ತಾಯಿಯಿಂದ ಹತ್ತು ಸಾವಿರ ಸಾಲ ಪಡೆದು ಬಿಸಿನೆಸ್ ಆರಂಭಿಸಿದ ವ್ಯಕ್ತಿ, ಈಗ 33,374 ಕೋಟಿ ಕಂಪೆನಿಯ ಮಾಲೀಕ!

ಬಿಲಿಯನೇರ್ ಉದ್ಯಮಿಗಳ ಜೀವನಶೈಲಿ ಎಷ್ಟು ಅದ್ಭುತವಾಗಿದೆ ಎಂದು ಹೇಳುವುದು ಸುಲಭ. ಆದರೆ ಆ ಹಂತವನ್ನು ತಲುಪಲು ಅವರು ಸಹ ಸಾಕಷ್ಟು ಕಷ್ಟಪಟ್ಟಿರುತ್ತಾರೆ. ಹಲವು ಅಡೆತಡೆಗಳನ್ನು ಎದುರಿಸಿರುತ್ತಾರೆ. ಇವರು ಸಹ ಅಂಥಾ ಉದ್ಯಮಿಗಳಲ್ಲಿ ಒಬ್ಬರು. ಕೇವಲ ಹತ್ತು ಸಾವಿರದಿಂದ ಬಿಸಿನೆಸ್ ಆರಂಭಿಸಿದ ವ್ಯಕ್ತಿ ಈಗ 33,374 ಕೋಟಿ ರೂ. ಉದ್ಯಮದ ಒಡೆಯರಾಗಿದ್ದಾರೆ.

ರಾಷ್ಟ್ರದ ಪ್ರಮುಖ ಎಥ್ನಿಕ್ ವೇರ್‌ಗಳಲ್ಲಿ ಒಂದಾದ ಬ್ರ್ಯಾಂಡ್ ವೇದಾಂತ್ ಫ್ಯಾಶನ್ಸ್‌  ಬಿಲಿಯನೇರ್ ರವಿ ಮೋದಿ ಒಡೆತನದಲ್ಲಿದೆ. ವೇದಾಂತ್ ಫ್ಯಾಶನ್ಸ್, ಮಾನ್ಯವರ್, ಮೋಹೆ, ಮಂಥನ್, ಮೆಬಾಜ್ ಮತ್ತು ತ್ವಮೇವ್ ಸೇರಿದಂತೆ ಪ್ರಸಿದ್ಧ ಬ್ರಾಂಡ್‌ಗಳನ್ನು ಹೊಂದಿರುವ ಸಂಸ್ಥೆಯನ್ನು ಮೋದಿ ಸ್ಥಾಪಿಸಿದರು. 

2022ರಲ್ಲಿ ತನ್ನ ಕಂಪನಿಯನ್ನು ಲಾಭದಾಯಕ ಆರಂಭಿಕ ಸಾರ್ವಜನಿಕ ಕೊಡುಗೆಗೆ (ಐಪಿಒ) ಮುನ್ನಡೆಸಿದ ನಂತರ, ಅವರು ಕಳೆದ ವರ್ಷ ಭಾರತದ ಶ್ರೀಮಂತ ವ್ಯಕ್ತಿಗಳಲ್ಲಿ ಒಬ್ಬರು ಎಂದು ಕರೆಸಿಕೊಂಡರು.

ರವಿ ಮೋದಿ 13 ವರ್ಷದವರಾಗಿದ್ದಾಗ ತಮ್ಮ ತಂದೆಯ ಬಟ್ಟೆ ಅಂಗಡಿಯಲ್ಲಿ ಮಾರಾಟಗಾರರಾಗಿ ಕೆಲಸ ಮಾಡಲು ಪ್ರಾರಂಭಿಸಿದರು. ಕೆಲವು ತಿಂಗಳುಗಳ ಕಾಲ ಇಲ್ಲಿ ಅನುಭವವನ್ನು ಗಳಿಸಿದ ನಂತರ ಕಂಪೆನಿಯ ನಿಯಂತ್ರಣವನ್ನು ಪಡೆದರು. 2002ರಲ್ಲಿ, ರವಿ ಮೋದಿ ಸಾಂಪ್ರದಾಯಿಕ ಭಾರತೀಯ ಉಡುಪುಗಳನ್ನು ತಯಾರಿಸಲು ಕೋಲ್ಕತ್ತಾದಲ್ಲಿ ವೇದಾಂತ್ ಫ್ಯಾಶನ್ಸ್‌ನ್ನು ಸ್ಥಾಪಿಸಿದರು. ವೇದಾಂತ್‌ ಅನ್ನೋದು ರವಿ ಮೋದಿಯವರ ಮಗನ ಹೆಸರಾಗಿದೆ.

ತಮ್ಮ ತಾಯಿಯಿಂದ ಎರವಲು ಪಡೆದ ಕೇವಲ 10,000 ರೂ.ನಿಂದ ವೇದಾಂತ್ ಫ್ಯಾಷನ್ ಎಂಬ ಸಣ್ಣ ಮಳಿಗೆ ಆರಂಭಿಸಿದರು. ಇಲ್ಲಿ ಭಾರತೀಯ ಉಡುಪುಗಳನ್ನು ಉತ್ಪಾದಿಸಲಾಗುತ್ತಿತ್ತು. ಆ ನಂತರ ಭಾರತೀಯ ರಾಜ್ಯಗಳಲ್ಲಿ ಮಾರುಕಟ್ಟೆಯನ್ನು ಪ್ರವೇಶಿಸಿದರು. ಮಾನ್ಯವರ್‌ ಹೆಸರಿನ ಬ್ರ್ಯಾಂಡ್ ಅವರ ಖ್ಯಾತಿಯನ್ನು ಉನ್ನತ ಸ್ಥಾನಕ್ಕೆ ಕೊಂಡೊಯ್ದಿತು. 

ವಿಶೇಷ ಬ್ರ್ಯಾಂಡ್‌ ಸ್ಥಳಗಳನ್ನು ತೆರೆಯುವುದು ಮತ್ತು ದೊಡ್ಡ ಸ್ವರೂಪದ ಮಳಿಗೆಗಳಿಗೆ ಮಾರಾಟ ಮಾಡುವುದನ್ನು ಒಳಗೊಂಡಿರುವ ಅವರ ಕಾರ್ಯತಂತ್ರದ ಆಯ್ಕೆಗಳಿಂದ ರವಿ ಮೋದಿಯವರ ವಾಣಿಜ್ಯ ಉಪಸ್ಥಿತಿಯು ಮತ್ತಷ್ಟು ವಿಸ್ತರಿಸಿತು.

ವೇದಾಂತ್‌ ಫ್ಯಾಷನ್‌ನ ಜನಪ್ರಿಯ ಭಾರತೀಯ ಮದುವೆ ಉಡುಪು ಬ್ರ್ಯಾಂಡ್ ಮಾನ್ಯವರ್ ಈಗ ಪುರುಷರ ಕುರ್ತಾಗಳು, ಶೆರ್ವಾನಿಗಳು ಮತ್ತು ಜಾಕೆಟ್‌ಗಳು, ಹಾಗೆಯೇ ಮಾರುಕಟ್ಟೆಯಲ್ಲಿ ಅದರ ಮಹಿಳೆಯರ ಲೆಹೆಂಗಾಗಳು, ಸೀರೆಗಳು ಮತ್ತು ಉಡುಪುಗಳಿಗೆ ಹೆಸರುವಾಸಿಯಾಗಿದೆ.

ಕೋಲ್ಕತ್ತಾ ಕಂಪನಿಯು ಪ್ರಸ್ತುತ ಭಾರತದ 248 ನಗರಗಳಲ್ಲಿ 662 ಮಳಿಗೆಗಳನ್ನು ಮತ್ತು 16 ಅಂತಾರಾಷ್ಟ್ರೀಯ ಮಳಿಗೆಗಳನ್ನು ಹೊಂದಿದೆ. ರವಿ ಮೋದಿಯವರ ನಿವ್ವಳ ಮೌಲ್ಯವು ಏಪ್ರಿಲ್ 2023 ರ ವೇಳೆಗೆ $ 2.5 ಶತಕೋಟಿಯಿಂದ $ 3 ಶತಕೋಟಿಗೆ ಏರಿತು. 2022ರ ಫೋರ್ಬ್ಸ್ ಪ್ರಪಂಚದ ಬಿಲಿಯನೇರ್‌ಗಳ ಪಟ್ಟಿಯಲ್ಲಿಯೂ ಸ್ಥಾನ ಗಿಟ್ಟಿಸಿಕೊಂಡಿದ್ದಾರೆ. 3.5 ಶತಕೋಟಿ ಮೌಲ್ಯದ ನಿವ್ವಳ ಮೌಲ್ಯದೊಂದಿಗೆ ಭಾರತದ ಶ್ರೀಮಂತ ಜನರ 64 ನೇ ಸ್ಥಾನದಲ್ಲಿದ್ದಾರೆ.