World Chocolate Dayಗೆ ಕಿರುತೆರೆ ತಾರೆಯರ ​ಶುಭಾಶಯ: ಮನೆಯಲ್ಲಿಯೇ ತಯಾರಿಸೋ ಸುಲಭದ 2 ವಿಧಾನ

ಜುಲೈ 7 ವಿಶ್ವ ಚಾಕೋಲೆಟ್​ ದಿನವಾಗಿದ್ದು, ಕಿರುತೆರೆ ಕಲಾವಿದೆಯರು ವೀಕ್ಷಕರಿಗೆ ವಿಶೇಷ ರೀತಿಯಲ್ಲಿ ಶುಭಾಶಯ ಕೋರಿದ್ದಾರೆ. ಈ ಸಂದರ್ಭದಲ್ಲಿ ಮನೆಯಲ್ಲಿಯೇ ಹೇಗೆ ಇದನ್ನು ತಯಾರಿಸಬಹುದು ಎನ್ನುವ ಎರಡು ಸುಲಭದ ವಿಧಾನವನ್ನು ಇಲ್ಲಿ ನೀಡಲಾಗಿದೆ. 

ಇಂದು ಅರ್ಥಾತ್​ ಜುಲೈ 7 ವಿಶ್ವ ಚಾಕೋಲೆಟ್​ ದಿನ. ನೇ ಶತಮಾನದಲ್ಲಿ ಯುರೋಪ್‌ಗೆ ಚಾಕೋಲೆಟ್​ನ ಪರಿಚಯವನ್ನು ಈ ದಿನ ಸ್ಮರಿಸುತ್ತದೆ ಎನ್ನಲಾಗಿದೆ. ಅಷ್ಟಕ್ಕೂ ಚಾಕೊಲೇಟ್​ಗೆ ಏನೂ ಒಂದು ದಿನವೇ ಬೇಕೆಂದೇನಿಲ್ಲ. ಪುಟಾಣಿಗಳಿಂದ ಹಿಡಿದು ವಯೋವೃದ್ಧರವರೆಗೂ ಚಾಕೊಲೇಟ್​ ಎಂದರೆ ಆಹಾ ಎನ್ನದೇ ಇರುವವರೇ ಇಲ್ಲವೇನೋ. ಶುಗರ್​ ಇದೆ ಎಂದ್ರೂ ಒಂದೂಚು ಚಾಕೊಲೇಟ್​ ಸವಿಯುವ ಹಲವು ಜನರಿದ್ದಾರೆ. ಅಂಥ ಮಹಿಮೆ ಈ ಸಿಹಿಗೆ. ಕೋಕೋ ಬೀಜದಿಂದ ಪಡೆದ ಚಾಕೊಲೇಟ್, ಪ್ರಾಚೀನ ಮೆಸೊಅಮೆರಿಕನ್ ಸಮಾಜಗಳ ಕಾಲದಿಂದಲೂ ಪ್ರಸಿದ್ಧವಾಗಿದೆ. ಆ ಅವಧಿಯಲ್ಲಿ, ಕೋಕೋ ಹಣ್ಣಿನ ರುಚಿಕರವಾದ ತಿರುಳನ್ನು ಆಲ್ಕೊಹಾಲ್​ಯುಕ್ತ ಪಾನೀಯವಾಗಿ ಹುದುಗಿಸಲಾಗುತ್ತಿತ್ತು. ಅಂದಿನಿಂದ ವಿಭಿನ್ನ ರೂಪ ಪಡೆದಿದೆ ಈ ಸಿಹಿ. ಈ ದಿನದ ಅಂಗವಾಗಿ ಜೀ ಕನ್ನಡದ ಕಿರುತೆರೆ ನಟ-ನಟಿಯರು ವಿಶೇಷವಾಗಿ ವೀಕ್ಷಕರಿಗೆ ಈ ದಿನದ ಶುಭಾಶಯವನ್ನು ಕೋರಿದ್ದಾರೆ.

ಶ್ರೀರಸ್ತು ಶುಭಮಸ್ತು, ಪುಟ್ಟಕ್ಕನ ಮಕ್ಕಳು, ಅಮೃತಧಾರೆ, ಕರ್ಣ, ಅಣ್ಣಯ್ಯ, ಲಕ್ಷ್ಮೀ ಬಾರಮ್ಮಾ, ಶ್ರಾವಣಿ ಸುಬ್ರಹ್ಮಣ್ಯ, ನಾ ನಿನ್ನ ಬಿಡಲಾರೆ ಹಾಗೂ ದೃಷ್ಟಿಬೊಟ್ಟು ಸೀರಿಯಲ್​ ನಾಯಕ-ನಾಯಕಿ ವೀಕ್ಷಕರಿಗೆ ಚಾಕೋಲೆಟ್​ ಮೂಲಕ ಶುಭಾಶಯ ಕೋರಿದ್ದಾರೆ.

ಚಾಕೋಲೆಟ್​ನಲ್ಲಿ ಹಲವಾರು ಬಗೆಯನ್ನು ಮಾಡಬಹುದಾಗಿದೆ. ಅದರಲ್ಲಿ ಒಂದು ಬಗೆಯನ್ನು ಇಲ್ಲಿ ನೀಡಲಾಗಿದೆ. ಮನೆಯಲ್ಲಿಯೇ ಇದನ್ನು ಸುಲಭದಲ್ಲಿ ಮಾಡಬಹುದು.

ಚಾಕೋಲೆಟ್​​ ಮಾಡಲು ಬೇಕಾಗುವ ಸಾಮಗ್ರಿಗಳು

- ಚಾಕೋಲೆಟ್​ ಪುಡಿ 1 ಕಪ್

- ಹಾಲಿನ ಪುಡಿ ಪೌಡರ್ 3 ಕಪ್

- ಸಕ್ಕರೆ 2 ಕಪ್

- ಬೆಣ್ಣೆ ಅರ್ಧ ಕಪ್

ಮಾಡುವ ವಿಧಾನ

ಮೊದಲಿಗೆ ಪಾತ್ರೆಯಲ್ಲಿ ಹಾಲಿನ ಪುಡಿ ಹಾಗೂ ಚಾಕೋಲೆಟ್​ ಪುಡಿಯನ್ನು ಬೆರೆಸಿ. ನಂತರ ದಪ್ಪ ಅಡಿ ಇರುವ ಕಡಾಯಿಯನ್ನು ತೆಗೆದುಕೊಳ್ಳಿ. ಇದನ್ನು ಗ್ಯಾಸ್​ ಮೇಲಿಟ್ಟು ಸ್ವಲ್ಪ ನೀರು ಹಾಕಿ ನೀರು ಬಿಸಿಯಾಗುತ್ತಿರುವಂತೆಯೇ ಸಕ್ಕರೆ ಹಾಕಿ ಚೆನ್ನಾಗಿ ಕಲಕಿ. ಗಂಟಾಗಲು ಬಿಡಬೇಡಿ. ಕೈಯಾಡಿಸುತ್ತಲೇ ಸಕ್ಕರೆಯನ್ನು ನೀರಿನಲ್ಲಿ ಕರಗಲು ಬಿಡಬೇಕು.

ಪಾಕ ಸ್ವಲ್ಪ ಮಂದವಾಗುತ್ತಾ ಬಂದ ತಕ್ಷಣ ಅದಕ್ಕೆ ಬೆಣ್ಣೆ ಹಾಕಿ. ನಂತರ ಬೆರೆಸಿದ ಚಾಕೋಲೆಟ್​ ಪುಡಿ ಹಾಗೂ ಹಾಲಿನ ಪುಡಿ ಸೇರಿಸಿ ಕಲಸಿ. ಗಟ್ಟಿಯಾಗುತ್ತಾ ಬಂದಾಗ ಗ್ಯಾಸ್​​ ಆಫ್​ ಮಾಡಿ. ಇದಾದ ಬಳಿಕ ಒಂದು ಪಾತ್ರೆಗೆ ತುಪ್ಪ ಸವರಿ ಅದರಲ್ಲಿ ಈ ಮಿಶ್ರಣವನ್ನು ಹಾಕಿ ನಂತರ ತಟ್ಟೆಗೆ ಸುರಿದು ತಣ್ಣಗಾಗಲು ಬಿಡಿ. ನಂತರ ಚಾಕು ತೆಗೆದುಕೊಂಡು ಗಟ್ಟಿಯಾದ ಚಾಕೋಲೆಟ್​ ಅನ್ನು ಚೌಕಾರದಲ್ಲಿ ಕತ್ತರಿಸಿದರೆ ರುಚಿಕರವಾದ ಚಾಕೋಲೆಟ್​ ರೆಡಿ.

****************************

ಅಂಗಡಿಯಲ್ಲಿ ಸಿಗುವ ಸ್ಟೈಲ್​ನಲ್ಲಿಯೇ ಚಾಕೋಲೆಟ್​ ಬೇಕೆಂದ್ರೆ ಇದನ್ನು ಟ್ರೈ ಮಾಡಿ

¾ ಟಿನ್: ನೆಸ್ಲೆ ಮಿಲ್ಕ್‌ಮೇಡ್

100 ಗ್ರಾಂ ಪುಡಿಮಾಡಿದ ಬಿಸ್ಕತ್ತುಗಳು

150 ಗ್ರಾಂ ಬೆಣ್ಣೆ

1 ಚಮಚ ಕೋಕೋ ಪೌಡರ್

200 ಗ್ರಾಂ ಕ್ರೀಮ್ ಚೀಸ್

1 ವೆನಿಲ್ಲಾ ಎಸೆನ್ಸ್

1 ಕಪ್ ಚಾಕೊಲೇಟ್ ಕಲರ್​

5 – 6 ಚೆರ್ರಿಗಳು

1 ಚಮಚ ಉಪ್ಪು

200 ಗ್ರಾಂ ಡಾರ್ಕ್ ಚಾಕೊಲೇಟ್

ಮಾಡುವ ವಿಧಾನ:

-ಮೊದಲಿಗೆ ಬಿಸ್ಕತ್ತು ಪದರವನ್ನು ತಯಾರಿಸಲು, 100 ಗ್ರಾಂ ಪುಡಿಮಾಡಿದ ಬಿಸ್ಕತ್ತುಗಳನ್ನು 50 ಗ್ರಾಂ ಕರಗಿದ ಬೆಣ್ಣೆ ಮತ್ತು ಒಂದು ಚಿಟಿಕೆ ಉಪ್ಪಿನೊಂದಿಗೆ ಸೇರಿಸಿ.

- ಕ್ರೀಮಿ ಚಾಕೊಲೇಟ್ ಪದರವನ್ನು ತಯಾರಿಸಲು, 200 ಗ್ರಾಂ ಡಾರ್ಕ್ ಚಾಕೊಲೇಟ್ ಮತ್ತು 100 ಗ್ರಾಂ ಬೆಣ್ಣೆಯನ್ನು ಒಟ್ಟಿಗೆ ಕರಗಿಸಿ. 3/4 ಕಪ್ ನೆಸ್ಲೆ ಮಿಲ್ಕ್‌ಮೇಡ್ ಅನ್ನು ಬೆರೆಸಿ ಮತ್ತು ಸಂಪೂರ್ಣವಾಗಿ ಕರಗಿದ ನಂತರ, ಒಂದು ಚಮಚ ಕೋಕೋ ಪೌಡರ್ ಅನ್ನು ಸೇರಿಸಿ.

- ಒಂದು ಬಟ್ಟಲಿನಲ್ಲಿ, 200 ಗ್ರಾಂ ಕ್ರೀಮ್ ಚೀಸ್ ತೆಗೆದುಕೊಂಡು ನಯವಾಗಿ ಮಿಕ್ಸ್​ ಮಾಡಿ. ಕರಗಿದ ಮತ್ತು ತಂಪಾಗಿಸಿದ ಚಾಕೊಲೇಟ್ ಮಿಶ್ರಣವನ್ನು ಕ್ರಮೇಣ ಸೇರಿಸಿ, ನಂತರ ವೆನಿಲ್ಲಾ ಎಸೆನ್ಸ್ ಸೇರಿಸಿ ಬೆರೆಸಿ.

- ಇದನ್ನು ಬಿಸ್ಕತ್ತು ಬೇಸ್ ಮೇಲೆ ಸುರಿಯಿರಿ.

- ಚಾಕೊಲೇಟ್ ಪುಡಿಂಗ್ ಅನ್ನು ಚಾಕೊಲೇಟ್ ಕರ್ಲ್ಸ್ ಮತ್ತು ಚೆರ್ರಿಗಳಿಂದ ಅಲಂಕರಿಸಿ.