾರತೀಯ ರೈಲ್ವೆಯಲ್ಲಿ ಇಂದು ವಿಶೇಷ ಸರ್ವೀಸ್‌ ಇದೆ. ಒದೇ ರೈಲು ಟಿಕೆಟ್‌ನೊಂದಿಗೆ 56 ದಿನಗಳವರೆಗೆ ಪ್ರಯಾಣಿಸಲು ನಿಮಗೆ ಅನುಕೂಲವಾಗುತ್ತದೆ. ಅಸಲಿಗೆ ಈ ಟಿಕೆಟ್ ಏನು, ಬೆಲೆ ಎಷ್ಟು, ಹೇಗೆ ಬುಕಿಂಗ್ ಮಾಡಿಕೊಳ್ಳುವುದು ಎಂಬ ವಿಧಾನವನ್ನು ಇಲ್ಲಿದೆ ನೋಡಿ..  

ಭಾರತೀಯ ರೈಲ್ವೆ ಪ್ರತಿದಿನ ಲಕ್ಷಾಂತರ ಪ್ರಯಾಣಿಕರನ್ನು ಅವರ ಗಮ್ಯಸ್ಥಾನಗಳಿಗೆ ಸಾಗಿಸುತ್ತಿದೆ. ಭಾರತೀಯ ರೈಲ್ವೆ ಪ್ರಯಾಣಿಕರಿಗೆ ಹಲವಾರು  ಸೌಲಭ್ಯಗಳನ್ನು ಕಲ್ಪಿಸುತ್ತಿದೆ. ಆದರೆ, ರೈಲ್ವೆ ಒದಗಿಸುವ ಹಲವು ಸೇವೆಗಳ ಬಗ್ಗೆ ಬಹಳಷ್ಟು ಪ್ರಯಾಣಿಕರಿಗೆ ತಿಳಿದಿಲ್ಲ. ಅದೇ ರೀತಿ, ಬಹಳ ಕಡಿಮೆ ಜನರಿಗೆ ಮಾತ್ರ ತಿಳಿದಿರುವ ಸೇವೆಗಳಲ್ಲಿ ಸರ್ಕ್ಯುಲರ್ ಜರ್ನಿ ಟಿಕೆಟ್ (Circular Journey Ticket) ಕೂಡ ಒಂದು.

ಭಾರತೀಯ ರೈಲ್ವೆ ವೆಬ್‌ಸೈಟ್‌ನಿಂದ ಪಡೆದ ಮಾಹಿತಿಯ ಪ್ರಕಾರ, ರೈಲ್ವೆ ಸರ್ಕ್ಯುಲರ್ ಜರ್ನಿ ಟಿಕೆಟ್ ಎಂಬ ವಿಶೇಷ ಟಿಕೆಟ್ ಅನ್ನು ನೀಡುತ್ತದೆ. ಈ ಟಿಕೆಟ್‌ನೊಂದಿಗೆ ರೈಲು ಪ್ರಯಾಣಿಕರು 8 ವಿವಿಧ ನಿಲ್ದಾಣಗಳಿಂದ ಒಂದು ಟಿಕೆಟ್‌ನಲ್ಲಿ 56 ದಿನಗಳವರೆಗೆ ಪ್ರಯಾಣಿಸಬಹುದು. ಈ ಅವಧಿಯಲ್ಲಿ ನೀವು ಹಲವಾರು ರೈಲುಗಳನ್ನು ಹತ್ತಬಹುದು. ಸಾಮಾನ್ಯವಾಗಿ ಯಾತ್ರಿಕರು ಅಥವಾ ಪ್ರವಾಸಿಗರು ಈ ರೈಲ್ವೆ ಟಿಕೆಟ್ ಸೌಲಭ್ಯವನ್ನು ಸದುಪಯೋಗಪಡಿಸಿಕೊಳ್ಳುತ್ತಾರೆ.

ನೀವು ವಿವಿಧ ನಿಲ್ದಾಣಗಳಲ್ಲಿ ಟಿಕೆಟ್‌ಗಳನ್ನು ಖರೀದಿಸಿದರೆ ಹೆಚ್ಚು  ಖರ್ಚಾಗುತ್ತದೆ. ಆದರೆ ಸರ್ಕ್ಯುಲರ್ ಜರ್ನಿ ಟಿಕೆಟ್‌ಗಳು 'ಟೆಲಿಸ್ಕೋಪ್ ಶುಲ್ಕ'ದ ಪ್ರಯೋಜನವನ್ನು ನೀಡುತ್ತವೆ, ಇದು ಸಾಮಾನ್ಯ ಪಾಯಿಂಟ್-ಟು-ಪಾಯಿಂಟ್ ಶುಲ್ಕಗಳಿಗಿಂತ ಕಡಿಮೆಯಾಗಿರುತ್ತದೆ. ಯಾವುದೇ ದರ್ಜೆಯಲ್ಲಿ ಪ್ರಯಾಣಿಸಲು ಸರ್ಕ್ಯುಲರ್ ಜರ್ನಿ ಟಿಕೆಟ್‌ಗಳನ್ನು ಖರೀದಿಸಬಹುದು.

ನೀವು ಉತ್ತರ ರೈಲ್ವೆಯಲ್ಲಿ ನವದೆಹಲಿಯಿಂದ ಕನ್ಯಾಕುಮಾರಿಗೆ ಒಂದು ಸರ್ಕ್ಯುಲರ್ ಜರ್ನಿ ಟಿಕೆಟ್ ಅನ್ನು ಬುಕ್ ಮಾಡಿದ್ದೀರಿ ಎಂದು ಭಾವಿಸೋಣ, ಆಗ ನಿಮ್ಮ ಪ್ರಯಾಣ ನವದೆಹಲಿಯಿಂದ ಪ್ರಾರಂಭವಾಗುತ್ತದೆ. ಮತ್ತೆ  ನವದೆಹಲಿಯಲ್ಲೇ ಕೊನೆಗೊಳ್ಳುತ್ತದೆ. ಮಥುರಾದಿಂದ ಮುಂಬೈ ಸೆಂಟ್ರಲ್, ಮರ್ಮಗೋವಾ, ಮೈಸೂರು, ಬೆಂಗಳೂರು ನಗರ, ಊಟಿ, ತಿರುವನಂತಪುರಂ ಸೆಂಟ್ರಲ್ ಮೂಲಕ ಕನ್ಯಾಕುಮಾರಿ ತಲುಪಿ ಮತ್ತೆ ಅದೇ ಮಾರ್ಗದಲ್ಲಿ ನವದೆಹಲಿಗೆ ತಲುಪಬೇಕು.

ಸರ್ಕ್ಯುಲರ್ ಜರ್ನಿ ಟಿಕೆಟ್  ಮಾನ್ಯತೆಯ ಅವಧಿ 56 ದಿನಗಳು. ರೌಂಡ್ ಟ್ರಿಪ್ ಟಿಕೆಟ್‌ಗಳನ್ನು ನೇರವಾಗಿ ಟಿಕೆಟ್ ಕೌಂಟರ್‌ನಿಂದ ಖರೀದಿಸಲು ಸಾಧ್ಯವಿಲ್ಲ. ಇದಕ್ಕಾಗಿ ಮೊದಲು ಅರ್ಜಿ ಸಲ್ಲಿಸಬೇಕು. ನೀವು ನಿಮ್ಮ ಪ್ರಯಾಣ ಮಾರ್ಗದ ಬಗ್ಗೆ ಮಾಹಿತಿಯನ್ನು ಕೆಲವು ಪ್ರಮುಖ ನಿಲ್ದಾಣಗಳಲ್ಲಿ ಅಥವಾ ನಿಲ್ದಾಣ ವ್ಯವಸ್ಥಾಪಕರೊಂದಿಗೆ ಹಂಚಿಕೊಳ್ಳಬೇಕು.