ಸುದೀಪ್​ ಕೊನೆಯ ಬಿಗ್​ಬಾಸ್​ನಲ್ಲಿ ಕಣ್ಣೀರ ಕೋಡಿ! ಆ ದನಿ ಕೇಳಿ ಕಣ್ಣೀರಾದ ಕಿಚ್ಚನ ಅಪ್ಪ-ಮಗಳು

ಕಿಚ್ಚ ಸುದೀಪ್‌ ಅವರ ಕೊನೆಯ ಬಿಗ್‌ಬಾಸ್‌ ಸೀಸನ್‌ ಎಂಬ ಭಾವುಕತೆಯ ನಡುವೆ ಹನುಮಂತ ವೈಲ್ಡ್‌ಕಾರ್ಡ್‌ ಮೂಲಕ ಬಂದು ಗೆದ್ದ ಮೊದಲ ಸ್ಪರ್ಧಿ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು. ಸುದೀಪ್ ತಾಯಿ ಮೃತಪಟ್ಟ ದುಃಖದ ನಡುವೆಯೂ ಷೋ ನಿರ್ವಹಿಸಿದರು. ತಂದೆ-ಮಗಳ ಆಗಮನದೊಂದಿಗೆ ಸೀಸನ್‌ ಭಾವನಾತ್ಮಕ ಕ್ಷಣಗಳಿಗೆ ಸಾಕ್ಷಿಯಾಯಿತು.

ಬಿಗ್​ಬಾಸ್​ ಕನ್ನಡ 11ನೇ ಸೀಸನ್​ ಹಲವಾರು ಕಾರಣಗಳಿಂದ ವಿಭಿನ್ನ ಎನಿಸಿಕೊಂಡಿದೆ. ಉಳಿದ ಸೀಸನ್​ಗಳಿಗಿಂತ ಭಿನ್ನವಾದ ಕಾನ್ಸೆಪ್ಟ್​ ಸ್ವರ್ಗ-ನರಕದ ಮೂಲಕ ಸೀಸನ್​ ಶುರುವಾಗಿತ್ತು. ಆದರೆ ಕೊನೆಗೆ ಈ ಕಾನ್ಸೆಪ್ಟ್​ ವಿರುದ್ಧ ಅಪಸ್ವರ ಬಂದಿದ್ದರಿಂದ ಅದನ್ನು ಬದಲಾಯಿಸಲಾಗಿತ್ತು. ಇದರ ಹೊರತಾಗಿಯೂ ಈ ಸೀಸನ್​ ಉಳಿದ ಸೀಸನ್​ಗಳಿಗಿಂತ ಬೇರೆ ಬೇರೆ ರೀತಿಯಲ್ಲಿ ವಿಭಿನ್ನ ಎನಿಸಿಕೊಂಡಿತು. ಆದರೆ ಎಲ್ಲಕ್ಕಿಂತಲೂ ಮುಖ್ಯವಾಗಿ ಬಿಗ್​ಬಾಸ್​​ 11 ಎಲ್ಲರ ಮನದಲ್ಲಿ ಅಚ್ಚಳಿಯದೇ ಉಳಿಯಲು ಕಾರಣಾಗಿರುವುದು ಇದು ಕಿಚ್ಚ ಸುದೀಪ್​ ಅವರ ಕೊನೆಯ ಷೋ ಎನ್ನುವ ಕಾರಣಕ್ಕೆ. ಮುಂದಿನ ಷೋನಲ್ಲಿ ಸುದೀಪ್​ ಅವರು ತಾವು ಹೋಸ್ಟ್​ ಮಾಡುವುದಿಲ್ಲ ಎಂದು ಸ್ಪಷ್ಟಪಡಿಸಿದ್ದರೂ, ಈ ಬಗ್ಗೆ ಇನ್ನೂ ಬೇರೆ ಬೇರೆ ರೀತಿಯ ಸುದ್ದಿಗಳು ಸದ್ದು ಮಾಡುತ್ತಲೇ ಇವೆ. ಆದರೂ ಸದ್ಯದ ಮಟ್ಟಿಗೆ ನೋಡುವುದಾದರೆ, ಇದು ಸುದೀಪ್​ ಅವರ ಕೊನೆಯ ಬಿಗ್​ಬಾಸ್​ ಷೋ ಎನ್ನಿಸಿಕೊಂಡಿದೆ. ಆದ್ದರಿಂದ ಅವರ ಅಸಂಖ್ಯ ಅಭಿಮಾನಿಗಳಿಗೆ ಇದು ನಿರಾಸೆಯುಂಟುಮಾಡಿದೆ. ಸುದೀಪ್​ ಅವರು ಇಲ್ಲದ ಬಿಗ್​ಬಾಸ್​ ಊಹಿಸಿಕೊಳ್ಳುವುದೂ ಕಷ್ಟ ಎನ್ನುವುದು ಎಲ್ಲರ ಅಭಿಮತ. 

ಅದೇ ಇನ್ನೊಂದೆಡೆ, ಇದೇ ಮೊದಲ ಬಾರಿಗೆ ವೈಲ್ಡ್​ಕಾರ್ಡ್​ ಮೂಲಕ ಎಂಟ್ರಿ ಕೊಟ್ಟ ಸ್ಪರ್ಧಿ ಬಿಗ್​ಬಾಸ್​​ ಟ್ರೋಫಿ ಗೆದ್ದಿರುವುದು. ಹನುಮಂತ ಇವರು ವೈಲ್ಡ್​ಕಾರ್ಡ್​ ಮೂಲಕ ಎಂಟ್ರಿ ಕೊಟ್ಟವರು. ಪ್ರತಿ ಬಾರಿಯೂ ಬಿಗ್​ಬಾಸ್​​ನಲ್ಲಿ ವಿನ್​ ಯಾರು ಆಗಬೇಕು ಎನ್ನುವ ಬಗ್ಗೆ ಹಲವರ ಹೆಸರು ಕೇಳಿಬಂದರೂ, ಈ ಸಲ ಮಾತ್ರ ಬಹುತೇಕರು ಮೊದಲಿನಿಂದಲೂ ಹನುಮಂತ ಅವರ ಹೆಸರನ್ನೇ ಹೇಳುತ್ತಿದ್ದುದು ಕೂಡ ವಿಶೇಷ. ಹೀಗೆ ಹಲವು ರೀತಿಯಲ್ಲಿ ಬಿಗ್​ಬಾಸ್​ ವಿಶೇಷ ಎನ್ನಿಸಿಕೊಂಡ ನಡುವೆಯೇ, ಈ ಸೀಸನ್​ನಲ್ಲಿ ನಡೆದ ಬಹುದೊಡ್ಡ ದುರಂತ ಎಂದರೆ ಸುದೀಪ್​ ಅವರು ತಮ್ಮ ತಾಯಿಯನ್ನು ಕಳೆದುಕೊಂಡದ್ದು. ಇಷ್ಟಾದರೂ ಅಂತಿಮ ವಿಧಿ ವಿಧಾನಗಳನ್ನು ನೆರವೇರಿಸಿದ ಬಳಿಕ ಸುದೀಪ್​ ಅವರು ಬಿಗ್​ಬಾಸ್​​ಗೆ ಮತ್ತೆ ಮರಳಿದ್ದರು.

ಆದರೆ ತಾಯಿ ಮತ್ತು ತಂದೆಯ ಮೇಲೆ ಅಪಾರ ಪ್ರೀತಿ ಇರಿಸಿಕೊಂಡವರು ಸುದೀಪ್​. ಬಿಗ್​ಬಾಸ್​​ನ ಫಿನಾಲೆಗೆ ಸುದೀಪ್​ ಅವರ ಅಪ್ಪ ಸಂಜೀವ್​ ಹಾಗೂ ಮಗಳು ಸಾನ್ವಿ ಕೂಡ ಬಂದಿದ್ದರು. ಇದೇ ವೇಳೆ ಸುದೀಪ್​ ಅವರ ತಾಯಿಯ ದನಿಯಲ್ಲಿ, ಮಗನಿಗೆ ಸಮಾಧಾನ ಮಾಡಿರುವ ಆಡಿಯೋ ಶೇರ್​ ಮಾಡಲಾಯಿತು. ಮಗನೇ ನಾನಿಲ್ಲ ಎಂದು ಬೇಸರ ಪಡಬೇಡ ಎನ್ನುವ ದನಿ ಅದು. ಅದನ್ನು ಕೇಳುತ್ತಿದ್ದಂತೆಯೇ ಸುದೀಪ್​ ಅವರ ತಂದೆ, ಮಗಳು ಸಾನ್ವಿ ಕಣ್ಣೀರಾದರು. ಸುದೀಪ್​ ಅವರು ಉಕ್ಕಿ ಬರುತ್ತಿದ್ದ ಕಣ್ಣೀರನ್ನು ತಡೆಹಿಡಿದುಕೊಳ್ಳುವ ಪ್ರಯತ್ನ ಮಾಡಿರುವುದನ್ನು ಈಗ ಕಲರ್ಸ್​ ಕನ್ನಡ ವಾಹಿನಿ ಶೇರ್​ ಮಾಡಿರುವ ವಿಡಿಯೋದಲ್ಲಿ ನೋಡಬಹುದು.

ಈ ಬಾರಿಯ ಸೀಸನ್​ ಇನ್ನೂ ವಿಶೇಷ ಕಳೆ ಕಟ್ಟಿದ್ದು, ಸುದೀಪ್​ ಅವರ ತಂದೆ ಮತ್ತು ಮಗಳು ವೇದಿಕೆಯ ಮೇಲೆ ಬಂದಿರುವ ಕಾರಣಕ್ಕೆ. ಸಂಜೀವ್​ ಅವರು  ಇದೇ ಮೊದಲ ಬಾರಿಗೆ ಬಿಗ್ ಬಾಸ್ ವೇದಿಕೆ ಏರಿದರು.  ತಂದೆ ವೇದಿಕೆಯ ಮೇಲೆ ಬಂದಾಗ ಸುದೀಪ್​ ಅವರ ಬಳಿ ಕ್ಷಮೆ ಕೂಡ ಕೇಳಿದರು.  ಅದಕ್ಕೆ ಕಾರಣ ಏನೆಂದರೆ,  ಸಿನಿಮಾ ಶೂಟಿಂಗ್​ನಲ್ಲಿ ಬ್ಯುಸಿ ಇರುವಾಗ ಬೇರೆ ಬೇರೆ ರಾಜ್ಯ, ಊರು, ದೇಶಗಳಿಗೆ ಹೋಗುವ ಸಮಯದಲ್ಲಿ ಎಷ್ಟೋ ಬಾರಿ ಅಮ್ಮ-ಅಪ್ಪನ ಕಾಳಜಿ ಮಾಡಲು ಆಗುವುದಿಲ್ಲ. ಹಾಗೆ ತಮ್ಮಿಂದಲೂ ಆಗಿರುವ ಕಾರಣ ಕ್ಷಮೆ ಕೋರಿದರು. ಆದರೆ ಸಾಧ್ಯವಾದಾಗಲೆಲ್ಲಾ ಏನೇ ಬಿಜಿ ಇದ್ದರೂ ಅಪ್ಪ-ಅಮ್ಮನ ಆಶೀರ್ವಾದ ಪಡೆದೇ ತಾವು ಶೂಟಿಂಗ್​ಗೆ ಹೋಗುತ್ತಿರುವ ಬಗ್ಗೆ ಇದಾಗಲೇ ಸುದೀಪ್​ ಹೇಳಿದ್ದಾರೆ. ಆದರೆ ಎಲ್ಲಾ ಸಮಯಗಳು ಹಾಗೆ ಇರುವುದಿಲ್ಲ. ಆದ್ದರಿಂದ ವೇದಿಕೆ ಮೇಲೆ ಅಪ್ಪನ ಕ್ಷಮೆ ಕೋರಿದರು ಸುದೀಪ್​.