ಇದು ಭಾರತದ ಮೊದಲ ಇಂಜಿನ್ ರಹಿತ ರೈಲು; ಗಂಟೆಗೆ 183 km ವೇಗದಲ್ಲಿ ಚಲಿಸೋ ಮಾಯಾಜಿಂಕೆ

ನಮ್ಮಲ್ಲಿ ಹಲವರು ಒಮ್ಮೆಯಾದರೂ ರೈಲಿನಲ್ಲಿ ಪ್ರಯಾಣಿಸಿರಬಹುದು. ಬಸ್ ಪ್ರಯಾಣಕ್ಕಿಂತ ರೈಲು ಪ್ರಯಾಣವನ್ನೇ ಹಲವರು ಇಷ್ಟಪಡುತ್ತಾರೆ. ಆರಾಮದಾಯಕ ಪ್ರಯಾಣ, ಕಡಿಮೆ ಟಿಕೆಟ್ ದರಗಳು ಇದಕ್ಕೆ ಕೆಲವು ಕಾರಣಗಳಾಗಿರಬಹುದು. ಭಾರತೀಯ ರೈಲ್ವೆ ಪ್ರಯಾಣಿಕರ ಅನುಕೂಲಕ್ಕಾಗಿ ಹಲವು ರಿಯಾಯತಿಗಳನ್ನು ಘೋಷಿಸುತ್ತಿದೆ. ರಾಜಧಾನಿ, ಶತಾಬ್ದಿ, ದುರಂತೋ ಸೇರಿದಂತೆ ಹಲವು ರೀತಿಯ ರೈಲುಗಳು ದೇಶದಲ್ಲಿ ಓಡುತ್ತಿವೆ. ಆದರೆ ಇಂಜಿನ್ ಇಲ್ಲದ ರೈಲು ದೇಶದಲ್ಲಿ ಓಡುತ್ತಿದೆ ಎಂದು ನಿಮಗೆ ತಿಳಿದಿದೆಯೇ?

ಈ ರೈಲಿನಲ್ಲಿ ಇಂಜಿನ್ ಇಲ್ಲದಿದ್ದರೂ, ವೇಗದಲ್ಲಿ ಈ ರೈಲು ರಾಜಧಾನಿ, ಶತಾಬ್ದಿ ಎಕ್ಸ್‌ಪ್ರೆಸ್‌ಗಳಂತಹ ರೈಲುಗಳೊಂದಿಗೆ ಸ್ಪರ್ಧಿಸುತ್ತದೆ. ಪ್ರಾಯೋಗಿಕ ಓಟದಲ್ಲಿ ಇಂಜಿನ್ ರಹಿತ ರೈಲಿನ ವೇಗ ಗಂಟೆಗೆ 183 ಕಿ.ಮೀ. ಆದರೆ ಹಳಿಗಳ ಸಾಮರ್ಥ್ಯದ ಕಾರಣದಿಂದಾಗಿ ಈ ರೈಲಿನ ವೇಗವನ್ನು ಗಂಟೆಗೆ 160 ಕಿ.ಮೀ.ಗೆ ಸೀಮಿತಗೊಳಿಸಲಾಗಿದೆ.

ಇದು ಬೇರೇನೂ ಅಲ್ಲ, ವಂದೇ ಭಾರತ್ ರೈಲು. ಪ್ರಯಾಣಿಕರು ಈ ಅರೆ-ಅತಿವೇಗದ ರೈಲನ್ನು ತುಂಬಾ ಇಷ್ಟಪಡುತ್ತಾರೆ. ಇದಕ್ಕೂ ಮೊದಲು ನೀವು ಈ ರೈಲಿನಲ್ಲಿ ಪ್ರಯಾಣಿಸಿರಬಹುದು, ಆದರೆ ಈ ರೈಲಿನಲ್ಲಿ ಇಂಜಿನ್ ಇಲ್ಲ ಎಂದು ಹಲವರಿಗೆ ತಿಳಿದಿರುವುದಿಲ್ಲ. ಇಂಜಿನ್ ಇಲ್ಲದಿದ್ದರೆ ಅದು ಹೇಗೆ ಅತಿವೇಗದ ರೈಲು ಎಂಬ ಪ್ರಶ್ನೆ ಮನಸ್ಸಿನಲ್ಲಿ ಮೂಡುತ್ತದೆ.

ಈ ರೈಲು ಸಂಪೂರ್ಣವಾಗಿ ಸ್ವಯಂಚಾಲಿತವಾಗಿದೆ. ಚೆನ್ನೈನ ಇಂಟಿಗ್ರಲ್ ಕೋಚ್ ಫ್ಯಾಕ್ಟರಿ (ಐಸಿಎಫ್) ನಿರ್ಮಿಸಿದ ಈ ರೈಲು ದೇಶದ ಮೊದಲ ಇಂಜಿನ್ ರಹಿತ ರೈಲು ಅಂದರೆ 'ಟ್ರೈನ್ 18'. ವಂದೇ ಭಾರತ್ ಎಕ್ಸ್‌ಪ್ರೆಸ್ ರೈಲನ್ನು ರಾಜಧಾನಿ ಮತ್ತು ಶತಾಬ್ದಿ ರೈಲುಗಳ ಉತ್ತರಾಧಿಕಾರಿ ಎಂದು ಕರೆಯಲಾಗುತ್ತದೆ. ವೇಗ ಮತ್ತು ಸೌಲಭ್ಯಗಳ ವಿಷಯದಲ್ಲಿ ಈ ರೈಲು ಪ್ರಸ್ತುತ ದೇಶದಲ್ಲೇ ಅಗ್ರಸ್ಥಾನದಲ್ಲಿದೆ.

ವಂದೇ ಭಾರತ್ ಎಕ್ಸ್‌ಪ್ರೆಸ್ ಭಾರತದ ಮೊದಲ ಇಂಜಿನ್ ರಹಿತ ರೈಲು. ಇಲ್ಲಿಯವರೆಗೆ ಭಾರತೀಯ ರೈಲುಗಳಿಗೆ ಪ್ರತ್ಯೇಕ ಇಂಜಿನ್ ಕೋಚ್ ಇತ್ತು, ಅದನ್ನು ಬೋಗಿಗಳಿಗೆ ಜೋಡಿಸಲಾಗುತ್ತಿತ್ತು. ಆದರೆ ಈ ವಂದೇ ಭಾರತ್ ರೈಲಿನಲ್ಲಿ ಬುಲೆಟ್ ಅಥವಾ ಮೆಟ್ರೋ ರೈಲಿನಂತೆ ಅಂತರ್ನಿರ್ಮಿತ ಇಂಜಿನ್ ಇದೆ.

ಪ್ರತ್ಯೇಕ ಇಂಜಿನ್ ಇಲ್ಲದ ಕಾರಣ ಈ ರೈಲಿನ ವೇಗ ಹೆಚ್ಚು. ಇಂಜಿನ್ ರಹಿತ ವಿದ್ಯುತ್ ರೈಲನ್ನು ಚಲಾಯಿಸಲು ಇಡೀ ವ್ಯವಸ್ಥೆಯನ್ನು ರೈಲಿನ ಬೋಗಿಗಳಲ್ಲಿಯೇ ಅಳವಡಿಸಲಾಗಿದೆ. ಆದಾಗ್ಯೂ, ಅಗತ್ಯಕ್ಕೆ ತಕ್ಕಂತೆ ಇಬ್ಬರು ಇಂಜಿನ್ ಪೈಲಟ್‌ಗಳು ರೈಲಿನಲ್ಲಿದ್ದಾರೆ.

ಈ ರೈಲು ಸಂಪೂರ್ಣವಾಗಿ ಮೇಕ್ ಇನ್ ಇಂಡಿಯಾ ಯೋಜನೆಯಡಿಯಲ್ಲಿ ನಿರ್ಮಾಣವಾದ ರೈಲು. ಇದರ ಗರಿಷ್ಠ ವೇಗ ಗಂಟೆಗೆ 180 ಕಿ.ಮೀ. ಆದರೆ ಪ್ರಸ್ತುತ ಸುರಕ್ಷತಾ ಕಾರಣಗಳಿಗಾಗಿ ರೈಲನ್ನು 130 ಕಿ.ಮೀ. ವೇಗದಲ್ಲಿ ಚಲಾಯಿಸಲಾಗುತ್ತಿದೆ. ಹೆಚ್ಚಿನ ವೇಗದಿಂದಾಗಿ ಈ ರೈಲಿನಲ್ಲಿ ಪ್ರಯಾಣಿಸಲು ತೆಗೆದುಕೊಳ್ಳುವ ಸಮಯ ಸುಮಾರು ಶೇ.15ರಷ್ಟು ಕಡಿಮೆಯಾಗುತ್ತದೆ ಎಂಬುದು ಗಮನಾರ್ಹ.