ಮಾಡಿಟ್ಟ ಚಪಾತಿ ಬೇಗ ಗಟ್ಟಿಯಾಗತ್ತಾ? ಹೆಚ್ಚಿನವರು ಮಾಡ್ತಿರೋ ನಾಲ್ಕು ತಪ್ಪು ತಿಳಿಸಿದ ಮಾಸ್ಟರ್​ಷೆಫ್​

ಚಪಾತಿ ತಣ್ಣಗಾದಾಗ ಗಟ್ಟಿಯಾಗಲು ಹಿಟ್ಟು ಕಲಸುವುದರಿಂದ ಹಿಡಿದು ಸಂಗ್ರಹಿಸುವವರೆಗೆ ಮಾಡುವ ನಾಲ್ಕು ಸಾಮಾನ್ಯ ತಪ್ಪುಗಳೇ ಕಾರಣ. ಬೆಚ್ಚಗಿನ ನೀರು ಬಳಸುವುದು, ಹಿಟ್ಟಿಗೆ ವಿಶ್ರಾಂತಿ ನೀಡುವುದು, ಸರಿಯಾದ ಉರಿಯಲ್ಲಿ ಬೇಯಿಸುವುದು ಚಪಾತಿಯನ್ನು ದೀರ್ಘಕಾಲ ಮೃದುವಾಗಿಡಬಹುದು ಎಂದು ಷೆಫ್​ ಸಲಹೆ ನೀಡುತ್ತಾರೆ.

ತಣ್ಣಗಾಗುತ್ತಿದ್ದಂತೆ ಚಪಾತಿ ಗಟ್ಟಿ

ಎಷ್ಟೋ ಸಂದರ್ಭಗಳಲ್ಲಿ ಚಪಾತಿ ಮಾಡಿಟ್ಟ ಕೆಲವೇ ಗಂಟೆಗಳಲ್ಲಿ ಅದು ತಣ್ಣಗಾಗುತ್ತಿದ್ದಂತೆಯೇ ಗಟ್ಟಿಯಾಗಿಬಿಡುತ್ತದೆ. ಇದಕ್ಕೆ ಕಾರಣ ಏನು ಗೊತ್ತಾ? ನೀವು ಮಾಡ್ತಿರೋ ನಾಲ್ಕು ತಪ್ಪುಗಳೇ ಇದಕ್ಕೆ ಕಾರಣ ಎನ್ನುತ್ತಾರೆ ಮಾಸ್ಟರ್​ಷೆಫ್​ ಮೊಬಾಸಿರ್​ ಹಾಸನ್​.

ನಾಲ್ಕು ತಪ್ಪುಗಳಿಂದ ಹೀಗಾಗತ್ತೆ

ಹಾಗಿದ್ದರೆ ಆ ನಾಲ್ಕು ತಪ್ಪುಗಳು ಯಾವುದು ಎಂದು ನೋಡೋಣ. ಇದು ಶುರುವಾಗುವುದು ಹಿಟ್ಟು ಕಲಸುವುದರಿಂದಲೇ. ಅಲ್ಲಿಂದ ಆಗುವ ತಪ್ಪು ಪ್ರತಿ ಹೆಜ್ಜೆಯಲ್ಲಿಯೂ ಆಗುತ್ತಿದೆ.ಆದರೆ ಸಾಧಾರಣವಾಗಿ ಈ ತಪ್ಪು ಎಷ್ಟೋ ಮಂದಿಗೆ ತಿಳಿದೇ ಇರುವುದಿಲ್ಲ.

ತಪ್ಪು 1: ಕಲಸುವಾಗ ತಣ್ಣೀರು ಹಾಕುವುದು

ಮೊದಲನೆಯ ತಪ್ಪು ಎಂದರೆ, ಹಿಟ್ಟನ್ನು ಕಲಸುವಾಗ ತಣ್ಣೀರು ಹಾಕುವುದು. ಮೊಬಾಸಿರ್​ ಹಾಸನ್​ ಅವರು ಹೇಳುವ ಪ್ರಕಾರ, ಹಿಟ್ಟನ್ನು ತಣ್ಣೀರಿನಲ್ಲಿ ಕಲಸಬಾರದು, ಬದಲಿಗೆ ಸ್ವಲ್ಪ ಬೆಚ್ಚಗಿನ ನೀರಿನಲ್ಲಿ ಕಲಸಬೇಕು. ಇದರಿಂದ ಮಾಯಿಸ್ಟರೈಸರ್​ ಚೆನ್ನಾಗಿ ಉಳಿಯುತ್ತದೆ. ದೀರ್ಘಕಾಲ ಚಪಾತಿ ಸಾಫ್ಟ್​ ಆಗಿಯೇ ಇರುತ್ತದೆ.

ತಪ್ಪು 2: ತಕ್ಷಣವೇ ಚಪಾತಿ ಮಾಡುವುದು

ಎರಡನೆಯ ತಪ್ಪು, ಹಿಟ್ಟನ್ನು ಕಲಸಿದ ತಕ್ಷಣವೇ ಚಪಾತಿ ಮಾಡುವುದು. ಇದು ತಪ್ಪು. ಹಿಟ್ಟನ್ನು ಕಲಸಿ ಕನಿಷ್ಠ 15 ನಿಮಿಷಗಳವರೆಗೆ ರೆಸ್ಟ್​ ಕೊಡಬೇಕು. ಅದರ ಮೇಲೆ ಒಂದು ಬಟ್ಟೆ ಮುಚ್ಚಿಟ್ಟರೆ ಚಪಾತಿ ದೀರ್ಘಕಾಲ ಸಾಫ್ಟ್​ ಆಗಿರುತ್ತದೆ.

ತಪ್ಪು 3: ಅತಿ ಕಡಿಮೆ ಹೀಟ್​ನಲ್ಲಿ ಬೇಯಿಸುವುದು

ಚಪಾತಿ ಮಾಡುವಾಗ ಅತಿ ಕಡಿಮೆ ಹೀಟ್​ನಲ್ಲಿ ಬೇಯಿಸುವುದು. ಈ ಸಂದರ್ಭದಲ್ಲಿ ಚಪಾತಿಯಲ್ಲಿನ ನೀರಿನಾಂಶವೆಲ್ಲಾ ನಿಧಾನವಾಗಿ ಹೀರುವುದರಿಂದ ಚಪಾತಿ ಗಟ್ಟಿಯಾಗುತ್ತದೆ. ಆದ್ದರಿಂದ ಅದನ್ನು ಮೀಡಿಯಂ ಹೈ ಹೀಟ್​ನಲ್ಲಿ ಬೇಯಿಸಬೇಕು.

ತಪ್ಪು 4: ನೇರವಾಗಿ ಡಬ್ಬದಲ್ಲಿ ಹಾಕುವುದು

ಕೊನೆಯದಾಗಿ ಚಪಾತಿಯನ್ನು ನೇರವಾಗಿ ಡಬ್ಬದಲ್ಲಿ ಹಾಕುವುದು. ಇದು ಸರಿಯಲ್ಲ. ಅದರ ಬದಲು ಒಂದು ಕಾಟನ್​ ಬಟ್ಟೆ ಹಾಕಿ ಅದರಲ್ಲಿ ಚಪಾತಿ ಇಟ್ಟು ಮುಚ್ಚಬೇಕು ಎನ್ನುವುದು ಮಾಸ್ಟರ್​ಷೆಫ್​ ಸಲಹೆ.