ಪಠಾಣ್ ಗಳಿಕೆಗೆ ಕಾಜೋಲ್​ ವ್ಯಂಗ್ಯ: ಶಾರುಖ್​ ಫ್ಯಾನ್ಸ್​ ಗರಂ- ನಟಿ ಹೇಳಿದ್ದಾದ್ರೂ ಏನು?

ಪಠಾಣ್​ ಚಿತ್ರದ ಗಳಿಕೆ ಕುರಿತು ಬಾಲಿವುಡ್​ ನಟಿ ಕಾಜೋಲ್​ ವ್ಯಂಗ್ಯದ ರೀತಿಯಲ್ಲಿ ಮಾತನಾಡಿದ್ದಾರೆ. ಇದರಿಂದ ಶಾರುಖ್​ ಫ್ಯಾನ್ಸ್​ ಗರಂ ಆಗಿದ್ದಾರೆ. ನಟಿ ಹೇಳಿದ್ದೇನು?  

ಪಠಾಣ್​ ಚಿತ್ರದ (Pathaan Movie) ಭರ್ಜರಿ ಯಶಸ್ಸಿನ ಬಗ್ಗೆ ಬೇರೆ ಹೇಳಬೇಕಾಗಿಲ್ಲ. ಒಂದರ ಮೇಲೊಂದರಂತೆ ಫ್ಲಾಪ್​ ಸಿನಿಮಾ ನೀಡಿ ಮೂರ್ನಾಲ್ಕು ವರ್ಷ ಬ್ರೇಕ್​ ತೆಗೆದುಕೊಂಡಿದ್ದ ನಟ ಶಾರುಖ್​ ಖಾನ್​ ಹಿಂದೆಂದೂ ಕಾಣದಂತೆ ಭರ್ಜರಿ ಯಶಸ್ಸು ಕಂಡ ಚಿತ್ರವಿದು. ಮಾತ್ರವಲ್ಲದೇ ಹಲವಾರು ದಾಖಲೆಗಳನ್ನು ಮಾಡಿದ ಪಠಾಣ್​ ಮಕಾಡೆ ಮಲಗಿದ್ದ ಬಾಲಿವುಡ್​ಗೆ ಜೀವ ತುಂಬಿದೆ. ಇದಾಗಲೇ ಹಲವಾರು ಬಾರಿ ಶಾರುಖ್​ ಫ್ಯಾನ್ಸ್​ ಈ ಚಿತ್ರವನ್ನು ನೋಡಿಯೂ ಆಗಿದೆ. ಕೇಸರಿ ಬಿಕಿನಿ ತೊಟ್ಟು ಬೇಷರಂ ರಂಗ್​ ಎಂದು ಹಾಡಿದ್ದ ದೀಪಿಕಾ ಪಡುಕೋಣೆಯ ಬಟ್ಟೆ ವಿವಾದ ಸೃಷ್ಟಿಸಿದ್ದ ನಡುವೆಯೂ ಕೆಲವೊಂದು ಬದಲಾವಣೆ ಮಾಡುವುದರ ಮೂಲಕ ಚಿತ್ರ ಭರ್ಜರಿ ಯಶಸ್ಸು ಕಂಡಿದೆ. ಭಾರತ ಮಾತ್ರವಲ್ಲದೇ, ಹಲವಾರು ದೇಶಗಳಲ್ಲಿಯೂ ಈ ಚಿತ್ರ ಇದಾಗಲೇ ಅಬ್ಬರಿಸಿದೆ. ಕಳೆದ ಏಪ್ರಿಲ್​ 6ರ ಅಂಕಿಅಂಶದ ಪ್ರಕಾರ, ಪಠಾಣ್​ ಚಲನಚಿತ್ರವು ಭಾರತದಲ್ಲಿ  82 ಮಿಲಿಯನ್ ಡಾಲರ್​ ಅರ್ಥಾತ್​ ಸುಮಾರು 654 ಕೋಟಿ ರೂಪಾಯಿಗಳನ್ನು ಗಳಿಸಿದ್ದರೆ, ಸಾಗರೋತ್ತರ ದೇಶಗಳಲ್ಲಿ 50 ಮಿಲಿಯನ್​ ಡಾಲರ್​ ಅರ್ಥಾತ್​ ಸುಮಾರು 396 ಕೋಟಿ ರೂಪಾಯಿ ಹಾಗೂ  ವಿಶ್ವಾದ್ಯಂತ ಒಟ್ಟು 130 ಮಿಲಿಯನ್​ ಡಾಲರ್​ ಅರ್ಥಾತ್​ 1,050  ಕೋಟಿ ರೂಪಾಯಿ ಸಂಗ್ರಹಿಸಿದೆ. 

ಆದರೆ ಪಠಾಣ್​ (Pathaan) ಇಷ್ಟೊಂದು ಗಳಿಕೆ ಮಾಡಲಿಲ್ಲ ಎನ್ನುವ ವಾದವೂ ಅದೇ ಇನ್ನೊಂದೆಡೆ ಇದೆ. ಕೆಲವರು ಪಠಾಣ್​ ಗಳಿಕೆಯ ಕುರಿತು ನೀಡುತ್ತಿರುವ ವರದಿ ಸುಳ್ಳು ಎಂದು ಹೇಳುತ್ತಿದ್ದಾರೆ. ಇದು ಇಷ್ಟು ಕಮಾಯಿ ಮಾಡಲು ಸಾಧ್ಯವೇ ಇಲ್ಲ. ಎಷ್ಟೋ ಮಂದಿ ಈ ಚಿತ್ರವನ್ನೇ ನೋಡಿಲ್ಲ. ಇವೆಲ್ಲಾ ಸುಳ್ಳು ವಾದ. ಸುಖಾ ಸುಮ್ಮನೇ ಹೈಪ್​ ಮಾಡಲಾಗುತ್ತಿದೆ ಎನ್ನುವುದು ಕೆಲವರ ವಾದ.  ಈ ವಾದ-ಪ್ರತಿವಾದದ ನಡುವೆಯೇ ನಟಿ ಕಾಜೋಲ್​ ಹೇಳಿಕೆಯೊಂದು ಸಕತ್​ ವೈರಲ್​ ಆಗಿದೆ. ಇದರಲ್ಲಿ ನಟಿ ಕಾಜೋಲ್​ ಪಠಾಣ್​ ಚಿತ್ರದ ಗಳಿಕೆಯ ಕುರಿತು ಮಾತನಾಡಿದ್ದಾರೆ. ಇದು ವೈರಲ್​ ಆದ ಬೆನ್ನಲ್ಲೇ ಥಹರೇವಾರಿ ಕಮೆಂಟ್​ಗಳ ಸುರಿಮಳೆಯಾಗುತ್ತಿದೆ. ಕೆಲವರು ನಟಿಯ ಹೇಳಿಕೆಯಂತೆ ತಮಗೂ ಪಠಾಣ್​ ಮೇಲೆ ಅನುಮಾನ ಎಂದಿದ್ದರೆ, ಶಾರುಖ್​ ಫ್ಯಾನ್ಸ್​ ಕಾಜೋಲ್​ (Kajol) ಮೇಲೆ ಹರಿಹಾಯ್ದಿದ್ದಾರೆ. 

ಅವಳಿ ಮಕ್ಕಳಿಗೆ ಪಠಾಣ್​, ಜವಾನ್​ ಎಂದು ಹೆಸರಿಡ್ಲಾ ಎಂದ ಮಹಿಳೆಗೆ ಶಾರುಖ್​ ಉತ್ತರ!

ಅಷ್ಟಕ್ಕೂ ನಟಿ ಹೇಳಿದ್ದೇನು ಅಂದರೆ, ಕಾರ್ಯಕ್ರಮವೊಂದರಲ್ಲಿ ಶಾರುಖ್​ ಖಾನ್​ ಅವರ ಪ್ರಶ್ನೆ ಕಾಜೋಲ್​ ಅವರಿಗೆ ಎದುರಾಗಿದೆ. ಆಗ ನಟಿ, ಶಾರುಖ್​ ಖಾನ್​... (Shah Rukh Khan) ಎನ್ನುತ್ತಾ ನಿಜಕ್ಕೂ ಪಠಾಣ್​ ಕಲೆಕ್ಷನ್​ ಮಾಡಿದ್ದು ಎಷ್ಟು ಎಂದು ಲೇವಡಿ ಮಾಡಿ ಹಾಸ್ಯದ ರೂಪದಲ್ಲಿ ಜೋರಾಗಿ ನಕ್ಕಿದ್ದಾರೆ. ಇದು ವ್ಯಂಗ್ಯದ ನಗು ಎನ್ನುವುದು ತಿಳಿಯುತ್ತದೆ. ಈ ಮೂಲಕ ಪಠಾಣ್​ ಇಷ್ಟೊಂದು ಕಲೆಕ್ಷನ್​ ಮಾಡಿರುವುದು ಸುಳ್ಳು ಎಂಬ ವಾದವನ್ನು ಅವರು ಈ ನಗುವಿನ ಜೊತೆ ಎತ್ತಿ ತೋರಿಸಿದ್ದಾರೆ.  ಶಾರುಖ್​ ಫ್ಯಾನ್ಸ್​ಗೆ ಕಾಜೋಲ್​ ಅವರ ಈ ವ್ಯಂಗ್ಯದ ನಗುವನ್ನು ಸಹಿಸಿಕೊಳ್ಳಲು ಆಗುತ್ತಿಲ್ಲ. ‘ಪಠಾಣ್​ ಸಿನಿಮಾದ ನಿಜವಾದ ಕಲೆಕ್ಷನ್​ ಎಷ್ಟು’ ಎಂದು ಅವರು ಬಹಿರಂಗವಾಗಿಯೇ ಪ್ರಶ್ನೆ ಮಾಡಿರುವುದು ಆಕೆಯ ಸೊಕ್ಕನ್ನು ತೋರಿಸುತ್ತಿದೆ ಎಂದು ಶಾರುಖ್​   ಅಭಿಮಾನಿಗಳು (Fans) ಕಿಡಿ ಕಾರುತ್ತಿದ್ದಾರೆ. ಅಸಲಿಗೆ ಈ ಸಂದರ್ಶನದಲ್ಲಿ ಸಂದರ್ಶಕರು ‘ನೀವು ಶಾರುಖ್​ ಖಾನ್​ಗೆ ಏನಾದರೂ ಪ್ರಶ್ನೆ ಕೇಳಬೇಕಾ’ ಎಂದು  ಕೇಳಿದ್ದಾರೆ. ಆಗ ಕಾಜೋಲ್​ ‘ಶಾರುಖ್​ ಖಾನ್​ ಬಗ್ಗೆ ನಾನೇನು ಕೇಳಲಿ. ಅವರ ಬಗ್ಗೆ ಸೋಶಿಯಲ್​ ಮೀಡಿಯಾದಲ್ಲಿ ಎಲ್ಲವೂ ಇದೆ’ ಎಂದು ಅರೆಕ್ಷಣ ಸುಮ್ಮನಾಗಿ ನಂತರ  ‘ನಿಜಕ್ಕೂ ಪಠಾಣ್​ ಸಿನಿಮಾ ಎಷ್ಟು ಕಲೆಕ್ಷನ್​ ಮಾಡಿತು’ ಎಂದು ಪ್ರಶ್ನೆ ಕೇಳಿದ್ದಾರೆ. ನಂತರ ಜೋರಾಗಿ ನಕ್ಕಿದ್ದಾರೆ. 

ಆ ನಗುವಿನಲ್ಲಿ ವ್ಯಂಗ್ಯ ಕಾಣಿಸಿದೆ ಎಂದು ನೆಟ್ಟಿಗರು (Commentators) ದೂರುತ್ತಿದ್ದಾರೆ. ಈಕೆಗೆ ತನಗಿಂತ ಹೆಚ್ಚು ಯಾರೂ ಕಮಾಯಿ ಮಾಡಬಾರದು, ಬೇರೆಯವರು ಮೇಲಕ್ಕೆ ಹೋಗುವುದನ್ನು ನೋಡುವುದು ಎಂದರೆ ಕಾಜೋಲ್​ಗೆ ಸಹಿಸಲು ಸಾಧ್ಯವಿಲ್ಲ, ಅಸೂಹೆಯಿಂದ ಹೀಗೆಲ್ಲಾ ಮಾತನಾಡುತ್ತಿದ್ದಾರೆ ಎಂದು ಶಾರುಖ್​ ಫ್ಯಾನ್ಸ್​ ಕಮೆಂಟ್​ ಮೂಲಕ ಕಿಡಿ ಕಾರುತ್ತಿದ್ದಾರೆ. ಮೇಲ್ನೋಟಕ್ಕೆ ಶಾರುಖ್​ ಖಾನ್ ಸ್ನೇಹಿತೆಯಂತೆ ನಟಿಸುವ ಕಾಜೋಲ್​ಗೆ ನಿಜವಾಗಿಯೂ ಅವರ ಮೇಲೆ ಅಸೂಯೆ ಇದೆ ಎಂದು ಕಮೆಂಟಿಗರು ಕೋಪ ವ್ಯಕ್ತಪಡಿಸುತ್ತಿದ್ದಾರೆ.