ಗರಿಗರಿ ಮಸಾಲೆ ವಡೆ ತಯಾರಿಸಲು ಹೋಟೆಲ್‌ನವರು ಬಳಸುವ ಸೀಕ್ರೆಟ್ ಟಿಪ್ಸ್ ಇಲ್ಲಿದೆ ನೋಡಿ

Masala Vada Recipe: ಕಡಲೆಬೇಳೆ ವಡೆ. ಹೊರಗೆ ಗರಿಗರಿಯಾಗಿ, ಒಳಗೆ ಖಾರವಾಗಿ, ಬಿಸಿಬಿಸಿ ಚಹಾ ಜೊತೆ ಸವಿದರೆ ಬಾಯಲ್ಲಿ ನೀರೂರುತ್ತೆ. ದಕ್ಷಿಣ ಭಾರತೀಯರ ನೆಚ್ಚಿನ ಸ್ನ್ಯಾಕ್ಸ್ ಅಂದ್ರೆ ಅದು ಕಡಲೆಬೇಳೆ ವಡೆ. ಇದನ್ನು ಹೋಟೆಲ್ ಶೈಲಿಯಲ್ಲಿ ಗರಿಗರಿಯಾಗಿ ಮಾಡಬೇಕಾ? ಹಾಗಿದ್ರೆ ಈ ಟಿಪ್ಸ್ ಫಾಲೋ ಮಾಡಿ.

ಚಹಾ ಜೊತೆ ಗರಿಗರಿ ಮಸಾಲೆ ವಡೆ

ಟೀ ಟೈಮ್ ಅಂದ ತಕ್ಷಣ ಎಲ್ಲರಿಗೂ ಬಿಸಿ ಚಹಾ ಜೊತೆ ಗರಿಗರಿ ತಿಂಡಿ ನೆನಪಾಗುತ್ತೆ. ಸಮೋಸ, ಬಜ್ಜಿ, ಪಕೋಡದ ಜೊತೆಗೆ ಕಡಲೆಬೇಳೆ ವಡೆಗೂ ಒಂದು ವಿಶೇಷ ಸ್ಥಾನವಿದೆ. ಹೊರಗಿನಿಂದ ಗರಿಗರಿಯಾಗಿ, ಒಳಗಿನಿಂದ ಮೃದುವಾಗಿರುವ ಈ ಮಸಾಲೆ ವಡೆ ಸಖತ್ ರುಚಿ ಕೊಡುತ್ತದೆ.

ಮನೆಯಲ್ಲೇ ಕಡಿಮೆ ಪದಾರ್ಥ ಬಳಸಿ ಇದನ್ನು ಸುಲಭವಾಗಿ ಹೇಗೆ ಮಾಡೋದು? ಬೇಕಾಗುವ ಸಾಮಗ್ರಿಗಳೇನು ಅಂತ ನೋಡೋಣ.

ಕನಿಷ್ಠ ಎರಡು ಗಂಟೆ ನೆನೆಸಿಡಿ

ಈ ಕಡಲೆಬೇಳೆ ವಡೆ ಮಾಡಲು, ಮೊದಲು ಕಡಲೆಬೇಳೆಯನ್ನು ಚೆನ್ನಾಗಿ ತೊಳೆದು ಕನಿಷ್ಠ ಎರಡು ಗಂಟೆಗಳ ಕಾಲ ನೀರಿನಲ್ಲಿ ನೆನೆಸಿಡಬೇಕು. ಹೀಗೆ ಮಾಡುವುದರಿಂದ ವಡೆ ಮೃದುವಾಗುತ್ತದೆ. ನಂತರ ನೀರನ್ನು ಸಂಪೂರ್ಣವಾಗಿ ಬಸಿದು ಮಿಕ್ಸಿ ಜಾರ್‌ಗೆ ಹಾಕಿ. ಜೀರಿಗೆ, ಸೋಂಪು, ಒಣಮೆಣಸಿನಕಾಯಿ, ಸಣ್ಣ ತುಂಡು ಚಕ್ಕೆ ಹಾಕಿ ಮೊದಲು ಮಸಾಲೆ ಪುಡಿ ಮಾಡಿ. ಬಳಿಕ ನೆನೆಸಿದ ಕಡಲೆಬೇಳೆ, ಉಪ್ಪು ಸೇರಿಸಿ ತರಿತರಿಯಾಗಿ ರುಬ್ಬಿಕೊಳ್ಳಿ. ಸ್ವಲ್ಪ ನೆನೆಸಿದ ಬೇಳೆಯನ್ನು ಹಾಗೆಯೇ ತೆಗೆದಿಟ್ಟುಕೊಂಡರೆ ವಡೆ ಇನ್ನಷ್ಟು ಗರಿಗರಿಯಾಗುತ್ತದೆ.

ಎಲ್ಲವನ್ನೂ ಚೆನ್ನಾಗಿ ಮಿಕ್ಸ್ ಮಾಡಿ

ಈಗ ರುಬ್ಬಿದ ಮಿಶ್ರಣವನ್ನು ಒಂದು ಬಟ್ಟಲಿಗೆ ಹಾಕಿ. ಅದಕ್ಕೆ ಸಣ್ಣಗೆ ಹೆಚ್ಚಿದ ಈರುಳ್ಳಿ, ಹಸಿಮೆಣಸಿನಕಾಯಿ, ಕರಿಬೇವು ಮತ್ತು ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ ಸೇರಿಸಿ. ಎಲ್ಲಾ ಪದಾರ್ಥಗಳು ಚೆನ್ನಾಗಿ ಬೆರೆಯುವಂತೆ ಮಿಶ್ರಣವನ್ನು ಕಲಸಿ. ನಂತರ ಸಣ್ಣ ಉಂಡೆಗಳನ್ನಾಗಿ ತೆಗೆದುಕೊಂಡು ಕೈಯಿಂದ ವಡೆಯ ಆಕಾರಕ್ಕೆ ತಟ್ಟಿ.

ಬಿಸಿಬಿಸಿ ವಡೆ ಸವಿಯಲು ಸಿದ್ಧ

ಬಾಣಲೆಯಲ್ಲಿ ಎಣ್ಣೆ ಬಿಸಿ ಮಾಡಿ, ಮಧ್ಯಮ ಉರಿಯಲ್ಲಿ ವಡೆಗಳನ್ನು ನಿಧಾನವಾಗಿ ಕರಿಯಿರಿ. ಅವು ಚಿನ್ನದ ಬಣ್ಣಕ್ಕೆ ಬರುವವರೆಗೆ ಡೀಪ್ ಫ್ರೈ ಮಾಡಿ. ಹೊರಗೆ ಗರಿಗರಿಯಾಗಿ, ಒಳಗೆ ಮೃದುವಾಗಿರುವ ಬಿಸಿಬಿಸಿ ಕಡಲೆಬೇಳೆ ವಡೆಯ ಸುವಾಸನೆ ಅದ್ಭುತವಾಗಿರುತ್ತದೆ. 

ಇದನ್ನೂ ಓದಿ:  1 ಕೆಜಿ ಚಿಕನ್ ಅಡುಗೆಗೆ ಎಷ್ಟು ಪ್ರಮಾಣದಲ್ಲಿ ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ ಹಾಕಬೇಕು?

ಅಕ್ಕಿ ಹಿಟ್ಟು

ಇನ್ನು ಕೆಲವರು ಮಸಾಲೆ ವಡೆ ಮಿಶ್ರಣದಲ್ಲಿಅರ್ಧ ಟೀ ಸ್ಪೂನ್‌ನಷ್ಟು ಅಕ್ಕಿ ಹಿಟ್ಟು ಸೇರಿಸಿಕೊಳ್ಳುತ್ತಾರೆ. ಅಕ್ಕಿಹಿಟ್ಟು ಸಹ ಮಸಾಲೆವಡೆಯನ್ನು ಮತ್ತಷ್ಟು ಗರಿಗರಿಯನ್ನಾಗಿ ಮಾಡುತ್ತದೆ. ಟೊಮೆಟೊ ಸಾಸ್ ಅಥವಾ ಹಸಿ ಚಟ್ನಿ ಜೊತೆ ತಿಂದರೆ ತುಂಬಾ ರುಚಿಯಾಗಿರುತ್ತದೆ. ಸಂಜೆ ಚಹಾ ಜೊತೆ ಈ ಸ್ನ್ಯಾಕ್ ಸವಿಯಬಹುದು. ಮನೆಗೆ ಅತಿಥಿಗಳು ಬಂದಾಗಲೂ ಇದನ್ನು ಮಾಡಿ ಬಡಿಸಬಹುದು.

ಇದನ್ನೂ ಓದಿ: ಮನೆಯಲ್ಲೇ 100% Organic ತರಕಾರಿ ಬೆಳೆಯಲು ಹಳ್ಳಿ ರೈತ ನೀಡಿದ ಟಿಪ್ಸ್