ಹೊಟ್ಟೆ ಮೇಲೆ ಮಲಗೋದ್ರಿಂದ ಹೃದಯಾಘಾತ ಅಪಾಯ ಹೆಚ್ಚಾಗುತ್ತಾ?

ಕೆಲವರು ಬೆನ್ನಿನ ಮೇಲೆ ಮಲಗಲು ಇಷ್ಟಪಡುತ್ತಾರೆ, ಆದರೆ ಕೆಲವರಿಗೆ ಹೊಟ್ಟೆಯ ಮೇಲೆ ಮಲಗೋದು ತುಂಬಾನೆ ಆರಾಮ ಅನಿಸುತ್ತೆ. ಹೊಟ್ಟೆಯ ಮೇಲೆ ಮಲಗೋದು ಹೃದಯದ ಆರೋಗ್ಯಕ್ಕೆ ಅಪಾಯಕಾರಿಯೇ ಅನ್ನೋದನ್ನ ತಿಳಿಯಿರಿ.   

ತುಂಬಾ ದಣಿದು ಬಂದಾಗ, ಒಂದ್ಸಲ ಮಲಗಿದ್ರೆ ಸಾಕು ಅಂದ್ಕೊಳ್ತೀವಿ. ಹೀಗೆ ಮಲ್ಗೋವಾಗ ನಾವು ಹೇಗೆ ಮಲ್ಕೊಂಡಿದ್ದೀವಿ, ಅನ್ನೋದು ನಮಗೆ ಗೊತ್ತೇ ಆಗೋದಿಲ್ಲ. ನೇರವಾಗಿ, ತಲೆಕೆಳಗಾಗಿ, ವಕ್ರವಾಗಿ, ಮುಖ ಕೆಳಗೆ ಮಾಡಿ ಹೀಗೆ ಹೇಗೇಗೋ ಮಲಗ್ತೀರಿ. ಕೆಲವರು ಬೆನ್ನಿನ ಮೇಲೆ ಮಲಗಲು ಇಷ್ಟಪಡುತ್ತಾರೆ, ಆದರೆ ಇನ್ನೂ ಕೆಲವರು ಹೊಟ್ಟೆಯ ಮೇಲೆ ಮಲಗೋದು ಹೆಚ್ಚು ಆರಾಮ ಅನಿಸುತ್ತೆ. ಆದರೆ ಈ ದಿನಗಳಲ್ಲಿ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗುತ್ತಿರುವ ವೀಡಿಯೊದಲ್ಲಿ, ಹೊಟ್ಟೆಯ ಮೇಲೆ ಮಲಗೋದ್ರಿಂದ ಹೃದಯಾಘಾತದ (heart attack) ಸಾಧ್ಯತೆ ಹೆಚ್ಚಿದೆ ಅನ್ನೋ ವಿಡಿಯೋ ವೈರಲ್ ಆಗ್ತಿದೆ. ಆದ್ರೆ ಇದು ನಿಜವೇ? ತಜ್ಞರು ಏನು ಹೇಳ್ತಾಳೆ. 

ತಜ್ಞರು ಹೇಳುವಂತೆ ಹೊಟ್ಟೆಯ ಮೇಲೆ ಮಲಗುವುದರಿಂದ ದೇಹಕ್ಕೆ ಅನೇಕ ರೀತಿಯಲ್ಲಿ ಹಾನಿಯಾಗುತ್ತದೆ. ಇದು ಇನ್ನೂ ಅನೇಕ ಸಮಸ್ಯೆಗಳನ್ನು ಉಂಟುಮಾಡಬಹುದು. ಇದರ ಅತಿದೊಡ್ಡ ಹಾನಿ ಬೆನ್ನುಹುರಿಗೆ (spinal cord) ಉಂಟಾಗುತ್ತೆ. ಅದರ ರಚನೆ ಬದಲಾಗಲು ಪ್ರಾರಂಭಿಸುತ್ತದೆ. ಇದಲ್ಲದೆ, ಭುಜಗಳು ಮತ್ತು ಕುತ್ತಿಗೆಯಲ್ಲಿ ನೋವಿನ ಕಾರಣವೂ ಆಗಬಹುದು. ವಿಶೇಷವಾಗಿ ಗರ್ಭಿಣಿಯರು ಈ ಭಂಗಿಯಲ್ಲಿ ಮಲಗಬಾರದು.

ಹೊಟ್ಟೆಯ ಮೇಲೆ ಮಲಗುವುದು ಹೃದಯದ ಆರೋಗ್ಯಕ್ಕೆ ಅಪಾಯಕಾರಿಯೇ?  
ಹೊಟ್ಟೆಯ ಮೇಲೆ ಮಲಗೋದು(sleeping on stomach) ಹೃದಯಾಘಾತದ ಅಪಾಯವನ್ನು ಹೆಚ್ಚಿಸುತ್ತದೆ ಎಂದು ಕೆಲವು ವೀಡಿಯೊಗಳು ಹೇಳುತ್ತಿರೋದು ಸುಳ್ಳು ಅನ್ನೋದನ್ನ ತಜ್ಞರು ಹೇಳ್ತಾರೆ. ಹೊಟ್ಟೆಯ ಮೇಲೆ ಮಲಗುವುದಕ್ಕೂ ಹೃದಯದ ಆರೋಗ್ಯಕ್ಕೂ ನೇರ ಸಂಬಂಧವಿಲ್ಲ. ಆದಾಗ್ಯೂ, ನಿದ್ರೆಯ ಕೊರತೆ ಮತ್ತು ನಿದ್ರೆಗೆ ಸಂಬಂಧಿಸಿದ ಇತರ ಸಮಸ್ಯೆಗಳು ಹೃದ್ರೋಗಗಳ ಅಪಾಯವನ್ನು ಮತ್ತಷ್ಟು ಹೆಚ್ಚಿಸುತ್ತವೆ.

ಹೊಟ್ಟೆಯ ಮೇಲೆ ಮಲಗುವ ಅನಾನುಕೂಲಗಳು ಯಾವುವು? 
ಬೆನ್ನುಮೂಳೆಯ ರಚನೆ ಬದಲಾಗಬಹುದು
ನಾವು ಹೊಟ್ಟೆಯ ಮೇಲೆ ಮಲಗಿದಾಗ, ದೇಹದ ತೂಕದಿಂದಾಗಿ ಬೆನ್ನುಹುರಿ ಕೆಳಕ್ಕೆ ಒತ್ತಲ್ಪಡುತ್ತದೆ. ಇದು ಬಿಲ್ಲಿನಂತಹ ರಚನೆಯನ್ನು ಸೃಷ್ಟಿಸುತ್ತದೆ.  ನಿರಂತರವಾಗಿ ಈ ರೀತಿ ಮಲಗಿದರೆ, ಬೆನ್ನುಮೂಳೆಯ ಮೇಲೆ ಶಾಶ್ವತ ಅಡ್ಡಪರಿಣಾಮಗಳು ಉಂಟಾಗಬಹುದು. ಇದು ನಡೆಯುವಾಗ ನೋವಿನಿಂದ ಹಿಡಿದು ಇತರ ಅನೇಕ ಸಮಸ್ಯೆಗಳನ್ನು ಉಂಟುಮಾಡಬಹುದು.

ಬೆನ್ನು, ಕುತ್ತಿಗೆ ಮತ್ತು ಭುಜದ ನೋವು
ನಿಮ್ಮ ಹೊಟ್ಟೆಯ ಮೇಲೆ ಮಲಗುವಾಗ ಉಸಿರಾಡಲು, ನೀವು ಆಗಾಗ್ಗೆ ನಿಮ್ಮ ಕುತ್ತಿಗೆಯನ್ನು ಒಂದು ಬದಿಗೆ ತಿರುಗಿಸಬೇಕು. ಇದು ಬೆನ್ನುಮೂಳೆಯೊಂದಿಗಿನ ಅದರ ಜೋಡಣೆಯನ್ನು ಇನ್ನಷ್ಟು ಹದಗೆಡಿಸುತ್ತದೆ. ಇದು ಕುತ್ತಿಗೆ ಮತ್ತು ಭುಜದ ನೋವಿಗೆ ಕಾರಣವಾಗಬಹುದು. ನಿದ್ರೆಯ ಮಾದರಿ ಸರಿಯಾಗಿಲ್ಲದಿದ್ದರೆ, ತಲೆನೋವು (headache) ಮತ್ತು ಬೆನ್ನುನೋವಿನ ಸಮಸ್ಯೆ ಇರಬಹುದು.

ಮುಖದ ಮೇಲೆ ಸುಕ್ಕುಗಳು ಉಂಟಾಗಬಹುದು
ಹೆಚ್ಚಿನ ಜನರು ಮಲಗುವಾಗ ತಮ್ಮ ಮುಖವನ್ನು ದಿಂಬಿನಲ್ಲಿ ಒತ್ತುತ್ತಾರೆ. ಇದು ಮುಖದ ಮೇಲೆ ಅಕಾಲಿಕ ಸುಕ್ಕುಗಳ (wrinkles in face) ಅಪಾಯವನ್ನುಂಟುಮಾಡುತ್ತದೆ. ಹೊಟ್ಟೆಯ ಮೇಲೆ ಮಲಗುವುದರಿಂದ ಮುಖದ ಚರ್ಮವು ರಾತ್ರಿಯಿಡೀ ಹಿಗ್ಗುವಂತೆ ಮಾಡುತ್ತದೆ. ಇದು ಚರ್ಮದ ಕೋಶಗಳ ಮೇಲೆ ಪರಿಣಾಮ ಬೀರುತ್ತದೆ, ಇದು ಸುಕ್ಕುಗಳಿಗೆ ಕಾರಣವಾಗುತ್ತದೆ.

ಗರ್ಭಾವಸ್ಥೆಯಲ್ಲಿ ವಿಶೇಷ ಗಮನ ಕೊಡಿ
ಗರ್ಭಿಣಿಯರು ವಿಶೇಷವಾಗಿ ಹೊಟ್ಟೆಯ ಮೇಲೆ ಮಲಗುವುದನ್ನು ತಪ್ಪಿಸಬೇಕು. ಗರ್ಭಾವಸ್ಥೆಯಲ್ಲಿ (pregnancy), ಹೊಟ್ಟೆಯ ಮೇಲೆ ಮಲಗೋದು ಅಹಿತಕರ ಅನುಭವ ನೀಡುತ್ತೆ, ಇದು ಸಂಪೂರ್ಣ ನಿದ್ರೆಗೆ ಕಾರಣವಾಗುವುದಿಲ್ಲ. ಇದರಿಂದ ಒತ್ತಡ, ಖಿನ್ನತೆ ಮತ್ತು ಆತಂಕ ಮೊದಲಾದ ಸಮಸ್ಯೆಗಳು ಉಂಟಾಗಬಹುದು. ಇದು ಹುಟ್ಟಲಿರುವ ಮಗುವಿಗೆ ಹಾನಿಕಾರಕವಾಗಬಹುದು.

ಮಲಗುವ ಉತ್ತಮ ಭಂಗಿ ಯಾವುದು?
ಮಲಗಲು ಉತ್ತಮ ಪೊಸಿಶನ್ ಅಂದ್ರೆ ಎಡಭಾಗದಲ್ಲಿ ಮಲಗುವುದು. ಇದರಿಂದ ಗೊರಕೆಯನ್ನು ಕಡಿಮೆ ಮಾಡುತ್ತದೆ ಮತ್ತು ಜೀರ್ಣಕಾರಿ ಸಮಸ್ಯೆಗಳು ದೂರವಾಗುತ್ತೆ. ಬೆನ್ನಿನ ಮೇಲೆ ನೇರವಾಗಿ ಮಲಗುವುದು ಬೆನ್ನು ನೋವು ಮತ್ತು ಇತರ ಕೆಲವು ಸಮಸ್ಯೆಗಳನ್ನು ನಿವಾರಿಸಲು ಸಹ ಪ್ರಯೋಜನಕಾರಿಯಾಗಿದೆ. ಕೆಲವೊಮ್ಮೆ ನೀವು ವಿಶ್ರಾಂತಿಗಾಗಿ ಸ್ಥಾನವನ್ನು ಬದಲಾಯಿಸಬೇಕಾದರೆ, ಹೊಟ್ಟೆಯ ಮೇಲೆ ಮಲಗುವುದು ಸರಿ, ಆದರೆ ಅದನ್ನು ಹೆಚ್ಚು ಸಮಯ ಮಾಡಬಾರದು ಮತ್ತು ಅಭ್ಯಾಸದಲ್ಲಿ ಸೇರಿಸಬಾರದು.