ತೂಕ ಹೆಚ್ಚಾಗುವ ಭಯದಿಂದ ನೀವು ಚಪಾತಿ ಜೊತೆ ತುಪ್ಪ ಹಾಕಿ ತಿನ್ನೋದನ್ನು ಮಿಸ್ ಮಾಡ್ತಿದ್ದೀರಾ? ಹಾಗಿದ್ರೆ, ಇವತ್ತೆ ಈ ತಪ್ಪು ತಿಳುವಳಿಕೆಯನ್ನು ತೆಗೆದುಹಾಕಿ. ರೊಟ್ಟಿ, ದೋಸೆ ಮೇಲೆ ತುಪ್ಪವನ್ನು ಹಚ್ಚುವುದರಿಂದ ತೂಕ ಖಂಡಿತವಾಗಿಯೂ ಹೆಚ್ಚಾಗಲ್ಲ, ಆದರೆ ಇಳಿಯೋದು ಖಚಿತ.
ಭಾರತೀಯ ಮನೆಗಳಲ್ಲಿ ತುಪ್ಪವನ್ನು ಆಹಾರದ ಜೊತೆ ಸೇವಿಸುವ ಒಂದು ಸಂಪ್ರದಾಯವಿದೆ. ನಮ್ಮಲ್ಲಿ ಅನೇಕರು ರೊಟ್ಟಿ ಅಥವಾ ಚಪಾತಿ ಮೇಲೆ ತುಪ್ಪ ಹಾಕಿ (adding ghee on roti) ತಿನ್ನಲು ಇಷ್ಟಪಡುತ್ತಾರೆ. ದಾಲ್ ಅಥವಾ ಖಿಚಡಿಯೊಂದಿಗೆ ಅಥವಾ ಬಿಸಿಬೇಳೆ ಬಾತ್ ಜೊತೆ, ಹೋಳಿಗೆ, ಒಬ್ಬಟ್ಟು ಜೊತೆ ತುಪ್ಪದ ಹಾಕಿ ತಿನ್ನೋದು ತುಂಬಾ ಅದ್ಭುತವಾಗಿರುತ್ತೆ. ಆದರೆ ಇತ್ತೀಚಿನ ದಿನಗಳಲ್ಲಿ, ಜನರು ತೂಕದ ಬಗ್ಗೆ ಎಷ್ಟು ಜಾಗೃತರಾಗಿದ್ದಾರೆಂದರೆ, ಅವರು ರೊಟ್ಟಿ ಮೇಲೆ ತುಪ್ಪ ಹಾಕಿ ತಿನ್ನುವ ಮೊದಲು 10 ಬಾರಿ ಯೋಚಿಸುತ್ತಾರೆ. ಕೆಲವರು ಅದನ್ನು ತಮ್ಮ ಮೆನುವಿನಿಂದಲೇ ತೆಗೆದು ಹಾಕಿದ್ದಾರೆ.
ರೊಟ್ಟಿ ಮೇಲೆ ತುಪ್ಪ ಹಾಕಿ ತಿನ್ನುವುದರಿಂದ ತೂಕ ಹೆಚ್ಚಾಗುತ್ತದೆ ಎಂದು ಜನರು ನಂಬುತ್ತಾರೆ. ಫಿಟ್ನೆಸ್ ವಿಷಯಕ್ಕೆ ಬಂದ್ರೆ ತುಪ್ಪ ಹಾಕಿದ್ರೆ, ತೂಕ ಹೆಚ್ಚಾಗುತ್ತೆ ಎಂದು ನೀವು ರೊಟ್ಟಿ ಜೊತೆ ತುಪ್ಪ (Ghee) ಹಾಕದೇ ತಿನ್ನುತ್ತಿದ್ರೆ, ಈ ಯೋಚನೆಯನ್ನು ಇವತ್ತೆ ದೂರ ಮಾಡಿ, ಯಾಕಂದ್ರೆ ತುಪ್ಪ ತಿನ್ನೋದ್ರಿಂದ ತೂಕ ಹೆಚ್ಚಾಗಲ್ಲ, ಬದಲಾಗಿ ತೂಕ ಇಳಿಯುತ್ತೆ.
ರೊಟ್ಟಿ ಮೇಲೆ ತುಪ್ಪ ಹಾಕಿ ತಿನ್ನುವುದು ತೂಕ ಹೆಚ್ಚಾಗಲು ಕಾರಣವಾಗುತ್ತದೆಯೇ?
ಇದು ದೊಡ್ಡ ಮಿಥ್ಯೆ ಎಂದು ತಜ್ಞರು ಹೇಳುತ್ತಾರೆ. ನೀವು ರೊಟ್ಟಿ ಮೇಲೆ ತುಪ್ಪ ಹಾಕಿ ತಿನ್ನುತ್ತಿದ್ದರೆ, ಅದು ರೊಟ್ಟಿಯ ಗ್ಲೈಸೆಮಿಕ್ ಸೂಚ್ಯಂಕವನ್ನು ಕಡಿಮೆ ಮಾಡುತ್ತದೆ, ಇದು ತೂಕ ನಷ್ಟಕ್ಕೆ (weight loss) ಸಹಾಯ ಮಾಡುತ್ತದೆ. ಅಲ್ಲದೇ ಇದು ರಕ್ತದಲ್ಲಿನ ಸಕ್ಕರೆ ಮಟ್ಟ ಹೆಚ್ಚಾಗುವುದನ್ನು ತಡೆಯುತ್ತದೆ. ಇದರಿಂದ ಮಧುಮೇಹದ ಸಮಸ್ಯೆ ಕೂಡ ಇರೋದಿಲ್ಲ.
ಹಾರ್ಮೋನುಗಳನ್ನು ಸಮತೋಲನಗೊಳಿಸುವಲ್ಲಿ ಮತ್ತು ಆರೋಗ್ಯಕರ ಕೊಲೆಸ್ಟ್ರಾಲ್ ಅನ್ನು ಕಾಪಾಡಿಕೊಳ್ಳುವಲ್ಲಿ ತುಪ್ಪವು ಪ್ರಮುಖ ಪಾತ್ರ ವಹಿಸುತ್ತದೆ. ಇದು ನಿಮಗೆ ಹೊಟ್ಟೆ ತುಂಬಿದ ಅನುಭವ ನೀಡುತ್ತದೆ ಇದರಿಂದ ನೀವು ದಿನದ ನಂತರ ಯಾವುದೇ ಕೊಬ್ಬಿನ ಆಹಾರವನ್ನು (fatty food) ತಿನ್ನುವುದನ್ನು ತಪ್ಪಿಸಬಹುದು.
ನೀವು ಜೀರ್ಣಕ್ರಿಯೆ ಸಮಸ್ಯೆಗಳನ್ನು ಹೊಂದಿದ್ದರೆ, ತುಪ್ಪವು ನಿಮಗೆ ಪ್ರಯೋಜನಕಾರಿ ಎಂದು ಹೇಳಲಾಗುತ್ತದೆ. ಇದು ಲೂಬ್ರಿಕೇಷನ್ ನಂತೆ ವರ್ತಿಸುವ ಮೂಲಕ ಕರುಳಿನ ಚಲನೆಯನ್ನು ನಿಯಂತ್ರಿಸುತ್ತದೆ. ಜೀವಸತ್ವಗಳು ಮತ್ತು ಖನಿಜಗಳನ್ನು ಒಳಗೊಂಡಿರುವ ತುಪ್ಪವನ್ನು ನೀವು ಯಾವುದೇ ಆಹಾರದ ಜೊತೆ ತಿನ್ನೋದ್ರಿಂದ ಜೀರ್ಣಶಕ್ತಿ (digestion) ಉತ್ತಮವಾಗುತ್ತದೆ.
ತೂಕ ಹೆಚ್ಚಾಗುತ್ತದೆ ಎಂಬ ಕಾರಣಕ್ಕೆ ರೊಟ್ಟಿ ಮೇಲೆ ತುಪ್ಪ ಹಾಕಿ ತಿನ್ನುವುದನ್ನು ತಪ್ಪಿಸುವವರು, ಇಂದಿನಿಂದ ತಮ್ಮ ರೊಟ್ಟಿ ಮೇಲೆ ತುಪ್ಪವನ್ನು ಹಚ್ಚಲು ಪ್ರಾರಂಭಿಸಿ. ಇದರಿಂದ ನೀವು ಅನೇಕ ಪ್ರಯೋಜನಗಳನ್ನು ಪಡೆಯಬಹುದು. ಆದಾಗ್ಯೂ, ನೀವು ಸರಿಯಾದ ಪ್ರಮಾಣದ ತುಪ್ಪವನ್ನು ತೆಗೆದುಕೊಳ್ಳುತ್ತಿದ್ದೀರಿ ಎಂದು ಖಚಿತಪಡಿಸಿಕೊಳ್ಳಿ ಏಕೆಂದರೆ ಅಗತ್ಯಕ್ಕಿಂತ ಹೆಚ್ಚಿನ ತುಪ್ಪ ಸೇವಿಸೋದರಿಂದ ಆರೋಗ್ಯಕ್ಕೆ ಹಾನಿಯಾಗುತ್ತೆ.